೧೨. ದ್ವಾದಸಕನಿಪಾತೋ

೪೬೪. ಚೂಳಕುಣಾಲಜಾತಕಂ (೧)

೧. ಲುದ್ಧಾನಂ [ಖುದ್ದಾನಂ (ಸೀ. ಸ್ಯಾ. ಪೀ.)] ಲಹುಚಿತ್ತಾನಂ, ಅಕತಞ್ಞೂನ ದುಬ್ಭಿನಂ;

ನಾದೇವಸತ್ತೋ ಪುರಿಸೋ, ಥೀನಂ ಸದ್ಧಾತುಮರಹತಿ.

೨. ನ ತಾ ಪಜಾನನ್ತಿ ಕತಂ ನ ಕಿಚ್ಚಂ, ನ ಮಾತರಂ ಪಿತರಂ ಭಾತರಂ ವಾ;

ಅನರಿಯಾ ಸಮತಿಕ್ಕನ್ತಧಮ್ಮಾ, ಸಸ್ಸೇವ ಚಿತ್ತಸ್ಸ ವಸಂ ವಜನ್ತಿ.

೩. ಚಿರಾನುವುಟ್ಠಮ್ಪಿ [ಚಿರಾನುವುತ್ಥಮ್ಪಿ (ಸೀ. ಪೀ.)] ಪಿಯಂ ಮನಾಪಂ, ಅನುಕಮ್ಪಕಂ ಪಾಣಸಮಮ್ಪಿ ಭತ್ತುಂ [ಸನ್ತಂ (ಸೀ. ಸ್ಯಾ. ಪೀ.)];

ಆವಾಸು ಕಿಚ್ಚೇಸು ಚ ನಂ ಜಹನ್ತಿ, ತಸ್ಮಾಹಮಿತ್ಥೀನಂ ನ ವಿಸ್ಸಸಾಮಿ.

೪. ಥೀನಞ್ಹಿ ಚಿತ್ತಂ ಯಥಾ ವಾನರಸ್ಸ, ಕನ್ನಪ್ಪಕನ್ನಂ ಯಥಾ ರುಕ್ಖಛಾಯಾ;

ಚಲಾಚಲಂ ಹದಯಮಿತ್ಥಿಯಾನಂ, ಚಕ್ಕಸ್ಸ ನೇಮಿ ವಿಯ ಪರಿವತ್ತತಿ.

೫. ಯದಾ ತಾ ಪಸ್ಸನ್ತಿ ಸಮೇಕ್ಖಮಾನಾ, ಆದೇಯ್ಯರೂಪಂ ಪುರಿಸಸ್ಸ ವಿತ್ತಂ;

ಸಣ್ಹಾಹಿ ವಾಚಾಹಿ ನಯನ್ತಿ ಮೇನಂ, ಕಮ್ಬೋಜಕಾ ಜಲಜೇನೇವ ಅಸ್ಸಂ.

೬. ಯದಾ ನ ಪಸ್ಸನ್ತಿ ಸಮೇಕ್ಖಮಾನಾ, ಆದೇಯ್ಯರೂಪಂ ಪುರಿಸಸ್ಸ ವಿತ್ತಂ;

ಸಮನ್ತತೋ ನಂ ಪರಿವಜ್ಜಯನ್ತಿ, ತಿಣ್ಣೋ ನದೀಪಾರಗತೋವ ಕುಲ್ಲಂ.

೭. ಸಿಲೇಸೂಪಮಾ ಸಿಖಿರಿವ ಸಬ್ಬಭಕ್ಖಾ, ತಿಕ್ಖಮಾಯಾ ನದೀರಿವ ಸೀಘಸೋತಾ;

ಸೇವನ್ತಿ ಹೇತಾ ಪಿಯಮಪ್ಪಿಯಞ್ಚ, ನಾವಾ ಯಥಾ ಓರಕೂಲಂ ಪರಞ್ಚ.

೮. ನ ತಾ ಏಕಸ್ಸ ನ ದ್ವಿನ್ನಂ, ಆಪಣೋವ ಪಸಾರಿತೋ;

ಯೋ ತಾ ಮಯ್ಹನ್ತಿ ಮಞ್ಞೇಯ್ಯ, ವಾತಂ ಜಾಲೇನ ಬಾಧಯೇ [ಬನ್ಧಯೇ (ಸ್ಯಾ. ಕ.)].

