೪೯೯. ಸಿವಿಜಾತಕಂ (೩)

೫೨. ದೂರೇ ಅಪಸ್ಸಂ ಥೇರೋವ, ಚಕ್ಖುಂ ಯಾಚಿತುಮಾಗತೋ;

ಏಕನೇತ್ತಾ ಭವಿಸ್ಸಾಮ, ಚಕ್ಖುಂ ಮೇ ದೇಹಿ ಯಾಚಿತೋ.

೫೩. ಕೇನಾನುಸಿಟ್ಠೋ ಇಧ ಮಾಗತೋಸಿ, ವನಿಬ್ಬಕ [ವಣಿಬ್ಬಕ (ಸೀ.)] ಚಕ್ಖುಪಥಾನಿ ಯಾಚಿತುಂ;

ಸುದುಚ್ಚಜಂ ಯಾಚಸಿ ಉತ್ತಮಙ್ಗಂ, ಯಮಾಹು ನೇತ್ತಂ ಪುರಿಸೇನ ದುಚ್ಚಜಂ.

೫೪. ಯಮಾಹು ದೇವೇಸು ಸುಜಮ್ಪತೀತಿ, ಮಘವಾತಿ ನಂ ಆಹು ಮನುಸ್ಸಲೋಕೇ;

ತೇನಾನುಸಿಟ್ಠೋ ಇಧ ಮಾಗತೋಸ್ಮಿ, ವನಿಬ್ಬಕೋ ಚಕ್ಖುಪಥಾನಿ ಯಾಚಿತುಂ.

೫೫. ವನಿಬ್ಬತೋ [ವನಿಬ್ಬಕೋ (ಸ್ಯಾ. ಪೀ.)] ಮಯ್ಹ ವನಿಂ [ವನಂ (ಕ.), ವಣಿಂ (ಸೀ. ಸ್ಯಾ. ಪೀ.)] ಅನುತ್ತರಂ, ದದಾಹಿ ತೇ ಚಕ್ಖುಪಥಾನಿ ಯಾಚಿತೋ;

ದದಾಹಿ ಮೇ ಚಕ್ಖುಪಥಂ ಅನುತ್ತರಂ, ಯಮಾಹು ನೇತ್ತಂ ಪುರಿಸೇನ ದುಚ್ಚಜಂ.

೫೬. ಯೇನ ಅತ್ಥೇನ ಆಗಚ್ಛಿ [ಆಗಞ್ಛಿ (ಸೀ. ಪೀ.)], ಯಮತ್ಥಮಭಿಪತ್ಥಯಂ;

ತೇ ತೇ ಇಜ್ಝನ್ತು ಸಙ್ಕಪ್ಪಾ, ಲಭ ಚಕ್ಖೂನಿ ಬ್ರಾಹ್ಮಣ.

೫೭. ಏಕಂ ತೇ ಯಾಚಮಾನಸ್ಸ, ಉಭಯಾನಿ ದದಾಮಹಂ;

ಸ ಚಕ್ಖುಮಾ ಗಚ್ಛ ಜನಸ್ಸ ಪೇಕ್ಖತೋ, ಯದಿಚ್ಛಸೇ ತ್ವಂ ತದತೇ ಸಮಿಜ್ಝತು.

೫೮. ಮಾ ನೋ ದೇವ ಅದಾ ಚಕ್ಖುಂ, ಮಾ ನೋ ಸಬ್ಬೇ ಪರಾಕರಿ [ಪರಕ್ಕರಿ (ಸ್ಯಾ. ಕ. ಅಟ್ಠ.), ಪರಿಕ್ಕರಿ (ಕ.) ಪರಿ + ಆ + ಕರಿ = ಪರಾಕರಿ];

ಧನಂ ದೇಹಿ ಮಹಾರಾಜ, ಮುತ್ತಾ ವೇಳುರಿಯಾ ಬಹೂ.

೫೯. ಯುತ್ತೇ ದೇವ ರಥೇ ದೇಹಿ, ಆಜಾನೀಯೇ ಚಲಙ್ಕತೇ;

ನಾಗೇ ದೇಹಿ ಮಹಾರಾಜ, ಹೇಮಕಪ್ಪನವಾಸಸೇ.

೬೦. ಯಥಾ ತಂ ಸಿವಯೋ [ಸೀವಿಯೋ (ಸ್ಯಾ.)] ಸಬ್ಬೇ, ಸಯೋಗ್ಗಾ ಸರಥಾ ಸದಾ;

ಸಮನ್ತಾ ಪರಿಕಿರೇಯ್ಯುಂ [ಪರಿಕರೇಯ್ಯುಂ (ಸ್ಯಾ. ಪೀ.)], ಏವಂ ದೇಹಿ ರಥೇಸಭ.

೬೧. ಯೋ ವೇ ದಸ್ಸನ್ತಿ ವತ್ವಾನ, ಅದಾನೇ ಕುರುತೇ ಮನೋ;

ಭೂಮ್ಯಂ [ಭೂಮ್ಯಾ (ಸೀ. ಪೀ.)] ಸೋ ಪತಿತಂ ಪಾಸಂ, ಗೀವಾಯಂ ಪಟಿಮುಞ್ಚತಿ.

