೧೩. ತೇರಸಕನಿಪಾತೋ
೪೭೪. ಅಮ್ಬಜಾತಕಂ (೧)
೧. ಅಹಾಸಿ [ಆಹಾಸಿ (?)] ಮೇ ಅಮ್ಬಫಲಾನಿ ಪುಬ್ಬೇ, ಅಣೂನಿ ಥೂಲಾನಿ ಚ ಬ್ರಹ್ಮಚಾರಿ;
ತೇಹೇವ ಮನ್ತೇಹಿ ನ ದಾನಿ ತುಯ್ಹಂ, ದುಮಪ್ಫಲಾ ಪಾತುಭವನ್ತಿ ಬ್ರಹ್ಮೇ.
೨. ನಕ್ಖತ್ತಯೋಗಂ ಪಟಿಮಾನಯಾಮಿ, ಖಣಂ ಮುಹುತ್ತಞ್ಚ ಮನ್ತೇ ನ ಪಸ್ಸಂ [ಖಣಂ ಮುಹುತ್ತಂ ನ ಮಂ ತೋಸಯನ್ತಿ (ಸೀ. ಪೀ.)];
ನಕ್ಖತ್ತಯೋಗಞ್ಚ ಖಣಞ್ಚ ಲದ್ಧಾ, ಅದ್ಧಾಹರಿಸ್ಸಮ್ಬಫಲಂ [ಅಥಾಹರಿಸ್ಸಮ್ಬಫಲಂ (ಸೀ. ಪೀ.)] ಪಹೂತಂ.
೩. ನಕ್ಖತ್ತಯೋಗಂ ನ ಪುರೇ ಅಭಾಣಿ, ಖಣಂ ಮುಹುತ್ತಂ ನ ಪುರೇ ಅಸಂಸಿ;
ಸಯಂ ಹರೀ [ಅಥಾಹರೀ (ಸೀ. ಸ್ಯಾ. ಪೀ.)] ಅಮ್ಬಫಲಂ ಪಹೂತಂ, ವಣ್ಣೇನ ಗನ್ಧೇನ ರಸೇನುಪೇತಂ.
೪. ಮನ್ತಾಭಿಜಪ್ಪೇನ ಪುರೇ ಹಿ [ಪುರ’ಸ್ಸ (ಸೀ. ಪೀ.), ಪುರೇಪಿ (ಸ್ಯಾ.)] ತುಯ್ಹಂ, ದುಮಪ್ಫಲಾ ಪಾತುಭವನ್ತಿ ಬ್ರಹ್ಮೇ;
ಸ್ವಾಜ್ಜ ನ ಪಾರೇಸಿ ಜಪ್ಪಮ್ಪಿ ಮನ್ತಂ [ಜಪಮ್ಪಿ ಮನ್ತೇ (ಸೀ. ಪೀ.)], ಅಯಂ ಸೋ ಕೋ ನಾಮ ತವಜ್ಜ ಧಮ್ಮೋ.
೫. ಚಣ್ಡಾಲಪುತ್ತೋ ಮಮ ಸಮ್ಪದಾಸಿ, ಧಮ್ಮೇನ ಮನ್ತೇ ಪಕತಿಞ್ಚ ಸಂಸಿ;
ಮಾ ಚಸ್ಸು ಮೇ ಪುಚ್ಛಿತೋ ನಾಮಗೋತ್ತಂ, ಗುಯ್ಹಿತ್ಥೋ ಅತ್ಥಂ [ಮಾ ತಂ (ಸೀ. ಸ್ಯಾ. ಪೀ.)] ವಿಜಹೇಯ್ಯ ಮನ್ತೋ [ವಿಜಹೇಯ್ಯುಮನ್ತಾ (ಸ್ಯಾ.)].
೬. ಸೋಹಂ ಜನಿನ್ದೇನ ಜನಮ್ಹಿ ಪುಟ್ಠೋ, ಮಕ್ಖಾಭಿಭೂತೋ ಅಲಿಕಂ ಅಭಾಣಿಂ;
‘‘ಮನ್ತಾ ಇಮೇ ಬ್ರಾಹ್ಮಣಸ್ಸಾ’’ತಿ ಮಿಚ್ಛಾ, ಪಹೀನಮನ್ತೋ ಕಪಣೋ ರುದಾಮಿ.
೭. ಏರಣ್ಡಾ ಪುಚಿಮನ್ದಾ ವಾ, ಅಥ ವಾ ಪಾಲಿಭದ್ದಕಾ;
ಮಧುಂ ಮಧುತ್ಥಿಕೋ ವಿನ್ದೇ, ಸೋ ಹಿ ತಸ್ಸ ದುಮುತ್ತಮೋ.