೯. ಯಥಾ ನದೀ ಚ ಪನ್ಥೋ ಚ, ಪಾನಾಗಾರಂ ಸಭಾ ಪಪಾ;

ಏವಂ ಲೋಕಿತ್ಥಿಯೋ ನಾಮ, ವೇಲಾ ತಾಸಂ ನ ವಿಜ್ಜತಿ [ಇಮಿಸ್ಸಾ ಗಾಥಾಯ ಪುಬ್ಬದ್ಧಾಪರದ್ಧಂ ವಿಪರಿಯಾಯೇನ ದಿಸ್ಸತಿ (ಕ.)].

೧೦. ಘತಾಸನಸಮಾ ಏತಾ, ಕಣ್ಹಸಪ್ಪಸಿರೂಪಮಾ;

ಗಾವೋ ಬಹಿತಿಣಸ್ಸೇವ, ಓಮಸನ್ತಿ ವರಂ ವರಂ.

೧೧. ಘತಾಸನಂ ಕುಞ್ಜರಂ ಕಣ್ಹಸಪ್ಪಂ, ಮುದ್ಧಾಭಿಸಿತ್ತಂ ಪಮದಾ ಚ ಸಬ್ಬಾ;

ಏತೇ ನರೋ ನಿಚ್ಚಯತೋ [ನಿಚ್ಚಯತ್ತೋ (ಸೀ. ಪೀ.)] ಭಜೇಥ, ತೇಸಂ ಹವೇ ದುಬ್ಬಿದು ಸಬ್ಬಭಾವೋ [ಸಚ್ಚಭಾವೋ (ಸ್ಯಾ.)].

೧೨. ನಚ್ಚನ್ತವಣ್ಣಾ ನ ಬಹೂನಂ ಕನ್ತಾ, ನ ದಕ್ಖಿಣಾ ಪಮದಾ ಸೇವಿತಬ್ಬಾ;

ನ ಪರಸ್ಸ ಭರಿಯಾ ನ ಧನಸ್ಸ ಹೇತು, ಏತಿತ್ಥಿಯೋ ಪಞ್ಚ ನ ಸೇವಿತಬ್ಬಾತಿ.

ಚೂಳಕುಣಾಲಜಾತಕಂ ಪಠಮಂ.

೪೬೫. ಭದ್ದಸಾಲಜಾತಕಂ (೨)

೧೩. ಕಾ ತ್ವಂ ಸುದ್ಧೇಹಿ ವತ್ಥೇಹಿ, ಅಘೇ ವೇಹಾಯಸಂ [ವೇಹಾಸಯಂ (ಸೀ. ಪೀ.)] ಠಿತಾ;

ಕೇನ ತ್ಯಾಸ್ಸೂನಿ ವತ್ತನ್ತಿ, ಕುತೋ ತಂ ಭಯಮಾಗತಂ.

೧೪. ತವೇವ ದೇವ ವಿಜಿತೇ, ಭದ್ದಸಾಲೋತಿ ಮಂ ವಿದೂ;

ಸಟ್ಠಿ [ಸಟ್ಠಿಂ (ಸೀ. ಪೀ.)] ವಸ್ಸಸಹಸ್ಸಾನಿ, ತಿಟ್ಠತೋ ಪೂಜಿತಸ್ಸ ಮೇ.

೧೫. ಕಾರಯನ್ತಾ ನಗರಾನಿ, ಅಗಾರೇ ಚ ದಿಸಮ್ಪತಿ;

ವಿವಿಧೇ ಚಾಪಿ ಪಾಸಾದೇ, ನ ಮಂ ತೇ ಅಚ್ಚಮಞ್ಞಿಸುಂ;

ಯಥೇವ ಮಂ ತೇ ಪೂಜೇಸುಂ, ತಥೇವ ತ್ವಮ್ಪಿ ಪೂಜಯ.

೧೬. ತಂ ಇವಾಹಂ [ತಞ್ಚ ಅಹಂ (ಸೀ. ಸ್ಯಾ. ಪೀ.)] ನ ಪಸ್ಸಾಮಿ, ಥೂಲಂ ಕಾಯೇನ ತೇ ದುಮಂ;

ಆರೋಹಪರಿಣಾಹೇನ, ಅಭಿರೂಪೋಸಿ ಜಾತಿಯಾ.

