೧೦. ತತಿಯಚೇತನಾಸುತ್ತವಣ್ಣನಾ

೪೦. ದಸಮೇ ನತೀತಿ ತಣ್ಹಾ. ಸಾ ಹಿ ಪಿಯರೂಪೇಸು ರೂಪಾದೀಸು ನಮನಟ್ಠೇನ ‘‘ನತೀ’’ತಿ ವುಚ್ಚತಿ. ಆಗತಿ ಗತಿ ಹೋತೀತಿ ಆಗತಿಮ್ಹಿ ಗತಿ ಹೋತಿ, ಆಗತೇ ಪಚ್ಚುಪಟ್ಠಿತೇ ಕಮ್ಮೇ ವಾ ಕಮ್ಮನಿಮಿತ್ತೇ ವಾ ಗಹಿನಿಮಿತ್ತೇ ವಾ ಪಟಿಸನ್ಧಿವಸೇನ ವಿಞ್ಞಾಣಸ್ಸ ಗತಿ ಹೋತಿ. ಚುತೂಪಪಾತೋತಿ ಏವಂ ವಿಞ್ಞಾಣಸ್ಸ ಆಗತೇ ಪಟಿಸನ್ಧಿವಿಸಯೇ ಗತಿಯಾ ಸತಿ ಇತೋ ಚವನಸಙ್ಖಾತಾ ಚುತಿ, ತತ್ಥೂಪಪತ್ತಿಸಙ್ಖಾತೋ ಉಪಪಾತೋತಿ ಅಯಂ ಚುತೂಪಪಾತೋ ನಾಮ ಹೋತಿ. ಏವಂ ಇಮಸ್ಮಿಂ ಸುತ್ತೇ ನತಿಯಾ ಚ ಆಗತಿಗತಿಯಾ ಚ ಅನ್ತರೇ ಏಕೋವ ಸನ್ಧಿ ಕಥಿತೋತಿ. ದಸಮಂ.

ಕಳಾರಖತ್ತಿಯವಗ್ಗೋ ಚತುತ್ಥೋ.