೮. ಖತ್ತಿಯಾ ಬ್ರಾಹ್ಮಣಾ ವೇಸ್ಸಾ, ಸುದ್ದಾ ಚಣ್ಡಾಲಪುಕ್ಕುಸಾ;
ಯಮ್ಹಾ ಧಮ್ಮಂ ವಿಜಾನೇಯ್ಯ, ಸೋ ಹಿ ತಸ್ಸ ನರುತ್ತಮೋ.
೯. ಇಮಸ್ಸ ದಣ್ಡಞ್ಚ ವಧಞ್ಚ ದತ್ವಾ, ಗಲೇ ಗಹೇತ್ವಾ ಖಲಯಾಥ [ಬಲಯಾಥ (ಸ್ಯಾ.), ಗಲಯಾಥ (ಕ.)] ಜಮ್ಮಂ;
ಯೋ ಉತ್ತಮತ್ಥಂ ಕಸಿರೇನ ಲದ್ಧಂ, ಮಾನಾತಿಮಾನೇನ ವಿನಾಸಯಿತ್ಥ.
೧೦. ಯಥಾ ಸಮಂ ಮಞ್ಞಮಾನೋ ಪತೇಯ್ಯ, ಸೋಬ್ಭಂ ಗುಹಂ ನರಕಂ ಪೂತಿಪಾದಂ;
ರಜ್ಜೂತಿ ವಾ ಅಕ್ಕಮೇ ಕಣ್ಹಸಪ್ಪಂ, ಅನ್ಧೋ ಯಥಾ ಜೋತಿಮಧಿಟ್ಠಹೇಯ್ಯ;
ಏವಮ್ಪಿ ಮಂ ತ್ವಂ ಖಲಿತಂ ಸಪಞ್ಞ [ಸಪಞ್ಞಾ (ಪೀ.)], ಪಹೀನಮನ್ತಸ್ಸ ಪುನಪ್ಪದಾಹಿ [ಪುನ ಸಮ್ಪದಾಹಿ (ಸ್ಯಾ.), ಪುನಪ್ಪಸೀದ (ಸೀ. ಪೀ.)].
೧೧. ಧಮ್ಮೇನ ಮನ್ತಂ [ಮನ್ತೇ (ಸೀ. ಸ್ಯಾ. ಪೀ.)] ತವ ಸಮ್ಪದಾಸಿಂ, ತುವಮ್ಪಿ ಧಮ್ಮೇನ [ತ್ವಮ್ಪಿ ಧಮ್ಮೇನೇವ (ಕ.)] ಪರಿಗ್ಗಹೇಸಿ;
ಪಕತಿಮ್ಪಿ ತೇ ಅತ್ತಮನೋ ಅಸಂಸಿಂ, ಧಮ್ಮೇ ಠಿತಂ ತಂ [ಪತಿಟ್ಠಂ (ಕ.)] ನ ಜಹೇಯ್ಯ ಮನ್ತೋ.
೧೨. ಯೋ ಬಾಲ ಮನ್ತಂ [ಬಲಮನ್ತಂ (ಕ.)] ಕಸಿರೇನ ಲದ್ಧಂ, ಯಂ ದುಲ್ಲಭಂ ಅಜ್ಜ ಮನುಸ್ಸಲೋಕೇ;
ಕಿಞ್ಚಾಪಿ ಲದ್ಧಾ ಜೀವಿತುಂ ಅಪ್ಪಪಞ್ಞೋ [ಕಿಚ್ಛಾ ಲದ್ಧಂ ಜೀವಿಕಂ ಅಪ್ಪಪಞ್ಞೋ (ಸೀ. ಸ್ಯಾ.), ಕಚ್ಛಾಪಿ ಲದ್ಧಾ ಜೀವಿಕಂ ಅಪ್ಪಞ್ಞ (ಪೀ.)], ವಿನಾಸಯೀ ಅಲಿಕಂ ಭಾಸಮಾನೋ.
೧೩. ಬಾಲಸ್ಸ ಮೂಳ್ಹಸ್ಸ ಅಕತಞ್ಞುನೋ ಚ, ಮುಸಾ ಭಣನ್ತಸ್ಸ ಅಸಞ್ಞತಸ್ಸ;
ಮನ್ತೇ ಮಯಂ ತಾದಿಸಕೇ ನ ದೇಮ, ಕುತೋ ಮನ್ತಾ ಗಚ್ಛ ನ ಮಯ್ಹ ರುಚ್ಚಸೀತಿ.
