೪೪೫. ನಿಗ್ರೋಧಜಾತಕಂ (೭)

೭೨. ನ ವಾಹಮೇತಂ [ನ ಚಾಹಮೇತಂ (ಸೀ.)] ಜಾನಾಮಿ, ಕೋ ವಾಯಂ ಕಸ್ಸ ವಾತಿ ವಾ [ಚಾತಿ ವಾ (ಸೀ.)];

ಯಥಾ ಸಾಖೋ ಚರಿ [ವದೀ (ಸೀ. ಸ್ಯಾ. ಪೀ.)] ಏವಂ, ನಿಗ್ರೋಧ ಕಿನ್ತಿ ಮಞ್ಞಸಿ.

೭೩. ತತೋ ಗಲವಿನೀತೇನ, ಪುರಿಸಾ ನೀಹರಿಂಸು ಮಂ;

ದತ್ವಾ ಮುಖಪಹಾರಾನಿ, ಸಾಖಸ್ಸ ವಚನಂಕರಾ.

೭೪. ಏತಾದಿಸಂ ದುಮ್ಮತಿನಾ, ಅಕತಞ್ಞುನ ದುಬ್ಭಿನಾ;

ಕತಂ ಅನರಿಯಂ ಸಾಖೇನ, ಸಖಿನಾ ತೇ ಜನಾಧಿಪ.

೭೫. ನ ವಾಹಮೇತಂ ಜಾನಾಮಿ, ನಪಿ ಮೇ ಕೋಚಿ ಸಂಸತಿ;

ಯಂ ಮೇ ತ್ವಂ ಸಮ್ಮ ಅಕ್ಖಾಸಿ, ಸಾಖೇನ ಕಾರಣಂ [ಕಡ್ಢನಂ (ಸೀ. ಸ್ಯಾ.)] ಕತಂ.

೭೬. ಸಖೀನಂ ಸಾಜೀವಕರೋ, ಮಮ ಸಾಖಸ್ಸ ಚೂಭಯಂ;

ತ್ವಂ ನೋಸಿಸ್ಸರಿಯಂ ದಾತಾ, ಮನುಸ್ಸೇಸು ಮಹನ್ತತಂ;

ತಯಾಮಾ ಲಬ್ಭಿತಾ ಇದ್ಧೀ, ಏತ್ಥ ಮೇ ನತ್ಥಿ ಸಂಸಯೋ.

೭೭. ಯಥಾಪಿ ಬೀಜಮಗ್ಗಿಮ್ಹಿ, ಡಯ್ಹತಿ ನ ವಿರೂಹತಿ;

ಏವಂ ಕತಂ ಅಸಪ್ಪುರಿಸೇ, ನಸ್ಸತಿ ನ ವಿರೂಹತಿ.

೭೮. ಕತಞ್ಞುಮ್ಹಿ ಚ ಪೋಸಮ್ಹಿ, ಸೀಲವನ್ತೇ ಅರಿಯವುತ್ತಿನೇ;

ಸುಖೇತ್ತೇ ವಿಯ ಬೀಜಾನಿ, ಕತಂ ತಮ್ಹಿ ನ ನಸ್ಸತಿ.

೭೯. ಇಮಂ ಜಮ್ಮಂ ನೇಕತಿಕಂ, ಅಸಪ್ಪುರಿಸಚಿನ್ತಕಂ;

ಹನನ್ತು ಸಾಖಂ ಸತ್ತೀಹಿ, ನಾಸ್ಸ ಇಚ್ಛಾಮಿ ಜೀವಿತಂ.

೮೦. ಖಮತಸ್ಸ ಮಹಾರಾಜ, ಪಾಣಾ ನ ಪಟಿಆನಯಾ [ದುಪ್ಪಟಿಆನಯಾ (ಸೀ. ಸ್ಯಾ. ಪೀ.)];

ಖಮ ದೇವ ಅಸಪ್ಪುರಿಸಸ್ಸ, ನಾಸ್ಸ ಇಚ್ಛಾಮಹಂ ವಧಂ.

೮೧. ನಿಗ್ರೋಧಮೇವ ಸೇವೇಯ್ಯ, ನ ಸಾಖಮುಪಸಂವಸೇ;

ನಿಗ್ರೋಧಸ್ಮಿಂ ಮತಂ ಸೇಯ್ಯೋ, ಯಞ್ಚೇ ಸಾಖಸ್ಮಿ ಜೀವಿತನ್ತಿ.

ನಿಗ್ರೋಧಜಾತಕಂ ಸತ್ತಮಂ.