೩. ಕುಮ್ಮೋಪಮಸುತ್ತವಣ್ಣನಾ

೨೪೦. ತತಿಯೇ ಕುಮ್ಮೋತಿ ಅಟ್ಠಿಕುಮ್ಮೋ. ಕಚ್ಛಪೋತಿ ತಸ್ಸೇವ ವೇವಚನಂ. ಅನುನದೀತೀರೇತಿ ನದಿಯಾ ಅನುತೀರೇ. ಗೋಚರಪಸುತೋತಿ ‘‘ಸಚೇ ಕಿಞ್ಚಿ ಫಲಾಫಲಂ ಲಭಿಸ್ಸಾಮಿ, ಖಾದಿಸ್ಸಾಮೀ’’ತಿ ಗೋಚರತ್ಥಾಯ ಪಸುತೋ ಉಸ್ಸುಕ್ಕೋ ತನ್ನಿಬನ್ಧೋ. ಸಮೋದಹಿತ್ವಾತಿ ಸಮುಗ್ಗೇ ವಿಯ ಪಕ್ಖಿಪಿತ್ವಾ. ಸಙ್ಕಸಾಯತೀತಿ ಅಚ್ಛತಿ. ಸಮೋದಹನ್ತಿ ಸಮೋದಹನ್ತೋ ಠಪೇನ್ತೋ. ಇದಂ ವುತ್ತಂ ಹೋತಿ – ಯಥಾ ಕುಮ್ಮೋ ಅಙ್ಗಾನಿ ಸಕೇ ಕಪಾಲೇ ಸಮೋದಹನ್ತೋ ಸಿಙ್ಗಾಲಸ್ಸ ಓತಾರಂ ನ ದೇತಿ, ನ ಚ ನಂ ಸಿಙ್ಗಾಲೋ ಪಸಹತಿ, ಏವಂ ಭಿಕ್ಖು ಅತ್ತನೋ ಮನೋವಿತಕ್ಕೇ ಸಕೇ ಆರಮ್ಮಣಕಪಾಲೇ ಸಮೋದಹನ್ತೋ ಕಿಲೇಸಮಾರಸ್ಸ ಓತಾರಂ ನ ದೇತಿ, ನ ಚ ನಂ ಮಾರೋ ಪಸಹತಿ.

ಅನಿಸ್ಸಿತೋತಿ ತಣ್ಹಾದಿಟ್ಠಿನಿಸ್ಸಯೇಹಿ ಅನಿಸ್ಸಿತೋ. ಅಞ್ಞಮಹೇಠಯಾನೋತಿ ಅಞ್ಞಂ ಕಞ್ಚಿ ಪುಗ್ಗಲಂ ಅವಿಹೇಠೇನ್ತೋ. ಪರಿನಿಬ್ಬುತೋತಿ ಕಿಲೇಸಪರಿನಿಬ್ಬಾನೇನ ಪರಿನಿಬ್ಬುತೋ. ನೂಪವದೇಯ್ಯ ಕಞ್ಚೀತಿ ಅಞ್ಞಂ ಕಞ್ಚಿ ಪುಗ್ಗಲಂ ಸೀಲವಿಪತ್ತಿಯಾ ವಾ ಆಚಾರವಿಪತ್ತಿಯಾ ವಾ ಅತ್ತಾನಂ ಉಕ್ಕಂಸೇತುಕಾಮತಾಯ ವಾ ಪರಂ ವಮ್ಭೇತುಕಾಮತಾಯ ವಾ ನ ಉಪವದೇಯ್ಯ, ಅಞ್ಞದತ್ಥು ಪಞ್ಚ ಧಮ್ಮೇ ಅಜ್ಝತ್ತಂ ಉಪಟ್ಠಪೇತ್ವಾ, ‘‘ಕಾಲೇನ ವಕ್ಖಾಮಿ, ನೋ ಅಕಾಲೇನ, ಭೂತೇನ ವಕ್ಖಾಮಿ, ನೋ ಅಭೂತೇನ, ಸಣ್ಹೇನ ವಕ್ಖಾಮಿ, ನೋ ಫರುಸೇನ, ಅತ್ಥಸಂಹಿತೇನ ವಕ್ಖಾಮಿ, ನೋ ಅನತ್ಥಸಂಹಿತೇನ, ಮೇತ್ತಚಿತ್ತೋ ವಕ್ಖಾಮಿ, ನೋ ದೋಸನ್ತರೋ’’ತಿ ಏವಂ ಉಲ್ಲುಮ್ಪನಸಭಾವಸಣ್ಠಿತೇನೇವ ಚಿತ್ತೇನ ವಿಹರತಿ.