ಅಮ್ಬಜಾತಕಂ ಪಠಮಂ.
೪೭೫. ಫನ್ದನಜಾತಕಂ (೨)
೧೪. ಕುಠಾರಿಹತ್ಥೋ [ಕುಧಾರಿಹತ್ಥೋ (ಕ.)] ಪುರಿಸೋ, ವನಮೋಗಯ್ಹ ತಿಟ್ಠಸಿ;
ಪುಟ್ಠೋ ಮೇ ಸಮ್ಮ ಅಕ್ಖಾಹಿ, ಕಿಂ ದಾರುಂ ಛೇತುಮಿಚ್ಛಸಿ.
೧೫. ಇಸ್ಸೋ [ಇಸೋ (ಸೀ.), ಈಸೋ (ಸ್ಯಾ. ಪೀ.)] ವನಾನಿ ಚರಸಿ, ಸಮಾನಿ ವಿಸಮಾನಿ ಚ;
ಪುಟ್ಠೋ ಮೇ ಸಮ್ಮ ಅಕ್ಖಾಹಿ, ಕಿಂ ದಾರುಂ ನೇಮಿಯಾ ದಳ್ಹಂ.
೧೬. ನೇವ ಸಾಲೋ ನ ಖದಿರೋ, ನಾಸ್ಸಕಣ್ಣೋ ಕುತೋ ಧವೋ;
ರುಕ್ಖೋ ಚ [ರುಕ್ಖೋವ (ಸೀ. ಪೀ.)] ಫನ್ದನೋ ನಾಮ, ತಂ ದಾರುಂ ನೇಮಿಯಾ ದಳ್ಹಂ.
೧೭. ಕೀದಿಸಾನಿಸ್ಸ ಪತ್ತಾನಿ, ಖನ್ಧೋ ವಾ ಪನ ಕೀದಿಸೋ;
ಪುಟ್ಠೋ ಮೇ ಸಮ್ಮ ಅಕ್ಖಾಹಿ, ಯಥಾ ಜಾನೇಮು ಫನ್ದನಂ.
೧೮. ಯಸ್ಸ ಸಾಖಾ ಪಲಮ್ಬನ್ತಿ, ನಮನ್ತಿ ನ ಚ ಭಞ್ಜರೇ;
ಸೋ ರುಕ್ಖೋ ಫನ್ದನೋ ನಾಮ, ಯಸ್ಸ ಮೂಲೇ ಅಹಂ ಠಿತೋ.
೧೯. ಅರಾನಂ ಚಕ್ಕನಾಭೀನಂ, ಈಸಾನೇಮಿರಥಸ್ಸ ಚ;
ಸಬ್ಬಸ್ಸ ತೇ ಕಮ್ಮನಿಯೋ, ಅಯಂ ಹೇಸ್ಸತಿ ಫನ್ದನೋ.
೨೦. ಇತಿ ಫನ್ದನರುಕ್ಖೋಪಿ, ತಾವದೇ ಅಜ್ಝಭಾಸಥ;
ಮಯ್ಹಮ್ಪಿ ವಚನಂ ಅತ್ಥಿ, ಭಾರದ್ವಾಜ ಸುಣೋಹಿ ಮೇ.
೨೧. ಇಸ್ಸಸ್ಸ [ಇಮಸ್ಸ (ಕ. ಸೀ. ಕ.)] ಉಪಕ್ಖನ್ಧಮ್ಹಾ [ಉಪಖನ್ಧಮ್ಹಾ (ಕ. ಸೀ. ಪೀ. ಕ.)], ಉಕ್ಕಚ್ಚ ಚತುರಙ್ಗುಲಂ;
ತೇನ ನೇಮಿಂ ಪಸಾರೇಸಿ [ಪರಿಹರೇಸಿ (ಸೀ. ಪೀ.)], ಏವಂ ದಳ್ಹತರಂ ಸಿಯಾ.
೨೨. ಇತಿ ಫನ್ದನರುಕ್ಖೋಪಿ, ವೇರಂ ಅಪ್ಪೇಸಿ ತಾವದೇ;
ಜಾತಾನಞ್ಚ ಅಜಾತಾನಂ, ಇಸ್ಸಾನಂ ದುಕ್ಖಮಾವಹಿ.
೨೩. ಇಚ್ಚೇವಂ [ಇಚ್ಚೇವ (ಸೀ. ಪೀ.)] ಫನ್ದನೋ ಇಸ್ಸಂ, ಇಸ್ಸೋ ಚ ಪನ ಫನ್ದನಂ;
ಅಞ್ಞಮಞ್ಞಂ ವಿವಾದೇನ, ಅಞ್ಞಮಞ್ಞಮಘಾತಯುಂ.
