೪೯೧. ಮಹಾಮೋರಜಾತಕಂ (೮)

೧೪೩. ಸಚೇ ಹಿ ತ್ಯಾಹಂ ಧನಹೇತು ಗಾಹಿತೋ, ಮಾ ಮಂ ವಧೀ ಜೀವಗಾಹಂ ಗಹೇತ್ವಾ;

ರಞ್ಞೋ ಚ [ರಞ್ಞೋವ (ಸೀ. ಪೀ.)] ಮಂ ಸಮ್ಮ ಉಪನ್ತಿಕಂ [ಉಪನ್ತಿ (ಸೀ. ಸ್ಯಾ. ಪೀ.)] ನೇಹಿ, ಮಞ್ಞೇ ಧನಂ ಲಚ್ಛಸಿನಪ್ಪರೂಪಂ.

೧೪೪. ನ ಮೇ ಅಯಂ ತುಯ್ಹ ವಧಾಯ ಅಜ್ಜ, ಸಮಾಹಿತೋ ಚಾಪಧುರೇ [ಚಾಪವರೇ (ಸೀ. ಪೀ.), ಚಾಪವರೋ (ಸ್ಯಾ.)] ಖುರಪ್ಪೋ;

ಪಾಸಞ್ಚ ತ್ಯಾಹಂ ಅಧಿಪಾತಯಿಸ್ಸಂ, ಯಥಾಸುಖಂ ಗಚ್ಛತು ಮೋರರಾಜಾ.

೧೪೫. ಯಂ ಸತ್ತ ವಸ್ಸಾನಿ ಮಮಾನುಬನ್ಧಿ, ರತ್ತಿನ್ದಿವಂ ಖುಪ್ಪಿಪಾಸಂ ಸಹನ್ತೋ;

ಅಥ ಕಿಸ್ಸ ಮಂ ಪಾಸವಸೂಪನೀತಂ, ಪಮುತ್ತವೇ ಇಚ್ಛಸಿ ಬನ್ಧನಸ್ಮಾ.

೧೪೬. ಪಾಣಾತಿಪಾತಾ ವಿರತೋ ನುಸಜ್ಜ, ಅಭಯಂ ನು ತೇ ಸಬ್ಬಭೂತೇಸು ದಿನ್ನಂ;

ಯಂ ಮಂ ತುವಂ ಪಾಸವಸೂಪನೀತಂ, ಪಮುತ್ತವೇ ಇಚ್ಛಸಿ ಬನ್ಧನಸ್ಮಾ.

೧೪೭. ಪಾಣಾತಿಪಾತಾ ವಿರತಸ್ಸ ಬ್ರೂಹಿ, ಅಭಯಞ್ಚ ಯೋ ಸಬ್ಬಭೂತೇಸು ದೇತಿ;

ಪುಚ್ಛಾಮಿ ತಂ ಮೋರರಾಜೇತಮತ್ಥಂ, ಇತೋ ಚುತೋ ಕಿಂ ಲಭತೇ ಸುಖಂ ಸೋ.

೧೪೮. ಪಾಣಾತಿಪಾತಾ ವಿರತಸ್ಸ ಬ್ರೂಮಿ, ಅಭಯಞ್ಚ ಯೋ ಸಬ್ಬಭೂತೇಸು ದೇತಿ;

ದಿಟ್ಠೇವ ಧಮ್ಮೇ ಲಭತೇ ಪಸಂಸಂ, ಸಗ್ಗಞ್ಚ ಸೋ ಯಾತಿ ಸರೀರಭೇದಾ.

೧೪೯. ನ ಸನ್ತಿ ದೇವಾ ಇತಿ ಆಹು [ಇಚ್ಚಾಹು (ಸೀ. ಪೀ.)] ಏಕೇ, ಇಧೇವ ಜೀವೋ ವಿಭವಂ ಉಪೇತಿ;

ತಥಾ ಫಲಂ ಸುಕತದುಕ್ಕಟಾನಂ, ದತ್ತುಪಞ್ಞತ್ತಞ್ಚ ವದನ್ತಿ ದಾನಂ;

ತೇಸಂ ವಚೋ ಅರಹತಂ ಸದ್ದಹಾನೋ, ತಸ್ಮಾ ಅಹಂ ಸಕುಣೇ ಬಾಧಯಾಮಿ.

೧೫೦. ಚನ್ದೋ ಚ ಸುರಿಯೋ ಚ ಉಭೋ ಸುದಸ್ಸನಾ, ಗಚ್ಛನ್ತಿ ಓಭಾಸಯಮನ್ತಲಿಕ್ಖೇ;

ಇಮಸ್ಸ ಲೋಕಸ್ಸ ಪರಸ್ಸ ವಾ ತೇ, ಕಥಂ ನು ತೇ ಆಹು ಮನುಸ್ಸಲೋಕೇ.

೧೫೧. ಚನ್ದೋ ಚ ಸುರಿಯೋ ಚ ಉಭೋ ಸುದಸ್ಸನಾ, ಗಚ್ಛನ್ತಿ ಓಭಾಸಯಮನ್ತಲಿಕ್ಖೇ;

ಪರಸ್ಸ ಲೋಕಸ್ಸ ನ ತೇ ಇಮಸ್ಸ, ದೇವಾತಿ ತೇ ಆಹು ಮನುಸ್ಸಲೋಕೇ.

