೪೮೭. ಉದ್ದಾಲಕಜಾತಕಂ (೪)

೬೨. ಖರಾಜಿನಾ ಜಟಿಲಾ ಪಙ್ಕದನ್ತಾ, ದುಮ್ಮಕ್ಖರೂಪಾ [ದುಮ್ಮುಧರೂಪಾ (ಸೀ. ಪೀ. ಕ.)] ಯೇ ಮನ್ತಂ ಜಪ್ಪನ್ತಿ [ಯೇಮೇ ಜಪನ್ತಿ (ಸೀ. ಪೀ.), ಯೇ’ಮೇ ಜಪ್ಪನ್ತಿ ಮನ್ತೇ (ಜಾ. ೧.೬.೧೦)];

ಕಚ್ಚಿನ್ನು ತೇ ಮಾನುಸಕೇ ಪಯೋಗೇ, ಇದಂ ವಿದೂ ಪರಿಮುತ್ತಾ ಅಪಾಯಾ.

೬೩. ಪಾಪಾನಿ ಕಮ್ಮಾನಿ ಕರೇಥ [ಕರೇಯ್ಯ (ಸ್ಯಾ.), ಕತ್ವಾನ (ಜಾ. ೧.೬.೧೧)] ರಾಜ, ಬಹುಸ್ಸುತೋ ಚೇ ನ ಚರೇಯ್ಯ ಧಮ್ಮಂ;

ಸಹಸ್ಸವೇದೋಪಿ ನ ತಂ ಪಟಿಚ್ಚ, ದುಕ್ಖಾ ಪಮುಚ್ಚೇ [ಪಮುಞ್ಚೇ (ಸ್ಯಾ.)] ಚರಣಂ ಅಪತ್ವಾ.

೬೪. ಸಹಸ್ಸವೇದೋಪಿ ನ ತಂ ಪಟಿಚ್ಚ, ದುಕ್ಖಾ ಪಮುಚ್ಚೇ ಚರಣಂ ಅಪತ್ವಾ;

ಮಞ್ಞಾಮಿ ವೇದಾ ಅಫಲಾ ಭವನ್ತಿ, ಸಸಂಯಮಂ ಚರಣಞ್ಞೇವ ಸಚ್ಚಂ.

೬೫. ನ ಹೇವ ವೇದಾ ಅಫಲಾ ಭವನ್ತಿ, ಸಸಂಯಮಂ ಚರಣಞ್ಞೇವ ಸಚ್ಚಂ;

ಕಿತ್ತಿಞ್ಹಿ [ಕಿತ್ತಿಞ್ಚ (ಸ್ಯಾ.)] ಪಪ್ಪೋತಿ ಅಧಿಚ್ಚ ವೇದೇ, ಸನ್ತಿಂ ಪುಣಾತಿ [ಪುನೋತಿ (ಸೀ. ಅಟ್ಠ.), ಪುಣೇತಿ (ಸ್ಯಾ. ಜಾ. ೧.೬.೧೩), ಪುನೇತಿ (ಪೀ.)] ಚರಣೇನ ದನ್ತೋ.

೬೬. ಭಚ್ಚಾ ಮಾತಾ ಪಿತಾ ಬನ್ಧೂ, ಯೇನ ಜಾತೋ ಸಯೇವ ಸೋ;

ಉದ್ದಾಲಕೋ ಅಹಂ ಭೋತೋ [ಭೋತಿ (ಕ.)], ಸೋತ್ತಿಯಾಕುಲವಂಸಕೋ [ವಂಸತೋ (ಕ.)].

೬೭. ಕಥಂ ಭೋ ಬ್ರಾಹ್ಮಣೋ ಹೋತಿ, ಕಥಂ ಭವತಿ ಕೇವಲೀ;

ಕಥಞ್ಚ ಪರಿನಿಬ್ಬಾನಂ, ಧಮ್ಮಟ್ಠೋ ಕಿನ್ತಿ ವುಚ್ಚತಿ.

೬೮. ನಿರಂಕತ್ವಾ ಅಗ್ಗಿಮಾದಾಯ ಬ್ರಾಹ್ಮಣೋ, ಆಪೋ ಸಿಞ್ಚಂ ಯಜಂ ಉಸ್ಸೇತಿ ಯೂಪಂ;

ಏವಂಕರೋ ಬ್ರಾಹ್ಮಣೋ ಹೋತಿ ಖೇಮೀ, ಧಮ್ಮೇ ಠಿತಂ ತೇನ ಅಮಾಪಯಿಂಸು.

