೧. ಸಮಾಧಿಸುತ್ತವಣ್ಣನಾ

೨೪೯. ವೇದನಾಸಂಯುತ್ತೇ ಸಗಾಥಾವಗ್ಗಸ್ಸ ಪಠಮೇ ಸಮಾಹಿತೋತಿ ಉಪಚಾರೇನ ವಾ ಅಪ್ಪನಾಯ ವಾ ಸಮಾಹಿತೋ. ವೇದನಾ ಚ ಪಜಾನಾತೀತಿ ವೇದನಾ ದುಕ್ಖಸಚ್ಚವಸೇನ ಪಜಾನಾತಿ. ವೇದನಾನಞ್ಚ ಸಮ್ಭವನ್ತಿ ತಾಸಂಯೇವ ಸಮ್ಭವಂ ಸಮುದಯಸಚ್ಚವಸೇನ ಪಜಾನಾತಿ. ಯತ್ಥ ಚೇತಾತಿ ಯತ್ಥೇತಾ ವೇದನಾ ನಿರುಜ್ಝನ್ತಿ, ತಂ ನಿಬ್ಬಾನಂ ನಿರೋಧಸಚ್ಚವಸೇನ ಪಜಾನಾತಿ. ಖಯಗಾಮಿನನ್ತಿ ತಾಸಂಯೇವ ವೇದನಾನಂ ಖಯಗಾಮಿನಂ ಮಗ್ಗಂ ಮಗ್ಗಸಚ್ಚವಸೇನ ಪಜಾನಾತಿ. ನಿಚ್ಛಾತೋ ಪರಿನಿಬ್ಬುತೋತಿ ನಿತ್ತಣ್ಹೋ ಹುತ್ವಾ ಕಿಲೇಸಪರಿನಿಬ್ಬಾನೇನ ಪರಿನಿಬ್ಬುತೋ. ಏವಮೇತ್ಥ ಸುತ್ತೇ ಸಮ್ಮಸನಚಾರವೇದನಾ ಕಥಿತಾ. ಗಾಥಾಸು ದ್ವೀಹಿ ಪದೇಹಿ ಸಮಥವಿಪಸ್ಸನಾ ಕಥಿತಾ, ಸೇಸೇಹಿ ಚತುಸಚ್ಚಂ ಕಥಿತಂ. ಏವಮೇತ್ಥ ಸಬ್ಬಸಙ್ಗಾಹಿಕೋ ಚತುಭೂಮಕಧಮ್ಮಪರಿಚ್ಛೇದೋ ವುತ್ತೋ.