೪೮೨. ರುರುಮಿಗರಾಜಜಾತಕಂ (೯)

೧೧೭. ತಸ್ಸ [ಕಸ್ಸ (ಸೀ. ಪೀ.)] ಗಾಮವರಂ ದಮ್ಮಿ, ನಾರಿಯೋ ಚ ಅಲಙ್ಕತಾ;

ಯೋ [ಕೋ (ಸೀ. ಸ್ಯಾ. ಪೀ.)] ಮೇತಂ ಮಿಗಮಕ್ಖಾತಿ [ಮಕ್ಖಾಸಿ (ಸ್ಯಾ. ಕ.)], ಮಿಗಾನಂ ಮಿಗಮುತ್ತಮಂ.

೧೧೮. ಮಯ್ಹಂ ಗಾಮವರಂ ದೇಹಿ, ನಾರಿಯೋ ಚ ಅಲಙ್ಕತಾ;

ಅಹಂ ತೇ ಮಿಗಮಕ್ಖಿಸ್ಸಂ, ಮಿಗಾನಂ ಮಿಗಮುತ್ತಮಂ.

೧೧೯. ಏತಸ್ಮಿಂ ವನಸಣ್ಡಸ್ಮಿಂ, ಅಮ್ಬಾ ಸಾಲಾ ಚ ಪುಪ್ಫಿತಾ;

ಇನ್ದಗೋಪಕಸಞ್ಛನ್ನಾ, ಏತ್ಥೇಸೋ ತಿಟ್ಠತೇ ಮಿಗೋ.

೧೨೦. ಧನುಂ ಅದ್ವೇಜ್ಝಂ [ಅದೇಜ್ಝಂ (ಸೀ. ಪೀ.), ಸರಜ್ಜಂ (ಕ.)] ಕತ್ವಾನ, ಉಸುಂ ಸನ್ನಯ್ಹುಪಾಗಮಿ [ಸನ್ಧಾಯುಪಾಗಮಿ (ಸೀ. ಪೀ.)];

ಮಿಗೋ ಚ ದಿಸ್ವಾ ರಾಜಾನಂ, ದೂರತೋ ಅಜ್ಝಭಾಸಥ.

೧೨೧. ಆಗಮೇಹಿ ಮಹಾರಾಜ, ಮಾ ಮಂ ವಿಜ್ಝಿ ರಥೇಸಭ;

ಕೋ ನು ತೇ ಇದಮಕ್ಖಾಸಿ, ಏತ್ಥೇಸೋ ತಿಟ್ಠತೇ ಮಿಗೋ.

೧೨೨. ಏಸ ಪಾಪಚರೋ ಪೋಸೋ, ಸಮ್ಮ ತಿಟ್ಠತಿ ಆರಕಾ;

ಸೋಯಂ [ಸೋ ಹಿ (ಸೀ. ಸ್ಯಾ. ಪೀ.)] ಮೇ ಇದಮಕ್ಖಾಸಿ, ಏತ್ಥೇಸೋ ತಿಟ್ಠತೇ ಮಿಗೋ.

೧೨೩. ಸಚ್ಚಂ ಕಿರೇವ ಮಾಹಂಸು, ನರಾ ಏಕಚ್ಚಿಯಾ ಇಧ;

ಕಟ್ಠಂ ನಿಪ್ಲವಿತಂ ಸೇಯ್ಯೋ, ನ ತ್ವೇವೇಕಚ್ಚಿ ಯೋ ನರೋ.

೧೨೪. ಕಿಂ ನು ರುರು ಗರಹಸಿ ಮಿಗಾನಂ, ಕಿಂ ಪಕ್ಖೀನಂ ಕಿಂ ಪನ ಮಾನುಸಾನಂ;

ಭಯಞ್ಹಿ ಮಂ ವಿನ್ದತಿನಪ್ಪರೂಪಂ, ಸುತ್ವಾನ ತಂ ಮಾನುಸಿಂ ಭಾಸಮಾನಂ.

೧೨೫. ಯಮುದ್ಧರಿಂ ವಾಹನೇ ವುಯ್ಹಮಾನಂ, ಮಹೋದಕೇ ಸಲಿಲೇ ಸೀಘಸೋತೇ;

ತತೋನಿದಾನಂ ಭಯಮಾಗತಂ ಮಮ, ದುಕ್ಖೋ ಹವೇ ರಾಜ ಅಸಬ್ಭಿ ಸಙ್ಗಮೋ.

