೪೮೧. ತಕ್ಕಾರಿಯಜಾತಕಂ (೮)

೧೦೪. ಅಹಮೇವ ದುಬ್ಭಾಸಿತಂ ಭಾಸಿ ಬಾಲೋ, ಭೇಕೋವರಞ್ಞೇ ಅಹಿಮವ್ಹಾಯಮಾನೋ [ಮವ್ಹಯಾನೋ (ಸೀ. ಪೀ.)];

ತಕ್ಕಾರಿಯೇ ಸೋಬ್ಭಮಿಮಂ [ಸೋಬ್ಭಮ್ಹಿ ಅಹಂ (ಕ.)] ಪತಾಮಿ, ನ ಕಿರೇವ ಸಾಧು ಅತಿವೇಲಭಾಣೀ [ಸಾಧೂತ್ಯತಿವೇಲಭಾಣೀ (ಕ.)].

೧೦೫. ಪಪ್ಪೋತಿ ಮಚ್ಚೋ ಅತಿವೇಲಭಾಣೀ, ಬನ್ಧಂ ವಧಂ ಸೋಕಪರಿದ್ದವಞ್ಚ;

ಅತ್ತಾನಮೇವ ಗರಹಾಸಿ ಏತ್ಥ, ಆಚೇರ ಯಂ ತಂ ನಿಖಣನ್ತಿ ಸೋಬ್ಭೇ.

೧೦೬. ಕಿಮೇವಹಂ ತುಣ್ಡಿಲಮನುಪುಚ್ಛಿಂ, ಕರೇಯ್ಯ ಸಂ [ಕರೇಯ್ಯಾಸಂ (ಸ್ಯಾ.), ಕರೇಯ್ಯ ಸ (ಕ.), ಭರೇಯ್ಯ ಸಂ (?)] ಭಾತರಂ ಕಾಳಿಕಾಯಂ [ಕಾಳಿಕಾಯ (ಸ್ಯಾ. ಕ.)];

ನಗ್ಗೋವಹಂ [ನಗ್ಗೋಚ’ಹಂ (?)] ವತ್ಥಯುಗಞ್ಚ ಜೀನೋ, ಅಯಮ್ಪಿ ಅತ್ಥೋ ಬಹುತಾದಿಸೋವ.

೧೦೭. ಯೋ ಯುಜ್ಝಮಾನಾನಮಯುಜ್ಝಮಾನೋ [ಯುಜ್ಝಮಾನೇನ ಅಯುಜ್ಝಮಾನೋ (ಕ.)], ಮೇಣ್ಡನ್ತರಂ ಅಚ್ಚುಪತೀ ಕುಲಿಙ್ಗೋ;

ಸೋ ಪಿಂಸಿತೋ ಮೇಣ್ಡಸಿರೇಹಿ ತತ್ಥ, ಅಯಮ್ಪಿ ಅತ್ಥೋ ಬಹುತಾದಿಸೋವ.

೧೦೮. ಚತುರೋ ಜನಾ ಪೋತ್ಥಕಮಗ್ಗಹೇಸುಂ, ಏಕಞ್ಚ ಪೋಸಂ ಅನುರಕ್ಖಮಾನಾ;

ಸಬ್ಬೇವ ತೇ ಭಿನ್ನಸಿರಾ ಸಯಿಂಸು, ಅಯಮ್ಪಿ ಅತ್ಥೋ ಬಹುತಾದಿಸೋವ.

೧೦೯. ಅಜಾ ಯಥಾ ವೇಳುಗುಮ್ಬಸ್ಮಿಂ ಬದ್ಧಾ [ಬನ್ಧಂ (ಸ್ಯಾ. ಕ.)], ಅವಕ್ಖಿಪನ್ತೀ ಅಸಿಮಜ್ಝಗಚ್ಛಿ;

ತೇನೇವ ತಸ್ಸಾ ಗಲಕಾವಕನ್ತಂ [ಗಲಯಾ ವಿಕನ್ತುಂ (ಕ.), ಗಲಕಂ ವಿಕನ್ತಾ (ಸ್ಯಾ.)], ಅಯಮ್ಪಿ ಅತ್ಥೋ ಬಹುತಾದಿಸೋವ.

೧೧೦. ಇಮೇ ನ ದೇವಾ ನ ಗನ್ಧಬ್ಬಪುತ್ತಾ, ಮಿಗಾ ಇಮೇ ಅತ್ಥವಸಂ ಗತಾ ಮೇ [ಅತ್ಥವಸಾಭತಾ ಇಮೇ (ಸೀ. ಸ್ಯಾ. ಪೀ.)];

ಏಕಞ್ಚ ನಂ ಸಾಯಮಾಸೇ ಪಚನ್ತು, ಏಕಂ ಪುನಪ್ಪಾತರಾಸೇ [ಏಕಞ್ಚ ನಂ ಪಾತರಾಸೇ (ಕ. ಸೀ. ಪೀ.)] ಪಚನ್ತು.