೧೭. ಪಾಸಾದಂ ಕಾರಯಿಸ್ಸಾಮಿ, ಏಕತ್ಥಮ್ಭಂ ಮನೋರಮಂ;

ತತ್ಥ ತಂ ಉಪನೇಸ್ಸಾಮಿ, ಚಿರಂ ತೇ ಯಕ್ಖ ಜೀವಿತಂ.

೧೮. ಏವಂ ಚಿತ್ತಂ ಉದಪಾದಿ, ಸರೀರೇನ ವಿನಾಭಾವೋ;

ಪುಥುಸೋ ಮಂ ವಿಕನ್ತಿತ್ವಾ, ಖಣ್ಡಸೋ ಅವಕನ್ತಥ.

೧೯. ಅಗ್ಗೇ ಚ ಛೇತ್ವಾ ಮಜ್ಝೇ ಚ, ಪಚ್ಛಾ ಮೂಲಮ್ಹಿ ಛಿನ್ದಥ [ಮೂಲಞ್ಚ ಛಿನ್ದಥ (ಸೀ.), ಮೂಲಂ ವಿಛಿನ್ದಥ (ಪೀ.)];

ಏವಂ ಮೇ ಛಿಜ್ಜಮಾನಸ್ಸ, ನ ದುಕ್ಖಂ ಮರಣಂ ಸಿಯಾ.

೨೦. ಹತ್ಥಪಾದಂ [ಹತ್ಥಪಾದೇ (ಕ.)] ಯಥಾ ಛಿನ್ದೇ [ಛಿನ್ನೇ (ಕ.)], ಕಣ್ಣನಾಸಞ್ಚ ಜೀವತೋ;

ತತೋ ಪಚ್ಛಾ ಸಿರೋ ಛಿನ್ದೇ, ತಂ ದುಕ್ಖಂ ಮರಣಂ ಸಿಯಾ.

೨೧. ಸುಖಂ ನು ಖಣ್ಡಸೋ ಛಿನ್ನಂ, ಭದ್ದಸಾಲವನಪ್ಪತಿ;

ಕಿಂ ಹೇತು ಕಿಂ ಉಪಾದಾಯ, ಖಣ್ಡಸೋ ಛಿನ್ನಮಿಚ್ಛಸಿ.

೨೨. ಯಞ್ಚ ಹೇತುಮುಪಾದಾಯ, ಹೇತುಂ ಧಮ್ಮೂಪಸಂಹಿತಂ;

ಖಣ್ಡಸೋ ಛಿನ್ನಮಿಚ್ಛಾಮಿ, ಮಹಾರಾಜ ಸುಣೋಹಿ ಮೇ.

೨೩. ಞಾತೀ ಮೇ ಸುಖಸಂವದ್ಧಾ, ಮಮ ಪಸ್ಸೇ ನಿವಾತಜಾ;

ತೇಪಿಹಂ ಉಪಹಿಂಸೇಯ್ಯಂ, ಪರೇಸಂ ಅಸುಖೋಚಿತಂ.

೨೪. ಚೇತೇಯ್ಯರೂಪಂ [ಚೇತಬ್ಬರೂಪಂ (ಸೀ. ಪೀ.)] ಚೇತೇಸಿ, ಭದ್ದಸಾಲವನಪ್ಪತಿ;

ಹಿತಕಾಮೋಸಿ ಞಾತೀನಂ, ಅಭಯಂ ಸಮ್ಮ ದಮ್ಮಿ ತೇತಿ.

ಭದ್ದಸಾಲಜಾತಕಂ ದುತಿಯಂ.

೪೬೬. ಸಮುದ್ದವಾಣಿಜಜಾತಕಂ (೩)

೨೫. ಕಸನ್ತಿ ವಪನ್ತಿ ತೇ ಜನಾ, ಮನುಜಾ ಕಮ್ಮಫಲೂಪಜೀವಿನೋ;

ನಯಿಮಸ್ಸ ದೀಪಕಸ್ಸ ಭಾಗಿನೋ, ಜಮ್ಬುದೀಪಾ ಇದಮೇವ ನೋ ವರಂ.

೨೬. ತಿಪಞ್ಚರತ್ತೂಪಗತಮ್ಹಿ ಚನ್ದೇ, ವೇಗೋ ಮಹಾ ಹೇಹಿತಿ ಸಾಗರಸ್ಸ;

ಉಪ್ಲವಿಸ್ಸಂ ದೀಪಮಿಮಂ ಉಳಾರಂ, ಮಾ ವೋ ವಧೀ ಗಚ್ಛಥ ಲೇಣಮಞ್ಞಂ.