೬೨. ಯೋ ವೇ ದಸ್ಸನ್ತಿ ವತ್ವಾನ, ಅದಾನೇ ಕುರುತೇ ಮನೋ;

ಪಾಪಾ ಪಾಪತರೋ ಹೋತಿ, ಸಮ್ಪತ್ತೋ ಯಮಸಾಧನಂ.

೬೩. ಯಞ್ಹಿ ಯಾಚೇ ತಞ್ಹಿ ದದೇ, ಯಂ ನ ಯಾಚೇ ನ ತಂ ದದೇ;

ಸ್ವಾಹಂ ತಮೇವ ದಸ್ಸಾಮಿ, ಯಂ ಮಂ ಯಾಚತಿ ಬ್ರಾಹ್ಮಣೋ.

೬೪. ಆಯುಂ ನು ವಣ್ಣಂ ನು ಸುಖಂ ಬಲಂ ನು, ಕಿಂ ಪತ್ಥಯಾನೋ ನು ಜನಿನ್ದ ದೇಸಿ;

ಕಥಞ್ಹಿ ರಾಜಾ ಸಿವಿನಂ ಅನುತ್ತರೋ, ಚಕ್ಖೂನಿ ದಜ್ಜಾ ಪರಲೋಕಹೇತು.

೬೫. ನ ವಾಹಮೇತಂ ಯಸಸಾ ದದಾಮಿ, ನ ಪುತ್ತಮಿಚ್ಛೇ ನ ಧನಂ ನ ರಟ್ಠಂ;

ಸತಞ್ಚ ಧಮ್ಮೋ ಚರಿತೋ ಪುರಾಣೋ, ಇಚ್ಚೇವ ದಾನೇ ರಮತೇ ಮನೋ ಮಮ [ಮಮಂ (ಸೀ. ಪೀ.)].

೬೬. ಸಖಾ ಚ ಮಿತ್ತೋ ಚ ಮಮಾಸಿ ಸೀವಿಕ [ಸೀವಕ (ಸೀ. ಪೀ.)], ಸುಸಿಕ್ಖಿತೋ ಸಾಧು ಕರೋಹಿ ಮೇ ವಚೋ;

ಉದ್ಧರಿತ್ವಾ [ಉದ್ಧತ್ವ (ಸೀ.), ಲದ್ಧ ತ್ವಂ (ಪೀ.)] ಚಕ್ಖೂನಿ ಮಮಂ ಜಿಗೀಸತೋ, ಹತ್ಥೇಸು ಠಪೇಹಿ [ಆವೇಸಿ (ಸೀ.)] ವನಿಬ್ಬಕಸ್ಸ.

೬೭. ಚೋದಿತೋ ಸಿವಿರಾಜೇನ, ಸಿವಿಕೋ ವಚನಙ್ಕರೋ;

ರಞ್ಞೋ ಚಕ್ಖೂನುದ್ಧರಿತ್ವಾ [ಚಕ್ಖೂನಿ ಉದ್ಧತ್ವಾ (ಸೀ. ಪೀ.)], ಬ್ರಾಹ್ಮಣಸ್ಸೂಪನಾಮಯಿ;

ಸಚಕ್ಖು ಬ್ರಾಹ್ಮಣೋ ಆಸಿ, ಅನ್ಧೋ ರಾಜಾ ಉಪಾವಿಸಿ.

೬೮. ತತೋ ಸೋ ಕತಿಪಾಹಸ್ಸ, ಉಪರೂಳ್ಹೇಸು ಚಕ್ಖುಸು;

ಸೂತಂ ಆಮನ್ತಯೀ ರಾಜಾ, ಸಿವೀನಂ ರಟ್ಠವಡ್ಢನೋ.

೬೯. ಯೋಜೇಹಿ ಸಾರಥಿ ಯಾನಂ, ಯುತ್ತಞ್ಚ ಪಟಿವೇದಯ;

ಉಯ್ಯಾನಭೂಮಿಂ ಗಚ್ಛಾಮ, ಪೋಕ್ಖರಞ್ಞೋ ವನಾನಿ ಚ.

೭೦. ಸೋ ಚ ಪೋಕ್ಖರಣೀತೀರೇ [ಪೋಕ್ಖರಣಿಯಾ ತೀರೇ (ಸೀ. ಪೀ.)], ಪಲ್ಲಙ್ಕೇನ ಉಪಾವಿಸಿ;

ತಸ್ಸ ಸಕ್ಕೋ ಪಾತುರಹು, ದೇವರಾಜಾ ಸುಜಮ್ಪತಿ.

೭೧. ಸಕ್ಕೋಹಮಸ್ಮಿ ದೇವಿನ್ದೋ, ಆಗತೋಸ್ಮಿ ತವನ್ತಿಕೇ;

ವರಂ ವರಸ್ಸು ರಾಜೀಸಿ, ಯಂ ಕಿಞ್ಚಿ ಮನಸಿಚ್ಛಸಿ.

