೩. ಫಲದಾಯಕವಿಮಾನವಣ್ಣನಾ

ಉಚ್ಚಮಿದಂ ಮಣಿಥೂಣನ್ತಿ ಫಲದಾಯಕವಿಮಾನಂ. ತಸ್ಸ ಕಾ ಉಪ್ಪತ್ತಿ? ಭಗವಾ ರಾಜಗಹೇ ವಿಹರತಿ ವೇಳುವನೇ. ತೇನ ಸಮಯೇನ ರಞ್ಞೋ ಬಿಮ್ಬಿಸಾರಸ್ಸ ಅಕಾಲೇ ಅಮ್ಬಫಲಾನಿ ಪರಿಭುಞ್ಜಿತುಂ ಇಚ್ಛಾ ಉಪ್ಪಜ್ಜಿ. ಸೋ ಆರಾಮಪಾಲಂ ಆಹ – ‘‘ಮಯ್ಹಂ ಖೋ, ಭಣೇ, ಅಮ್ಬಫಲೇಸು ಇಚ್ಛಾ ಉಪ್ಪನ್ನಾ, ತಸ್ಮಾ ಅಮ್ಬಾನಿ ಮೇ ಆನೇತ್ವಾ ದೇಹೀ’’ತಿ. ‘‘ದೇವ, ನತ್ಥಿ ಅಮ್ಬೇಸು ಅಮ್ಬಫಲಂ, ಅಪಿಚಾಹಂ ತಥಾ ಕರೋಮಿ, ಸಚೇ ದೇವೋ ಕಿಞ್ಚಿ ಕಾಲಂ ಆಗಮೇತಿ, ಯಥಾ ಅಮ್ಬಾ ನ ಚಿರಸ್ಸೇವ ಫಲಂ ಗಣ್ಹನ್ತೀ’’ತಿ. ‘‘ಸಾಧು, ಭಣೇ, ತಥಾ ಕರೋಹೀ’’ತಿ. ಆರಾಮಪಾಲೋ ಆರಾಮಂ ಗನ್ತ್ವಾ ಅಮ್ಬರುಕ್ಖಮೂಲೇಸು ಪಂಸುಂ ಅಪನೇತ್ವಾ ತಾದಿಸಂ ಪಂಸುಂ ಆಕಿರಿ, ತಾದಿಸಞ್ಚ ಉದಕಂ ಆಸಿಞ್ಚಿ, ಯಥಾ ನ ಚಿರಸ್ಸೇವ ಅಮ್ಬರುಕ್ಖಾ ಸಚ್ಛಿನ್ನಪತ್ತಾ ಅಹೇಸುಂ. ಅಥ ನಂ ಪಂಸುಂ ಅಪನೇತ್ವಾ ಫಾರುಸಕಕಸಟಮಿಸ್ಸಕಂ ಪಾಕತಿಕಂ ಪಂಸುಂ ಆಕಿರಿತ್ವಾ ಸಾಧುಕಂ ಉದಕಂ ಅದಾಸಿ. ತದಾ ಅಮ್ಬರುಕ್ಖಾ ನ ಚಿರೇನೇವ ಕೋರಕಿತಾ ಪಲ್ಲವಿತಾ ಕುಟಮಲಕಜಾತಾ ಹುತ್ವಾ ಪುಪ್ಫಿಂಸು, ಅಥ ಸಲಾಟುಕಜಾತಾ ಹುತ್ವಾ ಫಲಾನಿ ಗಣ್ಹಿಂಸು. ತತ್ಥೇಕಸ್ಮಿಂ ಅಮ್ಬರುಕ್ಖೇ ಪಠಮತರಂ ಚತ್ತಾರಿ ಫಲಾನಿ ಮನೋಸಿಲಾಚುಣ್ಣಪಿಞ್ಜರವಣ್ಣಾನಿ ಸಮ್ಪನ್ನಗನ್ಧರಸಾನಿ ಪರಿಣತಾನಿ ಅಹೇಸುಂ.

ಸೋ ತಾನಿ ಗಹೇತ್ವಾ ‘‘ರಞ್ಞೋ ದಸ್ಸಾಮೀ’’ತಿ ಗಚ್ಛನ್ತೋ ಅನ್ತರಾಮಗ್ಗೇ ಆಯಸ್ಮನ್ತಂ ಮಹಾಮೋಗ್ಗಲ್ಲಾನಂ ಪಿಣ್ಡಾಯ ಚರಮಾನಂ ದಿಸ್ವಾ ಚಿನ್ತೇಸಿ ‘‘ಇಮಾನಿ ಅಮ್ಬಾನಿ ಅಗ್ಗಫಲಭೂತಾನಿ ಇಮಸ್ಸ ಅಯ್ಯಸ್ಸ ದಸ್ಸಾಮಿ, ಕಾಮಂ ಮಂ ರಾಜಾ ಹನತು ವಾ ಪಬ್ಬಾಜೇತು ವಾ, ರಞ್ಞೋ ಹಿ ದಿನ್ನೇ ದಿಟ್ಠಧಮ್ಮೇ ಪೂಜಾಮತ್ತಂ ಅಪ್ಪಮತ್ತಕಂ ಫಲಂ, ಅಯ್ಯಸ್ಸ ದಿನ್ನೇ ಪನ ದಿಟ್ಠಧಮ್ಮಿಕಮ್ಪಿ ಸಮ್ಪರಾಯಿಕಮ್ಪಿ ಅಪರಿಮಾಣಂ ಫಲಂ ಭವಿಸ್ಸತೀ’’ತಿ. ಏವಂ ಪನ ