೧೧. ಯವಕಲಾಪಿಸುತ್ತವಣ್ಣನಾ

೨೪೮. ಏಕಾದಸಮೇ ಯವಕಲಾಪೀತಿ ಲಾಯಿತ್ವಾ ಠಪಿತಯವಪುಞ್ಜೋ. ಬ್ಯಾಭಙ್ಗಿಹತ್ಥಾತಿ ಕಾಜಹತ್ಥಾ. ಛಹಿ ಬ್ಯಾಭಙ್ಗೀಹಿ ಹನೇಯ್ಯುನ್ತಿ ಛಹಿ ಪುಥುಲಕಾಜದಣ್ಡಕೇಹಿ ಪೋಥೇಯ್ಯುಂ. ಸತ್ತಮೋತಿ ತೇಸು ಛಸು ಜನೇಸು ಯವೇ ಪೋಥೇತ್ವಾ ಪಸಿಬ್ಬಕೇ ಪೂರೇತ್ವಾ ಆದಾಯ ಗತೇಸು ಅಞ್ಞೋ ಸತ್ತಮೋ ಆಗಚ್ಛೇಯ್ಯ. ಸುಹತತರಾ ಅಸ್ಸಾತಿ ಯಂ ತತ್ಥ ಅವಸಿಟ್ಠಂ ಅತ್ಥಿ ಭುಸಪಲಾಪಮತ್ತಮ್ಪಿ, ತಸ್ಸ ಗಹಣತ್ಥಂ ಸುಟ್ಠುತರಂ ಹತಾ.

ಏವಮೇವ ಖೋತಿ ಏತ್ಥ ಚತುಮಹಾಪಥೋ ವಿಯ ಛ ಆಯತನಾನಿ ದಟ್ಠಬ್ಬಾನಿ, ಚತುಮಹಾಪಥೇ ನಿಕ್ಖಿತ್ತಯವಕಲಾಪೀ ವಿಯ ಸತ್ತೋ, ಛ ಬ್ಯಾಭಙ್ಗಿಯೋ ವಿಯ ಇಟ್ಠಾನಿಟ್ಠಮಜ್ಝತ್ತವಸೇನ ಅಟ್ಠಾರಸ ಆರಮ್ಮಣಾನಿ, ಸತ್ತಮಾ ಬ್ಯಾಭಙ್ಗೀ ವಿಯ ಭವಪತ್ಥನಾ ಕಿಲೇಸಾ. ಯಥಾ ಚತುಮಹಾಪಥೇ ಠಪಿತಾ ಯವಕಲಾಪೀ ಛಹಿ ಬ್ಯಾಭಙ್ಗೀಹಿ ಹಞ್ಞತಿ, ಏವಮಿಮೇ ಸತ್ತಾ ಅಟ್ಠಾರಸಹಿ ಆರಮ್ಮಣದಣ್ಡಕೇಹಿ ಛಸು ಆಯತನೇಸು ಹಞ್ಞನ್ತಿ. ಯಥಾ ಸತ್ತಮೇನ ಸುಹತತರಾ ಹೋನ್ತಿ, ಏವಂ ಸತ್ತಾ ಭವಪತ್ಥನಕಿಲೇಸೇಹಿ ಸುಹತತರಾ ಹೋನ್ತಿ ಭವೇಮೂಲಕಂ ದುಕ್ಖಂ ಅನುಭವಮಾನಾ.

