೪೪೩. ಚೂಳಬೋಧಿಜಾತಕಂ (೫)

೪೯. ಯೋ ತೇ ಇಮಂ ವಿಸಾಲಕ್ಖಿಂ, ಪಿಯಂ ಸಮ್ಹಿತಭಾಸಿನಿಂ [ಸಮ್ಮಿಲ್ಲಭಾಸಿನಿಂ (ಸೀ. ಪೀ.), ಸಮ್ಮಿಲ್ಲಹಾಸಿನಿಂ (ಸ್ಯಾ.)];

ಆದಾಯ ಬಲಾ ಗಚ್ಛೇಯ್ಯ, ಕಿಂ ನು ಕಯಿರಾಸಿ ಬ್ರಾಹ್ಮಣ.

೫೦. ಉಪ್ಪಜ್ಜೇ [ಉಪ್ಪಜ್ಜ (ಸೀ. ಪೀ.)] ಮೇ ನ ಮುಚ್ಚೇಯ್ಯ, ನ ಮೇ ಮುಚ್ಚೇಯ್ಯ ಜೀವತೋ;

ರಜಂವ ವಿಪುಲಾ ವುಟ್ಠಿ, ಖಿಪ್ಪಮೇವ ನಿವಾರಯೇ [ನಿವಾರಯಿಂ (ಕ.)].

೫೧. ಯಂ ನು ಪುಬ್ಬೇ ವಿಕತ್ಥಿತ್ಥೋ [ವಿಕತ್ಥಿತೋ (ಕ. ಸೀ. ಸ್ಯಾ. ಕ.)], ಬಲಮ್ಹಿವ ಅಪಸ್ಸಿತೋ;

ಸ್ವಜ್ಜ ತುಣ್ಹಿಕತೋ [ತುಣ್ಹಿಕತೋ (ಸೀ.), ತುಣ್ಹಿಕ್ಖಕೋ (ಪೀ.)] ದಾನಿ, ಸಙ್ಘಾಟಿಂ ಸಿಬ್ಬಮಚ್ಛಸಿ.

೫೨. ಉಪ್ಪಜ್ಜಿ ಮೇ ನ ಮುಚ್ಚಿತ್ಥ, ನ ಮೇ ಮುಚ್ಚಿತ್ಥ ಜೀವತೋ;

ರಜಂವ ವಿಪುಲಾ ವುಟ್ಠಿ, ಖಿಪ್ಪಮೇವ ನಿವಾರಯಿಂ.

೫೩. ಕಿಂ ತೇ ಉಪ್ಪಜ್ಜಿ ನೋ ಮುಚ್ಚಿ, ಕಿಂ ತೇ ನ ಮುಚ್ಚಿ ಜೀವತೋ;

ರಜಂವ ವಿಪುಲಾ ವುಟ್ಠಿ, ಕತಮಂ ತ್ವಂ ನಿವಾರಯಿ.

೫೪. ಯಮ್ಹಿ ಜಾತೇ ನ ಪಸ್ಸತಿ, ಅಜಾತೇ ಸಾಧು ಪಸ್ಸತಿ;

ಸೋ ಮೇ ಉಪ್ಪಜ್ಜಿ ನೋ ಮುಚ್ಚಿ, ಕೋಧೋ ದುಮ್ಮೇಧಗೋಚರೋ.

೫೫. ಯೇನ ಜಾತೇನ ನನ್ದನ್ತಿ, ಅಮಿತ್ತಾ ದುಕ್ಖಮೇಸಿನೋ;

ಸೋ ಮೇ ಉಪ್ಪಜ್ಜಿ ನೋ ಮುಚ್ಚಿ, ಕೋಧೋ ದುಮ್ಮೇಧಗೋಚರೋ.

೫೬. ಯಸ್ಮಿಞ್ಚ ಜಾಯಮಾನಮ್ಹಿ, ಸದತ್ಥಂ ನಾವಬುಜ್ಝತಿ;

ಸೋ ಮೇ ಉಪ್ಪಜ್ಜಿ ನೋ ಮುಚ್ಚಿ, ಕೋಧೋ ದುಮ್ಮೇಧಗೋಚರೋ.

೫೭. ಯೇನಾಭಿಭೂತೋ ಕುಸಲಂ ಜಹಾತಿ, ಪರಕ್ಕರೇ ವಿಪುಲಞ್ಚಾಪಿ ಅತ್ಥಂ;

ಸ ಭೀಮಸೇನೋ ಬಲವಾ ಪಮದ್ದೀ, ಕೋಧೋ ಮಹಾರಾಜ ನ ಮೇ ಅಮುಚ್ಚಥ.

೫೮. ಕಟ್ಠಸ್ಮಿಂ ಮತ್ಥಮಾನಸ್ಮಿಂ [ಮನ್ಥಮಾನಸ್ಮಿಂ (ಪೀ.), ಮದ್ದಮಾನಸ್ಮಿಂ (ಕ.)], ಪಾವಕೋ ನಾಮ ಜಾಯತಿ;

ತಮೇವ ಕಟ್ಠಂ ಡಹತಿ, ಯಸ್ಮಾ ಸೋ ಜಾಯತೇ ಗಿನಿ.

೫೯. ಏವಂ ಮನ್ದಸ್ಸ ಪೋಸಸ್ಸ, ಬಾಲಸ್ಸ ಅವಿಜಾನತೋ;

ಸಾರಮ್ಭಾ [ಸಾರಬ್ಭಾ (ಕ.)] ಜಾಯತೇ ಕೋಧೋ, ಸೋಪಿ ತೇನೇವ ಡಯ್ಹತಿ.

೬೦. ಅಗ್ಗೀವ ತಿಣಕಟ್ಠಸ್ಮಿಂ, ಕೋಧೋ ಯಸ್ಸ ಪವಡ್ಢತಿ;

ನಿಹೀಯತಿ ತಸ್ಸ ಯಸೋ, ಕಾಳಪಕ್ಖೇವ ಚನ್ದಿಮಾ.

೬೧. ಅನೇಧೋ [ಅನಿನ್ಧೋ (ಸೀ. ಕ.), ಅನಿನ್ದೋ (ಸ್ಯಾ.)] ಧೂಮಕೇತೂವ, ಕೋಧೋ ಯಸ್ಸೂಪಸಮ್ಮತಿ;

ಆಪೂರತಿ ತಸ್ಸ ಯಸೋ, ಸುಕ್ಕಪಕ್ಖೇವ ಚನ್ದಿಮಾತಿ.

ಚೂಳಬೋಧಿಜಾತಕಂ ಪಞ್ಚಮಂ.