೪೭೨. ಮಹಾಪದುಮಜಾತಕಂ (೯)

೧೦೬. ನಾದಟ್ಠಾ [ನಾದಿಟ್ಠಾ (ಕ. ಸೀ. ಸ್ಯಾ. ಕ.)] ಪರತೋ ದೋಸಂ, ಅಣುಂ ಥೂಲಾನಿ ಸಬ್ಬಸೋ;

ಇಸ್ಸರೋ ಪಣಯೇ ದಣ್ಡಂ, ಸಾಮಂ ಅಪ್ಪಟಿವೇಕ್ಖಿಯ.

೧೦೭. ಯೋ ಚ ಅಪ್ಪಟಿವೇಕ್ಖಿತ್ವಾ, ದಣ್ಡಂ ಕುಬ್ಬತಿ ಖತ್ತಿಯೋ;

ಸಕಣ್ಟಕಂ ಸೋ ಗಿಲತಿ, ಜಚ್ಚನ್ಧೋವ ಸಮಕ್ಖಿಕಂ.

೧೦೮. ಅದಣ್ಡಿಯಂ ದಣ್ಡಯತಿ [ದಣ್ಡಿಯತಿ (ಸ್ಯಾ. ಪೀ.)], ದಣ್ಡಿಯಞ್ಚ ಅದಣ್ಡಿಯಂ [ಅದಣ್ಡಿಯ (ನಿಯ್ಯ), ನ ದಣ್ಡಯೇ (?)];

ಅನ್ಧೋವ ವಿಸಮಂ ಮಗ್ಗಂ, ನ ಜಾನಾತಿ ಸಮಾಸಮಂ.

೧೦೯. ಯೋ ಚ ಏತಾನಿ ಠಾನಾನಿ, ಅಣುಂ ಥೂಲಾನಿ ಸಬ್ಬಸೋ;

ಸುದಿಟ್ಠಮನುಸಾಸೇಯ್ಯ, ಸ ವೇ ವೋಹರಿತು [ವೋಹಾತು (ಪೀ.)] ಮರಹತಿ.

೧೧೦. ನೇಕನ್ತಮುದುನಾ ಸಕ್ಕಾ, ಏಕನ್ತತಿಖಿಣೇನ ವಾ;

ಅತ್ತಂ ಮಹನ್ತೇ [ಮಹತ್ತೇ (ಸ್ಯಾ. ಕ.)] ಠಪೇತುಂ [ಠಾಪೇತುಂ (ಸೀ. ಸ್ಯಾ. ಪೀ.)], ತಸ್ಮಾ ಉಭಯಮಾಚರೇ.

೧೧೧. ಪರಿಭೂತೋ ಮುದು ಹೋತಿ, ಅತಿತಿಕ್ಖೋ ಚ ವೇರವಾ;

ಏತಞ್ಚ ಉಭಯಂ ಞತ್ವಾ, ಅನುಮಜ್ಝಂ ಸಮಾಚರೇ.

೧೧೨. ಬಹುಮ್ಪಿ ರತ್ತೋ ಭಾಸೇಯ್ಯ, ದುಟ್ಠೋಪಿ ಬಹು ಭಾಸತಿ;

ನ ಇತ್ಥಿಕಾರಣಾ ರಾಜ, ಪುತ್ತಂ ಘಾತೇತುಮರಹಸಿ.

೧೧೩. ಸಬ್ಬೋವ [ಸಬ್ಬೋ ಚ (ಕ. ಸೀ. ಪೀ.)] ಲೋಕೋ ಏಕತೋ [ಏಕನ್ತೋ (ಸೀ. ಪೀ.)], ಇತ್ಥೀ ಚ ಅಯಮೇಕಿಕಾ;

ತೇನಾಹಂ ಪಟಿಪಜ್ಜಿಸ್ಸಂ, ಗಚ್ಛಥ ಪಕ್ಖಿಪಥೇವ [ಪಕ್ಖಿಪೇಥ (ಸ್ಯಾ. ಅಟ್ಠ.)] ತಂ.

