೪೪೪. ಕಣ್ಹದೀಪಾಯನಜಾತಕಂ (೬)

೬೨. ಸತ್ತಾಹಮೇವಾಹಂ ಪಸನ್ನಚಿತ್ತೋ, ಪುಞ್ಞತ್ಥಿಕೋ ಆಚರಿಂ [ಅಚರಿಂ (ಸೀ. ಸ್ಯಾ. ಪೀ.)] ಬ್ರಹ್ಮಚರಿಯಂ;

ಅಥಾಪರಂ ಯಂ ಚರಿತಂ ಮಮೇದಂ [ಮಮ ಯಿದಂ (ಸ್ಯಾ.), ಮಮಾಯಿದಂ (ಪೀ.)], ವಸ್ಸಾನಿ ಪಞ್ಞಾಸ ಸಮಾಧಿಕಾನಿ;

ಅಕಾಮಕೋ ವಾಪಿ [ವಾಹಿ (ಪೀ. ಕ.)] ಅಹಂ ಚರಾಮಿ, ಏತೇನ ಸಚ್ಚೇನ ಸುವತ್ಥಿ ಹೋತು;

ಹತಂ ವಿಸಂ ಜೀವತು ಯಞ್ಞದತ್ತೋ.

೬೩. ಯಸ್ಮಾ ದಾನಂ ನಾಭಿನನ್ದಿಂ ಕದಾಚಿ, ದಿಸ್ವಾನಹಂ ಅತಿಥಿಂ ವಾಸಕಾಲೇ;

ನ ಚಾಪಿ ಮೇ ಅಪ್ಪಿಯತಂ ಅವೇದುಂ, ಬಹುಸ್ಸುತಾ ಸಮಣಬ್ರಾಹ್ಮಣಾ ಚ.

ಅಕಾಮಕೋ ವಾಪಿ ಅಹಂ ದದಾಮಿ, ಏತೇನ ಸಚ್ಚೇನ ಸುವತ್ಥಿ ಹೋತು;

ಹತಂ ವಿಸಂ ಜೀವತು ಯಞ್ಞದತ್ತೋ.

೬೪. ಆಸೀವಿಸೋ ತಾತ ಪಹೂತತೇಜೋ, ಯೋ ತಂ ಅದಂಸೀ [ಅಡಂಸೀ (ಸ್ಯಾ.)] ಸಚರಾ [ಬಿಲರಾ (ಸೀ.), ಪಿಳಾರಾ (ಸ್ಯಾ.), ಪತರಾ (ಪೀ.)] ಉದಿಚ್ಚ;

ತಸ್ಮಿಞ್ಚ ಮೇ ಅಪ್ಪಿಯತಾಯ ಅಜ್ಜ, ಪಿತರಿ ಚ ತೇ ನತ್ಥಿ ಕೋಚಿ ವಿಸೇಸೋ;

ಏತೇನ ಸಚ್ಚೇನ ಸುವತ್ಥಿ ಹೋತು, ಹತಂ ವಿಸಂ ಜೀವತು ಯಞ್ಞದತ್ತೋ.

೬೫. ಸನ್ತಾ ದನ್ತಾಯೇವ [ದನ್ತಾ ಸನ್ತಾ ಯೇ ಚ (ಸ್ಯಾ. ಕ.)] ಪರಿಬ್ಬಜನ್ತಿ, ಅಞ್ಞತ್ರ ಕಣ್ಹಾ ನತ್ಥಾಕಾಮರೂಪಾ [ಅನಕಾಮರೂಪಾ (ಸೀ. ಸ್ಯಾ. ಪೀ.)];

ದೀಪಾಯನ ಕಿಸ್ಸ ಜಿಗುಚ್ಛಮಾನೋ, ಅಕಾಮಕೋ ಚರಸಿ ಬ್ರಹ್ಮಚರಿಯಂ.

೬೬. ಸದ್ಧಾಯ ನಿಕ್ಖಮ್ಮ ಪುನಂ ನಿವತ್ತೋ, ಸೋ ಏಳಮೂಗೋವ ಬಾಲೋ [ಏಳಮೂಗೋ ಚಪಲೋ (ಸ್ಯಾ. ಕ.)] ವತಾಯಂ;

ಏತಸ್ಸ ವಾದಸ್ಸ ಜಿಗುಚ್ಛಮಾನೋ, ಅಕಾಮಕೋ ಚರಾಮಿ ಬ್ರಹ್ಮಚರಿಯಂ;

ವಿಞ್ಞುಪ್ಪಸತ್ಥಞ್ಚ ಸತಞ್ಚ ಠಾನಂ [ವಿಞ್ಞೂಪಸತ್ಥಂ ವಸಿತಂ ಚ ಠಾನಂ (ಕ.)], ಏವಮ್ಪಹಂ ಪುಞ್ಞಕರೋ ಭವಾಮಿ.