೭೨. ಪಹೂತಂ ಮೇ ಧನಂ ಸಕ್ಕ, ಬಲಂ ಕೋಸೋ ಚನಪ್ಪಕೋ;

ಅನ್ಧಸ್ಸ ಮೇ ಸತೋ ದಾನಿ, ಮರಣಞ್ಞೇವ ರುಚ್ಚತಿ.

೭೩. ಯಾನಿ ಸಚ್ಚಾನಿ ದ್ವಿಪದಿನ್ದ, ತಾನಿ ಭಾಸಸ್ಸು ಖತ್ತಿಯ;

ಸಚ್ಚಂ ತೇ ಭಣಮಾನಸ್ಸ, ಪುನ ಚಕ್ಖು ಭವಿಸ್ಸತಿ.

೭೪. ಯೇ ಮಂ ಯಾಚಿತುಮಾಯನ್ತಿ, ನಾನಾಗೋತ್ತಾ ವನಿಬ್ಬಕಾ;

ಯೋಪಿ ಮಂ ಯಾಚತೇ ತತ್ಥ, ಸೋಪಿ ಮೇ ಮನಸೋ ಪಿಯೋ;

ಏತೇನ ಸಚ್ಚವಜ್ಜೇನ, ಚಕ್ಖು ಮೇ ಉಪಪಜ್ಜಥ.

೭೫. ಯಂ ಮಂ ಸೋ ಯಾಚಿತುಂ ಆಗಾ, ದೇಹಿ ಚಕ್ಖುನ್ತಿ ಬ್ರಾಹ್ಮಣೋ;

ತಸ್ಸ ಚಕ್ಖೂನಿ ಪಾದಾಸಿಂ, ಬ್ರಾಹ್ಮಣಸ್ಸ ವನಿಬ್ಬತೋ [ವಣಿಬ್ಬಿನೋ (ಸೀ.), ವನಿಬ್ಬಿನೋ (ಪೀ.)].

೭೬. ಭಿಯ್ಯೋ ಮಂ ಆವಿಸೀ ಪೀತಿ, ಸೋಮನಸ್ಸಞ್ಚನಪ್ಪಕಂ;

ಏತೇನ ಸಚ್ಚವಜ್ಜೇನ, ದುತಿಯಂ ಮೇ ಉಪಪಜ್ಜಥ.

೭೭. ಧಮ್ಮೇನ ಭಾಸಿತಾ ಗಾಥಾ, ಸಿವೀನಂ ರಟ್ಠವಡ್ಢನ;

ಏತಾನಿ ತವ ನೇತ್ತಾನಿ, ದಿಬ್ಬಾನಿ ಪಟಿದಿಸ್ಸರೇ.

೭೮. ತಿರೋಕುಟ್ಟಂ ತಿರೋಸೇಲಂ, ಸಮತಿಗ್ಗಯ್ಹ ಪಬ್ಬತಂ;

ಸಮನ್ತಾ ಯೋಜನಸತಂ, ದಸ್ಸನಂ ಅನುಭೋನ್ತು ತೇ.

೭೯. ಕೋ ನೀಧ ವಿತ್ತಂ ನ ದದೇಯ್ಯ ಯಾಚಿತೋ, ಅಪಿ ವಿಸಿಟ್ಠಂ ಸುಪಿಯಮ್ಪಿ ಅತ್ತನೋ;

ತದಿಙ್ಘ ಸಬ್ಬೇ ಸಿವಯೋ ಸಮಾಗತಾ, ದಿಬ್ಬಾನಿ ನೇತ್ತಾನಿ ಮಮಜ್ಜ ಪಸ್ಸಥ.

೮೦. ತಿರೋಕುಟ್ಟಂ ತಿರೋಸೇಲಂ, ಸಮತಿಗ್ಗಯ್ಹ ಪಬ್ಬತಂ;

ಸಮನ್ತಾ ಯೋಜನಸತಂ, ದಸ್ಸನಂ ಅನುಭೋನ್ತಿ ಮೇ.

೮೧. ನ ಚಾಗಮತ್ತಾ ಪರಮತ್ಥಿ ಕಿಞ್ಚಿ, ಮಚ್ಚಾನಂ ಇಧ ಜೀವಿತೇ;

ದತ್ವಾನ ಮಾನುಸಂ [ದತ್ವಾ ಮಾನುಸಕಂ (ಸೀ.)] ಚಕ್ಖುಂ, ಲದ್ಧಂ ಮೇ [ಮೇ ಇತಿ ಪದಂ ನತ್ಥಿ ಸೀ. ಪೋತ್ಥಕೇ] ಚಕ್ಖುಂ ಅಮಾನುಸಂ.

೮೨. ಏತಮ್ಪಿ ದಿಸ್ವಾ ಸಿವಯೋ, ದೇಥ ದಾನಾನಿ ಭುಞ್ಜಥ;

ದತ್ವಾ ಚ ಭುತ್ವಾ ಚ ಯಥಾನುಭಾವಂ, ಅನಿನ್ದಿತಾ ಸಗ್ಗಮುಪೇಥ ಠಾನನ್ತಿ.

ಸಿವಿಜಾತಕಂ ತತಿಯಂ.