೬೯. ನ ಸುದ್ಧಿ ಸೇಚನೇನತ್ಥಿ, ನಾಪಿ ಕೇವಲೀ ಬ್ರಾಹ್ಮಣೋ;

ನ ಖನ್ತೀ ನಾಪಿ ಸೋರಚ್ಚಂ, ನಾಪಿ ಸೋ ಪರಿನಿಬ್ಬುತೋ.

೭೦. ಕಥಂ ಸೋ [ಭೋ (ಸ್ಯಾ. ಕ.)] ಬ್ರಾಹ್ಮಣೋ ಹೋತಿ, ಕಥಂ ಭವತಿ ಕೇವಲೀ;

ಕಥಞ್ಚ ಪರಿನಿಬ್ಬಾನಂ, ಧಮ್ಮಟ್ಠೋ ಕಿನ್ತಿ ವುಚ್ಚತಿ.

೭೧. ಅಖೇತ್ತಬನ್ಧೂ ಅಮಮೋ ನಿರಾಸೋ, ನಿಲ್ಲೋಭಪಾಪೋ ಭವಲೋಭಖೀಣೋ;

ಏವಂಕರೋ ಬ್ರಾಹ್ಮಣೋ ಹೋತಿ ಖೇಮೀ, ಧಮ್ಮೇ ಠಿತಂ ತೇನ ಅಮಾಪಯಿಂಸು.

೭೨. ಖತ್ತಿಯಾ ಬ್ರಾಹ್ಮಣಾ ವೇಸ್ಸಾ, ಸುದ್ದಾ ಚಣ್ಡಾಲಪುಕ್ಕುಸಾ;

ಸಬ್ಬೇವ ಸೋರತಾ ದನ್ತಾ, ಸಬ್ಬೇವ ಪರಿನಿಬ್ಬುತಾ;

ಸಬ್ಬೇಸಂ ಸೀತಿಭೂತಾನಂ, ಅತ್ಥಿ ಸೇಯ್ಯೋಥ [ಸೇಯ್ಯೋವ (ಸೀ. ಪೀ.)] ಪಾಪಿಯೋ.

೭೩. ಖತ್ತಿಯಾ ಬ್ರಾಹ್ಮಣಾ ವೇಸ್ಸಾ, ಸುದ್ದಾ ಚಣ್ಡಾಲಪುಕ್ಕುಸಾ;

ಸಬ್ಬೇವ ಸೋರತಾ ದನ್ತಾ, ಸಬ್ಬೇವ ಪರಿನಿಬ್ಬುತಾ;

ಸಬ್ಬೇಸಂ ಸೀತಿಭೂತಾನಂ, ನತ್ಥಿ ಸೇಯ್ಯೋಥ ಪಾಪಿಯೋ.

೭೪. ಖತ್ತಿಯಾ ಬ್ರಾಹ್ಮಣಾ ವೇಸ್ಸಾ, ಸುದ್ದಾ ಚಣ್ಡಾಲಪುಕ್ಕುಸಾ;

ಸಬ್ಬೇವ ಸೋರತಾ ದನ್ತಾ, ಸಬ್ಬೇವ ಪರಿನಿಬ್ಬುತಾ.

೭೫. ಸಬ್ಬೇಸಂ ಸೀತಿಭೂತಾನಂ, ನತ್ಥಿ ಸೇಯ್ಯೋಥ ಪಾಪಿಯೋ;

ಪನತ್ಥಂ [ಪಸತ್ಥಂ (ಸ್ಯಾ.), ಪಸಟ್ಠಂ (ಕ.)] ಚರಸಿ ಬ್ರಹ್ಮಞ್ಞಂ, ಸೋತ್ತಿಯಾಕುಲವಂಸತಂ.

೭೬. ನಾನಾರತ್ತೇಹಿ ವತ್ಥೇಹಿ, ವಿಮಾನಂ ಭವತಿ ಛಾದಿತಂ;

ನ ತೇಸಂ ಛಾಯಾ ವತ್ಥಾನಂ, ಸೋ ರಾಗೋ ಅನುಪಜ್ಜಥ.

೭೭. ಏವಮೇವ [ಏವಮೇವಂ (ಪೀ.)] ಮನುಸ್ಸೇಸು, ಯದಾ ಸುಜ್ಝನ್ತಿ ಮಾಣವಾ;

ತೇ ಸಜಾತಿಂ ಪಮುಞ್ಚನ್ತಿ [ನ ತೇಸಂ ಜಾತಿಂ ಪುಚ್ಛನ್ತಿ (ಸೀ. ಸ್ಯಾ. ಪೀ.), ನ ತೇಸಂ ಜಾತಿ ಸುಜ್ಝತಿ (ಕ.)], ಧಮ್ಮಮಞ್ಞಾಯ ಸುಬ್ಬತಾತಿ.

ಉದ್ದಾಲಕಜಾತಕಂ ಚತುತ್ಥಂ.