೪೯೨. ತಚ್ಛಸೂಕರಜಾತಕಂ (೯)

೧೬೦. ಯದೇಸಮಾನಾ ವಿಚರಿಮ್ಹ, ಪಬ್ಬತಾನಿ ವನಾನಿ ಚ;

ಅನ್ವೇಸಂ ವಿಚರಿಂ [ವಿಪುಲೇ (ಸ್ಯಾ. ಕ.)] ಞಾತೀ, ತೇಮೇ ಅಧಿಗತಾ ಮಯಾ.

೧೬೧. ಬಹುಞ್ಚಿದಂ ಮೂಲಫಲಂ, ಭಕ್ಖೋ ಚಾಯಂ ಅನಪ್ಪಕೋ;

ರಮ್ಮಾ ಚಿಮಾ ಗಿರೀನಜ್ಜೋ [ಗಿರಿನದಿಯೋ (ಸೀ. ಪೀ.)], ಫಾಸುವಾಸೋ ಭವಿಸ್ಸತಿ.

೧೬೨. ಇಧೇವಾಹಂ ವಸಿಸ್ಸಾಮಿ, ಸಹ ಸಬ್ಬೇಹಿ ಞಾತಿಭಿ;

ಅಪ್ಪೋಸ್ಸುಕ್ಕೋ ನಿರಾಸಙ್ಕೀ, ಅಸೋಕೋ ಅಕುತೋಭಯೋ.

೧೬೩. ಅಞ್ಞಮ್ಪಿ [ಅಞ್ಞಂ ಹಿ (ಸೀ. ಪೀ.)] ಲೇಣಂ ಪರಿಯೇಸ, ಸತ್ತು ನೋ ಇಧ ವಿಜ್ಜತಿ;

ಸೋ ತಚ್ಛ ಸೂಕರೇ ಹನ್ತಿ, ಇಧಾಗನ್ತ್ವಾ ವರಂ ವರಂ.

೧೬೪. ಕೋ ನುಮ್ಹಾಕಂ [ಕೋ ನಮ್ಹಾಕಂ (ಸೀ. ಪೀ.)] ಇಧ ಸತ್ತು, ಕೋ ಞಾತೀ ಸುಸಮಾಗತೇ;

ದುಪ್ಪಧಂಸೇ [ಅಪ್ಪಧಂಸೇ (ಸೀ. ಪೀ.)] ಪಧಂಸೇತಿ, ತಂ ಮೇ ಅಕ್ಖಾಥ ಪುಚ್ಛಿತಾ.

೧೬೫. ಉದ್ಧಗ್ಗರಾಜೀ ಮಿಗರಾಜಾ, ಬಲೀ ದಾಠಾವುಧೋ ಮಿಗೋ;

ಸೋ ತಚ್ಛ ಸೂಕರೇ ಹನ್ತಿ, ಇಧಾಗನ್ತ್ವಾ ವರಂ ವರಂ.

೧೬೬. ನ ನೋ ದಾಠಾ ನ ವಿಜ್ಜನ್ತಿ [ನು ವಿಜ್ಜನ್ತಿ (ಕ.)], ಬಲಂ ಕಾಯೇ ಸಮೋಹಿತಂ;

ಸಬ್ಬೇ ಸಮಗ್ಗಾ ಹುತ್ವಾನ, ವಸಂ ಕಾಹಾಮ ಏಕಕಂ.

೧೬೭. ಹದಯಙ್ಗಮಂ ಕಣ್ಣಸುಖಂ, ವಾಚಂ ಭಾಸಸಿ ತಚ್ಛಕ;

ಯೋಪಿ ಯುದ್ಧೇ ಪಲಾಯೇಯ್ಯ, ತಮ್ಪಿ ಪಚ್ಛಾ ಹನಾಮಸೇ.

೧೬೮. ಪಾಣಾತಿಪಾತಾ ವಿರತೋ ನು ಅಜ್ಜ, ಅಭಯಂ ನು ತೇ ಸಬ್ಬಭೂತೇಸು ದಿನ್ನಂ;

ದಾಠಾ ನು ತೇ ಮಿಗವಧಾಯ [ಮಿಗ ವಿರಿಯಂ (ಸೀ. ಸ್ಯಾ. ಪೀ.)] ನ ಸನ್ತಿ, ಯೋ ಸಙ್ಘಪತ್ತೋ ಕಪಣೋವ ಝಾಯಸಿ.

೧೬೯. ನ ಮೇ ದಾಠಾ ನ ವಿಜ್ಜನ್ತಿ, ಬಲಂ ಕಾಯೇ ಸಮೋಹಿತಂ;

ಞಾತೀ ಚ ದಿಸ್ವಾನ ಸಾಮಗ್ಗೀ ಏಕತೋ, ತಸ್ಮಾ ಚ ಝಾಯಾಮಿ ವನಮ್ಹಿ ಏಕಕೋ.

