೪೪೯. ಮಟ್ಠಕುಣ್ಡಲೀಜಾತಕಂ (೧೧)

೧೧೫. ಅಲಙ್ಕತೋ ಮಟ್ಠಕುಣ್ಡಲೀ [ಮಟ್ಟಕುಣ್ಡಲೀ (ಸೀ. ಪೀ.)], ಮಾಲಧಾರೀ [ಮಾಲಭಾರೀ (ಸೀ. ಪೀ.)] ಹರಿಚನ್ದನುಸ್ಸದೋ;

ಬಾಹಾ ಪಗ್ಗಯ್ಹ ಕನ್ದಸಿ, ವನಮಜ್ಝೇ ಕಿಂ ದುಕ್ಖಿತೋ ತುವಂ.

೧೧೬. ಸೋವಣ್ಣಮಯೋ ಪಭಸ್ಸರೋ, ಉಪ್ಪನ್ನೋ ರಥಪಞ್ಜರೋ ಮಮ;

ತಸ್ಸ ಚಕ್ಕಯುಗಂ ನ ವಿನ್ದಾಮಿ, ತೇನ ದುಕ್ಖೇನ ಜಹಾಮಿ ಜೀವಿತಂ.

೧೧೭. ಸೋವಣ್ಣಮಯಂ ಮಣೀಮಯಂ, ಲೋಹಮಯಂ ಅಥ ರೂಪಿಯಾಮಯಂ;

[ಆಚಿಕ್ಖ ಮೇ ಭದ್ದಮಾಣವ (ವಿ. ವ. ೧೨೦೯)] ಪಾವದ ರಥಂ ಕರಿಸ್ಸಾಮಿ [ಕಾರಯಾಮಿ (ಸೀ. ಪೀ.)] ತೇ [ಆಚಿಕ್ಖ ಮೇ ಭದ್ದಮಾಣವ (ವಿ. ವ. ೧೨೦೯)], ಚಕ್ಕಯುಗಂ ಪಟಿಪಾದಯಾಮಿ ತಂ.

೧೧೮. ಸೋ [ಅಥ (ಸ್ಯಾ.)] ಮಾಣವೋ ತಸ್ಸ ಪಾವದಿ, ಚನ್ದಿಮಸೂರಿಯಾ [ಚನ್ದಿಮಸೂರಿಯಾ (ಸ್ಯಾ.)] ಉಭಯೇತ್ಥ ಭಾತರೋ [ದಿಸ್ಸರೇ (ವಿ. ವ. ೧೨೧೦)];

ಸೋವಣ್ಣಮಯೋ ರಥೋ ಮಮ, ತೇನ ಚಕ್ಕಯುಗೇನ ಸೋಭತಿ.

೧೧೯. ಬಾಲೋ ಖೋ ತ್ವಂಸಿ ಮಾಣವ, ಯೋ ತ್ವಂ ಪತ್ಥಯಸೇ ಅಪತ್ಥಿಯಂ;

ಮಞ್ಞಾಮಿ ತುವಂ ಮರಿಸ್ಸಸಿ, ನ ಹಿ ತ್ವಂ ಲಚ್ಛಸಿ ಚನ್ದಸೂರಿಯೇ.

೧೨೦. ಗಮನಾಗಮನಮ್ಪಿ ದಿಸ್ಸತಿ, ವಣ್ಣಧಾತು ಉಭಯೇತ್ಥ ವೀಥಿಯೋ;

ಪೇತೋ ಪನ ನೇವ ದಿಸ್ಸತಿ, ಕೋ ನು ಖೋ [ಕೋ ನಿಧ (ವಿ. ವ. ೧೨೧೨)] ಕನ್ದತಂ ಬಾಲ್ಯತರೋ.

೧೨೧. ಸಚ್ಚಂ ಖೋ ವದೇಸಿ ಮಾಣವ, ಅಹಮೇವ ಕನ್ದತಂ ಬಾಲ್ಯತರೋ;

ಚನ್ದಂ ವಿಯ ದಾರಕೋ ರುದಂ, ಪೇತಂ ಕಾಲಕತಾಭಿಪತ್ಥಯೇ.

೧೨೨. ಆದಿತ್ತಂ ವತ ಮಂ ಸನ್ತಂ, ಘತಸಿತ್ತಂವ ಪಾವಕಂ;

ವಾರಿನಾ ವಿಯ ಓಸಿಞ್ಚಂ, ಸಬ್ಬಂ ನಿಬ್ಬಾಪಯೇ ದರಂ.

೧೨೩. ಅಬ್ಬಹೀ [ಅಬ್ಬುಹಿ (ಸ್ಯಾ.), ಅಬ್ಭುಳ್ಹಂ (ಕ.)] ವತ ಮೇ ಸಲ್ಲಂ, ಯಮಾಸಿ ಹದಯಸ್ಸಿತಂ [ಸೋಕಂ ಹದಯನಿಸ್ಸಿತಂ (ವಿ. ವ. ೧೨೧೫)];

ಯೋ ಮೇ ಸೋಕಪರೇತಸ್ಸ, ಪುತ್ತಸೋಕಂ ಅಪಾನುದಿ.

೧೨೪. ಸೋಹಂ ಅಬ್ಬೂಳ್ಹಸಲ್ಲೋಸ್ಮಿ, ವೀತಸೋಕೋ ಅನಾವಿಲೋ;

ನ ಸೋಚಾಮಿ ನ ರೋದಾಮಿ, ತವ ಸುತ್ವಾನ ಮಾಣವಾತಿ.

ಮಟ್ಠಕುಣ್ಡಲೀಜಾತಕಂ ಏಕಾದಸಮಂ.