೪೯೦. ಪಞ್ಚುಪೋಸಥಿಕಜಾತಕಂ (೭)

೧೨೭. ಅಪ್ಪೋಸ್ಸುಕ್ಕೋ ದಾನಿ ತುವಂ ಕಪೋತ, ವಿಹಙ್ಗಮ ನ ತವ ಭೋಜನತ್ಥೋ;

ಖುದಂ [ಖುದ್ದಂ (ಸ್ಯಾ. ಕ.), ಖುಧಂ (ಸಕ್ಕತ-ಪಾಕತಾನುರೂಪಂ)] ಪಿಪಾಸಂ ಅಧಿವಾಸಯನ್ತೋ, ಕಸ್ಮಾ ಭವಂಪೋಸಥಿಕೋ ಕಪೋತ [ಕಪೋತೋ (ಸೀ. ಪೀ.)].

೧೨೮. ಅಹಂ ಪುರೇ ಗಿದ್ಧಿಗತೋ ಕಪೋತಿಯಾ, ಅಸ್ಮಿಂ ಪದೇಸಸ್ಮಿಮುಭೋ ರಮಾಮ;

ಅಥಗ್ಗಹೀ ಸಾಕುಣಿಕೋ ಕಪೋತಿಂ, ಅಕಾಮಕೋ ತಾಯ ವಿನಾ ಅಹೋಸಿಂ.

೧೨೯. ನಾನಾಭವಾ ವಿಪ್ಪಯೋಗೇನ ತಸ್ಸಾ, ಮನೋಮಯಂ ವೇದನ ವೇದಯಾಮಿ [ವೇದನಂ ವೇದಿಯಾಮಿ (ಸೀ. ಪೀ.)];

ತಸ್ಮಾ ಅಹಂಪೋಸಥಂ ಪಾಲಯಾಮಿ, ರಾಗೋ ಮಮಂ ಮಾ ಪುನರಾಗಮಾಸಿ.

೧೩೦. ಅನುಜ್ಜುಗಾಮೀ ಉರಗಾ ದುಜಿವ್ಹ [ಉರಗ ದ್ವಿಜಿವ್ಹ (ಸೀ.)], ದಾಠಾವುಧೋ ಘೋರವಿಸೋಸಿ ಸಪ್ಪ;

ಖುದಂ ಪಿಪಾಸಂ ಅಧಿವಾಸಯನ್ತೋ, ಕಸ್ಮಾ ಭವಂಪೋಸಥಿಕೋ ನು ದೀಘ [ದೀಘೋ (ಸೀ. ಪೀ.)].

೧೩೧. ಉಸಭೋ ಅಹೂ ಬಲವಾ ಗಾಮಿಕಸ್ಸ, ಚಲಕ್ಕಕೂ ವಣ್ಣಬಲೂಪಪನ್ನೋ;

ಸೋ ಮಂ ಅಕ್ಕಮಿ ತಂ ಕುಪಿತೋ ಅಡಂಸಿ, ದುಕ್ಖಾಭಿತುಣ್ಣೋ ಮರಣಂ ಉಪಾಗಾ [ಉಪಾಗಮಿ (ಸೀ. ಪೀ.)].

೧೩೨. ತತೋ ಜನಾ ನಿಕ್ಖಮಿತ್ವಾನ ಗಾಮಾ, ಕನ್ದಿತ್ವಾ ರೋದಿತ್ವಾ [ಕನ್ದಿತ್ವ ರೋದಿತ್ವ (ಸೀ.)] ಅಪಕ್ಕಮಿಂಸು;

ತಸ್ಮಾ ಅಹಂಪೋಸಥಂ ಪಾಲಯಾಮಿ, ಕೋಧೋ ಮಮಂ ಮಾ ಪುನರಾಗಮಾಸಿ.

೧೩೩. ಮತಾನ ಮಂಸಾನಿ ಬಹೂ ಸುಸಾನೇ, ಮನುಞ್ಞರೂಪಂ ತವ ಭೋಜನೇ ತಂ;

ಖುದಂ ಪಿಪಾಸಂ ಅಧಿವಾಸಯನ್ತೋ, ಕಸ್ಮಾ ಭವಂಪೋಸಥಿಕೋ ಸಿಙ್ಗಾಲ [ಸಿಗಾಲೋ (ಸೀ. ಪೀ.)].

೧೩೪. ಪವಿಸಿ [ಪವಿಸ್ಸಂ (ಸೀ. ಪೀ.), ಪವಿಸ್ಸ (ಸ್ಯಾ.)] ಕುಚ್ಛಿಂ ಮಹತೋ ಗಜಸ್ಸ, ಕುಣಪೇ ರತೋ ಹತ್ಥಿಮಂಸೇಸು ಗಿದ್ಧೋ [ಹತ್ಥಿಮಂಸೇ ಪಗಿದ್ಧೋ (ಸೀ. ಪೀ.)];

ಉಣ್ಹೋ ಚ ವಾತೋ ತಿಖಿಣಾ ಚ ರಸ್ಮಿಯೋ, ತೇ ಸೋಸಯುಂ ತಸ್ಸ ಕರೀಸಮಗ್ಗಂ.

