೪೮೯. ಸುರುಚಿಜಾತಕಂ (೬)

೧೦೨. ಮಹೇಸೀ ಸುರುಚಿನೋ [ರುಚಿನೋ (ಸೀ. ಸ್ಯಾ. ಪೀ.)] ಭರಿಯಾ, ಆನೀತಾ ಪಠಮಂ ಅಹಂ;

ದಸ ವಸ್ಸಸಹಸ್ಸಾನಿ, ಯಂ ಮಂ ಸುರುಚಿಮಾನಯಿ.

೧೦೩. ಸಾಹಂ ಬ್ರಾಹ್ಮಣ ರಾಜಾನಂ, ವೇದೇಹಂ ಮಿಥಿಲಗ್ಗಹಂ;

ನಾಭಿಜಾನಾಮಿ ಕಾಯೇನ, ವಾಚಾಯ ಉದ ಚೇತಸಾ;

ಸುರುಚಿಂ ಅತಿಮಞ್ಞಿತ್ಥ [ಅತಿಮಞ್ಞಿತ್ಥೋ (ಸೀ. ಪೀ.), ಅತಿಮಞ್ಞಿತಾ (?)], ಆವಿ [ಆವಿಂ (ಸೀ. ಪೀ.)] ವಾ ಯದಿ ವಾ ರಹೋ.

೧೦೪. ಏತೇನ ಸಚ್ಚವಜ್ಜೇನ, ಪುತ್ತೋ ಉಪ್ಪಜ್ಜತಂ ಇಸೇ;

ಮುಸಾ ಮೇ ಭಣಮಾನಾಯ, ಮುದ್ಧಾ ಫಲತು ಸತ್ತಧಾ.

೧೦೫. ಭತ್ತು ಮಮ ಸಸ್ಸು ಮಾತಾ, ಪಿತಾ ಚಾಪಿ ಚ ಸಸ್ಸುರೋ;

ತೇ ಮಂ ಬ್ರಹ್ಮೇ ವಿನೇತಾರೋ, ಯಾವ ಅಟ್ಠಂಸು ಜೀವಿತಂ.

೧೦೬. ಸಾಹಂ ಅಹಿಂಸಾರತಿನೀ, ಕಾಮಸಾ [ಕಾಮಸೋ (ಸೀ.)] ಧಮ್ಮಚಾರಿನೀ [ಧಮ್ಮಚಾರಿಣೀ (ಸೀ.)];

ಸಕ್ಕಚ್ಚಂ ತೇ ಉಪಟ್ಠಾಸಿಂ, ರತ್ತಿನ್ದಿವಮತನ್ದಿತಾ.

೧೦೭. ಏತೇನ ಸಚ್ಚವಜ್ಜೇನ, ಪುತ್ತೋ ಉಪ್ಪಜ್ಜತಂ ಇಸೇ;

ಮುಸಾ ಮೇ ಭಣಮಾನಾಯ, ಮುದ್ಧಾ ಫಲತು ಸತ್ತಧಾ.

೧೦೮. ಸೋಳಸಿತ್ಥಿಸಹಸ್ಸಾನಿ, ಸಹಭರಿಯಾನಿ ಬ್ರಾಹ್ಮಣ;

ತಾಸು ಇಸ್ಸಾ ವಾ ಕೋಧೋ ವಾ, ನಾಹು ಮಯ್ಹಂ ಕುದಾಚನಂ.

೧೦೯. ಹಿತೇನ ತಾಸಂ ನನ್ದಾಮಿ, ನ ಚ ಮೇ ಕಾಚಿ ಅಪ್ಪಿಯಾ;

ಅತ್ತಾನಂವಾನುಕಮ್ಪಾಮಿ, ಸದಾ ಸಬ್ಬಾ ಸಪತ್ತಿಯೋ.