೧೭೦. ಇಮಸ್ಸುದಂ ಯನ್ತಿ ದಿಸೋದಿಸಂ ಪುರೇ, ಭಯಟ್ಟಿತಾ ಲೇಣಗವೇಸಿನೋ ಪುಥು;

ತೇ ದಾನಿ ಸಙ್ಗಮ್ಮ ವಸನ್ತಿ ಏಕತೋ, ಯತ್ಥಟ್ಠಿತಾ ದುಪ್ಪಸಹಜ್ಜ ತೇ ಮಯಾ.

೧೭೧. ಪರಿಣಾಯಕಸಮ್ಪನ್ನಾ, ಸಹಿತಾ ಏಕವಾದಿನೋ;

ತೇ ಮಂ ಸಮಗ್ಗಾ ಹಿಂಸೇಯ್ಯುಂ, ತಸ್ಮಾ ನೇಸಂ ನ ಪತ್ಥಯೇ [ಅಪತ್ಥವೇ (ಪೀ.)].

೧೭೨. ಏಕೋವ ಇನ್ದೋ ಅಸುರೇ ಜಿನಾತಿ, ಏಕೋವ ಸೇನೋ ಹನ್ತಿ ದಿಜೇ ಪಸಯ್ಹ;

ಏಕೋವ ಬ್ಯಗ್ಘೋ ಮಿಗಸಙ್ಘಪತ್ತೋ, ವರಂ ವರಂ ಹನ್ತಿ ಬಲಞ್ಹಿ ತಾದಿಸಂ.

೧೭೩. ನ ಹೇವ ಇನ್ದೋ ನ ಸೇನೋ, ನಪಿ ಬ್ಯಗ್ಘೋ ಮಿಗಾಧಿಪೋ;

ಸಮಗ್ಗೇ ಸಹಿತೇ ಞಾತೀ, ನ ಬ್ಯಗ್ಘೇ [ಬ್ಯಗ್ಘೇ ಚ (ಸೀ. ಪೀ.), ಬ್ಯಗ್ಘೋ ನ (ಸ್ಯಾ.)] ಕುರುತೇ ವಸೇ.

೧೭೪. ಕುಮ್ಭೀಲಕಾ ಸಕುಣಕಾ, ಸಙ್ಘಿನೋ ಗಣಚಾರಿನೋ;

ಸಮ್ಮೋದಮಾನಾ ಏಕಜ್ಝಂ, ಉಪ್ಪತನ್ತಿ ಡಯನ್ತಿ ಚ.

೧೭೫. ತೇಸಞ್ಚ ಡಯಮಾನಾನಂ, ಏಕೇತ್ಥ ಅಪಸಕ್ಕತಿ [ಅಪವತ್ತತಿ (ಸೀ. ಪೀ.)];

ತಞ್ಚ ಸೇನೋ ನಿತಾಳೇತಿ, ವೇಯ್ಯಗ್ಘಿಯೇವ ಸಾ ಗತಿ.

೧೭೬. ಉಸ್ಸಾಹಿತೋ ಜಟಿಲೇನ, ಲುದ್ದೇನಾಮಿಸಚಕ್ಖುನಾ;

ದಾಠೀ ದಾಠೀಸು ಪಕ್ಖನ್ದಿ, ಮಞ್ಞಮಾನೋ ಯಥಾ ಪುರೇ.

೧೭೭. ಸಾಧು ಸಮ್ಬಹುಲಾ ಞಾತೀ, ಅಪಿ ರುಕ್ಖಾ ಅರಞ್ಞಜಾ;

ಸೂಕರೇಹಿ ಸಮಗ್ಗೇಹಿ, ಬ್ಯಗ್ಘೋ ಏಕಾಯನೇ ಹತೋ.

೧೭೮. ಬ್ರಾಹ್ಮಣಞ್ಚೇವ ಬ್ಯಗ್ಘಞ್ಚ, ಉಭೋ ಹನ್ತ್ವಾನ ಸೂಕರಾ.

ಆನನ್ದಿನೋ ಪಮುದಿತಾ, ಮಹಾನಾದಂ ಪನಾದಿಸುಂ.

೧೭೯. ತೇ ಸು ಉದುಮ್ಬರಮೂಲಸ್ಮಿಂ, ಸೂಕರಾ ಸುಸಮಾಗತಾ;

ತಚ್ಛಕಂ ಅಭಿಸಿಞ್ಚಿಂಸು, ‘‘ತ್ವಂ ನೋ ರಾಜಾಸಿ ಇಸ್ಸರೋ’’ತಿ.

ತಚ್ಛಸೂಕರಜಾತಕಂ ನವಮಂ.