೪-೫. ಪಠಮಸಾರಿಪುತ್ತಸುತ್ತಾದಿವಣ್ಣನಾ

೧೦೦೦-೧೦೦೧. ಚತುತ್ಥ ಉತ್ತಾನಮೇವ. ಪಞ್ಚಮೇ ಸೋತಾಪತ್ತಿಯಙ್ಗನ್ತಿ ಸೋತಾಪತ್ತಿಯಾ ಪುಬ್ಬಭಾಗಪಟಿಲಾಭಙ್ಗಂ. ಬುದ್ಧೇ ಅವೇಚ್ಚಪ್ಪಸಾದಾದಯೋ ಪನ ಪಟಿಲದ್ಧಗುಣಾ ಸೋತಾಪನ್ನಸ್ಸ ಅಙ್ಗಾ ನಾಮ, ತೇಪಿ ಪನ ಸೋತಾಪತ್ತಿಯಙ್ಗನ್ತಿ ಆಗತಾ. ತತ್ರಾಯಂ ದ್ವಿನ್ನಮ್ಪಿ ವಚನತ್ಥೋ – ಸಪ್ಪುರಿಸೇ ಸೇವನ್ತೋ ಭಜನ್ತೋ ಪಯಿರುಪಾಸನ್ತೋ ಧಮ್ಮಂ ಸುಣನ್ತೋ ಯೋನಿಸೋ ಮನಸಿಕರೋನ್ತೋ ಧಮ್ಮಾನುಧಮ್ಮಂ ಪುಬ್ಬಭಾಗಪಟಿಪದಂ ಪಟಿಪಜ್ಜನ್ತೋ ಸೋತಾಪತ್ತಿಂ ಪಟಿಲಭತೀತಿ ಸಪ್ಪುರಿಸಸಂಸೇವಾದಯೋ ಸೋತಾಪತ್ತಿಅತ್ಥಾಯ ಅಙ್ಗನ್ತಿ ಸೋತಾಪತ್ತಿಯಙ್ಗಂ ನಾಮ, ಇತರೇ ಪಠಮಮಗ್ಗಸಙ್ಖಾತಾಯ ಸೋತಾಪತ್ತಿಯಾ ಅಙ್ಗನ್ತಿಪಿ ಸೋತಾಪತ್ತಿಯಙ್ಗಂ, ಪಟಿವಿದ್ಧಸೋತಾಪತ್ತಿಮಗ್ಗಸ್ಸ ಸೋತಾಪತ್ತಿಮಗ್ಗೋ ಅಙ್ಗನ್ತಿಪಿ ಸೋತಾಪತ್ತಿಯಙ್ಗಂ.