೪೭೩. ಮಿತ್ತಾಮಿತ್ತಜಾತಕಂ (೧೦)

೧೨೧. ಕಾನಿ ಕಮ್ಮಾನಿ ಕುಬ್ಬಾನಂ, ಕಥಂ ವಿಞ್ಞೂ ಪರಕ್ಕಮೇ;

ಅಮಿತ್ತಂ ಜಾನೇಯ್ಯ ಮೇಧಾವೀ, ದಿಸ್ವಾ ಸುತ್ವಾ ಚ ಪಣ್ಡಿತೋ.

೧೨೨. ನ ನಂ ಉಮ್ಹಯತೇ ದಿಸ್ವಾ, ನ ಚ ನಂ ಪಟಿನನ್ದತಿ;

ಚಕ್ಖೂನಿ ಚಸ್ಸ [ಚಕ್ಖೂನಿಸ್ಸ (ಸ್ಯಾ. ಕ.)] ನ ದದಾತಿ, ಪಟಿಲೋಮಞ್ಚ ವತ್ತತಿ.

೧೨೩. ಅಮಿತ್ತೇ ತಸ್ಸ ಭಜತಿ, ಮಿತ್ತೇ ತಸ್ಸ ನ ಸೇವತಿ;

ವಣ್ಣಕಾಮೇ ನಿವಾರೇತಿ, ಅಕ್ಕೋಸನ್ತೇ ಪಸಂಸತಿ.

೧೨೪. ಗುಯ್ಹಞ್ಚ ತಸ್ಸ ನಕ್ಖಾತಿ, ತಸ್ಸ ಗುಯ್ಹಂ ನ ಗೂಹತಿ;

ಕಮ್ಮಂ ತಸ್ಸ ನ ವಣ್ಣೇತಿ, ಪಞ್ಞಸ್ಸ ನಪ್ಪಸಂಸತಿ.

೧೨೫. ಅಭವೇ ನನ್ದತಿ ತಸ್ಸ, ಭವೇ ತಸ್ಸ ನ ನನ್ದತಿ;

ಅಚ್ಛೇರಂ [ಅಚ್ಛರಿಯಂ (ಸೀ. ಸ್ಯಾ. ಪೀ.)] ಭೋಜನಂ ಲದ್ಧಾ, ತಸ್ಸ ನುಪ್ಪಜ್ಜತೇ ಸತಿ;

ತತೋ ನಂ ನಾನುಕಮ್ಪತಿ, ಅಹೋ ಸೋಪಿ [ಅಹಾಸೋಪಿ (ಕ. ಸೀ. ಸ್ಯಾ. ಕ.)] ಲಭೇಯ್ಯಿತೋ.

೧೨೬. ಇಚ್ಚೇತೇ ಸೋಳಸಾಕಾರಾ, ಅಮಿತ್ತಸ್ಮಿಂ ಪತಿಟ್ಠಿತಾ;

ಯೇಹಿ ಅಮಿತ್ತಂ ಜಾನೇಯ್ಯ, ದಿಸ್ವಾ ಸುತ್ವಾ ಚ ಪಣ್ಡಿತೋ.

೧೨೭. ಕಾನಿ ಕಮ್ಮಾನಿ ಕುಬ್ಬಾನಂ, ಕಥಂ ವಿಞ್ಞೂ ಪರಕ್ಕಮೇ;

ಮಿತ್ತಂ ಜಾನೇಯ್ಯ ಮೇಧಾವೀ, ದಿಸ್ವಾ ಸುತ್ವಾ ಚ ಪಣ್ಡಿತೋ.

೧೨೮. ಪವುತ್ಥಂ ತಸ್ಸ ಸರತಿ, ಆಗತಂ ಅಭಿನನ್ದತಿ;

ತತೋ ಕೇಲಾಯಿತೋ ಹೋತಿ, ವಾಚಾಯ ಪಟಿನನ್ದತಿ.

೧೨೯. ಮಿತ್ತೇ ತಸ್ಸೇವ ಭಜತಿ, ಅಮಿತ್ತೇ ತಸ್ಸ ನ ಸೇವತಿ;

ಅಕ್ಕೋಸನ್ತೇ ನಿವಾರೇತಿ, ವಣ್ಣಕಾಮೇ ಪಸಂಸತಿ.

೧೩೦. ಗುಯ್ಹಞ್ಚ ತಸ್ಸ ಅಕ್ಖಾತಿ, ತಸ್ಸ ಗುಯ್ಹಞ್ಚ ಗೂಹತಿ;

ಕಮ್ಮಞ್ಚ ತಸ್ಸ ವಣ್ಣೇತಿ, ಪಞ್ಞಂ ತಸ್ಸ [ಪಞ್ಞಮಸ್ಸ (ಸ್ಯಾ. ಕ.)] ಪಸಂಸತಿ.

೧೩೧. ಭವೇ ಚ ನನ್ದತಿ ತಸ್ಸ [ಭವೇ ನನ್ದತಿ ತಸ್ಸ ಚ (ಕ.)], ಅಭವೇ ತಸ್ಸ ನ ನನ್ದತಿ;

ಅಚ್ಛೇರಂ [ಅಚ್ಛರಿಯಂ (ಸೀ. ಸ್ಯಾ. ಪೀ.)] ಭೋಜನಂ ಲದ್ಧಾ, ತಸ್ಸ ಉಪ್ಪಜ್ಜತೇ ಸತಿ;

ತತೋ ನಂ ಅನುಕಮ್ಪತಿ, ಅಹೋ ಸೋಪಿ [ಪಹಾಸೋಪಿ (ಕ. ಸೀ. ಸ್ಯಾ. ಕ.)] ಲಭೇಯ್ಯಿತೋ.

೧೩೨. ಇಚ್ಚೇತೇ ಸೋಳಸಾಕಾರಾ, ಮಿತ್ತಸ್ಮಿಂ ಸುಪ್ಪತಿಟ್ಠಿತಾ;

ಯೇಹಿ ಮಿತ್ತಞ್ಚ ಜಾನೇಯ್ಯ [ಮಿತ್ತಂ ಸುಜಾನೇಯ್ಯ (ಪೀ. ಕ.)], ದಿಸ್ವಾ ಸುತ್ವಾ ಚ ಪಣ್ಡಿತೋತಿ.

ಮಿತ್ತಾಮಿತ್ತಜಾತಕಂ ದಸಮಂ.

ದ್ವಾದಸಕನಿಪಾತಂ ನಿಟ್ಠಿತಂ.