೧೧೪. ಅನೇಕತಾಲೇ ನರಕೇ, ಗಮ್ಭೀರೇ ಚ ಸುದುತ್ತರೇ [ಗಮ್ಭೀರೇ ಸುದುರುತ್ತರೇ (ಪೀ. ಕ.)];

ಪಾತಿತೋ ಗಿರಿದುಗ್ಗಸ್ಮಿಂ, ಕೇನ ತ್ವಂ ತತ್ಥ ನಾಮರಿ.

೧೧೫. ನಾಗೋ ಜಾತಫಣೋ ತತ್ಥ, ಥಾಮವಾ ಗಿರಿಸಾನುಜೋ;

ಪಚ್ಚಗ್ಗಹಿ ಮಂ ಭೋಗೇಹಿ, ತೇನಾಹಂ ತತ್ಥ ನಾಮರಿಂ.

೧೧೬. ಏಹಿ ತಂ ಪಟಿನೇಸ್ಸಾಮಿ, ರಾಜಪುತ್ತ ಸಕಂ ಘರಂ;

ರಜ್ಜಂ ಕಾರೇಹಿ [ಕಾರೇಸಿ (ಸೀ.)] ಭದ್ದನ್ತೇ, ಕಿಂ ಅರಞ್ಞೇ ಕರಿಸ್ಸಸಿ.

೧೧೭. ಯಥಾ ಗಿಲಿತ್ವಾ ಬಳಿಸಂ, ಉದ್ಧರೇಯ್ಯ ಸಲೋಹಿತಂ;

ಉದ್ಧರಿತ್ವಾ ಸುಖೀ ಅಸ್ಸ, ಏವಂ [ಸುಖಂ (ಪೀ. ಕ.)] ಪಸ್ಸಾಮಿ ಅತ್ತನಂ [ಅತ್ತನಿ (ಪೀ. ಕ.), ಅತ್ತನಾ (ಸ್ಯಾ.), ಏವಂ ಅಹಮ್ಪಿ ಪುನ ಸೋತ್ಥಿಭಾವಪ್ಪತ್ತಂ ಗಿಲಿತಬಳಿಸಂ ಪುರಿಸಮಿವ ಅತ್ತಾನಂ ಪಸ್ಸಾಮೀತಿ (ಅಟ್ಠ. ಸಂವಣ್ಣನಾ)].

೧೧೮. ಕಿಂ ನು ತ್ವಂ ಬಳಿಸಂ ಬ್ರೂಸಿ, ಕಿಂ ತ್ವಂ ಬ್ರೂಸಿ ಸಲೋಹಿತಂ;

ಕಿಂ ನು ತ್ವಂ ಉಬ್ಭತಂ ಬ್ರೂಸಿ, ತಂ ಮೇ ಅಕ್ಖಾಹಿ ಪುಚ್ಛಿತೋ.

೧೧೯. ಕಾಮಾಹಂ ಬಳಿಸಂ ಬ್ರೂಮಿ, ಹತ್ಥಿಅಸ್ಸಂ ಸಲೋಹಿತಂ;

ಚತ್ತಾಹಂ ಉಬ್ಭತಂ ಬ್ರೂಮಿ, ಏವಂ ಜಾನಾಹಿ ಖತ್ತಿಯ.

೧೨೦. ಚಿಞ್ಚಾಮಾಣವಿಕಾ ಮಾತಾ, ದೇವದತ್ತೋ ಚ ಮೇ ಪಿತಾ;

ಆನನ್ದೋ ಪಣ್ಡಿತೋ ನಾಗೋ, ಸಾರಿಪುತ್ತೋ ಚ ದೇವತಾ;

ರಾಜಪುತ್ತೋ ಅಹಂ ಆಸಿಂ [ಅಹಂ ತದಾ ರಾಜಪುತ್ತೋ (ಸೀ. ಸ್ಯಾ. ಪೀ.)], ಏವಂ ಧಾರೇಥ ಜಾತಕನ್ತಿ.

ಮಹಾಪದುಮಜಾತಕಂ ನವಮಂ.