ಇದಾನಿ ನೇಸಂ ತಂ ಭವಪತ್ಥನಕಿಲೇಸಂ ದಸ್ಸೇತುಂ ಭೂತಪುಬ್ಬಂ, ಭಿಕ್ಖವೇತಿಆದಿಮಾಹ. ತತ್ರಾತಿ ಸುಧಮ್ಮಾಯಂ ಭುಮ್ಮಂ, ಸುಧಮ್ಮಾಯ ದೇವಸಭಾಯ ದ್ವಾರೇತಿ ಅತ್ಥೋ. ಧಮ್ಮಿಕಾ ಖೋ ದೇವಾತಿ ಧಮ್ಮಿಕಾ ಏತೇ ದೇವಾ ನಾಮ, ಯೇಹಿ ಮಾದಿಸಂ ಅಸುರಾಧಿಪತಿಂ ಗಹೇತ್ವಾ ಮಯ್ಹಂ ಭೇದನಮತ್ತಮ್ಪಿ ನ ಕತನ್ತಿ ಸನ್ಧಾಯ ವದತಿ. ಅಧಮ್ಮಿಕಾ ದೇವಾತಿ ಅಧಮ್ಮಿಕಾ ಏತೇ ದೇವಾ ನಾಮ, ಯೇ ಮಾದಿಸಂ ಅಸುರಾಧಿಪತಿಂ ನವಗೂಥಸೂಕರಂ ವಿಯ ಕಣ್ಠಪಞ್ಚಮೇಹಿ ಬನ್ಧನೇಹಿ ಬನ್ಧಿತ್ವಾ ನಿಸೀದಾಪೇನ್ತಿ. ಏವಂ ಸುಖುಮಂ ಖೋ, ಭಿಕ್ಖವೇ, ವೇಪಚಿತ್ತಿಬನ್ಧನನ್ತಿ ತಂ ಕಿರ ಪದುಮನಾಳಸುತ್ತಂ ವಿಯ ಮಕ್ಕಟಜಾಲಸುತ್ತಂ ವಿಯ ಚ ಸುಖುಮಂ ಹೋತಿ, ಛೇತ್ತುಂ ಪನ ನೇವ ವಾಸಿಯಾ ನ ಫರಸುನಾ ಸಕ್ಕಾ. ಯಸ್ಮಾ ಪನ ಚಿತ್ತೇನೇವ ಬಜ್ಝತಿ, ಚಿತ್ತೇನ ಮುಚ್ಚತಿ, ತಸ್ಮಾ ‘‘ವೇಪಚಿತ್ತಿಬನ್ಧನ’’ನ್ತಿ ವುತ್ತಂ.

ತತೋ ಸುಖುಮತರಂ ಮಾರಬನ್ಧನನ್ತಿ ಕಿಲೇಸಬನ್ಧನಂ ಪನೇಸಂ ತತೋಪಿ ಸುಖುಮತರಂ, ನೇವ ಚಕ್ಖುಸ್ಸ ಆಪಾಥಂ ಗಚ್ಛತಿ, ನ ಇರಿಯಾಪಥಂ ನಿವಾರೇತಿ. ತೇನ ಹಿ ಬದ್ಧಾ ಸತ್ತಾ ಪಥವಿತಲೇಪಿ ಆಕಾಸೇಪಿ ಯೋಜನಸತಮ್ಪಿ ಯೋಜನಸಹಸ್ಸಮ್ಪಿ ಗಚ್ಛನ್ತಿಪಿ ಆಗಚ್ಛನ್ತಿಪಿ. ಛಿಜ್ಜಮಾನಂ ಪನೇತಂ ಞಾಣೇನೇವ ಛಿಜ್ಜತಿ, ನ ಅಞ್ಞೇನಾತಿ ‘‘ಞಾಣಮೋಕ್ಖಂ ಬನ್ಧನ’’ನ್ತಿಪಿ ವುಚ್ಚತಿ.

