೪೮೬. ಮಹಾಉಕ್ಕುಸಜಾತಕಂ (೩)

೪೪. ಉಕ್ಕಾ ಚಿಲಾಚಾ [ಮಿಲಾಚಾ (ಸೀ. ಸ್ಯಾ. ಪೀ.)] ಬನ್ಧನ್ತಿ ದೀಪೇ [ಬನ್ಧನ್ತಿ ಲುದ್ದಾ, ದೀಪೇ (ಕ.)], ಪಜಾ ಮಮಂ ಖಾದಿತುಂ ಪತ್ಥಯನ್ತಿ;

ಮಿತ್ತಂ ಸಹಾಯಞ್ಚ ವದೇಹಿ ಸೇನಕ, ಆಚಿಕ್ಖ ಞಾತಿಬ್ಯಸನಂ ದಿಜಾನಂ.

೪೫. ದಿಜೋ ದಿಜಾನಂ ಪವರೋಸಿ ಪಕ್ಖಿಮ [ಪಕ್ಖಿ (ಸೀ. ಪೀ.), ಪಕ್ಖಿ ಚ (ಸ್ಯಾ.)], ಉಕ್ಕುಸರಾಜ ಸರಣಂ ತಂ ಉಪೇಮ [ಉಪೇಮಿ (ಸೀ. ಸ್ಯಾ. ಪೀ.)];

ಪಜಾ ಮಮಂ ಖಾದಿತುಂ ಪತ್ಥಯನ್ತಿ, ಲುದ್ದಾ ಚಿಲಾಚಾ [ಮಿಲಾಚಾ (ಸೀ. ಸ್ಯಾ. ಪೀ.)] ಭವ ಮೇ ಸುಖಾಯ.

೪೬. ಮಿತ್ತಂ ಸಹಾಯಞ್ಚ ಕರೋನ್ತಿ ಪಣ್ಡಿತಾ, ಕಾಲೇ ಅಕಾಲೇ ಸುಖಮೇಸಮಾನಾ [ಮಾಸಯಾನಾ (ಪೀ.)];

ಕರೋಮಿ ತೇ ಸೇನಕ ಏತಮತ್ಥಂ, ಅರಿಯೋ ಹಿ ಅರಿಯಸ್ಸ ಕರೋತಿ ಕಿಚ್ಚಂ.

೪೭. ಯಂ ಹೋತಿ ಕಿಚ್ಚಂ ಅನುಕಮ್ಪಕೇನ, ಅರಿಯಸ್ಸ ಅರಿಯೇನ ಕತಂ ತಯೀದಂ [ತವ ಯಿದಂ (ಸೀ. ಪೀ.)];

ಅತ್ತಾನುರಕ್ಖೀ ಭವ ಮಾ ಅದಯ್ಹಿ [ಅಡಯ್ಹ (ಸೀ. ಪೀ.)], ಲಚ್ಛಾಮ ಪುತ್ತೇ ತಯಿ ಜೀವಮಾನೇ.

೪೮. ತವೇವ [ತಮೇವ (ಸ್ಯಾ. ಕ.)] ರಕ್ಖಾವರಣಂ ಕರೋನ್ತೋ, ಸರೀರಭೇದಾಪಿ ನ ಸನ್ತಸಾಮಿ;

ಕರೋನ್ತಿ ಹೇಕೇ [ಹೇತೇ (ಕ. ಸೀ. ಸ್ಯಾ. ಪೀ.)] ಸಖೀನಂ ಸಖಾರೋ, ಪಾಣಂ ಚಜನ್ತಾ [ಚಜನ್ತಿ (ಸೀ. ಪೀ.)] ಸತಮೇಸ [ಸತಾನೇಸ (ಪೀ.)] ಧಮ್ಮೋ.

೪೯. ಸುದುಕ್ಕರಂ ಕಮ್ಮಮಕಾಸಿ [ಮಕಾ (ಸೀ. ಪೀ.)], ಅಣ್ಡಜಾಯಂ ವಿಹಙ್ಗಮೋ;

ಅತ್ಥಾಯ ಕುರರೋ ಪುತ್ತೇ, ಅಡ್ಢರತ್ತೇ ಅನಾಗತೇ.

೫೦. ಚುತಾಪಿ ಹೇಕೇ [ಏಕೇ (ಸೀ. ಪೀ.)] ಖಲಿತಾ ಸಕಮ್ಮುನಾ, ಮಿತ್ತಾನುಕಮ್ಪಾಯ ಪತಿಟ್ಠಹನ್ತಿ;

ಪುತ್ತಾ ಮಮಟ್ಟಾ ಗತಿಮಾಗತೋಸ್ಮಿ, ಅತ್ಥಂ ಚರೇಥೋ [ಚರೇಥ (ಸೀ. ಸ್ಯಾ. ಪೀ.)] ಮಮ ವಾರಿಚರ [ವಾರಿಛನ್ನ (ಸೀ. ಪೀ.)].

೫೧. ಧನೇನ ಧಞ್ಞೇನ ಚ ಅತ್ತನಾ ಚ, ಮಿತ್ತಂ ಸಹಾಯಞ್ಚ ಕರೋನ್ತಿ ಪಣ್ಡಿತಾ;

ಕರೋಮಿ ತೇ ಸೇನಕ ಏತಮತ್ಥಂ, ಅರಿಯೋ ಹಿ ಅರಿಯಸ್ಸ ಕರೋತಿ ಕಿಚ್ಚಂ.