೧೧೦. ಏತೇನ ಸಚ್ಚವಜ್ಜೇನ, ಪುತ್ತೋ ಉಪ್ಪಜ್ಜತಂ ಇಸೇ;

ಮುಸಾ ಮೇ ಭಣಮಾನಾಯ, ಮುದ್ಧಾ ಫಲತು ಸತ್ತಧಾ.

೧೧೧. ದಾಸೇ ಕಮ್ಮಕರೇ ಪೇಸ್ಸೇ [ಪೋಸೇ (ಸ್ಯಾ. ಕ.)], ಯೇ ಚಞ್ಞೇ ಅನುಜೀವಿನೋ;

ಪೇಸೇಮಿ [ಪೋಸೇಮಿ (ಸೀ. ಸ್ಯಾ. ಪೀ.)] ಸಹಧಮ್ಮೇನ, ಸದಾ ಪಮುದಿತಿನ್ದ್ರಿಯಾ.

೧೧೨. ಏತೇನ ಸಚ್ಚವಜ್ಜೇನ, ಪುತ್ತೋ ಉಪ್ಪಜ್ಜತಂ ಇಸೇ;

ಮುಸಾ ಮೇ ಭಣಮಾನಾಯ, ಮುದ್ಧಾ ಫಲತು ಸತ್ತಧಾ.

೧೧೩. ಸಮಣೇ ಬ್ರಾಹ್ಮಣೇ ಚಾಪಿ, ಅಞ್ಞೇ ಚಾಪಿ ವನಿಬ್ಬಕೇ;

ತಪ್ಪೇಮಿ ಅನ್ನಪಾನೇನ, ಸದಾ ಪಯತಪಾಣಿನೀ.

೧೧೪. ಏತೇನ ಸಚ್ಚವಜ್ಜೇನ, ಪುತ್ತೋ ಉಪ್ಪಜ್ಜತಂ ಇಸೇ;

ಮುಸಾ ಮೇ ಭಣಮಾನಾಯ, ಮುದ್ಧಾ ಫಲತು ಸತ್ತಧಾ.

೧೧೫. ಚಾತುದ್ದಸಿಂ ಪಞ್ಚದ್ದಸಿಂ [ಪನ್ನರಸಿಂ (ಸೀ. ಪೀ.)], ಯಾ ಚ ಪಕ್ಖಸ್ಸ ಅಟ್ಠಮೀ [ಅಟ್ಠಮಿಂ (ಸೀ. ಪೀ.)];

ಪಾಟಿಹಾರಿಯಪಕ್ಖಞ್ಚ, ಅಟ್ಠಙ್ಗಸುಸಮಾಗತಂ [ಅಟ್ಠಙ್ಗಸುಸಮಾಹಿತಂ (ಸಬ್ಬತ್ಥ) ವಿ. ವ. ೧೨೯ ಪಾಳಿಯಾ ಅಟ್ಠಕಥಾ ಪಸ್ಸಿತಬ್ಬಾ];

ಉಪೋಸಥಂ ಉಪವಸಾಮಿ [ಉಪವಸಿಂ (ಕ.)], ಸದಾ ಸೀಲೇಸು ಸಂವುತಾ.

೧೧೬. ಏತೇನ ಸಚ್ಚವಜ್ಜೇನ, ಪುತ್ತೋ ಉಪ್ಪಜ್ಜತಂ ಇಸೇ;

ಮುಸಾ ಮೇ ಭಣಮಾನಾಯ, ಮುದ್ಧಾ ಫಲತು ಸತ್ತಧಾ.

೧೧೭. ಸಬ್ಬೇವ ತೇ ಧಮ್ಮಗುಣಾ, ರಾಜಪುತ್ತಿ ಯಸಸ್ಸಿನಿ;

ಸಂವಿಜ್ಜನ್ತಿ ತಯಿ ಭದ್ದೇ, ಯೇ ತ್ವಂ ಕಿತ್ತೇಸಿ ಅತ್ತನಿ.

