೪೯೪. ಸಾಧಿನಜಾತಕಂ (೧೧)

೨೦೨. ಅಬ್ಭುತೋ ವತ ಲೋಕಸ್ಮಿಂ, ಉಪ್ಪಜ್ಜಿ ಲೋಮಹಂಸನೋ;

ದಿಬ್ಬೋ ರಥೋ ಪಾತುರಹು, ವೇದೇಹಸ್ಸ ಯಸಸ್ಸಿನೋ.

೨೦೩. ದೇವಪುತ್ತೋ ಮಹಿದ್ಧಿಕೋ, ಮಾತಲಿ [ಮಾತಲೀ (ಸೀ.)] ದೇವಸಾರಥಿ;

ನಿಮನ್ತಯಿತ್ಥ ರಾಜಾನಂ, ವೇದೇಹಂ ಮಿಥಿಲಗ್ಗಹಂ.

೨೦೪. ಏಹಿಮಂ ರಥಮಾರುಯ್ಹ, ರಾಜಸೇಟ್ಠ ದಿಸಮ್ಪತಿ;

ದೇವಾ ದಸ್ಸನಕಾಮಾ ತೇ, ತಾವತಿಂಸಾ ಸಇನ್ದಕಾ;

ಸರಮಾನಾ ಹಿ ತೇ ದೇವಾ, ಸುಧಮ್ಮಾಯಂ ಸಮಚ್ಛರೇ.

೨೦೫. ತತೋ ಚ ರಾಜಾ ಸಾಧಿನೋ [ಸಾಧೀನೋ (ಸೀ. ಪೀ.)], ವೇದೇಹೋ ಮಿಥಿಲಗ್ಗಹೋ [ಪಮುಖೋ ರಥಮಾರುಹಿ (ಸೀ. ಪೀ.)];

ಸಹಸ್ಸಯುತ್ತಮಾರುಯ್ಹ [ಯುತ್ತಂ ಅಭಿರುಯ್ಹ (ಸೀ.)], ಅಗಾ ದೇವಾನ ಸನ್ತಿಕೇ;

ತಂ ದೇವಾ ಪಟಿನನ್ದಿಂಸು, ದಿಸ್ವಾ ರಾಜಾನಮಾಗತಂ.

೨೦೬. ಸ್ವಾಗತಂ ತೇ ಮಹಾರಾಜ, ಅಥೋ ತೇ ಅದುರಾಗತಂ;

ನಿಸೀದ ದಾನಿ ರಾಜೀಸಿ [ರಾಜಿಸಿ (ಸೀ. ಸ್ಯಾ. ಪೀ.)], ದೇವರಾಜಸ್ಸ ಸನ್ತಿಕೇ.

೨೦೭. ಸಕ್ಕೋಪಿ ಪಟಿನನ್ದಿತ್ಥ, ವೇದೇಹಂ ಮಿಥಿಲಗ್ಗಹಂ;

ನಿಮನ್ತಯಿತ್ಥ [ನಿಮನ್ತಯೀ ಚ (ಸೀ. ಪೀ.)] ಕಾಮೇಹಿ, ಆಸನೇನ ಚ ವಾಸವೋ.

೨೦೮. ಸಾಧು ಖೋಸಿ ಅನುಪ್ಪತ್ತೋ, ಆವಾಸಂ ವಸವತ್ತಿನಂ;

ವಸ ದೇವೇಸು ರಾಜೀಸಿ, ಸಬ್ಬಕಾಮಸಮಿದ್ಧಿಸು;

ತಾವತಿಂಸೇಸು ದೇವೇಸು, ಭುಞ್ಜ ಕಾಮೇ ಅಮಾನುಸೇ.

೨೦೯. ಅಹಂ ಪುರೇ ಸಗ್ಗಗತೋ ರಮಾಮಿ, ನಚ್ಚೇಹಿ ಗೀತೇಹಿ ಚ ವಾದಿತೇಹಿ;

ಸೋ ದಾನಿ ಅಜ್ಜ ನ ರಮಾಮಿ ಸಗ್ಗೇ, ಆಯುಂ ನು ಖೀಣೋ [ಖೀಣಂ (ಸ್ಯಾ.)] ಮರಣಂ ನು ಸನ್ತಿಕೇ;

ಉದಾಹು ಮೂಳ್ಹೋಸ್ಮಿ ಜನಿನ್ದಸೇಟ್ಠ.

೨೧೦. ನ ತಾಯು [ನ ಚಾಯು (ಸೀ. ಪೀ. ಕ.)] ಖೀಣಂ ಮರಣಞ್ಚ [ಮರಣಂ ತೇ (ಸೀ. ಪೀ.)] ದೂರೇ, ನ ಚಾಪಿ ಮೂಳ್ಹೋ ನರವೀರಸೇಟ್ಠ;

ತುಯ್ಹಞ್ಚ [ತವಞ್ಚ (ಸೀ. ಪೀ.), ತವ ಚ (ಕ.)] ಪುಞ್ಞಾನಿ ಪರಿತ್ತಕಾನಿ, ಯೇಸಂ ವಿಪಾಕಂ ಇಧ ವೇದಯಿತ್ಥೋ [ವೇದಯತೋ (ಪೀ. ಕ.)].