೧೫೨. ಏತ್ಥೇವ ತೇ ನೀಹತಾ ಹೀನವಾದಾ, ಅಹೇತುಕಾ ಯೇ ನ ವದನ್ತಿ ಕಮ್ಮಂ;

ತಥಾ ಫಲಂ ಸುಕತದುಕ್ಕಟಾನಂ, ದತ್ತುಪಞ್ಞತ್ತಂ ಯೇ ಚ ವದನ್ತಿ ದಾನಂ.

೧೫೩. ಅದ್ಧಾ ಹಿ ಸಚ್ಚಂ ವಚನಂ ತವೇದಂ [ತವೇತಂ (ಸೀ. ಸ್ಯಾ. ಪೀ.)], ಕಥಞ್ಹಿ ದಾನಂ ಅಫಲಂ ಭವೇಯ್ಯ [ವದೇಯ್ಯ (ಸೀ. ಪೀ.)];

ತಥಾ ಫಲಂ ಸುಕತದುಕ್ಕಟಾನಂ, ದತ್ತುಪಞ್ಞತ್ತಞ್ಚ ಕಥಂ ಭವೇಯ್ಯ.

೧೫೪. ಕಥಂಕರೋ ಕಿನ್ತಿಕರೋ ಕಿಮಾಚರಂ, ಕಿಂ ಸೇವಮಾನೋ ಕೇನ ತಪೋಗುಣೇನ;

ಅಕ್ಖಾಹಿ [ಅಕ್ಖಾಹಿ ತಂ ದಾನಿ (ಕ.)] ಮೇ ಮೋರರಾಜೇತಮತ್ಥಂ, ಯಥಾ ಅಹಂ ನೋ ನಿರಯಂ ಪತೇಯ್ಯಂ.

೧೫೫. ಯೇ ಕೇಚಿ ಅತ್ಥಿ ಸಮಣಾ ಪಥಬ್ಯಾ, ಕಾಸಾಯವತ್ಥಾ ಅನಗಾರಿಯಾ ತೇ;

ಪಾತೋವ ಪಿಣ್ಡಾಯ ಚರನ್ತಿ ಕಾಲೇ, ವಿಕಾಲಚರಿಯಾ ವಿರತಾ ಹಿ ಸನ್ತೋ.

೧೫೬. ತೇ ತತ್ಥ ಕಾಲೇನುಪಸಙ್ಕಮಿತ್ವಾ, ಪುಚ್ಛಾಹಿ ಯಂ ತೇ ಮನಸೋ ಪಿಯಂ ಸಿಯಾ;

ತೇ ತೇ ಪವಕ್ಖನ್ತಿ ಯಥಾಪಜಾನಂ, ಇಮಸ್ಸ ಲೋಕಸ್ಸ ಪರಸ್ಸ ಚತ್ಥಂ.

೧೫೭. ತಚಂವ ಜಿಣ್ಣಂ ಉರಗೋ ಪುರಾಣಂ, ಪಣ್ಡೂಪಲಾಸಂ ಹರಿತೋ ದುಮೋವ;

ಏಸಪ್ಪಹೀನೋ ಮಮ ಲುದ್ದಭಾವೋ, ಜಹಾಮಹಂ ಲುದ್ದಕಭಾವಮಜ್ಜ.

೧೫೮. ಯೇ ಚಾಪಿ ಮೇ ಸಕುಣಾ ಅತ್ಥಿ ಬದ್ಧಾ, ಸತಾನಿನೇಕಾನಿ ನಿವೇಸನಸ್ಮಿಂ;

ತೇಸಮ್ಪಹಂ [ತೇಸಂ ಅಹಂ (ಸ್ಯಾ. ಕ.)] ಜೀವಿತಮಜ್ಜ ದಮ್ಮಿ, ಮೋಕ್ಖಞ್ಚ ತೇ ಪತ್ತಾ [ಪತ್ತೋ (ಸೀ.), ಅಚ್ಛ (ಸ್ಯಾ.)] ಸಕಂ ನಿಕೇತಂ.

೧೫೯. ಲುದ್ದೋ ಚರೀ ಪಾಸಹತ್ಥೋ ಅರಞ್ಞೇ, ಬಾಧೇತು ಮೋರಾಧಿಪತಿಂ ಯಸಸ್ಸಿಂ;

ಬನ್ಧಿತ್ವಾ [ಬನ್ಧಿತ್ವ (ಸೀ. ಪೀ.)] ಮೋರಾಧಿಪತಿಂ ಯಸಸ್ಸಿಂ, ದುಕ್ಖಾ ಸ ಪಮುಚ್ಚಿ [ದುಕ್ಖಾ ಪಮುಚ್ಚಿ (ಸೀ.), ದುಕ್ಖಾ ಪಮುಞ್ಚಿ (ಸ್ಯಾ. ಪೀ.)] ಯಥಾಹಂ ಪಮುತ್ತೋತಿ.

ಮಹಾಮೋರಜಾತಕಂ ಅಟ್ಠಮಂ.