೪೮೮. ಭಿಸಜಾತಕಂ (೫)

೭೮. ಅಸ್ಸಂ ಗವಂ ರಜತಂ ಜಾತರೂಪಂ, ಭರಿಯಞ್ಚ ಸೋ ಇಧ ಲಭತಂ ಮನಾಪಂ;

ಪುತ್ತೇಹಿ ದಾರೇಹಿ ಸಮಙ್ಗಿ ಹೋತು, ಭಿಸಾನಿ ತೇ ಬ್ರಾಹ್ಮಣ ಯೋ ಅಹಾಸಿ.

೭೯. ಮಾಲಞ್ಚ ಸೋ ಕಾಸಿಕಚನ್ದನಞ್ಚ, ಧಾರೇತು ಪುತ್ತಸ್ಸ ಬಹೂ ಭವನ್ತು;

ಕಾಮೇಸು ತಿಬ್ಬಂ ಕುರುತಂ ಅಪೇಕ್ಖಂ, ಭಿಸಾನಿ ತೇ ಬ್ರಾಹ್ಮಣ ಯೋ ಅಹಾಸಿ.

೮೦. ಪಹೂತಧಞ್ಞೋ ಕಸಿಮಾ ಯಸಸ್ಸೀ, ಪುತ್ತೇ ಗಿಹೀ ಧನಿಮಾ ಸಬ್ಬಕಾಮೇ;

ವಯಂ ಅಪಸ್ಸಂ ಘರಮಾವಸಾತು, ಭಿಸಾನಿ ತೇ ಬ್ರಾಹ್ಮಣ ಯೋ ಅಹಾಸಿ.

೮೧. ಸೋ ಖತ್ತಿಯೋ ಹೋತು ಪಸಯ್ಹಕಾರೀ, ರಾಜಾಭಿರಾಜಾ [ರಾಜಾಧಿರಾಜಾ (ಸ್ಯಾ. ಕ.)] ಬಲವಾ ಯಸಸ್ಸೀ;

ಸ ಚಾತುರನ್ತಂ ಮಹಿಮಾವಸಾತು, ಭಿಸಾನಿ ತೇ ಬ್ರಾಹ್ಮಣ ಯೋ ಅಹಾಸಿ.

೮೨. ಸೋ ಬ್ರಾಹ್ಮಣೋ ಹೋತು ಅವೀತರಾಗೋ, ಮುಹುತ್ತನಕ್ಖತ್ತಪಥೇಸು ಯುತ್ತೋ;

ಪೂಜೇತು ನಂ ರಟ್ಠಪತೀ ಯಸಸ್ಸೀ, ಭಿಸಾನಿ ತೇ ಬ್ರಾಹ್ಮಣ ಯೋ ಅಹಾಸಿ.

೮೩. ಅಜ್ಝಾಯಕಂ ಸಬ್ಬಸಮನ್ತವೇದಂ [ಸಬ್ಬಸಮತ್ತವೇದಂ (ಸೀ.), ಸಬ್ಬಸಮತ್ತವೇದನಂ (ಪೀ.)], ತಪಸ್ಸೀನಂ ಮಞ್ಞತು ಸಬ್ಬಲೋಕೋ;

ಪೂಜೇನ್ತು ನಂ ಜಾನಪದಾ ಸಮೇಚ್ಚ, ಭಿಸಾನಿ ತೇ ಬ್ರಾಹ್ಮಣ ಯೋ ಅಹಾಸಿ.

೮೪. ಚತುಸ್ಸದಂ ಗಾಮವರಂ ಸಮಿದ್ಧಂ, ದಿನ್ನಞ್ಹಿ ಸೋ ಭುಞ್ಜತು ವಾಸವೇನ;

ಅವೀತರಾಗೋ ಮರಣಂ ಉಪೇತು, ಭಿಸಾನಿ ತೇ ಬ್ರಾಹ್ಮಣ ಯೋ ಅಹಾಸಿ.

೮೫. ಸೋ ಗಾಮಣೀ ಹೋತು ಸಹಾಯಮಜ್ಝೇ, ನಚ್ಚೇಹಿ ಗೀತೇಹಿ ಪಮೋದಮಾನೋ;

ಸೋ ರಾಜತೋ ಬ್ಯಸನ ಮಾಲತ್ಥ [ಮಾ ರಾಜತೋ ವ್ಯಸನ’ಮಲತ್ಥ (ಸೀ. ಸ್ಯಾ. ಪೀ.)] ಕಿಞ್ಚಿ, ಭಿಸಾನಿ ತೇ ಬ್ರಾಹ್ಮಣ ಯೋ ಅಹಾಸಿ.