೨೪. ಏವಮೇವ ಮನುಸ್ಸಾನಂ, ವಿವಾದೋ ಯತ್ಥ ಜಾಯತಿ;
ಮಯೂರನಚ್ಚಂ ನಚ್ಚನ್ತಿ, ಯಥಾ ತೇ ಇಸ್ಸಫನ್ದನಾ.
೨೫. ತಂ ವೋ ವದಾಮಿ ಭದ್ದಂ ವೋ [ಭದ್ದನ್ತೇ (ಕ.)], ಯಾವನ್ತೇತ್ಥ ಸಮಾಗತಾ;
ಸಮ್ಮೋದಥ ಮಾ ವಿವದಥ [ಮಾವಿವದಿತ್ಥ (ಸೀ. ಸ್ಯಾ. ಪೀ.)], ಮಾ ಹೋಥ ಇಸ್ಸಫನ್ದನಾ.
೨೬. ಸಾಮಗ್ಗಿಮೇವ [ಸಾಮಗ್ಯಮೇವ (ಸ್ಯಾ. ಕ.)] ಸಿಕ್ಖೇಥ, ಬುದ್ಧೇಹೇತಂ ಪಸಂಸಿತಂ;
ಸಾಮಗ್ಗಿರತೋ ಧಮ್ಮಟ್ಠೋ, ಯೋಗಕ್ಖೇಮಾ ನ ಧಂಸತೀತಿ.
ಫನ್ದನಜಾತಕಂ ದುತಿಯಂ.
೪೭೬. ಜವನಹಂಸಜಾತಕಂ (೩)
೨೭. ಇಧೇವ ಹಂಸ ನಿಪತ, ಪಿಯಂ ಮೇ ತವ ದಸ್ಸನಂ;
ಇಸ್ಸರೋಸಿ ಅನುಪ್ಪತ್ತೋ, ಯಮಿಧತ್ಥಿ ಪವೇದಯ.
೨೮. ಸವನೇನ ಏಕಸ್ಸ ಪಿಯಾ ಭವನ್ತಿ, ದಿಸ್ವಾ ಪನೇಕಸ್ಸ ವಿಯೇತಿ [ವಿನೇತಿ (ಸ್ಯಾ.), ವಿಹೇತಿ (ಪೀ.), ವಿಗೇತಿ (ಕ. ಅಟ್ಠ.)] ಛನ್ದೋ;
ದಿಸ್ವಾ ಚ ಸುತ್ವಾ ಚ ಪಿಯಾ ಭವನ್ತಿ, ಕಚ್ಚಿನ್ನು ಮೇ ಪೀಯಸಿ [ಪಿಯ್ಯಸಿ (ಸೀ. ಪೀ.)] ದಸ್ಸನೇನ.
೨೯. ಸವನೇನ ಪಿಯೋ ಮೇಸಿ, ಭಿಯ್ಯೋ ಚಾಗಮ್ಮ ದಸ್ಸನಂ;
ಏವಂ ಪಿಯದಸ್ಸನೋ ಮೇ [ಏವಂ ಪಿಯದಸ್ಸನೋ ಸಮಾನೋ (ಸೀ. ಸ್ಯಾ. ಪೀ.)], ವಸ ಹಂಸ ಮಮನ್ತಿಕೇ [ಮಮ ಸನ್ತಿಕೇ (ಸೀ. ಸ್ಯಾ. ಪೀ.)].
೩೦. ವಸೇಯ್ಯಾಮ ತವಾಗಾರೇ, ನಿಚ್ಚಂ ಸಕ್ಕತಪೂಜಿತಾ;
ಮತ್ತೋ ಚ ಏಕದಾ ವಜ್ಜೇ [ವಜ್ಜಾ (ಸೀ. ಪೀ.)], ‘‘ಹಂಸರಾಜಂ ಪಚನ್ತು ಮೇ’’.
೩೧. ಧಿರತ್ಥು ತಂ ಮಜ್ಜಪಾನಂ, ಯಂ ಮೇ ಪಿಯತರಂ ತಯಾ;
ನ ಚಾಪಿ ಮಜ್ಜಂ ಪಿಸ್ಸಾಮಿ [ಪಿವಿಸ್ಸಾಮಿ (ಸ್ಯಾ.), ಪಾಯಾಮಿ (ಸೀ. ಪೀ.)], ಯಾವ ಮೇ ವಚ್ಛಸೀ ಘರೇ.