೧೨೬. ಸೋಹಂ ಚತುಪ್ಪತ್ತಮಿಮಂ ವಿಹಙ್ಗಮಂ, ತನುಚ್ಛಿದಂ ಹದಯೇ ಓಸ್ಸಜಾಮಿ;

ಹನಾಮಿ ತಂ ಮಿತ್ತದುಬ್ಭಿಂ ಅಕಿಚ್ಚಕಾರಿಂ [ಹನಾಮಿ ಮಿತ್ತದ್ದು’ಮಕಿಚ್ಚಕಾರಿಂ (ಸೀ. ಪೀ.)], ಯೋ ತಾದಿಸಂ ಕಮ್ಮಕತಂ ನ ಜಾನೇ.

೧೨೭. ಧೀರಸ್ಸ ಬಾಲಸ್ಸ ಹವೇ ಜನಿನ್ದ, ಸನ್ತೋ ವಧಂ ನಪ್ಪಸಂಸನ್ತಿ ಜಾತು;

ಕಾಮಂ ಘರಂ ಗಚ್ಛತು ಪಾಪಧಮ್ಮೋ, ಯಞ್ಚಸ್ಸ ಭಟ್ಠಂ ತದೇತಸ್ಸ ದೇಹಿ;

ಅಹಞ್ಚ ತೇ ಕಾಮಕರೋ ಭವಾಮಿ.

೧೨೮. ಅದ್ಧಾ ರುರು ಅಞ್ಞತರೋ ಸತಂ ಸೋ [ಸತಂ’ಸೇ (ಸೀ.)], ಯೋ ದುಬ್ಭತೋ [ದುಬ್ಭಿನೋ (ಸ್ಯಾ.), ದೂಭತೋ (ಪೀ.)] ಮಾನುಸಸ್ಸ ನ ದುಬ್ಭಿ;

ಕಾಮಂ ಘರಂ ಗಚ್ಛತು ಪಾಪಧಮ್ಮೋ, ಯಞ್ಚಸ್ಸ ಭಟ್ಠಂ ತದೇತಸ್ಸ ದಮ್ಮಿ;

ಅಹಞ್ಚ ತೇ ಕಾಮಚಾರಂ ದದಾಮಿ.

೧೨೯. ಸುವಿಜಾನಂ ಸಿಙ್ಗಾಲಾನಂ, ಸಕುಣಾನಞ್ಚವಸ್ಸಿತಂ;

ಮನುಸ್ಸವಸ್ಸಿತಂ ರಾಜ, ದುಬ್ಬಿಜಾನತರಂ ತತೋ.

೧೩೦. ಅಪಿ ಚೇ ಮಞ್ಞತೀ ಪೋಸೋ, ಞಾತಿ ಮಿತ್ತೋ ಸಖಾತಿ ವಾ;

ಯೋ ಪುಬ್ಬೇ ಸುಮನೋ ಹುತ್ವಾ, ಪಚ್ಛಾ ಸಮ್ಪಜ್ಜತೇ ದಿಸೋ.

೧೩೧. ಸಮಾಗತಾ ಜಾನಪದಾ, ನೇಗಮಾ ಚ ಸಮಾಗತಾ;

ಮಿಗಾ ಸಸ್ಸಾನಿ ಖಾದನ್ತಿ, ತಂ ದೇವೋ ಪಟಿಸೇಧತು.

೧೩೨. ಕಾಮಂ ಜನಪದೋ ಮಾಸಿ, ರಟ್ಠಞ್ಚಾಪಿ ವಿನಸ್ಸತು;

ನ ತ್ವೇವಾಹಂ ರುರುಂ ದುಬ್ಭೇ, ದತ್ವಾ ಅಭಯದಕ್ಖಿಣಂ.

೧೩೩. ಮಾ ಮೇ ಜನಪದೋ ಆಸಿ [ಮಾ ಮಂ ಜನಪದೋ ಅಹು (ಸ್ಯಾ.)], ರಟ್ಠಞ್ಚಾಪಿ ವಿನಸ್ಸತು;

ನ ತ್ವೇವಾಹಂ [ನ ತ್ವೇವ (ಕ. ಸೀ. ಕ.)] ಮಿಗರಾಜಸ್ಸ, ವರಂ ದತ್ವಾ ಮುಸಾ ಭಣೇತಿ.

ರುರುಮಿಗರಾಜಜಾತಕಂ ನವಮಂ.