೪೫೧. ಚಕ್ಕವಾಕಜಾತಕಂ (೧೩)

೧೩೫. ವಣ್ಣವಾ ಅಭಿರೂಪೋಸಿ, ಘನೋ ಸಞ್ಜಾತರೋಹಿತೋ;

ಚಕ್ಕವಾಕ ಸುರೂಪೋಸಿ, ವಿಪ್ಪಸನ್ನಮುಖಿನ್ದ್ರಿಯೋ.

೧೩೬. ಪಾಠೀನಂ ಪಾವುಸಂ ಮಚ್ಛಂ, ಬಲಜಂ [ವಾಲಜಂ (ಸೀ. ಪೀ.), ಬಲಜ್ಜಂ (ಸ್ಯಾ.)] ಮುಞ್ಜರೋಹಿತಂ;

ಗಙ್ಗಾಯ ತೀರೇ ನಿಸಿನ್ನೋ [ಗಙ್ಗಾತೀರೇ ನಿಸಿನ್ನೋಸಿ (ಸ್ಯಾ. ಕ.)], ಏವಂ ಭುಞ್ಜಸಿ ಭೋಜನಂ.

೧೩೭. ನ ವಾಹಮೇತಂ [ಸಬ್ಬತ್ಥಪಿ ಸಮಾನಂ] ಭುಞ್ಜಾಮಿ, ಜಙ್ಗಲಾನೋದಕಾನಿ ವಾ;

ಅಞ್ಞತ್ರ ಸೇವಾಲಪಣಕಾ, ಏತಂ [ಅಞ್ಞಂ (ಸ್ಯಾ.)] ಮೇ ಸಮ್ಮ ಭೋಜನಂ.

೧೩೮. ನ ವಾಹಮೇತಂ ಸದ್ದಹಾಮಿ, ಚಕ್ಕವಾಕಸ್ಸ ಭೋಜನಂ;

ಅಹಮ್ಪಿ ಸಮ್ಮ ಭುಞ್ಜಾಮಿ, ಗಾಮೇ ಲೋಣಿಯತೇಲಿಯಂ.

೧೩೯. ಮನುಸ್ಸೇಸು ಕತಂ ಭತ್ತಂ, ಸುಚಿಂ ಮಂಸೂಪಸೇಚನಂ;

ನ ಚ ಮೇ ತಾದಿಸೋ ವಣ್ಣೋ, ಚಕ್ಕವಾಕ ಯಥಾ ತುವಂ.

೧೪೦. ಸಮ್ಪಸ್ಸಂ ಅತ್ತನಿ ವೇರಂ, ಹಿಂಸಯಂ [ಹಿಂಸಾಯ (ಸ್ಯಾ. ಪೀ. ಕ.)] ಮಾನುಸಿಂ ಪಜಂ;

ಉತ್ರಸ್ತೋ ಘಸಸೀ ಭೀತೋ, ತೇನ ವಣ್ಣೋ ತವೇದಿಸೋ.

೧೪೧. ಸಬ್ಬಲೋಕವಿರುದ್ಧೋಸಿ, ಧಙ್ಕ ಪಾಪೇನ ಕಮ್ಮುನಾ;

ಲದ್ಧೋ ಪಿಣ್ಡೋ ನ ಪೀಣೇತಿ, ತೇನ ವಣ್ಣೋ ತವೇದಿಸೋ.

೧೪೨. ಅಹಮ್ಪಿ [ಅಹಞ್ಚ (?)] ಸಮ್ಮ ಭುಞ್ಜಾಮಿ, ಅಹಿಂಸಂ ಸಬ್ಬಪಾಣಿನಂ;

ಅಪ್ಪೋಸ್ಸುಕ್ಕೋ ನಿರಾಸಙ್ಕೀ, ಅಸೋಕೋ ಅಕುತೋಭಯೋ.

೧೪೩. ಸೋ ಕರಸ್ಸು ಆನುಭಾವಂ, ವೀತಿವತ್ತಸ್ಸು ಸೀಲಿಯಂ;

ಅಹಿಂಸಾಯ ಚರ ಲೋಕೇ, ಪಿಯೋ ಹೋಹಿಸಿ ಮಂಮಿವ.

೧೪೪. ಯೋ ನ ಹನ್ತಿ ನ ಘಾತೇತಿ, ನ ಜಿನಾತಿ ನ ಜಾಪಯೇ;

ಮೇತ್ತಂಸೋ ಸಬ್ಬಭೂತೇಸು, ವೇರಂ ತಸ್ಸ ನ ಕೇನಚೀತಿ.

ಚಕ್ಕವಾಕಜಾತಕಂ ತೇರಸಮಂ.