೧೩೫. ಕಿಸೋ ಚ ಪಣ್ಡೂ ಚ ಅಹಂ ಭದನ್ತೇ, ನ ಮೇ ಅಹೂ ನಿಕ್ಖಮನಾಯ ಮಗ್ಗೋ;

ಮಹಾ ಚ ಮೇಘೋ ಸಹಸಾ ಪವಸ್ಸಿ, ಸೋ ತೇಮಯೀ ತಸ್ಸ ಕರೀಸಮಗ್ಗಂ.

೧೩೬. ತತೋ ಅಹಂ ನಿಕ್ಖಮಿಸಂ ಭದನ್ತೇ, ಚನ್ದೋ ಯಥಾ ರಾಹುಮುಖಾ ಪಮುತ್ತೋ;

ತಸ್ಮಾ ಅಹಂಪೋಸಥಂ ಪಾಲಯಾಮಿ, ಲೋಭೋ ಮಮಂ ಮಾ ಪುನರಾಗಮಾಸಿ.

೧೩೭. ವಮ್ಮೀಕಥೂಪಸ್ಮಿಂ ಕಿಪಿಲ್ಲಿಕಾನಿ, ನಿಪ್ಪೋಥಯನ್ತೋ ತುವಂ ಪುರೇ ಚರಾಸಿ;

ಖುದಂ ಪಿಪಾಸಂ ಅಧಿವಾಸಯನ್ತೋ, ಕಸ್ಮಾ ಭವಂಪೋಸಥಿಕೋ ನು ಅಚ್ಛ [ಅಚ್ಛೋ (ಸೀ. ಪೀ.)].

೧೩೮. ಸಕಂ ನಿಕೇತಂ ಅತಿಹೀಳಯಾನೋ [ಅತಿಹೇಳಯಾನೋ (ಸ್ಯಾ. ಕ.)], ಅತ್ರಿಚ್ಛತಾ [ಅತ್ರಿಚ್ಛತಾಯ (ಸೀ. ಸ್ಯಾ. ಪೀ.)] ಮಲ್ಲಗಾಮಂ [ಮಲತಂ (ಸೀ. ಪೀ.), ಮಲ್ಲಯತಂ (ಕ.)] ಅಗಚ್ಛಿಂ;

ತತೋ ಜನಾ ನಿಕ್ಖಮಿತ್ವಾನ ಗಾಮಾ, ಕೋದಣ್ಡಕೇನ ಪರಿಪೋಥಯಿಂಸು ಮಂ.

೧೩೯. ಸೋ ಭಿನ್ನಸೀಸೋ ರುಹಿರಮಕ್ಖಿತಙ್ಗೋ, ಪಚ್ಚಾಗಮಾಸಿಂ ಸಕಂ [ಸ ಸಕಂ (ಸ್ಯಾ. ಕ.),’ಥ ಸಕಂ (?)] ನಿಕೇತಂ;

ತಸ್ಮಾ ಅಹಂಪೋಸಥಂ ಪಾಲಯಾಮಿ, ಅತ್ರಿಚ್ಛತಾ ಮಾ ಪುನರಾಗಮಾಸಿ.

೧೪೦. ಯಂ ನೋ ಅಪುಚ್ಛಿತ್ಥ ತುವಂ ಭದನ್ತೇ, ಸಬ್ಬೇವ ಬ್ಯಾಕರಿಮ್ಹ ಯಥಾ ಪಜಾನಂ;

ಮಯಮ್ಪಿ ಪುಚ್ಛಾಮ ತುವಂ ಭದನ್ತೇ, ಕಸ್ಮಾ ಭವಂಪೋಸಥಿಕೋ ನು ಬ್ರಹ್ಮೇ.

೧೪೧. ಅನೂಪಲಿತ್ತೋ ಮಮ ಅಸ್ಸಮಮ್ಹಿ, ಪಚ್ಚೇಕಬುದ್ಧೋ ಮುಹುತ್ತಂ ನಿಸೀದಿ;

ಸೋ ಮಂ ಅವೇದೀ ಗತಿಮಾಗತಿಞ್ಚ, ನಾಮಞ್ಚ ಗೋತ್ತಂ ಚರಣಞ್ಚ ಸಬ್ಬಂ.

೧೪೨. ಏವಮ್ಪಹಂ ವನ್ದಿ ನ [ಏವಮ್ಪಹಂ ನಗ್ಗಹೇ (ಸೀ. ಪೀ.)] ತಸ್ಸ ಪಾದೇ, ನ ಚಾಪಿ ನಂ ಮಾನಗತೇನ ಪುಚ್ಛಿಂ;

ತಸ್ಮಾ ಅಹಂಪೋಸಥಂ ಪಾಲಯಾಮಿ, ಮಾನೋ ಮಮಂ ಮಾ ಪುನರಾಗಮಾಸೀತಿ.

ಪಞ್ಚುಪೋಸಥಿಕಜಾತಕಂ ಸತ್ತಮಂ.