೪೮೩. ಸರಭಮಿಗಜಾತಕಂ (೧೦)

೧೩೪. ಆಸೀಸೇಥೇವ [ಆಸಿಂಸೇಥೇವ (ಸೀ. ಸ್ಯಾ. ಪೀ.)] ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ಪಸ್ಸಾಮಿ ವೋಹಂ ಅತ್ತಾನಂ, ಯಥಾ ಇಚ್ಛಿಂ ತಥಾ ಅಹು.

೧೩೫. ಆಸೀಸೇಥೇವ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ಪಸ್ಸಾಮಿ ವೋಹಂ ಅತ್ತಾನಂ, ಉದಕಾ ಥಲಮುಬ್ಭತಂ.

೧೩೬. ವಾಯಮೇಥೇವ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ಪಸ್ಸಾಮಿ ವೋಹಂ ಅತ್ತಾನಂ, ಯಥಾ ಇಚ್ಛಿಂ ತಥಾ ಅಹು.

೧೩೭. ವಾಯಮೇಥೇವ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ಪಸ್ಸಾಮಿ ವೋಹಂ ಅತ್ತಾನಂ, ಉದಕಾ ಥಲಮುಬ್ಭತಂ.

೧೩೮. ದುಕ್ಖೂಪನೀತೋಪಿ ನರೋ ಸಪಞ್ಞೋ, ಆಸಂ ನ ಛಿನ್ದೇಯ್ಯ ಸುಖಾಗಮಾಯ;

ಬಹೂ ಹಿ ಫಸ್ಸಾ ಅಹಿತಾ ಹಿತಾ ಚ, ಅವಿತಕ್ಕಿತಾ ಮಚ್ಚಮುಪಬ್ಬಜನ್ತಿ [ಮಚ್ಚುಮುಪಬ್ಬಜನ್ತಿ (ಕ. ಸೀ. ಪೀ.), ಮಚ್ಚುಮುಪಪಜ್ಜನ್ತಿ (ಸ್ಯಾ. ಕ.) ಏತ್ಥ ‘‘ಅವಿತಕ್ಕಿತಾಪಿ ಫಸ್ಸೋ ಮಚ್ಚಂ ಜನಂ ಉಪಗಚ್ಛನ್ತೀ’’ತಿ ಅತ್ಥೋ].

೧೩೯. ಅಚಿನ್ತಿತಮ್ಪಿ ಭವತಿ, ಚಿನ್ತಿತಮ್ಪಿ ವಿನಸ್ಸತಿ;

ನ ಹಿ ಚಿನ್ತಾಮಯಾ ಭೋಗಾ, ಇತ್ಥಿಯಾ ಪುರಿಸಸ್ಸ ವಾ.

೧೪೦. ಸರಭಂ ಗಿರಿದುಗ್ಗಸ್ಮಿಂ, ಯಂ ತ್ವಂ ಅನುಸರೀ ಪುರೇ;

ಅಲೀನಚಿತ್ತಸ್ಸ ತುವಂ, ವಿಕ್ಕನ್ತಮನುಜೀವಸಿ [ತವ, ವಿಕ್ಕನ್ತಂ ಜೀವಿತಂ ಲಭಿ (ಕ.)].

೧೪೧. ಯೋ ತಂ ವಿದುಗ್ಗಾ ನರಕಾ ಸಮುದ್ಧರಿ, ಸಿಲಾಯ ಯೋಗ್ಗಂ ಸರಭೋ ಕರಿತ್ವಾ;

ದುಕ್ಖೂಪನೀತಂ ಮಚ್ಚುಮುಖಾ ಪಮೋಚಯಿ, ಅಲೀನಚಿತ್ತಂ ತಂ ಮಿಗಂ [ತಮೇವ (ಸ್ಯಾ. ಕ.)] ವದೇಸಿ.

೧೪೨. ಕಿಂ ತ್ವಂ ನು [ತುವನ್ನು (ಸೀ. ಪೀ.)] ತತ್ಥೇವ ತದಾ ಅಹೋಸಿ, ಉದಾಹು ತೇ ಕೋಚಿ ನಂ [ತಂ (ಕ.)] ಏತದಕ್ಖಾ;

ವಿವಟ್ಟಚ್ಛದ್ದೋ ನುಸಿ ಸಬ್ಬದಸ್ಸೀ, ಞಾಣಂ ನು ತೇ ಬ್ರಾಹ್ಮಣ ಭಿಂಸರೂಪಂ.

೧೪೩. ನ ಚೇವಹಂ ತತ್ಥ ತದಾ ಅಹೋಸಿಂ, ನ ಚಾಪಿ ಮೇ ಕೋಚಿ ನಂ [ತಂ (ಕ.)] ಏತದಕ್ಖಾ;

ಗಾಥಾಪದಾನಞ್ಚ ಸುಭಾಸಿತಾನಂ, ಅತ್ಥಂ ತದಾನೇನ್ತಿ ಜನಿನ್ದ ಧೀರಾ.

