೧೪. ಪಕಿಣ್ಣಕನಿಪಾತೋ

೪೮೪. ಸಾಲಿಕೇದಾರಜಾತಕಂ (೧)

೧. ಸಮ್ಪನ್ನಂ ಸಾಲಿಕೇದಾರಂ, ಸುವಾ ಭುಞ್ಜನ್ತಿ ಕೋಸಿಯ;

ಪಟಿವೇದೇಮಿ ತೇ ಬ್ರಹ್ಮೇ, ನ ನೇ [ತೇ (ಸೀ. ಸ್ಯಾ.), ನಂ (ಸೀ. ಸ್ಯಾ. ಪೀ. ಅಟ್ಠ.), ತಂ (ಕ. ಅಟ್ಠ.)] ವಾರೇತುಮುಸ್ಸಹೇ.

೨. ಏಕೋ ಚ ತತ್ಥ ಸಕುಣೋ, ಯೋ ನೇಸಂ [ತೇಸಂ (ಸೀ. ಅಟ್ಠ.)] ಸಬ್ಬಸುನ್ದರೋ;

ಭುತ್ವಾ ಸಾಲಿಂ ಯಥಾಕಾಮಂ, ತುಣ್ಡೇನಾದಾಯ ಗಚ್ಛತಿ.

೩. ಓಡ್ಡೇನ್ತು [ಉಜ್ಝುನ್ತು (ಸ್ಯಾ. ಕ.) ಅಙ್ಗುತ್ತರನಿಕಾಯೇ ಪಸ್ಸಿತಬ್ಬಂ] ವಾಳಪಾಸಾನಿ, ಯಥಾ ವಜ್ಝೇಥ ಸೋ ದಿಜೋ;

ಜೀವಞ್ಚ ನಂ ಗಹೇತ್ವಾನ, ಆನಯೇಹಿ [ಆನಯೇಥ (ಸೀ. ಪೀ.)] ಮಮನ್ತಿಕೇ.

೪. ಏತೇ ಭುತ್ವಾ ಪಿವಿತ್ವಾ ಚ [ಭುತ್ವಾ ಚ ಪಿತ್ವಾ ಚ (ಪೀ.)], ಪಕ್ಕಮನ್ತಿ ವಿಹಙ್ಗಮಾ;

ಏಕೋ ಬದ್ಧೋಸ್ಮಿ ಪಾಸೇನ, ಕಿಂ ಪಾಪಂ ಪಕತಂ ಮಯಾ.

೫. ಉದರಂ ನೂನ ಅಞ್ಞೇಸಂ, ಸುವ ಅಚ್ಚೋದರಂ ತವ;

ಭುತ್ವಾ ಸಾಲಿಂ ಯಥಾಕಾಮಂ, ತುಣ್ಡೇನಾದಾಯ ಗಚ್ಛಸಿ.

೬. ಕೋಟ್ಠಂ ನು ತತ್ಥ ಪೂರೇಸಿ, ಸುವ ವೇರಂ ನು ತೇ ಮಯಾ;

ಪುಟ್ಠೋ ಮೇ ಸಮ್ಮ ಅಕ್ಖಾಹಿ, ಕುಹಿಂ ಸಾಲಿಂ ನಿದಾಹಸಿ [ನಿಧೀಯಸಿ (ಪೀ.)].

೭. ನ ಮೇ ವೇರಂ ತಯಾ ಸದ್ಧಿಂ, ಕೋಟ್ಠೋ ಮಯ್ಹಂ ನ ವಿಜ್ಜತಿ;

ಇಣಂ ಮುಞ್ಚಾಮಿಣಂ ದಮ್ಮಿ, ಸಮ್ಪತ್ತೋ ಕೋಟಸಿಮ್ಬಲಿಂ;

ನಿಧಿಮ್ಪಿ ತತ್ಥ ನಿದಹಾಮಿ, ಏವಂ ಜಾನಾಹಿ ಕೋಸಿಯ.

೮. ಕೀದಿಸಂ ತೇ ಇಣದಾನಂ, ಇಣಮೋಕ್ಖೋ ಚ ಕೀದಿಸೋ;

ನಿಧಿನಿಧಾನಮಕ್ಖಾಹಿ, ಅಥ ಪಾಸಾ ಪಮೋಕ್ಖಸಿ.

೯. ಅಜಾತಪಕ್ಖಾ ತರುಣಾ, ಪುತ್ತಕಾ ಮಯ್ಹ ಕೋಸಿಯ;

ತೇ ಮಂ ಭತಾ ಭರಿಸ್ಸನ್ತಿ, ತಸ್ಮಾ ತೇಸಂ ಇಣಂ ದದೇ.