೩೨. ಸುವಿಜಾನಂ ಸಿಙ್ಗಾಲಾನಂ, ಸಕುಣಾನಞ್ಚ [ಸಕುನ್ತಾನಞ್ಚ (ಸೀ. ಸ್ಯಾ. ಪೀ.)] ವಸ್ಸಿತಂ;
ಮನುಸ್ಸವಸ್ಸಿತಂ ರಾಜ, ದುಬ್ಬಿಜಾನತರಂ ತತೋ.
೩೩. ಅಪಿ ಚೇ ಮಞ್ಞತೀ ಪೋಸೋ, ಞಾತಿ ಮಿತ್ತೋ ಸಖಾತಿ ವಾ;
ಯೋ ಪುಬ್ಬೇ ಸುಮನೋ ಹುತ್ವಾ, ಪಚ್ಛಾ ಸಮ್ಪಜ್ಜತೇ ದಿಸೋ.
೩೪. ಯಸ್ಮಿಂ ಮನೋ ನಿವಿಸತಿ, ಅವಿದೂರೇ ಸಹಾಪಿ ಸೋ;
ಸನ್ತಿಕೇಪಿ ಹಿ ಸೋ ದೂರೇ, ಯಸ್ಮಿಂ ನಾವಿಸತೇ [ಯಸ್ಮಾ ವಿವಸತೇ (ಸೀ. ಸ್ಯಾ. ಪೀ.)] ಮನೋ.
೩೫. ಅನ್ತೋಪಿ ಸೋ ಹೋತಿ ಪಸನ್ನಚಿತ್ತೋ, ಪಾರಂ ಸಮುದ್ದಸ್ಸ ಪಸನ್ನಚಿತ್ತೋ;
ಅನ್ತೋಪಿ ಸೋ ಹೋತಿ ಪದುಟ್ಠಚಿತ್ತೋ, ಪಾರಂ ಸಮುದ್ದಸ್ಸ ಪದುಟ್ಠಚಿತ್ತೋ.
೩೬. ಸಂವಸನ್ತಾ ವಿವಸನ್ತಿ, ಯೇ ದಿಸಾ ತೇ ರಥೇಸಭ;
ಆರಾ ಸನ್ತೋ ಸಂವಸನ್ತಿ, ಮನಸಾ ರಟ್ಠವಡ್ಢನ.
೩೭. ಅತಿಚಿರಂ ನಿವಾಸೇನ, ಪಿಯೋ ಭವತಿ ಅಪ್ಪಿಯೋ;
ಆಮನ್ತ ಖೋ ತಂ ಗಚ್ಛಾಮ [ಗಚ್ಛಾಮಿ (ಸ್ಯಾ.)], ಪುರಾ ತೇ ಹೋಮ ಅಪ್ಪಿಯಾ [ಹೋಮಿ ಅಪ್ಪಿಯೋ (ಸ್ಯಾ.)].
೩೮. ಏವಂ ಚೇ ಯಾಚಮಾನಾನಂ, ಅಞ್ಜಲಿಂ ನಾವಬುಜ್ಝಸಿ;
ಪರಿಚಾರಕಾನಂ ಸತಂ [ಸನ್ತಾನಂ (ಸೀ. ಸ್ಯಾ.), ಸತ್ತಾನಂ (ಪೀ.)], ವಚನಂ ನ ಕರೋಸಿ ನೋ;
ಏವಂ ತಂ ಅಭಿಯಾಚಾಮ, ಪುನ ಕಯಿರಾಸಿ ಪರಿಯಾಯಂ.
೩೯. ಏವಂ ಚೇ ನೋ ವಿಹರತಂ, ಅನ್ತರಾಯೋ ನ ಹೇಸ್ಸತಿ;
ತುಯ್ಹಞ್ಚಾಪಿ [ವಾಪಿ (ಸ್ಯಾ. ಪೀ. ಕ.)] ಮಹಾರಾಜ, ಮಯ್ಹಞ್ಚ [ವಾ (ಬಹೂಸು)] ರಟ್ಠವಡ್ಢನ;
ಅಪ್ಪೇವ ನಾಮ ಪಸ್ಸೇಮು [ಪಸ್ಸೇಮ (ಸೀ. ಸ್ಯಾ. ಪೀ.)], ಅಹೋರತಾನಮಚ್ಚಯೇತಿ.
ಜವನಹಂಸಜಾತಕಂ ತತಿಯಂ.