೧೧೧. ಸತಂ ಸಹಸ್ಸಾನಿ ದುಭಾಸಿತಾನಿ, ಕಲಮ್ಪಿ ನಾಗ್ಘನ್ತಿ ಸುಭಾಸಿತಸ್ಸ;

ದುಬ್ಭಾಸಿತಂ ಸಙ್ಕಮಾನೋ ಕಿಲೇಸೋ [ಕಿಲಿಸ್ಸತಿ (?)], ತಸ್ಮಾ ತುಣ್ಹೀ ಕಿಮ್ಪುರಿಸಾ [ಕಿಂಪುರಿಸೋ (ಸೀ. ಸ್ಯಾ.)] ನ ಬಾಲ್ಯಾ.

೧೧೨. ಯಾ ಮೇಸಾ ಬ್ಯಾಹಾಸಿ [ಬ್ಯಾಕಾಸಿ (ಸೀ. ಸ್ಯಾ. ಪೀ.)] ಪಮುಞ್ಚಥೇತಂ, ಗಿರಿಞ್ಚ ನಂ [ಗಿರಿಂ ವರಂ (ಕ.)] ಹಿಮವನ್ತಂ ನಯನ್ತು;

ಇಮಞ್ಚ ಖೋ ದೇನ್ತು ಮಹಾನಸಾಯ, ಪಾತೋವ ನಂ ಪಾತರಾಸೇ ಪಚನ್ತು.

೧೧೩. ಪಜ್ಜುನ್ನನಾಥಾ ಪಸವೋ, ಪಸುನಾಥಾ ಅಯಂ ಪಜಾ;

ತ್ವಂ ನಾಥೋಸಿ [ತ್ವಂ-ನಾಥೋ’ಸ್ಮಿ (ಸೀ. ಸ್ಯಾ. ಪೀ.)] ಮಹಾರಾಜ, ನಾಥೋಹಂ ಭರಿಯಾಯ ಮೇ [ಅಮ್ಹ-ನಾಥಾ ಮಮ ಭರಿಯಾ (ಕ. ಸೀ. ಸ್ಯಾ.)];

ದ್ವಿನ್ನಮಞ್ಞತರಂ ಞತ್ವಾ, ಮುತ್ತೋ ಗಚ್ಛೇಯ್ಯ ಪಬ್ಬತಂ.

೧೧೪. ನ ವೇ ನಿನ್ದಾ ಸುಪರಿವಜ್ಜಯೇಥ [ಸುಪರಿವಜ್ಜಯಾಥ (ಸ್ಯಾ.)], ನಾನಾ ಜನಾ ಸೇವಿತಬ್ಬಾ ಜನಿನ್ದ;

ಯೇನೇವ ಏಕೋ ಲಭತೇ ಪಸಂಸಂ, ತೇನೇವ ಅಞ್ಞೋ ಲಭತೇ ನಿನ್ದಿತಾರಂ.

೧೧೫. ಸಬ್ಬೋ ಲೋಕೋ ಪರಿಚಿತ್ತೋ ಅತಿಚಿತ್ತೋ [ಪರಚಿತ್ತೇನ ಅತಿಚಿತ್ತೋ (ಸೀ. ಸ್ಯಾ.), ಪರಚಿತ್ತೇನ ಅಚಿತ್ತೋ (ಸೀ. ಅಟ್ಠ.)], ಸಬ್ಬೋ ಲೋಕೋ ಚಿತ್ತವಾ ಸಮ್ಹಿ ಚಿತ್ತೇ;

ಪಚ್ಚೇಕಚಿತ್ತಾ ಪುಥು ಸಬ್ಬಸತ್ತಾ, ಕಸ್ಸೀಧ ಚಿತ್ತಸ್ಸ ವಸೇ ನ ವತ್ತೇ.

೧೧೬. ತುಣ್ಹೀ ಅಹೂ ಕಿಮ್ಪುರಿಸೋ ಸಭರಿಯೋ [ಅಭಾಣೀ (ಕ.)], ಯೋ ದಾನಿ ಬ್ಯಾಹಾಸಿ ಭಯಸ್ಸ ಭೀತೋ;

ಸೋ ದಾನಿ ಮುತ್ತೋ ಸುಖಿತೋ ಅರೋಗೋ, ವಾಚಾಕಿರೇವತ್ತವತೀ ನರಾನನ್ತಿ.

ತಕ್ಕಾರಿಯಜಾತಕಂ ಅಟ್ಠಮಂ.