ಮಞ್ಞಮಾನೋತಿ ತಣ್ಹಾದಿಟ್ಠಿಮಾನಾನಂ ವಸೇನ ಖನ್ಧೇ ಮಞ್ಞನ್ತೋ. ಬದ್ಧೋ ಮಾರಸ್ಸಾತಿ ಮಾರಬನ್ಧನೇನ ಬದ್ಧೋ. ಕರಣತ್ಥೇ ವಾ ಏತಂ ಸಾಮಿವಚನಂ, ಕಿಲೇಸಮಾರೇನ ಬದ್ಧೋತಿ ಅತ್ಥೋ. ಮುತ್ತೋ ಪಾಪಿಮತೋತಿ ಮಾರಸ್ಸ ಬನ್ಧನೇನ ಮುತ್ತೋ. ಕರಣತ್ಥೇಯೇವ ವಾ ಇದಂ ಸಾಮಿವಚನಂ, ಪಾಪಿಮತಾ ಕಿಲೇಸಬನ್ಧನೇನ ಮುತ್ತೋತಿ ಅತ್ಥೋ.

ಅಸ್ಮೀತಿ ಪದೇನ ತಣ್ಹಾಮಞ್ಞಿತಂ ವುತ್ತಂ. ಅಯಮಹಸ್ಮೀತಿ ದಿಟ್ಠಿಮಞ್ಞಿತಂ. ಭವಿಸ್ಸನ್ತಿ ಸಸ್ಸತವಸೇನ ದಿಟ್ಠಿಮಞ್ಞಿತಮೇವ. ನ ಭವಿಸ್ಸನ್ತಿ ಉಚ್ಛೇದವಸೇನ. ರೂಪೀತಿಆದೀನಿ ಸಸ್ಸತಸ್ಸೇವ ಪಭೇದದೀಪನಾನಿ. ತಸ್ಮಾತಿ ಯಸ್ಮಾ ಮಞ್ಞಿತಂ ಆಬಾಧಂ ಅನ್ತೋದೋಸನಿಕನ್ತನವಸೇನ ರೋಗೋ ಚೇವ ಗಣ್ಡೋ ಚ ಸಲ್ಲಞ್ಚ, ತಸ್ಮಾ. ಇಞ್ಜಿತನ್ತಿಆದೀನಿ ಯಸ್ಮಾ ಇಮೇಹಿ ಕಿಲೇಸೇಹಿ ಸತ್ತಾ ಇಞ್ಜನ್ತಿ ಚೇವ ಫನ್ದನ್ತಿ ಚ ಪಪಞ್ಚಿತಾ ಚ ಹೋನ್ತಿ ಪಮತ್ತಾಕಾರಪತ್ತಾ, ತಸ್ಮಾ ತೇಸಂ ಆಕಾರದಸ್ಸನತ್ಥಂ ವುತ್ತಾನಿ.

ಮಾನಗತವಾರೇ ಪನ ಮಾನಸ್ಸ ಗತಂ ಮಾನಗತಂ, ಮಾನಪವತ್ತೀತಿ ಅತ್ಥೋ. ಮಾನೋಯೇವ ಮಾನಗತಂ ಗೂಥಗತಂ ಮುತ್ತಗತಂ ವಿಯ. ತತ್ಥ ಅಸ್ಮೀತಿ ಇದಂ ತಣ್ಹಾಯ ಸಮ್ಪಯುತ್ತಮಾನವಸೇನ ವುತ್ತಂ. ಅಯಮಹಮಸ್ಮೀತಿ ದಿಟ್ಠಿವಸೇನ. ನನು ಚ ದಿಟ್ಠಿಸಮ್ಪಯುತ್ತೋ ನಾಮ ಮಾನೋ ನತ್ಥೀತಿ? ಆಮ ನತ್ಥಿ, ಮಾನಸ್ಸ ಪನ ಅಪ್ಪಹೀನತ್ತಾ ದಿಟ್ಠಿ ನಾಮ ಹೋತಿ. ಮಾನಮೂಲಕಂ ದಿಟ್ಠಿಂ ಸನ್ಧಾಯೇತಂ ವುತ್ತಂ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ಆಸೀವಿಸವಗ್ಗೋ.

ಚತುತ್ಥೋ ಪಣ್ಣಾಸಕೋ.

ಸಳಾಯತನಸಂಯುತ್ತವಣ್ಣನಾ ನಿಟ್ಠಿತಾ.