೪೫೨. ಭೂರಿಪಞ್ಞಜಾತಕಂ (೧೪)

೧೪೫. ಸಚ್ಚಂ ಕಿರ ತ್ವಂ ಅಪಿ [ತ್ವಮ್ಪಿ (ಸೀ.), ತುವಮ್ಪಿ (ಸ್ಯಾ.), ತ್ವಂ ಅಸಿ (ಕ.)] ಭೂರಿಪಞ್ಞ, ಯಾ ತಾದಿಸೀ ಸೀರಿ ಧಿತೀ ಮತೀ ಚ;

ನ ತಾಯತೇಭಾವವಸೂಪನಿತಂ, ಯೋ ಯವಕಂ ಭುಞ್ಜಸಿ ಅಪ್ಪಸೂಪಂ.

೧೪೬. ಸುಖಂ ದುಕ್ಖೇನ ಪರಿಪಾಚಯನ್ತೋ, ಕಾಲಾ ಕಾಲಂ ವಿಚಿನಂ ಛನ್ದಛನ್ನೋ;

ಅತ್ಥಸ್ಸ ದ್ವಾರಾನಿ ಅವಾಪುರನ್ತೋ, ತೇನಾಹಂ ತುಸ್ಸಾಮಿ ಯವೋದನೇನ.

೧೪೭. ಕಾಲಞ್ಚ ಞತ್ವಾ ಅಭಿಜೀಹನಾಯ, ಮನ್ತೇಹಿ ಅತ್ಥಂ ಪರಿಪಾಚಯಿತ್ವಾ;

ವಿಜಮ್ಭಿಸ್ಸಂ ಸೀಹವಿಜಮ್ಭಿತಾನಿ, ತಾಯಿದ್ಧಿಯಾ ದಕ್ಖಸಿ ಮಂ ಪುನಾಪಿ.

೧೪೮. ಸುಖೀಪಿ ಹೇಕೇ [ಸುಖೀ ಹಿ ಏಕೇ (ಸೀ.), ಸುಖೀತಿ ಹೇಕೇ (?)] ನ ಕರೋನ್ತಿ ಪಾಪಂ, ಅವಣ್ಣಸಂಸಗ್ಗಭಯಾ ಪುನೇಕೇ;

ಪಹೂ ಸಮಾನೋ ವಿಪುಲತ್ಥಚಿನ್ತೀ, ಕಿಂಕಾರಣಾ ಮೇ ನ ಕರೋಸಿ ದುಕ್ಖಂ.

೧೪೯. ನ ಪಣ್ಡಿತಾ ಅತ್ತಸುಖಸ್ಸ ಹೇತು, ಪಾಪಾನಿ ಕಮ್ಮಾನಿ ಸಮಾಚರನ್ತಿ;

ದುಕ್ಖೇನ ಫುಟ್ಠಾ ಖಲಿತಾಪಿ ಸನ್ತಾ, ಛನ್ದಾ ಚ ದೋಸಾ ನ ಜಹನ್ತಿ ಧಮ್ಮಂ.

೧೫೦. ಯೇನ ಕೇನಚಿ ವಣ್ಣೇನ, ಮುದುನಾ ದಾರುಣೇನ ವಾ;

ಉದ್ಧರೇ ದೀನಮತ್ತಾನಂ, ಪಚ್ಛಾ ಧಮ್ಮಂ ಸಮಾಚರೇ.

೧೫೧. ಯಸ್ಸ ರುಕ್ಖಸ್ಸ ಛಾಯಾಯ, ನಿಸೀದೇಯ್ಯ ಸಯೇಯ್ಯ ವಾ;

ನ ತಸ್ಸ ಸಾಖಂ ಭಞ್ಜೇಯ್ಯ, ಮಿತ್ತದುಬ್ಭೋ ಹಿ ಪಾಪಕೋ.

೧೫೨. ಯಸ್ಸಾಪಿ [ಯಸ್ಸ ಹಿ (ಸೀ. ಕ.)] ಧಮ್ಮಂ ಪುರಿಸೋ [ಮನುಜೋ (ಸೀ.)] ವಿಜಞ್ಞಾ, ಯೇ ಚಸ್ಸ ಕಙ್ಖಂ ವಿನಯನ್ತಿ ಸನ್ತೋ;

ತಂ ಹಿಸ್ಸ ದೀಪಞ್ಚ ಪರಾಯನಞ್ಚ, ನ ತೇನ ಮೇತ್ತಿಂ ಜರಯೇಥ ಪಞ್ಞೋ.

೧೫೩. ಅಲಸೋ ಗಿಹೀ ಕಾಮಭೋಗೀ ನ ಸಾಧು, ಅಸಞ್ಞತೋ ಪಬ್ಬಜಿತೋ ನ ಸಾಧು;

ರಾಜಾ ನ ಸಾಧು ಅನಿಸಮ್ಮಕಾರೀ, ಯೋ ಪಣ್ಡಿತೋ ಕೋಧನೋ ತಂ ನ ಸಾಧು.

೧೫೪. ನಿಸಮ್ಮ ಖತ್ತಿಯೋ ಕಯಿರಾ, ನಾನಿಸಮ್ಮ ದಿಸಮ್ಪತಿ;

ನಿಸಮ್ಮಕಾರಿನೋ ರಾಜ, ಯಸೋ ಕಿತ್ತಿ ಚ ವಡ್ಢತೀತಿ.

ಭೂರಿಪಞ್ಞಜಾತಕಂ ಚುದ್ದಸಮಂ.