೧೦. ಮಾತಾ ಪಿತಾ ಚ ಮೇ ವುದ್ಧಾ, ಜಿಣ್ಣಕಾ ಗತಯೋಬ್ಬನಾ;

ತೇಸಂ ತುಣ್ಡೇನ ಹಾತೂನ, ಮುಞ್ಚೇ ಪುಬ್ಬಕತಂ [ಪುಬ್ಬೇ ಕತಂ (ಸೀ.)] ಇಣಂ.

೧೧. ಅಞ್ಞೇಪಿ ತತ್ಥ ಸಕುಣಾ, ಖೀಣಪಕ್ಖಾ ಸುದುಬ್ಬಲಾ;

ತೇಸಂ ಪುಞ್ಞತ್ಥಿಕೋ ದಮ್ಮಿ, ತಂ ನಿಧಿಂ ಆಹು ಪಣ್ಡಿತಾ.

೧೨. ಈದಿಸಂ [ಏದಿಸಂ (ಸೀ. ಪೀ.)] ಮೇ ಇಣದಾನಂ, ಇಣಮೋಕ್ಖೋ ಚ ಈದಿಸೋ;

ನಿಧಿನಿಧಾನಮಕ್ಖಾಮಿ [ನಿಧಿಂ ನಿಧಾನಂ ಅಕ್ಖಾತಂ (ಸೀ. ಪೀ.)], ಏವಂ ಜಾನಾಹಿ ಕೋಸಿಯ.

೧೩. ಭದ್ದಕೋ ವತಯಂ ಪಕ್ಖೀ, ದಿಜೋ ಪರಮಧಮ್ಮಿಕೋ;

ಏಕಚ್ಚೇಸು ಮನುಸ್ಸೇಸು, ಅಯಂ ಧಮ್ಮೋ ನ ವಿಜ್ಜತಿ.

೧೪. ಭುಞ್ಜ ಸಾಲಿಂ ಯಥಾಕಾಮಂ, ಸಹ ಸಬ್ಬೇಹಿ ಞಾತಿಭಿ;

ಪುನಾಪಿ ಸುವ ಪಸ್ಸೇಮು, ಪಿಯಂ ಮೇ ತವ ದಸ್ಸನಂ.

೧೫. ಭುತ್ತಞ್ಚ ಪೀತಞ್ಚ ತವಸ್ಸಮಮ್ಹಿ [ತವಸ್ಸಬ್ಯಮ್ಹಿ (ಕ.)], ರತ್ತಿಞ್ಚ [ರತೀ ಚ (ಸೀ. ಪೀ.)] ನೋ ಕೋಸಿಯ ತೇ ಸಕಾಸೇ;

ನಿಕ್ಖಿತ್ತದಣ್ಡೇಸು ದದಾಹಿ ದಾನಂ, ಜಿಣ್ಣೇ ಚ ಮಾತಾಪಿತರೋ ಭರಸ್ಸು.

೧೬. ಲಕ್ಖೀ ವತ ಮೇ ಉದಪಾದಿ ಅಜ್ಜ, ಯೋ ಅದ್ದಸಾಸಿಂ ಪವರಂ [ಯೋಹಂ ಅದಸ್ಸಂ ಪರಮಂ (ಸ್ಯಾ. ಕ.)] ದಿಜಾನಂ;

ಸುವಸ್ಸ ಸುತ್ವಾನ ಸುಭಾಸಿತಾನಿ, ಕಾಹಾಮಿ ಪುಞ್ಞಾನಿ ಅನಪ್ಪಕಾನಿ.

೧೭. ಸೋ ಕೋಸಿಯೋ ಅತ್ತಮನೋ ಉದಗ್ಗೋ, ಅನ್ನಞ್ಚ ಪಾನಞ್ಚಭಿಸಙ್ಖರಿತ್ವಾ [ಅನ್ನಞ್ಚ ಪಾನಂ ಅಭಿಸಂಹರಿತ್ವಾ (ಕ.)];

ಅನ್ನೇನ ಪಾನೇನ ಪಸನ್ನಚಿತ್ತೋ, ಸನ್ತಪ್ಪಯಿ ಸಮಣಬ್ರಾಹ್ಮಣೇ ಚಾತಿ.

ಸಾಲಿಕೇದಾರಜಾತಕಂ [ಕೇದಾರಜಾತಕಂ (ಕ.)] ಪಠಮಂ.

