೪೯೩. ಮಹಾವಾಣಿಜಜಾತಕಂ (೧೦)

೧೮೦. ವಾಣಿಜಾ ಸಮಿತಿಂ ಕತ್ವಾ, ನಾನಾರಟ್ಠತೋ ಆಗತಾ;

ಧನಾಹರಾ ಪಕ್ಕಮಿಂಸು, ಏಕಂ ಕತ್ವಾನ ಗಾಮಣಿಂ.

೧೮೧. ತೇ ತಂ ಕನ್ತಾರಮಾಗಮ್ಮ, ಅಪ್ಪಭಕ್ಖಂ ಅನೋದಕಂ;

ಮಹಾನಿಗ್ರೋಧಮದ್ದಕ್ಖುಂ, ಸೀತಚ್ಛಾಯಂ ಮನೋರಮಂ.

೧೮೨. ತೇ ಚ ತತ್ಥ ನಿಸೀದಿತ್ವಾ, ತಸ್ಸ ರುಕ್ಖಸ್ಸ ಛಾಯಯಾ [ಛಾದಿಯಾ (ಸೀ. ಸ್ಯಾ. ಪೀ.)];

ವಾಣಿಜಾ ಸಮಚಿನ್ತೇಸುಂ, ಬಾಲಾ ಮೋಹೇನ ಪಾರುತಾ.

೧೮೩. ಅಲ್ಲಾಯತೇ [ಅದ್ದಾಯತೇ (ಸೀ. ಪೀ.)] ಅಯಂ ರುಕ್ಖೋ, ಅಪಿ ವಾರೀವ [ವಾರಿ ಚ (ಸೀ. ಪೀ.)] ಸನ್ದತಿ;

ಇಙ್ಘಸ್ಸ ಪುರಿಮಂ ಸಾಖಂ, ಮಯಂ ಛಿನ್ದಾಮ ವಾಣಿಜಾ.

೧೮೪. ಸಾ ಚ ಛಿನ್ನಾವ ಪಗ್ಘರಿ, ಅಚ್ಛಂ ವಾರಿಂ ಅನಾವಿಲಂ;

ತೇ ತತ್ಥ ನ್ಹತ್ವಾ ಪಿವಿತ್ವಾ, ಯಾವತಿಚ್ಛಿಂಸು ವಾಣಿಜಾ.

೧೮೫. ದುತಿಯಂ ಸಮಚಿನ್ತೇಸುಂ, ಬಾಲಾ ಮೋಹೇನ ಪಾರುತಾ;

ಇಙ್ಘಸ್ಸ ದಕ್ಖಿಣಂ ಸಾಖಂ, ಮಯಂ ಛಿನ್ದಾಮ ವಾಣಿಜಾ.

೧೮೬. ಸಾ ಚ ಛಿನ್ನಾವ ಪಗ್ಘರಿ, ಸಾಲಿಮಂಸೋದನಂ ಬಹುಂ;

ಅಪ್ಪೋದವಣ್ಣೇ ಕುಮ್ಮಾಸೇ, ಸಿಙ್ಗಿಂ ವಿದಲಸೂಪಿಯೋ [ಸಿಙ್ಗಿಂ ಬಿದಲಸೂಪಿಯೋ (ಸೀ. ಪೀ.), ಸಿಙ್ಗೀವೇರಂ ಲಸೂಪಿಯೋ (ಕ.) ಸಿಙ್ಗೀನ್ತಿ ಸಿಙ್ಗೀವೇರಾದಿಕಂ ಉತ್ತರಿಭಙ್ಗಂ; ವಿದಲಸೂಪಿಯೋತಿ ಮುಗ್ಗಸೂಪಾದಯೋ (ಅಟ್ಠ.) ವಿದಲಂ ಕಲಾಯಾದಿಮ್ಹಿ ವತ್ತತೀತಿ ಸಕ್ಕತಾಭಿಧಾನೇ].