೧೪೪. ಆದಾಯ ಪತ್ತಿಂ [ಪತ್ತಂ (ಸ್ಯಾ.), ಪಟ್ಟಿಂ (ಕ.)] ಪರವಿರಿಯಘಾತಿಂ, ಚಾಪೇ ಸರಂ ಕಿಂ ವಿಚಿಕಿಚ್ಛಸೇ ತುವಂ;

ನುನ್ನೋ [ನುಣ್ಣೋ (ಕ. ಸೀ. ಸ್ಯಾ.), ತುಣ್ಣೋ (ಕ.)] ಸರೋ ಸರಭಂ ಹನ್ತು ಖಿಪ್ಪಂ, ಅನ್ನಞ್ಹಿ ಏತಂ ವರಪಞ್ಞ ರಞ್ಞೋ.

೧೪೫. ಅದ್ಧಾ ಪಜಾನಾಮಿ ಅಹಮ್ಪಿ ಏತಂ, ಅನ್ನಂ ಮಿಗೋ ಬ್ರಾಹ್ಮಣ ಖತ್ತಿಯಸ್ಸ;

ಪುಬ್ಬೇ ಕತಞ್ಚ [ಪುಬ್ಬೇ ಚ ಕತಂ (ಕ.)] ಅಪಚಾಯಮಾನೋ, ತಸ್ಮಾ ಮಿಗಂ ಸರಭಂ ನೋ ಹನಾಮಿ.

೧೪೬. ನೇಸೋ ಮಿಗೋ ಮಹಾರಾಜ, ಅಸುರೇಸೋ ದಿಸಮ್ಪತಿ;

ಏತಂ ಹನ್ತ್ವಾ ಮನುಸ್ಸಿನ್ದ, ಭವಸ್ಸು ಅಮರಾಧಿಪೋ.

೧೪೭. ಸಚೇ ಚ ರಾಜಾ [ರಾಜ (ಸೀ. ಸ್ಯಾ. ಪೀ.)] ವಿಚಿಕಿಚ್ಛಸೇ ತುವಂ, ಹನ್ತುಂ ಮಿಗಂ ಸರಭಂ ಸಹಾಯಕಂ [ಸಹಾಯಕಂ ಮೇ (ಸೀ. ಪೀ.)];

ಸಪುತ್ತದಾರೋ ನರವೀರಸೇಟ್ಠ [ನರವಿರಿಯಸೇಟ್ಠ (ಸೀ. ಪೀ.)], ಗನ್ತ್ವಾ [ಗನ್ತಾ (ಸೀ. ಪೀ. ಅಟ್ಠ.)] ತುವಂ ವೇತರಣಿಂ ಯಮಸ್ಸ.

೧೪೮. ಕಾಮಂ ಅಹಂ ಜಾನಪದಾ ಚ ಸಬ್ಬೇ, ಪುತ್ತಾ ಚ ದಾರಾ ಚ ಸಹಾಯಸಙ್ಘಾ;

ಗಚ್ಛೇಮು ತಂ ವೇತರಣಿಂ ಯಮಸ್ಸ, ನ ತ್ವೇವ ಹಞ್ಞೋ ಮಮ ಪಾಣದೋ ಯೋ [ಪಾಣದ’ಸ್ಸ (ಸೀ. ಸ್ಯಾ. ಪೀ.)].

೧೪೯. ಅಯಂ ಮಿಗೋ ಕಿಚ್ಛಗತಸ್ಸ ಮಯ್ಹಂ, ಏಕಸ್ಸ ಕತ್ತಾ ವಿವನಸ್ಮಿ ಘೋರೇ;

ತಂ ತಾದಿಸಂ ಪುಬ್ಬಕಿಚ್ಚಂ ಸರನ್ತೋ, ಜಾನಂ ಮಹಾಬ್ರಹ್ಮೇ ಕಥಂ ಹನೇಯ್ಯಂ.

೧೫೦. ಮಿತ್ತಾಭಿರಾಧೀ ಚಿರಮೇವ ಜೀವ, ರಜ್ಜಂ ಇಮಂ ಧಮ್ಮಗುಣೇ [ರಜ್ಜಮ್ಪಿಮಂ ಚಸ್ಸ ಗಣೇ (ಕ.)] ಪಸಾಸ;

ನಾರೀಗಣೇಹಿ ಪರಿಚಾರಿಯನ್ತೋ, ಮೋದಸ್ಸು ರಟ್ಠೇ ತಿದಿವೇವ ವಾಸವೋ.

೧೫೧. ಅಕ್ಕೋಧನೋ ನಿಚ್ಚಪಸನ್ನಚಿತ್ತೋ, ಸಬ್ಬಾತಿಥೀ ಯಾಚಯೋಗೋ ಭವಿತ್ವಾ [ಪಾಹುನಕೇ ಕರಿತ್ವಾ (ಸ್ಯಾ.), ಯಾಚಯೋಗೋ ವಿದಿತ್ವಾ (ಕ.)];

ದತ್ವಾ ಚ ಭುತ್ವಾ ಚ ಯಥಾನುಭಾವಂ, ಅನಿನ್ದಿತೋ ಸಗ್ಗಮುಪೇಹಿ ಠಾನನ್ತಿ.

ಸರಭಮಿಗಜಾತಕಂ ದಸಮಂ.

ತೇರಸಕನಿಪಾತಂ ನಿಟ್ಠಿತಂ.