೨೭. ನ ಜಾತುಯಂ ಸಾಗರವಾರಿವೇಗೋ, ಉಪ್ಲವಿಸ್ಸಂ ದೀಪಮಿಮಂ ಉಳಾರಂ;

ತಂ ಮೇ ನಿಮಿತ್ತೇಹಿ ಬಹೂಹಿ ದಿಟ್ಠಂ, ಮಾ ಭೇಥ ಕಿಂ ಸೋಚಥ ಮೋದಥವ್ಹೋ [ಮೋದಥ ವೋ (ಕ.) ೬.೩೮ ಮೋಗ್ಗಲ್ಲಾನಸುತ್ತಂ ಪಸ್ಸಿತಬ್ಬಂ].

೨೮. ಪಹೂತಭಕ್ಖಂ ಬಹುಅನ್ನಪಾನಂ, ಪತ್ತತ್ಥ ಆವಾಸಮಿಮಂ ಉಳಾರಂ;

ನ ವೋ ಭಯಂ ಪಟಿಪಸ್ಸಾಮಿ ಕಿಞ್ಚಿ, ಆಪುತ್ತಪುತ್ತೇಹಿ ಪಮೋದಥವ್ಹೋ.

೨೯. ಯೋ ದೇವೋಯಂ ದಕ್ಖಿಣಾಯಂ [ದಕ್ಖಿಣಸ್ಸಂ (ಸೀ.)] ದಿಸಾಯಂ, ಖೇಮನ್ತಿ ಪಕ್ಕೋಸತಿ ತಸ್ಸ ಸಚ್ಚಂ;

ನ ಉತ್ತರೋ ವೇದಿ ಭಯಾಭಯಸ್ಸ, ಮಾ ಭೇಥ ಕಿಂ ಸೋಚಥ ಮೋದಥವ್ಹೋ.

೩೦. ಯಥಾ ಇಮೇ ವಿಪ್ಪವದನ್ತಿ ಯಕ್ಖಾ, ಏಕೋ ಭಯಂ ಸಂಸತಿ ಖೇಮಮೇಕೋ;

ತದಿಙ್ಘ ಮಯ್ಹಂ ವಚನಂ ಸುಣಾಥ, ಖಿಪ್ಪಂ ಲಹುಂ ಮಾ ವಿನಸ್ಸಿಮ್ಹ ಸಬ್ಬೇ.

೩೧. ಸಬ್ಬೇ ಸಮಾಗಮ್ಮ ಕರೋಮ ನಾವಂ, ದೋಣಿಂ ದಳ್ಹಂ ಸಬ್ಬಯನ್ತೂಪಪನ್ನಂ;

ಸಚೇ ಅಯಂ ದಕ್ಖಿಣೋ ಸಚ್ಚಮಾಹ, ಮೋಘಂ ಪಟಿಕ್ಕೋಸತಿ ಉತ್ತರೋಯಂ;

ಸಾ ಚೇವ ನೋ ಹೇಹಿತಿ ಆಪದತ್ಥಾ, ಇಮಞ್ಚ ದೀಪಂ ನ ಪರಿಚ್ಚಜೇಮ.

೩೨. ಸಚೇ ಚ ಖೋ ಉತ್ತರೋ ಸಚ್ಚಮಾಹ, ಮೋಘಂ ಪಟಿಕ್ಕೋಸತಿ ದಕ್ಖಿಣೋಯಂ;

ತಮೇವ ನಾವಂ ಅಭಿರುಯ್ಹ ಸಬ್ಬೇ, ಏವಂ ಮಯಂ ಸೋತ್ಥಿ ತರೇಮು ಪಾರಂ.

೩೩. ನ ವೇ ಸುಗಣ್ಹಂ ಪಠಮೇನ ಸೇಟ್ಠಂ, ಕನಿಟ್ಠಮಾಪಾಥಗತಂ ಗಹೇತ್ವಾ;

ಯೋ ಚೀಧ ತಚ್ಛಂ [ಮಜ್ಝಂ (ಸೀ. ಸ್ಯಾ. ಪೀ.)] ಪವಿಚೇಯ್ಯ ಗಣ್ಹತಿ [ಗಣ್ಹಿ (ಕ.)], ಸ ವೇ ನರೋ ಸೇಟ್ಠಮುಪೇತಿ ಠಾನಂ.

