೫. ವಾಲಸುತ್ತವಣ್ಣನಾ

೧೧೧೫. ಪಞ್ಚಮೇ ಸನ್ಥಾಗಾರೇತಿ ಸಿಪ್ಪುಗ್ಗಣ್ಹನಸಾಲಾಯಂ. ಉಪಾಸನಂ ಕರೋನ್ತೇತಿ ಕಣ್ಡಖಿಪನಸಿಪ್ಪಂ ಕರೋನ್ತೇ. ಅಸನಂ ಅತಿಪಾತೇನ್ತೇತಿ ಕಣ್ಡಂ ಅತಿಕ್ಕಮೇನ್ತೇ. ಪೋಙ್ಖಾನುಪೋಙ್ಖನ್ತಿ ಏಕಂ ಕಣ್ಡಂ ಖಿಪಿತ್ವಾ ಯಥಾ ಅಸ್ಸ ಸರಸ್ಸ ಪೋಙ್ಖಂ ವಿಜ್ಝತಿ, ಅಪರಂ ಅನುಪೋಙ್ಖಂ ನಾಮ ದುತಿಯಸ್ಸ ಪೋಙ್ಖಂ, ಪುನ ಅಪರಂ ತಸ್ಸ ಪೋಙ್ಖನ್ತಿ ಏವಂ ಅತಿಪಾತೇನ್ತೇ ಅದ್ದಸ. ಯತ್ರ ಹಿ ನಾಮಾತಿ ಯೇ ನಾಮ. ದುರಭಿಸಮ್ಭವತರನ್ತಿ ದುಕ್ಕರತರಂ. ಸತ್ತಧಾ ಭಿನ್ನಸ್ಸ ವಾಲಸ್ಸ ಕೋಟಿಯಾ ಕೋಟಿಂ ಪಟಿವಿಜ್ಝೇಯ್ಯಾತಿ ಏಕಂ ವಾಲಂ ಸತ್ತಧಾ ಭಿನ್ದಿತ್ವಾ, ತಸ್ಸ ಏಕಂ ಭೇದಂ ಗಹೇತ್ವಾ, ವಾತಿಙ್ಗಣಮಜ್ಝೇ ಬನ್ಧಿತ್ವಾ, ಅಪರಂ ಭೇದಂ ಕಣ್ಡಸ್ಸ ಅಗ್ಗಕೋಟಿಯಂ ಬನ್ಧಿತ್ವಾ, ಉಸಭಮತ್ತೇ ಠಿತೋ ಕಣ್ಡಬದ್ಧಾಯ ಕೋಟಿಯಾ ತಂ ವಾತಿಙ್ಗಣಬದ್ಧಕೋಟಿಂ ಪಟಿವಿಜ್ಝೇಯ್ಯಾತಿ ಅತ್ಥೋ. ತಸ್ಮಾತಿ ಯಸ್ಮಾ ಏವಂ ದುಪ್ಪಟಿವಿಜ್ಝಾನಿ ಚತ್ತಾರಿ ಸಚ್ಚಾನಿ, ತಸ್ಮಾ.