೪೯೬. ಭಿಕ್ಖಾಪರಮ್ಪರಜಾತಕಂ (೧೩)

೨೭೦. ಸುಖುಮಾಲರೂಪಂ ದಿಸ್ವಾ [ದಿಸ್ವಾನ (ಕ. ಸೀ. ಅಟ್ಠ.)], ರಟ್ಠಾ ವಿವನಮಾಗತಂ;

ಕೂಟಾಗಾರವರೂಪೇತಂ, ಮಹಾಸಯನಮುಪಾಸಿತಂ [ಮುಪೋಚಿತಂ (ಬಹೂಸು)].

೨೭೧. ತಸ್ಸ ತೇ ಪೇಮಕೇನಾಹಂ, ಅದಾಸಿಂ ವಡ್ಢಮೋದನಂ [ಬದ್ಧಮೋದನಂ (ಸೀ. ಪೀ.)];

ಸಾಲೀನಂ ವಿಚಿತಂ ಭತ್ತಂ, ಸುಚಿಂ ಮಂಸೂಪಸೇಚನಂ.

೨೭೨. ತಂ ತ್ವಂ ಭತ್ತಂ ಪಟಿಗ್ಗಯ್ಹ, ಬ್ರಾಹ್ಮಣಸ್ಸ ಅದಾಸಯಿ [ಅದಾಪಯಿ (ಸೀ. ಸ್ಯಾ. ಪೀ.)];

ಅತ್ತಾನಂ [ಅತ್ತನಾ (ಪೀ. ಅಟ್ಠ. ಪಾಠನ್ತರಂ)] ಅನಸಿತ್ವಾನ, ಕೋಯಂ ಧಮ್ಮೋ ನಮತ್ಥು ತೇ.

೨೭೩. ಆಚರಿಯೋ ಬ್ರಾಹ್ಮಣೋ ಮಯ್ಹಂ, ಕಿಚ್ಚಾಕಿಚ್ಚೇಸು ಬ್ಯಾವಟೋ [ವಾವಟೋ (ಕ.)];

ಗರು ಚ ಆಮನ್ತನೀಯೋ [ಆಮನ್ತಣೀಯೋ (ಸೀ. ಪೀ.)] ಚ, ದಾತುಮರಹಾಮಿ ಭೋಜನಂ.

೨೭೪. ಬ್ರಾಹ್ಮಣಂ ದಾನಿ ಪುಚ್ಛಾಮಿ, ಗೋತಮಂ ರಾಜಪೂಜಿತಂ;

ರಾಜಾ ತೇ ಭತ್ತಂ ಪಾದಾಸಿ, ಸುಚಿಂ ಮಂಸೂಪಸೇಚನಂ.

೨೭೫. ತಂ ತ್ವಂ ಭತ್ತಂ ಪಟಿಗ್ಗಯ್ಹ, ಇಸಿಸ್ಸ ಭೋಜನಂ ಅದಾ;

ಅಖೇತ್ತಞ್ಞೂಸಿ ದಾನಸ್ಸ, ಕೋಯಂ ಧಮ್ಮೋ ನಮತ್ಥು ತೇ.

೨೭೬. ಭರಾಮಿ ಪುತ್ತ [ಪುತ್ತೇ (ಸೀ. ಪೀ.)] ದಾರೇ ಚ, ಘರೇಸು ಗಧಿತೋ [ಗಥಿತೋ (ಸೀ. ಪೀ.)] ಅಹಂ;

ಭುಞ್ಜೇ ಮಾನುಸಕೇ ಕಾಮೇ, ಅನುಸಾಸಾಮಿ ರಾಜಿನೋ.

೨೭೭. ಆರಞ್ಞಿಕಸ್ಸ [ಆರಞ್ಞಕಸ್ಸ (ಸೀ. ಪೀ.)] ಇಸಿನೋ, ಚಿರರತ್ತಂ ತಪಸ್ಸಿನೋ;

ವುಡ್ಢಸ್ಸ ಭಾವಿತತ್ತಸ್ಸ, ದಾತುಮರಹಾಮಿ ಭೋಜನಂ.

೨೭೮. ಇಸಿಞ್ಚ ದಾನಿ ಪುಚ್ಛಾಮಿ, ಕಿಸಂ ಧಮನಿಸನ್ಥತಂ;

ಪರೂಳ್ಹಕಚ್ಛನಖಲೋಮಂ, ಪಙ್ಕದನ್ತಂ ರಜಸ್ಸಿರಂ.

೨೭೯. ಏಕೋ ಅರಞ್ಞೇ ವಿಹರಸಿ [ವಿಹಾಸಿ (ಕ.)], ನಾವಕಙ್ಖಸಿ ಜೀವಿತಂ;

ಭಿಕ್ಖು ಕೇನ ತಯಾ ಸೇಯ್ಯೋ, ಯಸ್ಸ ತ್ವಂ ಭೋಜನಂ ಅದಾ.