೩೪. ಯಥಾಪಿ ತೇ ಸಾಗರವಾರಿಮಜ್ಝೇ, ಸಕಮ್ಮುನಾ ಸೋತ್ಥಿ ವಹಿಂಸು ವಾಣಿಜಾ;

ಅನಾಗತತ್ಥಂ ಪಟಿವಿಜ್ಝಿಯಾನ, ಅಪ್ಪಮ್ಪಿ ನಾಚ್ಚೇತಿ ಸ ಭೂರಿಪಞ್ಞೋ.

೩೫. ಬಾಲಾ ಚ ಮೋಹೇನ ರಸಾನುಗಿದ್ಧಾ, ಅನಾಗತಂ ಅಪ್ಪಟಿವಿಜ್ಝಿಯತ್ಥಂ;

ಪಚ್ಚುಪ್ಪನ್ನೇ ಸೀದನ್ತಿ ಅತ್ಥಜಾತೇ, ಸಮುದ್ದಮಜ್ಝೇ ಯಥಾ ತೇ ಮನುಸ್ಸಾ.

೩೬. ಅನಾಗತಂ ಪಟಿಕಯಿರಾಥ ಕಿಚ್ಚಂ, ‘‘ಮಾ ಮಂ ಕಿಚ್ಚಂ ಕಿಚ್ಚಕಾಲೇ ಬ್ಯಧೇಸಿ’’;

ತಂ ತಾದಿಸಂ ಪಟಿಕತ [ಪಟಿಕತಂ (ಕ.), ಪಟಿಗತ (ಸೀ. ಅಟ್ಠ.), ಪಟಿಕಚ್ಚ (?)] ಕಿಚ್ಚಕಾರಿಂ, ನ ತಂ ಕಿಚ್ಚಂ ಕಿಚ್ಚಕಾಲೇ ಬ್ಯಧೇತೀತಿ.

ಸಮುದ್ದವಾಣಿಜಜಾತಕಂ ತತಿಯಂ.

೪೬೭. ಕಾಮಜಾತಕಂ (೪)

೩೭. ಕಾಮಂ ಕಾಮಯಮಾನಸ್ಸ, ತಸ್ಸ ಚೇ ತಂ ಸಮಿಜ್ಝತಿ;

ಅದ್ಧಾ ಪೀತಿಮನೋ ಹೋತಿ, ಲದ್ಧಾ ಮಚ್ಚೋ ಯದಿಚ್ಛತಿ.

೩೮. ಕಾಮಂ ಕಾಮಯಮಾನಸ್ಸ, ತಸ್ಸ ಚೇ ತಂ ಸಮಿಜ್ಝತಿ;

ತತೋ ನಂ ಅಪರಂ ಕಾಮೇ, ಧಮ್ಮೇ ತಣ್ಹಂವ ವಿನ್ದತಿ.

೩೯. ಗವಂವ ಸಿಙ್ಗಿನೋ ಸಿಙ್ಗಂ, ವಡ್ಢಮಾನಸ್ಸ ವಡ್ಢತಿ;

ಏವಂ ಮನ್ದಸ್ಸ ಪೋಸಸ್ಸ, ಬಾಲಸ್ಸ ಅವಿಜಾನತೋ;

ಭಿಯ್ಯೋ ತಣ್ಹಾ ಪಿಪಾಸಾ ಚ, ವಡ್ಢಮಾನಸ್ಸ ವಡ್ಢತಿ.

೪೦. ಪಥಬ್ಯಾ ಸಾಲಿಯವಕಂ, ಗವಸ್ಸಂ [ಗವಾಸಂ (ಸೀ. ಸ್ಯಾ. ಪೀ.)] ದಾಸಪೋರಿಸಂ;

ದತ್ವಾ ಚ [ದತ್ವಾಪಿ (ಸೀ. ಸ್ಯಾ.), ದತ್ವಾ ವಾ (ಪೀ.)] ನಾಲಮೇಕಸ್ಸ, ಇತಿ ವಿದ್ವಾ [ವಿದ್ಧಾ (ಸ್ಯಾ.)] ಸಮಂ ಚರೇ.

೪೧. ರಾಜಾ ಪಸಯ್ಹ ಪಥವಿಂ ವಿಜಿತ್ವಾ, ಸಸಾಗರನ್ತಂ ಮಹಿಮಾವಸನ್ತೋ;

ಓರಂ ಸಮುದ್ದಸ್ಸ ಅತಿತ್ತರೂಪೋ [ಅತಿತ್ತಿರೂಪೋ (ಕ.)], ಪಾರಂ ಸಮುದ್ದಸ್ಸಪಿ ಪತ್ಥಯೇಥ.

