೪೪೬. ತಕ್ಕಲಜಾತಕಂ (೮)

೮೨. ನ ತಕ್ಕಲಾ ಸನ್ತಿ ನ ಆಲುವಾನಿ [ಆಲುಪಾನಿ (ಸೀ. ಸ್ಯಾ. ಪೀ.)], ನ ಬಿಳಾಲಿಯೋ ನ ಕಳಮ್ಬಾನಿ ತಾತ;

ಏಕೋ ಅರಞ್ಞಮ್ಹಿ ಸುಸಾನಮಜ್ಝೇ, ಕಿಮತ್ಥಿಕೋ ತಾತ ಖಣಾಸಿ ಕಾಸುಂ.

೮೩. ಪಿತಾಮಹೋ ತಾತ ಸುದುಬ್ಬಲೋ ತೇ, ಅನೇಕಬ್ಯಾಧೀಹಿ ದುಖೇನ ಫುಟ್ಠೋ;

ತಮಜ್ಜಹಂ ನಿಖಣಿಸ್ಸಾಮಿ ಸೋಬ್ಭೇ, ನ ಹಿಸ್ಸ ತಂ ಜೀವಿತಂ ರೋಚಯಾಮಿ.

೮೪. ಸಙ್ಕಪ್ಪಮೇತಂ ಪಟಿಲದ್ಧ ಪಾಪಕಂ, ಅಚ್ಚಾಹಿತಂ ಕಮ್ಮ ಕರೋಸಿ ಲುದ್ದಂ;

ಮಯಾಪಿ ತಾತ ಪಟಿಲಚ್ಛಸೇ ತುವಂ, ಏತಾದಿಸಂ ಕಮ್ಮ ಜರೂಪನೀತೋ;

ತಂ ಕುಲ್ಲವತ್ತಂ ಅನುವತ್ತಮಾನೋ, ಅಹಮ್ಪಿ ತಂ ನಿಖಣಿಸ್ಸಾಮಿ ಸೋಬ್ಭೇ.

೮೫. ಫರುಸಾಹಿ ವಾಚಾಹಿ ಪಕುಬ್ಬಮಾನೋ, ಆಸಜ್ಜ ಮಂ ತ್ವಂ ವದಸೇ ಕುಮಾರ;

ಪುತ್ತೋ ಮಮಂ ಓರಸಕೋ ಸಮಾನೋ, ಅಹಿತಾನುಕಮ್ಪೀ ಮಮ ತ್ವಂಸಿ ಪುತ್ತ.

೮೬. ನ ತಾಹಂ [ತ್ಯಾಹಂ (ಸ್ಯಾ.)] ತಾತ ಅಹಿತಾನುಕಮ್ಪೀ, ಹಿತಾನುಕಮ್ಪೀ ತೇ ಅಹಮ್ಪಿ [ಅಹಞ್ಹಿ (ಸ್ಯಾ.)] ತಾತ;

ಪಾಪಞ್ಚ ತಂ ಕಮ್ಮ ಪಕುಬ್ಬಮಾನಂ, ಅರಹಾಮಿ ನೋ ವಾರಯಿತುಂ ತತೋ.

೮೭. ಯೋ ಮಾತರಂ ವಾ ಪಿತರಂ ಸವಿಟ್ಠ [ಮಾತರಂ ಪಿತರಂ ವಾ ವಸಿಟ್ಠ (ಸೀ. ಪೀ.)], ಅದೂಸಕೇ ಹಿಂಸತಿ ಪಾಪಧಮ್ಮೋ;

ಕಾಯಸ್ಸ ಭೇದಾ ಅಭಿಸಮ್ಪರಾಯಂ, ಅಸಂಸಯಂ ಸೋ ನಿರಯಂ ಉಪೇತಿ [ಪರೇತಿ (ಸೀ. ಪೀ.)].

೮೮. ಯೋ ಮಾತರಂ ವಾ ಪಿತರಂ ಸವಿಟ್ಠ, ಅನ್ನೇನ ಪಾನೇನ ಉಪಟ್ಠಹಾತಿ;

ಕಾಯಸ್ಸ ಭೇದಾ ಅಭಿಸಮ್ಪರಾಯಂ, ಅಸಂಸಯಂ ಸೋ ಸುಗತಿಂ ಉಪೇತಿ.

೮೯. ನ ಮೇ ತ್ವಂ ಪುತ್ತ ಅಹಿತಾನುಕಮ್ಪೀ, ಹಿತಾನುಕಮ್ಪೀ ಮೇ [ಮಮ (?)] ತ್ವಂಸಿ ಪುತ್ತ;

ಅಹಞ್ಚ ತಂ ಮಾತರಾ ವುಚ್ಚಮಾನೋ, ಏತಾದಿಸಂ ಕಮ್ಮ ಕರೋಮಿ ಲುದ್ದಂ.

೯೦. ಯಾ ತೇ ಸಾ ಭರಿಯಾ ಅನರಿಯರೂಪಾ, ಮಾತಾ ಮಮೇಸಾ ಸಕಿಯಾ ಜನೇತ್ತಿ;

ನಿದ್ಧಾಪಯೇ [ನಿದ್ಧಾಮಸೇ (ಪೀ.)] ತಞ್ಚ ಸಕಾ ಅಗಾರಾ, ಅಞ್ಞಮ್ಪಿ ತೇ ಸಾ ದುಖಮಾವಹೇಯ್ಯ.

೯೧. ಯಾ ತೇ ಸಾ ಭರಿಯಾ ಅನರಿಯರೂಪಾ, ಮಾತಾ ಮಮೇಸಾ ಸಕಿಯಾ ಜನೇತ್ತಿ;

ದನ್ತಾ ಕರೇಣೂವ ವಸೂಪನೀತಾ, ಸಾ ಪಾಪಧಮ್ಮಾ ಪುನರಾವಜಾತೂತಿ.

ತಕ್ಕಲಜಾತಕಂ ಅಟ್ಠಮಂ.