೨೧೧. ವಸ ದೇವಾನುಭಾವೇನ, ರಾಜಸೇಟ್ಠ ದಿಸಮ್ಪತಿ;

ತಾವತಿಂಸೇಸು ದೇವೇಸು, ಭುಞ್ಜ ಕಾಮೇ ಅಮಾನುಸೇ.

೨೧೨. ಯಥಾ ಯಾಚಿತಕಂ ಯಾನಂ, ಯಥಾ ಯಾಚಿತಕಂ ಧನಂ;

ಏವಂ ಸಮ್ಪದಮೇವೇತಂ, ಯಂ ಪರತೋ ದಾನಪಚ್ಚಯಾ.

೨೧೩. ನ ಚಾಹಮೇತಮಿಚ್ಛಾಮಿ, ಯಂ ಪರತೋ ದಾನಪಚ್ಚಯಾ;

ಸಯಂಕತಾನಿ ಪುಞ್ಞಾನಿ, ತಂ ಮೇ ಆವೇಣಿಕಂ [ಆವೇಣಿಯಂ (ಸೀ. ಸ್ಯಾ. ಪೀ.), ಆವೇನಿಕಂ (ಕ.)] ಧನಂ.

೨೧೪. ಸೋಹಂ ಗನ್ತ್ವಾ ಮನುಸ್ಸೇಸು, ಕಾಹಾಮಿ ಕುಸಲಂ ಬಹುಂ;

ದಾನೇನ ಸಮಚರಿಯಾಯ, ಸಂಯಮೇನ ದಮೇನ ಚ;

ಯಂ ಕತ್ವಾ ಸುಖಿತೋ ಹೋತಿ, ನ ಚ ಪಚ್ಛಾನುತಪ್ಪತಿ.

೨೧೫. ಇಮಾನಿ ತಾನಿ ಖೇತ್ತಾನಿ, ಇಮಂ ನಿಕ್ಖಂ ಸುಕುಣ್ಡಲಂ;

ಇಮಾ ತಾ ಹರಿತಾನೂಪಾ, ಇಮಾ ನಜ್ಜೋ ಸವನ್ತಿಯೋ.

೨೧೬. ಇಮಾ ತಾ ಪೋಕ್ಖರಣೀ ರಮ್ಮಾ, ಚಕ್ಕವಾಕಪಕೂಜಿತಾ [ಚಕ್ಕವಾಕೂಪಕೂಜಿತಾ (ಸೀ. ಪೀ.)];

ಮನ್ದಾಲಕೇಹಿ ಸಞ್ಛನ್ನಾ, ಪದುಮುಪ್ಪಲಕೇಹಿ ಚ;

ಯಸ್ಸಿಮಾನಿ ಮಮಾಯಿಂಸು, ಕಿಂ ನು ತೇ ದಿಸತಂ ಗತಾ.

೨೧೭. ತಾನೀಧ ಖೇತ್ತಾನಿ ಸೋ ಭೂಮಿಭಾಗೋ, ತೇಯೇವ ಆರಾಮವನುಪಚಾರಾ [ತೇ ಆರಾಮಾ ತೇ ವನ’ಮೇ ಪಚಾರಾ (ಸೀ. ಪೀ.), ತೇ ಯೇವ ಆರಾಮವನಾನಿ ಸಞ್ಚರಾ (ಕ.)];

ತಮೇವ ಮಯ್ಹಂ ಜನತಂ ಅಪಸ್ಸತೋ, ಸುಞ್ಞಂವ ಮೇ ನಾರದ ಖಾಯತೇ ದಿಸಾ.

೨೧೮. ದಿಟ್ಠಾ ಮಯಾ ವಿಮಾನಾನಿ, ಓಭಾಸೇನ್ತಾ ಚತುದ್ದಿಸಾ;

ಸಮ್ಮುಖಾ ದೇವರಾಜಸ್ಸ, ತಿದಸಾನಞ್ಚ ಸಮ್ಮುಖಾ.

೨೧೯. ವುತ್ಥಂ ಮೇ ಭವನಂ ದಿಬ್ಯಂ [ದಿಬ್ಬಂ (ಸೀ. ಪೀ.)], ಭುತ್ತಾ ಕಾಮಾ ಅಮಾನುಸಾ;

ತಾವತಿಂಸೇಸು ದೇವೇಸು, ಸಬ್ಬಕಾಮಸಮಿದ್ಧಿಸು.

೨೨೦. ಸೋಹಂ ಏತಾದಿಸಂ ಹಿತ್ವಾ, ಪುಞ್ಞಾಯಮ್ಹಿ ಇಧಾಗತೋ;

ಧಮ್ಮಮೇವ ಚರಿಸ್ಸಾಮಿ, ನಾಹಂ ರಜ್ಜೇನ ಅತ್ಥಿಕೋ.

೨೨೧. ಅದಣ್ಡಾವಚರಂ ಮಗ್ಗಂ, ಸಮ್ಮಾಸಮ್ಬುದ್ಧದೇಸಿತಂ;

ತಂ ಮಗ್ಗಂ ಪಟಿಪಜ್ಜಿಸ್ಸಂ, ಯೇನ ಗಚ್ಛನ್ತಿ ಸುಬ್ಬತಾತಿ.

ಸಾಧಿನಜಾತಕಂ [ಸಾಧಿನರಾಜಜಾತಕಂ (ಸ್ಯಾ.)] ಏಕಾದಸಮಂ.