೪೨. ಯಾವ ಅನುಸ್ಸರಂ ಕಾಮೇ, ಮನಸಾ ತಿತ್ತಿ ನಾಜ್ಝಗಾ;

ತತೋ ನಿವತ್ತಾ ಪಟಿಕಮ್ಮ ದಿಸ್ವಾ, ತೇ ವೇ ಸುತಿತ್ತಾ ಯೇ [ತಿತ್ತಾ (ಸೀ. ಸ್ಯಾ. ಪೀ.)] ಪಞ್ಞಾಯ ತಿತ್ತಾ.

೪೩. ಪಞ್ಞಾಯ ತಿತ್ತಿನಂ [ತಿತ್ತೀನಂ (ಸೀ. ಸ್ಯಾ.)] ಸೇಟ್ಠಂ, ನ ಸೋ ಕಾಮೇಹಿ ತಪ್ಪತಿ;

ಪಞ್ಞಾಯ ತಿತ್ತಂ ಪುರಿಸಂ, ತಣ್ಹಾ ನ ಕುರುತೇ ವಸಂ.

೪೪. ಅಪಚಿನೇಥೇವ ಕಾಮಾನಂ [ಕಾಮಾನಿ (ಸೀ. ಸ್ಯಾ. ಪೀ.)], ಅಪ್ಪಿಚ್ಛಸ್ಸ ಅಲೋಲುಪೋ;

ಸಮುದ್ದಮತ್ತೋ ಪುರಿಸೋ, ನ ಸೋ ಕಾಮೇಹಿ ತಪ್ಪತಿ.

೪೫. ರಥಕಾರೋವ ಚಮ್ಮಸ್ಸ, ಪರಿಕನ್ತಂ ಉಪಾಹನಂ;

ಯಂ ಯಂ ಚಜತಿ [ಜಹತಿ (ಸ್ಯಾ. ಕ.)] ಕಾಮಾನಂ, ತಂ ತಂ ಸಮ್ಪಜ್ಜತೇ ಸುಖಂ;

ಸಬ್ಬಂ ಚೇ ಸುಖಮಿಚ್ಛೇಯ್ಯ, ಸಬ್ಬೇ ಕಾಮೇ ಪರಿಚ್ಚಜೇ.

೪೬. ಅಟ್ಠ ತೇ ಭಾಸಿತಾ ಗಾಥಾ, ಸಬ್ಬಾ ಹೋನ್ತಿ ಸಹಸ್ಸಿಯೋ [ಸಹಸ್ಸಿಯಾ (?) ಉಪರಿ ಸುತಸೋಮಜಾತಕೇ ತಥಾ ದಿಸ್ಸತಿ];

ಪಟಿಗಣ್ಹ ಮಹಾಬ್ರಹ್ಮೇ, ಸಾಧೇತಂ ತವ ಭಾಸಿತಂ.

೪೭. ನ ಮೇ ಅತ್ಥೋ ಸಹಸ್ಸೇಹಿ, ಸತೇಹಿ ನಹುತೇಹಿ ವಾ;

ಪಚ್ಛಿಮಂ ಭಾಸತೋ ಗಾಥಂ, ಕಾಮೇ ಮೇ ನ ರತೋ ಮನೋ.

೪೮. ಭದ್ರಕೋ [ಸದ್ದೋ (ಸೀ.)] ವತಾಯಂ ಮಾಣವಕೋ, ಸಬ್ಬಲೋಕವಿದೂ ಮುನಿ;

ಯೋ ಇಮಂ ತಣ್ಹಂ [ಯೋ ತಣ್ಹಂ (ಸೀ. ಸ್ಯಾ.)] ದುಕ್ಖಜನನಿಂ, ಪರಿಜಾನಾತಿ ಪಣ್ಡಿತೋತಿ.

ಕಾಮಜಾತಕಂ ಚತುತ್ಥಂ.