೪೭೭. ಚೂಳನಾರದಜಾತಕಂ (೪)
೪೦. ನ ತೇ ಕಟ್ಠಾನಿ ಭಿನ್ನಾನಿ, ನ ತೇ ಉದಕಮಾಭತಂ;
ಅಗ್ಗೀಪಿ ತೇ ನ ಹಾಪಿತೋ [ಹಾಸಿತೋ (ಸೀ. ಸ್ಯಾ.)], ಕಿಂ ನು ಮನ್ದೋವ ಝಾಯಸಿ.
೪೧. ನ ಉಸ್ಸಹೇ ವನೇ ವತ್ಥುಂ, ಕಸ್ಸಪಾಮನ್ತಯಾಮಿ ತಂ;
ದುಕ್ಖೋ ವಾಸೋ ಅರಞ್ಞಸ್ಮಿಂ, ರಟ್ಠಂ ಇಚ್ಛಾಮಿ ಗನ್ತವೇ.
೪೨. ಯಥಾ ಅಹಂ ಇತೋ ಗನ್ತ್ವಾ, ಯಸ್ಮಿಂ ಜನಪದೇ ವಸಂ;
ಆಚಾರಂ ಬ್ರಹ್ಮೇ [ಬ್ರಹ್ಮಂ (ಕ.)] ಸಿಕ್ಖೇಯ್ಯಂ, ತಂ ಧಮ್ಮಂ ಅನುಸಾಸ ಮಂ.
೪೩. ಸಚೇ ಅರಞ್ಞಂ ಹಿತ್ವಾನ, ವನಮೂಲಫಲಾನಿ ಚ;
ರಟ್ಠೇ ರೋಚಯಸೇ ವಾಸಂ, ತಂ ಧಮ್ಮಂ ನಿಸಾಮೇಹಿ ಮೇ.
೪೪. ವಿಸಂ ಮಾ ಪಟಿಸೇವಿತ್ಥೋ [ಪಟಿಸೇವಿತ್ಥ (ಸ್ಯಾ. ಕ.)], ಪಪಾತಂ ಪರಿವಜ್ಜಯ;
ಪಙ್ಕೇ ಚ ಮಾ ವಿಸೀದಿತ್ಥೋ [ಪಙ್ಕೋ ಚ ಮಾ ವಿಸಿಯಿತ್ಥೋ (ಕ.)], ಯತ್ತೋ ಚಾಸೀವಿಸೇ ಚರೇ.
೪೫. ಕಿಂ ನು ವಿಸಂ ಪಪಾತೋ ವಾ, ಪಙ್ಕೋ ವಾ ಬ್ರಹ್ಮಚಾರಿನಂ;
ಕಂ ತ್ವಂ ಆಸೀವಿಸಂ ಬ್ರೂಸಿ, ತಂ ಮೇ ಅಕ್ಖಾಹಿ ಪುಚ್ಛಿತೋ;
೪೬. ಆಸವೋ ತಾತ ಲೋಕಸ್ಮಿಂ, ಸುರಾ ನಾಮ ಪವುಚ್ಚತಿ;
ಮನುಞ್ಞೋ [ಮನುಞ್ಞಾ (ಸೀ. ಸ್ಯಾ. ಪೀ.)] ಸುರಭೀ ವಗ್ಗು, ಸಾದು [ಮಧು (ಸೀ. ಸ್ಯಾ.)] ಖುದ್ದರಸೂಪಮೋ [ರಸೂಪಮಾ (ಸೀ. ಸ್ಯಾ. ಪೀ.)];
ವಿಸಂ ತದಾಹು ಅರಿಯಾ ಸೇ, ಬ್ರಹ್ಮಚರಿಯಸ್ಸ ನಾರದ.
೪೭. ಇತ್ಥಿಯೋ ತಾತ ಲೋಕಸ್ಮಿಂ, ಪಮತ್ತಂ ಪಮಥೇನ್ತಿ ತಾ;
ಹರನ್ತಿ ಯುವಿನೋ ಚಿತ್ತಂ, ತೂಲಂ ಭಟ್ಠಂವ ಮಾಲುತೋ;
ಪಪಾತೋ ಏಸೋ ಅಕ್ಖಾತೋ, ಬ್ರಹ್ಮಚರಿಯಸ್ಸ ನಾರದ.
೪೮. ಲಾಭೋ ಸಿಲೋಕೋ ಸಕ್ಕಾರೋ, ಪೂಜಾ ಪರಕುಲೇಸು ಚ;
ಪಙ್ಕೋ ಏಸೋ ಚ [ಏಸೋವ (ಸೀ. ಸ್ಯಾ. ಪೀ.)] ಅಕ್ಖಾತೋ, ಬ್ರಹ್ಮಚರಿಯಸ್ಸ ನಾರದ.