೮೬. ಯಂ ಏಕರಾಜಾ ಪಥವಿಂ ವಿಜೇತ್ವಾ, ಇತ್ಥೀಸಹಸ್ಸಾನ [ಇತ್ಥೀಸಹಸ್ಸಸ್ಸ (ಸೀ. ಪೀ.)] ಠಪೇತು ಅಗ್ಗಂ;

ಸೀಮನ್ತಿನೀನಂ ಪವರಾ ಭವಾತು, ಭಿಸಾನಿ ತೇ ಬ್ರಾಹ್ಮಣ ಯಾ ಅಹಾಸಿ.

೮೭. ಇಸೀನಞ್ಹಿ ಸಾ ಸಬ್ಬಸಮಾಗತಾನಂ, ಭುಞ್ಜೇಯ್ಯ ಸಾದುಂ ಅವಿಕಮ್ಪಮಾನಾ;

ಚರಾತು ಲಾಭೇನ ವಿಕತ್ಥಮಾನಾ, ಭಿಸಾನಿ ತೇ ಬ್ರಾಹ್ಮಣ ಯಾ ಅಹಾಸಿ.

೮೮. ಆವಾಸಿಕೋ ಹೋತು ಮಹಾವಿಹಾರೇ, ನವಕಮ್ಮಿಕೋ ಹೋತು ಗಜಙ್ಗಲಾಯಂ [ಕಜಙ್ಗಲಾಯಂ (ಸೀ. ಸ್ಯಾ. ಪೀ.)];

ಆಲೋಕಸನ್ಧಿಂ ದಿವಸಂ [ದಿವಸಾ (ಸೀ. ಸ್ಯಾ. ಪೀ.)] ಕರೋತು, ಭಿಸಾನಿ ತೇ ಬ್ರಾಹ್ಮಣ ಯೋ ಅಹಾಸಿ.

೮೯. ಸೋ ಬಜ್ಝತೂ ಪಾಸಸತೇಹಿ ಛಬ್ಭಿ [ಛಮ್ಹಿ (ಸೀ. ಪೀ.), ಛಸ್ಸು (?)], ರಮ್ಮಾ ವನಾ ನಿಯ್ಯತು ರಾಜಧಾನಿಂ [ರಾಜಠಾನಿಂ (ಕ.)];

ತುತ್ತೇಹಿ ಸೋ ಹಞ್ಞತು ಪಾಚನೇಹಿ, ಭಿಸಾನಿ ತೇ ಬ್ರಾಹ್ಮಣ ಯೋ ಅಹಾಸಿ.

೯೦. ಅಲಕ್ಕಮಾಲೀ ತಿಪುಕಣ್ಣವಿದ್ಧೋ, ಲಟ್ಠೀಹತೋ ಸಪ್ಪಮುಖಂ ಉಪೇತು;

ಸಕಚ್ಛಬನ್ಧೋ [ಸಕ್ಕಚ್ಚಬದ್ಧೋ (ಸೀ. ಪೀ.), ಸಂಕಚ್ಚಬನ್ಧೋ (ನಿಯ್ಯ)] ವಿಸಿಖಂ ಚರಾತು, ಭಿಸಾನಿ ತೇ ಬ್ರಾಹ್ಮಣ ಯೋ ಅಹಾಸಿ.

೯೧. ಯೋ ವೇ ಅನಟ್ಠಂವ [ಅನಟ್ಠಂ (ಸೀ. ಸ್ಯಾ. ಪೀ.)] ನಟ್ಠನ್ತಿ ಚಾಹ, ಕಾಮೇವ ಸೋ ಲಭತಂ ಭುಞ್ಜತಞ್ಚ [ಲಭತು ಭುಞ್ಜತು ಚ (ಸ್ಯಾ.)];

ಅಗಾರಮಜ್ಝೇ ಮರಣಂ ಉಪೇತು, ಯೋ ವಾ ಭೋನ್ತೋ ಸಙ್ಕತಿ ಕಞ್ಚಿದೇವ [ಕಿಞ್ಚಿದೇವ (ಕ.)].

೯೨. ಯದೇಸಮಾನಾ ವಿಚರನ್ತಿ ಲೋಕೇ, ಇಟ್ಠಞ್ಚ ಕನ್ತಞ್ಚ ಬಹೂನಮೇತಂ;

ಪಿಯಂ ಮನುಞ್ಞಂ ಚಿಧ ಜೀವಲೋಕೇ, ಕಸ್ಮಾ ಇಸಯೋ ನಪ್ಪಸಂಸನ್ತಿ ಕಾಮೇ.