೨೮೦. ಖಣನ್ತಾಲುಕಲಮ್ಬಾನಿ [ಖಣಮಾಲುಕಲಮ್ಬಾನಿ (ಸ್ಯಾ. ಕ.)], ಬಿಲಾಲಿತಕ್ಕಲಾನಿ ಚ [ಬಿಳಾಲಿತಕ್ಕಳಾನಿ ಚ (ಸೀ. ಪೀ.)];

ಧುನಂ ಸಾಮಾಕನೀವಾರಂ, ಸಙ್ಘಾರಿಯಂ ಪಸಾರಿಯಂ [ಸಂಹಾರಿಯಂ ಪಹಾರಿಯಂ (ಸ್ಯಾ.), ಸಂಸಾರಿಯಂ ಪಸಾರಿಯಂ (ಕ.)].

೨೮೧. ಸಾಕಂ ಭಿಸಂ ಮಧುಂ ಮಂಸಂ, ಬದರಾಮಲಕಾನಿ ಚ;

ತಾನಿ ಆಹರಿತ್ವಾ [ಆಹತ್ವ (ಸೀ. ಸ್ಯಾ.)] ಭುಞ್ಜಾಮಿ, ಅತ್ಥಿ ಮೇ ಸೋ ಪರಿಗ್ಗಹೋ.

೨೮೨. ಪಚನ್ತೋ ಅಪಚನ್ತಸ್ಸ, ಅಮಮಸ್ಸ ಸಕಿಞ್ಚನೋ [ಅಕಿಞ್ಚನೋ (ಕ.)];

ಅನಾದಾನಸ್ಸ ಸಾದಾನೋ, ದಾತುಮರಹಾಮಿ ಭೋಜನಂ.

೨೮೩. ಭಿಕ್ಖುಞ್ಚ ದಾನಿ ಪುಚ್ಛಾಮಿ, ತುಣ್ಹೀಮಾಸೀನ ಸುಬ್ಬತಂ;

ಇಸಿ ತೇ ಭತ್ತಂ ಪಾದಾಸಿ, ಸುಚಿಂ ಮಂಸೂಪಸೇಚನಂ.

೨೮೪. ತಂ ತ್ವಂ ಭತ್ತಂ ಪಟಿಗ್ಗಯ್ಹ, ತುಣ್ಹೀ ಭುಞ್ಜಸಿ ಏಕಕೋ;

ನಾಞ್ಞಂ ಕಞ್ಚಿ [ಕಿಞ್ಚಿ (ಕ.)] ನಿಮನ್ತೇಸಿ, ಕೋಯಂ ಧಮ್ಮೋ ನಮತ್ಥು ತೇ.

೨೮೫. ನ ಪಚಾಮಿ ನ ಪಾಚೇಮಿ, ನ ಛಿನ್ದಾಮಿ ನ ಛೇದಯೇ;

ತಂ ಮಂ ಅಕಿಞ್ಚನಂ ಞತ್ವಾ, ಸಬ್ಬಪಾಪೇಹಿ ಆರತಂ.

೨೮೬. ವಾಮೇನ ಭಿಕ್ಖಮಾದಾಯ, ದಕ್ಖಿಣೇನ ಕಮಣ್ಡಲುಂ;

ಇಸಿ ಮೇ ಭತ್ತಂ ಪಾದಾಸಿ, ಸುಚಿಂ ಮಂಸೂಪಸೇಚನಂ.

೨೮೭. ಏತೇ ಹಿ ದಾತುಮರಹನ್ತಿ, ಸಮಮಾ ಸಪರಿಗ್ಗಹಾ;

ಪಚ್ಚನೀಕಮಹಂ ಮಞ್ಞೇ, ಯೋ ದಾತಾರಂ ನಿಮನ್ತಯೇ.

೨೮೮. ಅತ್ಥಾಯ ವತ ಮೇ ಅಜ್ಜ, ಇಧಾಗಚ್ಛಿ ರಥೇಸಭೋ;

ಸೋಹಂ ಅಜ್ಜ ಪಜಾನಾಮಿ [ಇತೋ ಪುಬ್ಬೇ ನ ಜಾನಾಮಿ (ಸೀ. ಪೀ.)], ಯತ್ಥ ದಿನ್ನಂ ಮಹಪ್ಫಲಂ.

೨೮೯. ರಟ್ಠೇಸು ಗಿದ್ಧಾ ರಾಜಾನೋ, ಕಿಚ್ಚಾಕಿಚ್ಚೇಸು ಬ್ರಾಹ್ಮಣಾ;

ಇಸೀ ಮೂಲಫಲೇ ಗಿದ್ಧಾ, ವಿಪ್ಪಮುತ್ತಾ ಚ ಭಿಕ್ಖವೋತಿ.

ಭಿಕ್ಖಾಪರಮ್ಪರಜಾತಕಂ ತೇರಸಮಂ.

ತಸ್ಸುದ್ದಾನಂ –

ಸುವ ಕಿನ್ನರ ಮುಕ್ಕ ಖರಾಜಿನಸೋ, ಭಿಸಜಾತ ಮಹೇಸಿ ಕಪೋತವರೋ;

ಅಥ ಮೋರ ಸತಚ್ಛಕ ವಾಣಿಜಕೋ, ಅಥ ರಾಜ ಸಬ್ರಾಹ್ಮಣ ಭಿಕ್ಖಪರನ್ತಿ.

ಪಕಿಣ್ಣಕನಿಪಾತಂ ನಿಟ್ಠಿತಂ.