೪೯. ಸಸತ್ಥಾ [ಮಹನ್ತಾ (ಸ್ಯಾ. ಕ.)] ತಾತ ರಾಜಾನೋ, ಆವಸನ್ತಿ ಮಹಿಂ ಇಮಂ;
ತೇ ತಾದಿಸೇ ಮನುಸ್ಸಿನ್ದೇ, ಮಹನ್ತೇ ತಾತ ನಾರದ.
೫೦. ಇಸ್ಸರಾನಂ ಅಧಿಪತೀನಂ, ನ ತೇಸಂ ಪಾದತೋ ಚರೇ;
ಆಸೀವಿಸೋತಿ [ಆಸೀವಿಸೋ ಸೋ (ಸೀ. ಪೀ.)] ಅಕ್ಖಾತೋ, ಬ್ರಹ್ಮಚರಿಯಸ್ಸ ನಾರದ.
೫೧. ಭತ್ತತ್ಥೋ ಭತ್ತಕಾಲೇ ಚ [ಯಂ (ಸೀ. ಪೀ.)], ಯಂ ಗೇಹಮುಪಸಙ್ಕಮೇ;
ಯದೇತ್ಥ ಕುಸಲಂ ಜಞ್ಞಾ, ತತ್ಥ ಘಾಸೇಸನಂ ಚರೇ.
೫೨. ಪವಿಸಿತ್ವಾ ಪರಕುಲಂ, ಪಾನತ್ಥಂ [ಪಾನತ್ಥೋ (ಸ್ಯಾ. ಪೀ.)] ಭೋಜನಾಯ ವಾ;
ಮಿತಂ ಖಾದೇ ಮಿತಂ ಭುಞ್ಜೇ, ನ ಚ ರೂಪೇ ಮನಂ ಕರೇ.
೫೩. ಗೋಟ್ಠಂ ಮಜ್ಜಂ ಕಿರಾಟಞ್ಚ [ಕಿರಾಸಞ್ಚ (ಸೀ. ಸ್ಯಾ.), ಕಿರಾಸಂ ವಾ (ಪೀ.)], ಸಭಾ ನಿಕಿರಣಾನಿ ಚ;
ಆರಕಾ ಪರಿವಜ್ಜೇಹಿ, ಯಾನೀವ ವಿಸಮಂ ಪಥನ್ತಿ.
ಚೂಳನಾರದಜಾತಕಂ ಚತುತ್ಥಂ.
೪೭೮. ದೂತಜಾತಕಂ (೫)
೫೪. ದೂತೇ ತೇ ಬ್ರಹ್ಮೇ [ದೂತೇ ಬ್ರಾಹ್ಮಣ (ಕ.)] ಪಾಹೇಸಿಂ, ಗಙ್ಗಾತೀರಸ್ಮಿ ಝಾಯತೋ;
ತೇಸಂ ಪುಟ್ಠೋ ನ ಬ್ಯಾಕಾಸಿ, ದುಕ್ಖಂ ಗುಯ್ಹಮತಂ [ಗುಯ್ಹಂ ಮತಂ (ಸೀ.), ತುಯ್ಹಂ ಮತಂ (ಸ್ಯಾ. ಕ.)] ನು ತೇ.
೫೫. ಸಚೇ ತೇ ದುಕ್ಖಮುಪ್ಪಜ್ಜೇ, ಕಾಸೀನಂ ರಟ್ಠವಡ್ಢನ;
ಮಾ ಖೋ ನಂ ತಸ್ಸ ಅಕ್ಖಾಹಿ, ಯೋ ತಂ ದುಕ್ಖಾ ನ ಮೋಚಯೇ.
೫೬. ಯೋ ತಸ್ಸ [ಯೋ ಚ ತಥಾ (ಪೀ.)] ದುಕ್ಖಜಾತಸ್ಸ, ಏಕಙ್ಗಮಪಿ ಭಾಗಸೋ [ಏಕನ್ತಮಪಿ ಭಾಸತೋ (ಸೀ. ಪೀ.)];
ವಿಪ್ಪಮೋಚೇಯ್ಯ ಧಮ್ಮೇನ, ಕಾಮಂ ತಸ್ಸ ಪವೇದಯ [ಪವೇದಯೇ (ಸೀ.)].
೫೭. ಸುವಿಜಾನಂ ಸಿಙ್ಗಾಲಾನಂ, ಸಕುಣಾನಞ್ಚ ವಸ್ಸಿತಂ;
ಮನುಸ್ಸವಸ್ಸಿತಂ ರಾಜ, ದುಬ್ಬಿಜಾನತರಂ ತತೋ.