೧೧೮. ಖತ್ತಿಯೋ ಜಾತಿಸಮ್ಪನ್ನೋ, ಅಭಿಜಾತೋ ಯಸಸ್ಸಿಮಾ;

ಧಮ್ಮರಾಜಾ ವಿದೇಹಾನಂ, ಪುತ್ತೋ ಉಪ್ಪಜ್ಜತೇ ತವ [ತವಂ (ಸೀ. ಪೀ.)].

೧೧೯. ದುಮ್ಮೀ [ರುಮ್ಮೀ (ಸೀ. ಪೀ.)] ರಜೋಜಲ್ಲಧರೋ, ಅಘೇ ವೇಹಾಯಸಂ ಠಿತೋ;

ಮನುಞ್ಞಂ ಭಾಸಸೇ ವಾಚಂ, ಯಂ ಮಯ್ಹಂ ಹದಯಙ್ಗಮಂ.

೧೨೦. ದೇವತಾನುಸಿ ಸಗ್ಗಮ್ಹಾ, ಇಸಿ ವಾಸಿ [ಚಾಪಿ (ಕ.)] ಮಹಿದ್ಧಿಕೋ;

ಕೋ ವಾಸಿ ತ್ವಂ ಅನುಪ್ಪತ್ತೋ, ಅತ್ತಾನಂ ಮೇ ಪವೇದಯ.

೧೨೧. ಯಂ ದೇವಸಙ್ಘಾ ವನ್ದನ್ತಿ, ಸುಧಮ್ಮಾಯಂ ಸಮಾಗತಾ;

ಸೋಹಂ ಸಕ್ಕೋ ಸಹಸ್ಸಕ್ಖೋ, ಆಗತೋಸ್ಮಿ ತವನ್ತಿಕೇ.

೧೨೨. ಇತ್ಥಿಯೋ [ಇತ್ಥಿಯಾ (ಪೀ.)] ಜೀವಲೋಕಸ್ಮಿಂ, ಯಾ ಹೋತಿ [ಹೋನ್ತಿ (ಸೀ. ಸ್ಯಾ.)] ಸಮಚಾರಿನೀ [ಸಮಚಾರಿಣೀ (ಸೀ.)];

ಮೇಧಾವಿನೀ ಸೀಲವತೀ, ಸಸ್ಸುದೇವಾ ಪತಿಬ್ಬತಾ.

೧೨೩. ತಾದಿಸಾಯ ಸುಮೇಧಾಯ, ಸುಚಿಕಮ್ಮಾಯ ನಾರಿಯಾ;

ದೇವಾ ದಸ್ಸನಮಾಯನ್ತಿ, ಮಾನುಸಿಯಾ ಅಮಾನುಸಾ.

೧೨೪. ತ್ವಞ್ಚ ಭದ್ದೇ ಸುಚಿಣ್ಣೇನ, ಪುಬ್ಬೇ ಸುಚರಿತೇನ ಚ;

ಇಧ ರಾಜಕುಲೇ ಜಾತಾ, ಸಬ್ಬಕಾಮಸಮಿದ್ಧಿನೀ.

೧೨೫. ಅಯಞ್ಚ ತೇ ರಾಜಪುತ್ತಿ, ಉಭಯತ್ಥ ಕಟಗ್ಗಹೋ;

ದೇವಲೋಕೂಪಪತ್ತೀ ಚ, ಕಿತ್ತೀ ಚ ಇಧ ಜೀವಿತೇ.

೧೨೬. ಚಿರಂ ಸುಮೇಧೇ ಸುಖಿನೀ, ಧಮ್ಮಮತ್ತನಿ ಪಾಲಯ;

ಏಸಾಹಂ ತಿದಿವಂ ಯಾಮಿ, ಪಿಯಂ ಮೇ ತವ ದಸ್ಸನನ್ತಿ.

ಸುರುಚಿಜಾತಕಂ ಛಟ್ಠಂ.