೧೮೭. ತೇ ತತ್ಥ ಭುತ್ವಾ ಖಾದಿತ್ವಾ [ಭುತ್ವಾ ಚ ಪಿವಿತ್ವಾ ಚ (ಪೀ.)], ಯಾವತಿಚ್ಛಿಂಸು ವಾಣಿಜಾ;

ತತಿಯಂ ಸಮಚಿನ್ತೇಸುಂ, ಬಾಲಾ ಮೋಹೇನ ಪಾರುತಾ;

ಇಙ್ಘಸ್ಸ ಪಚ್ಛಿಮಂ ಸಾಖಂ, ಮಯಂ ಛಿನ್ದಾಮ ವಾಣಿಜಾ.

೧೮೮. ಸಾ ಚ ಛಿನ್ನಾವ ಪಗ್ಘರಿ, ನಾರಿಯೋ ಸಮಲಙ್ಕತಾ;

ವಿಚಿತ್ರವತ್ಥಾಭರಣಾ, ಆಮುತ್ತಮಣಿಕುಣ್ಡಲಾ.

೧೮೯. ಅಪಿ ಸು ವಾಣಿಜಾ ಏಕಾ, ನಾರಿಯೋ ಪಣ್ಣವೀಸತಿ;

ಸಮನ್ತಾ ಪರಿವಾರಿಂಸು [ಪರಿಕರಿಂಸು (ಸೀ. ಸ್ಯಾ. ಪೀ.)], ತಸ್ಸ ರುಕ್ಖಸ್ಸ ಛಾಯಯಾ [ಛಾದಿಯಾ (ಸೀ. ಸ್ಯಾ. ಪೀ.)].

೧೯೦. ತೇ ತಾಹಿ ಪರಿಚಾರೇತ್ವಾ [ಪರಿವಾರೇತ್ವಾ (ಸೀ. ಸ್ಯಾ. ಪೀ.)], ಯಾವತಿಚ್ಛಿಂಸು ವಾಣಿಜಾ;

ಚತುತ್ಥಂ ಸಮಚಿನ್ತೇಸುಂ, ಬಾಲಾ ಮೋಹೇನ ಪಾರುತಾ;

ಇಙ್ಘಸ್ಸ ಉತ್ತರಂ ಸಾಖಂ, ಮಯಂ ಛಿನ್ದಾಮ ವಾಣಿಜಾ.

೧೯೧. ಸಾ ಚ ಛಿನ್ನಾವ ಪಗ್ಘರಿ, ಮುತ್ತಾ ವೇಳುರಿಯಾ ಬಹೂ;

ರಜತಂ ಜಾತರೂಪಞ್ಚ, ಕುತ್ತಿಯೋ ಪಟಿಯಾನಿ ಚ.

೧೯೨. ಕಾಸಿಕಾನಿ ಚ ವತ್ಥಾನಿ, ಉದ್ದಿಯಾನಿ ಚ ಕಮ್ಬಲಾ [ಉದ್ದಿಯಾನೇ ಚ ಕಮ್ಬಲೇ (ಸೀ. ಪೀ.)];

ತೇ ತತ್ಥ ಭಾರೇ ಬನ್ಧಿತ್ವಾ, ಯಾವತಿಚ್ಛಿಂಸು ವಾಣಿಜಾ.

೧೯೩. ಪಞ್ಚಮಂ ಸಮಚಿನ್ತೇಸುಂ, ಬಾಲಾ ಮೋಹೇನ ಪಾರುತಾ;

ಇಙ್ಘಸ್ಸ ಮೂಲೇ [ಮೂಲಂ (ಸೀ. ಪೀ. ಕ.)] ಛಿನ್ದಾಮ, ಅಪಿ ಭಿಯ್ಯೋ ಲಭಾಮಸೇ.