೯೩. ಕಾಮೇಸು ವೇ ಹಞ್ಞರೇ ಬಜ್ಝರೇ ಚ, ಕಾಮೇಸು ದುಕ್ಖಞ್ಚ ಭಯಞ್ಚ ಜಾತಂ;

ಕಾಮೇಸು ಭೂತಾಧಿಪತೀ ಪಮತ್ತಾ, ಪಾಪಾನಿ ಕಮ್ಮಾನಿ ಕರೋನ್ತಿ ಮೋಹಾ.

೯೪. ತೇ ಪಾಪಧಮ್ಮಾ ಪಸವೇತ್ವ ಪಾಪಂ, ಕಾಯಸ್ಸ ಭೇದಾ ನಿರಯಂ ವಜನ್ತಿ;

ಆದೀನವಂ ಕಾಮಗುಣೇಸು ದಿಸ್ವಾ, ತಸ್ಮಾ ಇಸಯೋ ನಪ್ಪಸಂಸನ್ತಿ ಕಾಮೇ.

೯೫. ವೀಮಂಸಮಾನೋ ಇಸಿನೋ ಭಿಸಾನಿ, ತೀರೇ ಗಹೇತ್ವಾನ ಥಲೇ ನಿಧೇಸಿಂ;

ಸುದ್ಧಾ ಅಪಾಪಾ ಇಸಯೋ ವಸನ್ತಿ, ಏತಾನಿ ತೇ ಬ್ರಹ್ಮಚಾರೀ ಭಿಸಾನಿ.

೯೬. ನ ತೇ ನಟಾ ನೋ ಪನ ಕೀಳನೇಯ್ಯಾ, ನ ಬನ್ಧವಾ ನೋ ಪನ ತೇ ಸಹಾಯಾ;

ಕಿಸ್ಮಿಂ ವುಪತ್ಥಮ್ಭ ಸಹಸ್ಸನೇತ್ತ, ಇಸೀಹಿ ತ್ವಂ ಕೀಳಸಿ ದೇವರಾಜ.

೯೭. ಆಚರಿಯೋ ಮೇಸಿ ಪಿತಾ ಚ ಮಯ್ಹಂ, ಏಸಾ ಪತಿಟ್ಠಾ ಖಲಿತಸ್ಸ ಬ್ರಹ್ಮೇ;

ಏಕಾಪರಾಧಂ ಖಮ ಭೂರಿಪಞ್ಞ, ನ ಪಣ್ಡಿತಾ ಕೋಧಬಲಾ ಭವನ್ತಿ.

೯೮. ಸುವಾಸಿತಂ ಇಸಿನಂ ಏಕರತ್ತಂ, ಯಂ ವಾಸವಂ ಭೂತಪತಿದ್ದಸಾಮ;

ಸಬ್ಬೇವ ಭೋನ್ತೋ ಸುಮನಾ ಭವನ್ತು, ಯಂ ಬ್ರಾಹ್ಮಣೋ ಪಚ್ಚುಪಾದೀ ಭಿಸಾನಿ.

೯೯. ಅಹಞ್ಚ ಸಾರಿಪುತ್ತೋ ಚ, ಮೋಗ್ಗಲ್ಲಾನೋ ಚ ಕಸ್ಸಪೋ;

ಅನುರುದ್ಧೋ ಪುಣ್ಣೋ ಆನನ್ದೋ, ತದಾಸುಂ ಸತ್ತ ಭಾತರೋ.

೧೦೦. ಭಗಿನೀ ಉಪ್ಪಲವಣ್ಣಾ ಚ, ದಾಸೀ ಖುಜ್ಜುತ್ತರಾ ತದಾ;

ಚಿತ್ತೋ ಗಹಪತಿ ದಾಸೋ, ಯಕ್ಖೋ ಸಾತಾಗಿರೋ ತದಾ.

೧೦೧. ಪಾಲಿಲೇಯ್ಯೋ [ಪಾರಿಲೇಯ್ಯೋ (ಸೀ. ಪೀ.)] ತದಾ ನಾಗೋ, ಮಧುದೋ [ಮಧುವಾ (ಸೀ. ಪೀ.)] ಸೇಟ್ಠವಾನರೋ;

ಕಾಳುದಾಯೀ ತದಾ ಸಕ್ಕೋ, ಏವಂ ಧಾರೇಥ ಜಾತಕನ್ತಿ.

ಭಿಸಜಾತಕಂ ಪಞ್ಚಮಂ.