೪೬೮. ಜನಸನ್ಧಜಾತಕಂ (೫)

೪೯. ದಸ ಖಲು ಇಮಾನಿ [ಖಲುಮಾನಿ (ಸ್ಯಾ.)] ಠಾನಾನಿ, ಯಾನಿ ಪುಬ್ಬೇ ಅಕರಿತ್ವಾ;

ಸ ಪಚ್ಛಾ ಮನುತಪ್ಪತಿ, ಇಚ್ಚೇವಾಹ [ಇಚ್ಚಾಹ ರಾಜಾ (ಸೀ. ಸ್ಯಾ. ಪೀ.)] ಜನಸನ್ಧೋ.

೫೦. ಅಲದ್ಧಾ ವಿತ್ತಂ ತಪ್ಪತಿ, ಪುಬ್ಬೇ ಅಸಮುದಾನಿತಂ;

ನ ಪುಬ್ಬೇ ಧನಮೇಸಿಸ್ಸಂ, ಇತಿ ಪಚ್ಛಾನುತಪ್ಪತಿ.

೫೧. ಸಕ್ಯರೂಪಂ ಪುರೇ ಸನ್ತಂ, ಮಯಾ ಸಿಪ್ಪಂ ನ ಸಿಕ್ಖಿತಂ;

ಕಿಚ್ಛಾ ವುತ್ತಿ ಅಸಿಪ್ಪಸ್ಸ, ಇತಿ ಪಚ್ಛಾನುತಪ್ಪತಿ.

೫೨. ಕೂಟವೇದೀ ಪುರೇ ಆಸಿಂ, ಪಿಸುಣೋ ಪಿಟ್ಠಿಮಂಸಿಕೋ;

ಚಣ್ಡೋ ಚ ಫರುಸೋ ಚಾಪಿ [ಚಾಸಿಂ (ಸೀ. ಸ್ಯಾ. ಪೀ.)], ಇತಿ ಪಚ್ಛಾನುತಪ್ಪತಿ.

೫೩. ಪಾಣಾತಿಪಾತೀ ಪುರೇ ಆಸಿಂ, ಲುದ್ದೋ ಚಾಪಿ [ಚಾಸಿಂ (ಸೀ. ಪೀ.)] ಅನಾರಿಯೋ;

ಭೂತಾನಂ ನಾಪಚಾಯಿಸ್ಸಂ, ಇತಿ ಪಚ್ಛಾನುತಪ್ಪತಿ.

೫೪. ಬಹೂಸು ವತ ಸನ್ತೀಸು, ಅನಾಪಾದಾಸು ಇತ್ಥಿಸು;

ಪರದಾರಂ ಅಸೇವಿಸ್ಸಂ, ಇತಿ ಪಚ್ಛಾನುತಪ್ಪತಿ.

೫೫. ಬಹುಮ್ಹಿ ವತ ಸನ್ತಮ್ಹಿ, ಅನ್ನಪಾನೇ ಉಪಟ್ಠಿತೇ;

ನ ಪುಬ್ಬೇ ಅದದಂ [ಅದದಿಂ (ಸೀ.)] ದಾನಂ, ಇತಿ ಪಚ್ಛಾನುತಪ್ಪತಿ.

೫೬. ಮಾತರಂ ಪಿತರಞ್ಚಾಪಿ, ಜಿಣ್ಣಕಂ ಗತಯೋಬ್ಬನಂ [ಜಿಣ್ಣಕೇ ಗತಯೋಬ್ಬನೇ (ಸೀ. ಸ್ಯಾ. ಪೀ.)];

ಪಹು ಸನ್ತೋ ನ ಪೋಸಿಸ್ಸಂ, ಇತಿ ಪಚ್ಛಾನುತಪ್ಪತಿ.

೫೭. ಆಚರಿಯಮನುಸತ್ಥಾರಂ, ಸಬ್ಬಕಾಮರಸಾಹರಂ;

ಪಿತರಂ ಅತಿಮಞ್ಞಿಸ್ಸಂ, ಇತಿ ಪಚ್ಛಾನುತಪ್ಪತಿ.

೫೮. ಸಮಣೇ ಬ್ರಾಹ್ಮಣೇ ಚಾಪಿ, ಸೀಲವನ್ತೇ ಬಹುಸ್ಸುತೇ;

ನ ಪುಬ್ಬೇ ಪಯಿರುಪಾಸಿಸ್ಸಂ, ಇತಿ ಪಚ್ಛಾನುತಪ್ಪತಿ.