೬೭. ಸಮಣೇ ತುವಂ ಬ್ರಾಹ್ಮಣೇ ಅದ್ಧಿಕೇ ಚ, ಸನ್ತಪ್ಪಯಾಸಿ ಅನ್ನಪಾನೇನ ಭಿಕ್ಖಂ;

ಓಪಾನಭೂತಂವ ಘರಂ ತವ ಯಿದಂ, ಅನ್ನೇನ ಪಾನೇನ ಉಪೇತರೂಪಂ;

ಅಥ ಕಿಸ್ಸ ವಾದಸ್ಸ ಜಿಗುಚ್ಛಮಾನೋ, ಅಕಾಮಕೋ ದಾನಮಿಮಂ ದದಾಸಿ.

೬೮. ಪಿತರೋ ಚ ಮೇ ಆಸುಂ ಪಿತಾಮಹಾ ಚ, ಸದ್ಧಾ ಅಹುಂ ದಾನಪತೀ ವದಞ್ಞೂ;

ತಂ ಕುಲ್ಲವತ್ತಂ ಅನುವತ್ತಮಾನೋ, ಮಾಹಂ ಕುಲೇ ಅನ್ತಿಮಗನ್ಧನೋ [ಗನ್ಧಿನೋ (ಸ್ಯಾ. ಪೀ. ಕ.), ಗನ್ಧಿನೀ (ಸೀ.)] ಅಹುಂ;

ಏತಸ್ಸ ವಾದಸ್ಸ ಜಿಗುಚ್ಛಮಾನೋ, ಅಕಾಮಕೋ ದಾನಮಿಮಂ ದದಾಮಿ.

೬೯. ದಹರಿಂ ಕುಮಾರಿಂ ಅಸಮತ್ಥಪಞ್ಞಂ, ಯಂ ತಾನಯಿಂ ಞಾತಿಕುಲಾ ಸುಗತ್ತೇ;

ನ ಚಾಪಿ ಮೇ ಅಪ್ಪಿಯತಂ ಅವೇದಿ, ಅಞ್ಞತ್ರ ಕಾಮಾ ಪರಿಚಾರಯನ್ತಾ [ಪರಿಚಾರಯನ್ತೀ (ಸೀ. ಪೀ.)];

ಅಥ ಕೇನ ವಣ್ಣೇನ ಮಯಾ ತೇ ಭೋತಿ, ಸಂವಾಸಧಮ್ಮೋ ಅಹು ಏವರೂಪೋ.

೭೦. ಆರಾ ದೂರೇ ನಯಿಧ ಕದಾಚಿ ಅತ್ಥಿ, ಪರಮ್ಪರಾ ನಾಮ ಕುಲೇ ಇಮಸ್ಮಿಂ;

ತಂ ಕುಲ್ಲವತ್ತಂ ಅನುವತ್ತಮಾನಾ, ಮಾಹಂ ಕುಲೇ ಅನ್ತಿಮಗನ್ಧಿನೀ ಅಹುಂ;

ಏತಸ್ಸ ವಾದಸ್ಸ ಜಿಗುಚ್ಛಮಾನಾ, ಅಕಾಮಿಕಾ ಪದ್ಧಚರಾಮ್ಹಿ [ಪಟ್ಠಚರಾಮ್ಹಿ (ಸ್ಯಾ. ಕ.)] ತುಯ್ಹಂ.

೭೧. ಮಣ್ಡಬ್ಯ ಭಾಸಿಂ ಯಮಭಾಸನೇಯ್ಯಂ [ಭಾಸಿಸ್ಸಂ ಅಭಾಸನೇಯ್ಯಂ (ಸೀ. ಸ್ಯಾ. ಪೀ.), ಭಾಸಿಸ್ಸ’ಮಭಾಸನೇಯ್ಯಂ (?)], ತಂ ಖಮ್ಯತಂ ಪುತ್ತಕಹೇತು ಮಜ್ಜ;

ಪುತ್ತಪೇಮಾ ನ ಇಧ ಪರತ್ಥಿ ಕಿಞ್ಚಿ, ಸೋ ನೋ ಅಯಂ ಜೀವತಿ ಯಞ್ಞದತ್ತೋತಿ.

ಕಣ್ಹದೀಪಾಯನಜಾತಕಂ [ಮಣ್ಡಬ್ಯಜಾತಕಂ (ಸ್ಯಾ. ಕ.)] ಛಟ್ಠಂ.