೪೮೫. ಚನ್ದಕಿನ್ನರೀಜಾತಕಂ (೨)

೧೮. ಉಪನೀಯತಿದಂ ಮಞ್ಞೇ, ಚನ್ದೇ [ಲೋಹಿತಮದೇನ ಮಜ್ಜಾಮಿ; ವಿಜಹಾಮಿ ಜೀವಿತಂ ಪಾಣಾ, (ಸೀ. ಪೀ. ಅಟ್ಠ.)] ಲೋಹಿತಮದ್ದನೇ;

ಅಜ್ಜ ಜಹಾಮಿ ಜೀವಿತಂ, ಪಾಣಾ [ಲೋಹಿತಮದೇನ ಮಜ್ಜಾಮಿ; ವಿಜಹಾಮಿ ಜೀವಿತಂ ಪಾಣಾ, (ಸೀ. ಪೀ. ಅಟ್ಠ.)] ಮೇ ಚನ್ದೇ ನಿರುಜ್ಝನ್ತಿ.

೧೯. ಓಸೀದಿ [ಓಸಧಿ (ಸೀ. ಸ್ಯಾ. ಪೀ.), ಓಸಟ್ಠಿ (ಕ.), ಓಸತಿ (ಅಭಿನವಟೀಕಾ), ಓಸೀದತಿ (?)] ಮೇ ದುಕ್ಖಂ [ದುಕ್ಖಂ ಮೇ (ಸೀ. ಪೀ.)] ಹದಯಂ, ಮೇ ಡಯ್ಹತೇ ನಿತಮ್ಮಾಮಿ;

ತವ ಚನ್ದಿಯಾ ಸೋಚನ್ತಿಯಾ, ನ ನಂ ಅಞ್ಞೇಹಿ ಸೋಕೇಹಿ.

೨೦. ತಿಣಮಿವ ವನಮಿವ ಮಿಲಾಯಾಮಿ [ಮಿಲಯಾಮಿ (ಸೀ.), ಮಿಯ್ಯಾಮಿ (ಸೀ. ಪೀ. ಅಟ್ಠ.)], ನದೀ ಅಪರಿಪುಣ್ಣಾವ [ಅಪರಿಪುಣ್ಣಿಯಾವ (ಸೀ. ಪೀ.)] ಸುಸ್ಸಾಮಿ;

ತವ ಚನ್ದಿಯಾ ಸೋಚನ್ತಿಯಾ, ನ ನಂ ಅಞ್ಞೇಹಿ ಸೋಕೇಹಿ.

೨೧. ವಸ್ಸಮಿವ ಸರೇ ಪಾದೇ [ವಸ್ಸಂವ ಸರೇ ಪಾದೇ (ಸೀ.), ವಸ್ಸಂವ ಸರೇ ಪಬ್ಬತಪಾದೇ (ಪೀ.)], ಇಮಾನಿ ಅಸ್ಸೂನಿ ವತ್ತರೇ ಮಯ್ಹಂ;

ತವ ಚನ್ದಿಯಾ ಸೋಚನ್ತಿಯಾ, ನ ನಂ ಅಞ್ಞೇಹಿ ಸೋಕೇಹಿ.

೨೨. ಪಾಪೋ ಖೋಸಿ [ಪಾಪೋಸಿ ಖೋ (ಸೀ.), ಪಾಪೋ ಖೋ (ಸ್ಯಾ. ಪೀ.)] ರಾಜಪುತ್ತ, ಯೋ ಮೇ ಇಚ್ಛಿತಂ [ಇಚ್ಛಿತ (ಸೀ. ಸ್ಯಾ. ಪೀ.)] ಪತಿಂ ವರಾಕಿಯಾ;

ವಿಜ್ಝಸಿ ವನಮೂಲಸ್ಮಿಂ, ಸೋಯಂ ವಿದ್ಧೋ ಛಮಾ ಸೇತಿ.

೨೩. ಇಮಂ ಮಯ್ಹಂ ಹದಯಸೋಕಂ, ಪಟಿಮುಞ್ಚತು ರಾಜಪುತ್ತ ತವ ಮಾತಾ;

ಯೋ ಮಯ್ಹಂ ಹದಯಸೋಕೋ, ಕಿಮ್ಪುರಿಸಂ ಅವೇಕ್ಖಮಾನಾಯ.