೫೯. ಸಾಧು ಹೋತಿ ತಪೋ ಚಿಣ್ಣೋ, ಸನ್ತೋ ಚ ಪಯಿರುಪಾಸಿತೋ;

ನ ಚ ಪುಬ್ಬೇ ತಪೋ ಚಿಣ್ಣೋ, ಇತಿ ಪಚ್ಛಾನುತಪ್ಪತಿ.

೬೦. ಯೋ ಚ ಏತಾನಿ ಠಾನಾನಿ, ಯೋನಿಸೋ ಪಟಿಪಜ್ಜತಿ;

ಕರಂ ಪುರಿಸಕಿಚ್ಚಾನಿ, ಸ ಪಚ್ಛಾ ನಾನುತಪ್ಪತೀತಿ.

ಜನಸನ್ಧಜಾತಕಂ ಪಞ್ಚಮಂ.

೪೬೯. ಮಹಾಕಣ್ಹಜಾತಕಂ (೬)

೬೧. ಕಣ್ಹೋ ಕಣ್ಹೋ ಚ ಘೋರೋ ಚ, ಸುಕ್ಕದಾಠೋ ಪಭಾಸವಾ [ಪತಾಪವಾ (ಸೀ. ಸ್ಯಾ. ಪೀ.)];

ಬದ್ಧೋ ಪಞ್ಚಹಿ ರಜ್ಜೂಹಿ, ಕಿಂ ರವಿ [ಧೀರ (ಸೀ. ಪೀ.), ವೀರ (ಸ್ಯಾ.)] ಸುನಖೋ ತವ.

೬೨. ನಾಯಂ ಮಿಗಾನಮತ್ಥಾಯ, ಉಸೀನಕ [ಉಸೀನರ (ಸೀ. ಪೀ.), ಉಸೀನ್ನರ (ಸ್ಯಾ.)] ಭವಿಸ್ಸತಿ;

ಮನುಸ್ಸಾನಂ ಅನಯೋ ಹುತ್ವಾ, ತದಾ ಕಣ್ಹೋ ಪಮೋಕ್ಖತಿ.

೬೩. ಪತ್ತಹತ್ಥಾ ಸಮಣಕಾ, ಮುಣ್ಡಾ ಸಙ್ಘಾಟಿಪಾರುತಾ;

ನಙ್ಗಲೇಹಿ ಕಸಿಸ್ಸನ್ತಿ, ತದಾ ಕಣ್ಹೋ ಪಮೋಕ್ಖತಿ.

೬೪. ತಪಸ್ಸಿನಿಯೋ [ತಪನೀಯಾ (ಕ.) ದುತಿಯನ್ತಪದಾನಿ ಹೇತಾನಿ] ಪಬ್ಬಜಿತಾ, ಮುಣ್ಡಾ ಸಙ್ಘಾಟಿಪಾರುತಾ;

ಯದಾ ಲೋಕೇ ಗಮಿಸ್ಸನ್ತಿ, ತದಾ ಕಣ್ಹೋ ಪಮೋಕ್ಖತಿ.

೬೫. ದೀಘೋತ್ತರೋಟ್ಠಾ ಜಟಿಲಾ, ಪಙ್ಕದನ್ತಾ ರಜಸ್ಸಿರಾ;

ಇಣಂ ಚೋದಾಯ [ವೋದಾಯ (ಸೀ. ಪೀ.), ಚೋದಯ (ಸ್ಯಾ.)] ಗಚ್ಛನ್ತಿ, ತದಾ ಕಣ್ಹೋ ಪಮೋಕ್ಖತಿ.

೬೬. ಅಧಿಚ್ಚ ವೇದೇ [ವೇದಂ (ಕ.)] ಸಾವಿತ್ತಿಂ, ಯಞ್ಞತನ್ತಞ್ಚ [ತನ್ತ್ರಞ್ಚ (ಸೀ. ಸ್ಯಾ. ಪೀ.)] ಬ್ರಾಹ್ಮಣಾ;

ಭತಿಕಾಯ ಯಜಿಸ್ಸನ್ತಿ, ತದಾ ಕಣ್ಹೋ ಪಮೋಕ್ಖತಿ.

೬೭. ಮಾತರಂ ಪಿತರಞ್ಚಾಪಿ, ಜಿಣ್ಣಕಂ ಗತಯೋಬ್ಬನಂ;

ಪಹೂ ಸನ್ತೋ [ಸನ್ತಾ (ಸೀ.)] ನ ಭರನ್ತಿ, ತದಾ ಕಣ್ಹೋ ಪಮೋಕ್ಖತಿ.