೫೮. ಅಪಿ ಚೇ ಮಞ್ಞತೀ ಪೋಸೋ, ಞಾತಿ ಮಿತ್ತೋ ಸಖಾತಿ ವಾ;
ಯೋ ಪುಬ್ಬೇ ಸುಮನೋ ಹುತ್ವಾ, ಪಚ್ಛಾ ಸಮ್ಪಜ್ಜತೇ ದಿಸೋ.
೫೯. ಯೋ ಅತ್ತನೋ ದುಕ್ಖಮನಾನುಪುಟ್ಠೋ, ಪವೇದಯೇ ಜನ್ತು ಅಕಾಲರೂಪೇ;
ಆನನ್ದಿನೋ ತಸ್ಸ ಭವನ್ತಿಮಿತ್ತಾ [ಭವನ್ತ’ಮಿತ್ತಾ (ಸೀ. ಪೀ.)], ಹಿತೇಸಿನೋ ತಸ್ಸ ದುಖೀ ಭವನ್ತಿ.
೬೦. ಕಾಲಞ್ಚ ಞತ್ವಾನ ತಥಾವಿಧಸ್ಸ, ಮೇಧಾವೀನಂ ಏಕಮನಂ ವಿದಿತ್ವಾ;
ಅಕ್ಖೇಯ್ಯ ತಿಬ್ಬಾನಿ [ತಿಪ್ಪಾನಿ (ಸೀ. ಸ್ಯಾ. ಪೀ.)] ಪರಸ್ಸ ಧೀರೋ, ಸಣ್ಹಂ ಗಿರಂ ಅತ್ಥವತಿಂ ಪಮುಞ್ಚೇ.
೬೧. ಸಚೇ ಚ ಜಞ್ಞಾ ಅವಿಸಯ್ಹಮತ್ತನೋ, ನ ತೇ ಹಿ ಮಯ್ಹಂ [ನಾಯಂ ನೀತಿ ಮಯ್ಹ (ಸೀ. ಪೀ.)] ಸುಖಾಗಮಾಯ;
ಏಕೋವ ತಿಬ್ಬಾನಿ ಸಹೇಯ್ಯ ಧೀರೋ, ಸಚ್ಚಂ ಹಿರೋತ್ತಪ್ಪಮಪೇಕ್ಖಮಾನೋ.
೬೨. ಅಹಂ ರಟ್ಠಾನಿ ವಿಚರನ್ತೋ, ನಿಗಮೇ ರಾಜಧಾನಿಯೋ;
ಭಿಕ್ಖಮಾನೋ ಮಹಾರಾಜ, ಆಚರಿಯಸ್ಸ ಧನತ್ಥಿಕೋ.
೬೩. ಗಹಪತೀ ರಾಜಪುರಿಸೇ, ಮಹಾಸಾಲೇ ಚ ಬ್ರಾಹ್ಮಣೇ;
ಅಲತ್ಥಂ ಸತ್ತ ನಿಕ್ಖಾನಿ, ಸುವಣ್ಣಸ್ಸ ಜನಾಧಿಪ;
ತೇ ಮೇ ನಟ್ಠಾ ಮಹಾರಾಜ, ತಸ್ಮಾ ಸೋಚಾಮಹಂ ಭುಸಂ.
೬೪. ಪುರಿಸಾ ತೇ ಮಹಾರಾಜ, ಮನಸಾನುವಿಚಿನ್ತಿತಾ;
ನಾಲಂ ದುಕ್ಖಾ ಪಮೋಚೇತುಂ, ತಸ್ಮಾ ತೇಸಂ ನ ಬ್ಯಾಹರಿಂ.
೬೫. ತ್ವಞ್ಚ ಖೋ ಮೇ ಮಹಾರಾಜ, ಮನಸಾನುವಿಚಿನ್ತಿತೋ;
ಅಲಂ ದುಕ್ಖಾ ಪಮೋಚೇತುಂ, ತಸ್ಮಾ ತುಯ್ಹಂ ಪವೇದಯಿಂ.
೬೬. ತಸ್ಸಾದಾಸಿ ಪಸನ್ನತ್ತೋ, ಕಾಸೀನಂ ರಟ್ಠವಡ್ಢನೋ;
ಜಾತರೂಪಮಯೇ ನಿಕ್ಖೇ, ಸುವಣ್ಣಸ್ಸ ಚತುದ್ದಸಾತಿ.
ದೂತಜಾತಕಂ ಪಞ್ಚಮಂ.