೧೯೪. ಅಥುಟ್ಠಹಿ ಸತ್ಥವಾಹೋ, ಯಾಚಮಾನೋ ಕತಞ್ಜಲೀ;

ನಿಗ್ರೋಧೋ ಕಿಂ ಪರಜ್ಝತಿ [ಅಪರಜ್ಝಥ (ಸೀ.), ಅಪರಜ್ಝತಿ (ಸ್ಯಾ. ಪೀ.)], ವಾಣಿಜಾ ಭದ್ದಮತ್ಥು ತೇ.

೧೯೫. ವಾರಿದಾ ಪುರಿಮಾ ಸಾಖಾ, ಅನ್ನಪಾನಞ್ಚ ದಕ್ಖಿಣಾ;

ನಾರಿದಾ ಪಚ್ಛಿಮಾ ಸಾಖಾ, ಸಬ್ಬಕಾಮೇ ಚ ಉತ್ತರಾ;

ನಿಗ್ರೋಧೋ ಕಿಂ ಪರಜ್ಝತಿ, ವಾಣಿಜಾ ಭದ್ದಮತ್ಥು ತೇ.

೧೯೬. ಯಸ್ಸ ರುಕ್ಖಸ್ಸ ಛಾಯಾಯ, ನಿಸೀದೇಯ್ಯ ಸಯೇಯ್ಯ ವಾ;

ನ ತಸ್ಸ ಸಾಖಂ ಭಞ್ಜೇಯ್ಯ, ಮಿತ್ತದುಬ್ಭೋ ಹಿ ಪಾಪಕೋ.

೧೯೭. ತೇ ಚ ತಸ್ಸಾನಾದಿಯಿತ್ವಾ [ತಸ್ಸ ಅನಾದಿತ್ವಾ (ಸೀ. ಸ್ಯಾ.)], ಏಕಸ್ಸ ವಚನಂ ಬಹೂ;

ನಿಸಿತಾಹಿ ಕುಠಾರೀಹಿ [ಕುಧಾರೀಹಿ (ಕ.)], ಮೂಲತೋ ನಂ ಉಪಕ್ಕಮುಂ.

೧೯೮. ತತೋ ನಾಗಾ ನಿಕ್ಖಮಿಂಸು, ಸನ್ನದ್ಧಾ ಪಣ್ಣವೀಸತಿ;

ಧನುಗ್ಗಹಾನಂ ತಿಸತಾ, ಛಸಹಸ್ಸಾ ಚ ವಮ್ಮಿನೋ.

೧೯೯. ಏತೇ ಹನಥ ಬನ್ಧಥ, ಮಾ ವೋ ಮುಞ್ಚಿತ್ಥ [ಮುಚ್ಚಿತ್ಥ (ಪೀ.)] ಜೀವಿತಂ;

ಠಪೇತ್ವಾ ಸತ್ಥವಾಹಂವ, ಸಬ್ಬೇ ಭಸ್ಮಂ [ಭಸ್ಮೀ (ಸೀ.)] ಕರೋಥ ನೇ.

೨೦೦. ತಸ್ಮಾ ಹಿ ಪಣ್ಡಿತೋ ಪೋಸೋ, ಸಮ್ಪಸ್ಸಂ ಅತ್ಥಮತ್ತನೋ;

ಲೋಭಸ್ಸ ನ ವಸಂ ಗಚ್ಛೇ, ಹನೇಯ್ಯಾರಿಸಕಂ [ಹನೇಯ್ಯ ದಿಸತಂ (ಸೀ.), ಹನೇಯ್ಯ ದಿಸಕಂ (ಸ್ಯಾ.)] ಮನಂ.

೨೦೧. ಏವ [ಏತ (ಸೀ. ಪೀ.)] ಮಾದೀನವಂ ಞತ್ವಾ, ತಣ್ಹಾ ದುಕ್ಖಸ್ಸ ಸಮ್ಭವಂ;

ವೀತತಣ್ಹೋ ಅನಾದಾನೋ, ಸತೋ ಭಿಕ್ಖು ಪರಿಬ್ಬಜೇತಿ.

ಮಹಾವಾಣಿಜಜಾತಕಂ ದಸಮಂ.