೪೭೧. ಮೇಣ್ಡಕಪಞ್ಹಜಾತಕಂ (೮)

೯೪. ಯೇಸಂ ನ ಕದಾಚಿ ಭೂತಪುಬ್ಬಂ, ಸಖ್ಯಂ [ಸಕ್ಖಿಂ (ಸೀ. ಪೀ.), ಸಖಿ (ಸ್ಯಾ.)] ಸತ್ತಪದಮ್ಪಿಮಸ್ಮಿ ಲೋಕೇ;

ಜಾತಾ ಅಮಿತ್ತಾ ದುವೇ ಸಹಾಯಾ, ಪಟಿಸನ್ಧಾಯ ಚರನ್ತಿ ಕಿಸ್ಸ ಹೇತು.

೯೫. ಯದಿ ಮೇ ಅಜ್ಜ ಪಾತರಾಸಕಾಲೇ, ಪಞ್ಹಂ ನ ಸಕ್ಕುಣೇಯ್ಯಾಥ ವತ್ತುಮೇತಂ;

ರಟ್ಠಾ ಪಬ್ಬಾಜಯಿಸ್ಸಾಮಿ ವೋ ಸಬ್ಬೇ, ನ ಹಿ ಮತ್ಥೋ ದುಪ್ಪಞ್ಞಜಾತಿಕೇಹಿ.

೯೬. ಮಹಾಜನಸಮಾಗಮಮ್ಹಿ ಘೋರೇ, ಜನಕೋಲಾಹಲಸಙ್ಗಮಮ್ಹಿ ಜಾತೇ;

ವಿಕ್ಖಿತ್ತಮನಾ ಅನೇಕಚಿತ್ತಾ, ಪಞ್ಹಂ ನ ಸಕ್ಕುಣೋಮ ವತ್ತುಮೇತಂ.

೯೭. ಏಕಗ್ಗಚಿತ್ತಾವ ಏಕಮೇಕಾ, ರಹಸಿ ಗತಾ ಅತ್ಥಂ ನಿಚಿನ್ತಯಿತ್ವಾ [ಅತ್ಥಾನಿ ಚಿನ್ತಯಿತ್ವಾ (ಸ್ಯಾ. ಕ.)];

ಪವಿವೇಕೇ ಸಮ್ಮಸಿತ್ವಾನ ಧೀರಾ, ಅಥ ವಕ್ಖನ್ತಿ ಜನಿನ್ದ ಏತಮತ್ಥಂ.

೯೮. ಉಗ್ಗಪುತ್ತ-ರಾಜಪುತ್ತಿಯಾನಂ, ಉರಬ್ಭಸ್ಸ ಮಂಸಂ ಪಿಯಂ ಮನಾಪಂ;

ನ ಸುನಖಸ್ಸ ತೇ ಅದೇನ್ತಿ ಮಂಸಂ, ಅಥ ಮೇಣ್ಡಸ್ಸ ಸುಣೇನ ಸಖ್ಯಮಸ್ಸ.

೯೯. ಚಮ್ಮಂ ವಿಹನನ್ತಿ ಏಳಕಸ್ಸ, ಅಸ್ಸಪಿಟ್ಠತ್ಥರಸ್ಸುಖಸ್ಸ [ಅಸ್ಸಪಿಟ್ಠತ್ಥರಣಸುಖಸ್ಸ (ಸೀ.)] ಹೇತು;

ನ ಚ ತೇ ಸುನಖಸ್ಸ ಅತ್ಥರನ್ತಿ, ಅಥ ಮೇಣ್ಡಸ್ಸ ಸುಣೇನ ಸಖ್ಯಮಸ್ಸ.

೧೦೦. ಆವೇಲ್ಲಿತಸಿಙ್ಗಿಕೋ ಹಿ ಮೇಣ್ಡೋ, ನ ಚ ಸುನಖಸ್ಸ ವಿಸಾಣಕಾನಿ ಅತ್ಥಿ;

ತಿಣಭಕ್ಖೋ ಮಂಸಭೋಜನೋ ಚ, ಅಥ ಮೇಣ್ಡಸ್ಸ ಸುಣೇನ ಸಖ್ಯಮಸ್ಸ.

೧೦೧. ತಿಣಮಾಸಿ ಪಲಾಸಮಾಸಿ ಮೇಣ್ಡೋ, ನ ಚ ಸುನಖೋ ತಿಣಮಾಸಿ ನೋ ಪಲಾಸಂ;

ಗಣ್ಹೇಯ್ಯ ಸುಣೋ ಸಸಂ ಬಿಳಾರಂ, ಅಥ ಮೇಣ್ಡಸ್ಸ ಸುಣೇನ ಸಖ್ಯಮಸ್ಸ.

೧೦೨. ಅಟ್ಠಡ್ಢಪದೋ ಚತುಪ್ಪದಸ್ಸ, ಮೇಣ್ಡೋ ಅಟ್ಠನಖೋ ಅದಿಸ್ಸಮಾನೋ;

ಛಾದಿಯಮಾಹರತೀ ಅಯಂ ಇಮಸ್ಸ, ಮಂಸಂ ಆಹರತೀ ಅಯಂ ಅಮುಸ್ಸ.

೧೦೩. ಪಾಸಾದವರಗತೋ ವಿದೇಹಸೇಟ್ಠೋ, ವಿತಿಹಾರಂ ಅಞ್ಞಮಞ್ಞಭೋಜನಾನಂ;

ಅದ್ದಕ್ಖಿ [ಅದ್ದಸ (ಸ್ಯಾ. ಕ.)] ಕಿರ ಸಕ್ಖಿಕಂ ಜನಿನ್ದೋ, ಬುಭುಕ್ಕಸ್ಸ ಪುಣ್ಣಂ ಮುಖಸ್ಸ [ಭೋಭುಕ್ಖಸ್ಸ ಚ ಪುಣ್ಣಮುಖಸ್ಸ (ಸೀ.)] ಚೇತಂ.

೧೦೪. ಲಾಭಾ ವತ ಮೇ ಅನಪ್ಪರೂಪಾ, ಯಸ್ಸ ಮೇದಿಸಾ ಪಣ್ಡಿತಾ ಕುಲಮ್ಹಿ;

ಪಞ್ಹಸ್ಸ ಗಮ್ಭೀರಗತಂ ನಿಪುಣಮತ್ಥಂ, ಪಟಿವಿಜ್ಝನ್ತಿ ಸುಭಾಸಿತೇನ ಧೀರಾ.

೧೦೫. ಅಸ್ಸತರಿರಥಞ್ಚ ಏಕಮೇಕಂ, ಫೀತಂ ಗಾಮವರಞ್ಚ ಏಕಮೇಕಂ;

ಸಬ್ಬೇಸಂ ವೋ ದಮ್ಮಿ ಪಣ್ಡಿತಾನಂ, ಪರಮಪ್ಪತೀತಮನೋ ಸುಭಾಸಿತೇನಾತಿ.

ಮೇಣ್ಡಕಪಞ್ಹಜಾತಕಂ ಅಟ್ಠಮಂ.