೪೪೮. ಕುಕ್ಕುಟಜಾತಕಂ (೧೦)

೧೦೪. ನಾಸ್ಮಸೇ ಕತಪಾಪಮ್ಹಿ, ನಾಸ್ಮಸೇ ಅಲಿಕವಾದಿನೇ;

ನಾಸ್ಮಸೇ ಅತ್ತತ್ಥಪಞ್ಞಮ್ಹಿ, ಅತಿಸನ್ತೇಪಿ ನಾಸ್ಮಸೇ.

೧೦೫. ಭವನ್ತಿ ಹೇಕೇ ಪುರಿಸಾ, ಗೋಪಿಪಾಸಿಕಜಾತಿಕಾ [ಗೋಪಿಪಾಸಕಜಾತಿಕಾ (ಸೀ. ಸ್ಯಾ. ಪೀ.)];

ಘಸನ್ತಿ ಮಞ್ಞೇ ಮಿತ್ತಾನಿ, ವಾಚಾಯ ನ ಚ ಕಮ್ಮುನಾ.

೧೦೬. ಸುಕ್ಖಞ್ಜಲಿಪಗ್ಗಹಿತಾ, ವಾಚಾಯ ಪಲಿಗುಣ್ಠಿತಾ;

ಮನುಸ್ಸಫೇಗ್ಗೂ ನಾಸೀದೇ, ಯಸ್ಮಿಂ ನತ್ಥಿ ಕತಞ್ಞುತಾ.

೧೦೭. ನ ಹಿ ಅಞ್ಞಞ್ಞಚಿತ್ತಾನಂ, ಇತ್ಥೀನಂ ಪುರಿಸಾನ ವಾ;

ನಾನಾವಿಕತ್ವಾ [ನಾನಾವ ಕತ್ವಾ (ಸೀ. ಪೀ.)] ಸಂಸಗ್ಗಂ, ತಾದಿಸಮ್ಪಿ ಚ ನಾಸ್ಮಸೇ [ತಾದಿಸಮ್ಪಿ ನ ವಿಸ್ಸಸೇ (ಸ್ಯಾ.)].

೧೦೮. ಅನರಿಯಕಮ್ಮಮೋಕ್ಕನ್ತಂ, ಅಥೇತಂ [ಅತ್ಥೇತಂ (ಸೀ. ಸ್ಯಾ. ಪೀ.)] ಸಬ್ಬಘಾತಿನಂ;

ನಿಸಿತಂವ ಪಟಿಚ್ಛನ್ನಂ, ತಾದಿಸಮ್ಪಿ ಚ ನಾಸ್ಮಸೇ.

೧೦೯. ಮಿತ್ತರೂಪೇನಿಧೇಕಚ್ಚೇ, ಸಾಖಲ್ಯೇನ ಅಚೇತಸಾ;

ವಿವಿಧೇಹಿ ಉಪಾಯನ್ತಿ, ತಾದಿಸಮ್ಪಿ ಚ ನಾಸ್ಮಸೇ.

೧೧೦. ಆಮಿಸಂ ವಾ ಧನಂ ವಾಪಿ, ಯತ್ಥ ಪಸ್ಸತಿ ತಾದಿಸೋ;

ದುಬ್ಭಿಂ ಕರೋತಿ ದುಮ್ಮೇಧೋ, ತಞ್ಚ ಹನ್ತ್ವಾನ [ಝಾತ್ವಾನ (ಸೀ. ಪೀ.), ಹಿತ್ವಾನ (ಸ್ಯಾ.)] ಗಚ್ಛತಿ.

೧೧೧. ಮಿತ್ತರೂಪೇನ ಬಹವೋ, ಛನ್ನಾ ಸೇವನ್ತಿ ಸತ್ತವೋ;

ಜಹೇ ಕಾಪುರಿಸೇ ಹೇತೇ, ಕುಕ್ಕುಟೋ ವಿಯ ಸೇನಕಂ.

೧೧೨. ಯೋ ಚ [ಯೋಧ (ಜಾ. ೧.೮.೨೫ ಸುಲಸಾಜಾತಕೇ)] ಉಪ್ಪತಿತಂ ಅತ್ಥಂ, ನ ಖಿಪ್ಪಮನುಬುಜ್ಝತಿ;

ಅಮಿತ್ತವಸಮನ್ವೇತಿ, ಪಚ್ಛಾ ಚ ಅನುತಪ್ಪತಿ.

೧೧೩. ಯೋ ಚ ಉಪ್ಪತಿತಂ ಅತ್ಥಂ, ಖಿಪ್ಪಮೇವ ನಿಬೋಧತಿ;

ಮುಚ್ಚತೇ ಸತ್ತುಸಮ್ಬಾಧಾ, ಕುಕ್ಕುಟೋ ವಿಯ ಸೇನಕಾ;

೧೧೪. ತಂ ತಾದಿಸಂ ಕೂಟಮಿವೋಡ್ಡಿತಂ ವನೇ, ಅಧಮ್ಮಿಕಂ ನಿಚ್ಚವಿಧಂಸಕಾರಿನಂ;

ಆರಾ ವಿವಜ್ಜೇಯ್ಯ ನರೋ ವಿಚಕ್ಖಣೋ, ಸೇನಂ ಯಥಾ ಕುಕ್ಕುಟೋ ವಂಸಕಾನನೇತಿ.

ಕುಕ್ಕುಟಜಾತಕಂ ದಸಮಂ.