೨೪. ಇಮಂ ಮಯ್ಹಂ ಹದಯಸೋಕಂ, ಪಟಿಮುಞ್ಚತು ರಾಜಪುತ್ತ ತವ ಜಾಯಾ;

ಯೋ ಮಯ್ಹಂ ಹದಯಸೋಕೋ, ಕಿಮ್ಪುರಿಸಂ ಅವೇಕ್ಖಮಾನಾಯ.

೨೫. ಮಾ ಚ ಪುತ್ತಂ [ಪುತ್ತೇ (ಸೀ. ಪೀ.)] ಮಾ ಚ ಪತಿಂ, ಅದ್ದಕ್ಖಿ ರಾಜಪುತ್ತ ತವ ಮಾತಾ;

ಯೋ ಕಿಮ್ಪುರಿಸಂ ಅವಧಿ, ಅದೂಸಕಂ ಮಯ್ಹ ಕಾಮಾ ಹಿ [ಮಯ್ಹಂ ಕಾಮಾ (ಕ.)].

೨೬. ಮಾ ಚ ಪುತ್ತಂ ಮಾ ಚ ಪತಿಂ, ಅದ್ದಕ್ಖಿ ರಾಜಪುತ್ತ ತವ ಜಾಯಾ;

ಯೋ ಕಿಮ್ಪುರಿಸಂ ಅವಧಿ, ಅದೂಸಕಂ ಮಯ್ಹ ಕಾಮಾ ಹಿ.

೨೭. ಮಾ ತ್ವಂ ಚನ್ದೇ ರೋದಿ, ಮಾ ಸೋಚಿ ವನತಿಮಿರಮತ್ತಕ್ಖಿ;

ಮಮ ತ್ವಂ ಹೇಹಿಸಿ ಭರಿಯಾ, ರಾಜಕುಲೇ ಪೂಜಿತಾ ನಾರೀಭಿ [ನಾರೀ (ಸೀ. ಪೀ.)].

೨೮. ಅಪಿ ನೂನಹಂ ಮರಿಸ್ಸಂ, ನಾಹಂ [ನ ಚ ಪನಾಹಂ (ಸೀ. ಪೀ.)] ರಾಜಪುತ್ತ ತವ ಹೇಸ್ಸಂ;

ಯೋ ಕಿಮ್ಪುರಿಸಂ ಅವಧಿ, ಅದೂಸಕಂ ಮಯ್ಹ ಕಾಮಾ ಹಿ.

೨೯. ಅಪಿ ಭೀರುಕೇ ಅಪಿ ಜೀವಿತುಕಾಮಿಕೇ, ಕಿಮ್ಪುರಿಸಿ ಗಚ್ಛ ಹಿಮವನ್ತಂ;

ತಾಲೀಸತಗರಭೋಜನಾ, ಅಞ್ಞೇ [ತಾಲಿಸ್ಸತಗರಭೋಜನೇ, ಅರಞ್ಞೇ (ಸೀ. ಪೀ.)] ತಂ ಮಿಗಾ ರಮಿಸ್ಸನ್ತಿ.

೩೦. ತೇ ಪಬ್ಬತಾ ತಾ ಚ ಕನ್ದರಾ, [ತಾ ಚ ಗಿರಿಗುಹಾಯೋ (ಸೀ. ಸ್ಯಾ. ಪೀ.)] ತಾ ಚ ಗಿರಿಗುಹಾಯೋ ತಥೇವ ತಿಟ್ಠನ್ತಿ [ತಾ ಚ ಗಿರಿಗುಹಾಯೋ (ಸೀ. ಸ್ಯಾ. ಪೀ.)];

ತತ್ಥೇವ [ತತ್ಥ (ಸೀ. ಸ್ಯಾ. ಪೀ.)] ತಂ ಅಪಸ್ಸನ್ತೀ, ಕಿಮ್ಪುರಿಸ ಕಥಂ ಅಹಂ ಕಸ್ಸಂ.

೩೧. ತೇ ಪಣ್ಣಸನ್ಥತಾ ರಮಣೀಯಾ, ವಾಳಮಿಗೇಹಿ ಅನುಚಿಣ್ಣಾ;

ತತ್ಥೇವ ತಂ ಅಪಸ್ಸನ್ತೀ, ಕಿಮ್ಪುರಿಸ ಕಥಂ ಅಹಂ ಕಸ್ಸಂ [ಕಾಸಂ (ಸೀ. ಸ್ಯಾ. ಪೀ.)].

೩೨. ತೇ ಪುಪ್ಫಸನ್ಥತಾ ರಮಣೀಯಾ, ವಾಳಮಿಗೇಹಿ ಅನುಚಿಣ್ಣಾ;