೫೨. ಅಪ್ಪೋಸ್ಸುಕ್ಕೋ ತಾತ ತುವಂ ನಿಸೀದ, ಪುತ್ತೋ ಪಿತು ಚರತಿ ಅತ್ಥಚರಿಯಂ;

ಅಹಂ ಚರಿಸ್ಸಾಮಿ ತವೇತಮತ್ಥಂ, ಸೇನಸ್ಸ ಪುತ್ತೇ ಪರಿತಾಯಮಾನೋ.

೫೩. ಅದ್ಧಾ ಹಿ ತಾತ ಸತಮೇಸ ಧಮ್ಮೋ, ಪುತ್ತೋ ಪಿತು ಯಂ ಚರೇ [ಪಿತುನಂ ಚರೇ (ಕ.), ಪಿತು ಯಞ್ಚರೇಥ (ಸೀ. ಪೀ.)] ಅತ್ಥಚರಿಯಂ;

ಅಪ್ಪೇವ ಮಂ ದಿಸ್ವಾನ ಪವಡ್ಢಕಾಯಂ, ಸೇನಸ್ಸ ಪುತ್ತಾ ನ ವಿಹೇಠಯೇಯ್ಯುಂ.

೫೪. ಪಸೂ ಮನುಸ್ಸಾ ಮಿಗವೀರಸೇಟ್ಠ [ಮಿಗವಿರಿಯಸೇಟ್ಠ (ಸೀ. ಪೀ.)], ಭಯಟ್ಟಿತಾ [ಭಯದ್ದಿತಾ (ಸೀ. ಪೀ.)] ಸೇಟ್ಠಮುಪಬ್ಬಜನ್ತಿ;

ಪುತ್ತಾ ಮಮಟ್ಟಾ ಗತಿಮಾಗತೋಸ್ಮಿ, ತ್ವಂ ನೋಸಿ ರಾಜಾ ಭವ ಮೇ ಸುಖಾಯ.

೫೫. ಕರೋಮಿ ತೇ ಸೇನಕ ಏತಮತ್ಥಂ, ಆಯಾಮಿ ತೇ ತಂ ದಿಸತಂ ವಧಾಯ;

ಕಥಞ್ಹಿ ವಿಞ್ಞೂ ಪಹು ಸಮ್ಪಜಾನೋ, ನ ವಾಯಮೇ ಅತ್ತಜನಸ್ಸ ಗುತ್ತಿಯಾ.

೫೬. ಮಿತ್ತಞ್ಚ ಕಯಿರಾಥ ಸುಹದಯಞ್ಚ [ಸುಹದ್ದಯಞ್ಚ (ಸೀ.), ಸಖಾಘರಞ್ಚ (ಪೀ.)], ಅಯಿರಞ್ಚ ಕಯಿರಾಥ ಸುಖಾಗಮಾಯ;

ನಿವತ್ಥಕೋಚೋವ [ಕೋಜೋವ (ಸೀ. ಪೀ.)] ಸರೇಭಿಹನ್ತ್ವಾ, ಮೋದಾಮ ಪುತ್ತೇಹಿ ಸಮಙ್ಗಿಭೂತಾ.

೫೭. ಸಕಮಿತ್ತಸ್ಸ ಕಮ್ಮೇನ, ಸಹಾಯಸ್ಸಾಪಲಾಯಿನೋ;

ಕೂಜನ್ತಮುಪಕೂಜನ್ತಿ, ಲೋಮಸಾ ಹದಯಙ್ಗಮಂ.

೫೮. ಮಿತ್ತಂ ಸಹಾಯಂ ಅಧಿಗಮ್ಮ ಪಣ್ಡಿತೋ, ಸೋ ಭುಞ್ಜತೀ ಪುತ್ತ ಪಸುಂ ಧನಂ ವಾ;

ಅಹಞ್ಚ ಪುತ್ತಾ ಚ ಪತೀ ಚ ಮಯ್ಹಂ, ಮಿತ್ತಾನುಕಮ್ಪಾಯ ಸಮಙ್ಗಿಭೂತಾ.

೫೯. ರಾಜವತಾ ಸೂರವತಾ ಚ ಅತ್ಥೋ, ಸಮ್ಪನ್ನಸಖಿಸ್ಸ ಭವನ್ತಿ ಹೇತೇ;

ಸೋ ಮಿತ್ತವಾ ಯಸವಾ ಉಗ್ಗತತ್ತೋ, ಅಸ್ಮಿಂಧಲೋಕೇ [ಅಸ್ಮಿಞ್ಚ ಲೋಕೇ (ಸೀ. ಸ್ಯಾ. ಪೀ.)] ಮೋದತಿ ಕಾಮಕಾಮೀ.

೬೦. ಕರಣೀಯಾನಿ ಮಿತ್ತಾನಿ, ದಲಿದ್ದೇನಾಪಿ ಸೇನಕ;

ಪಸ್ಸ ಮಿತ್ತಾನುಕಮ್ಪಾಯ, ಸಮಗ್ಗಮ್ಹಾ ಸಞಾತಕೇ [ಸಞಾತಕಾ (?)].

೬೧. ಸೂರೇನ ಬಲವನ್ತೇನ, ಯೋ ಮಿತ್ತೇ [ಮೇತ್ತೇ (ಸೀ.), ಮಿತ್ತಂ (ಸ್ಯಾ.)] ಕುರುತೇ ದಿಜೋ;

ಏವಂ ಸೋ ಸುಖಿತೋ ಹೋತಿ, ಯಥಾಹಂ ತ್ವಞ್ಚ ಸೇನಕಾತಿ.

ಮಹಾಉಕ್ಕುಸಜಾತಕಂ ತತಿಯಂ.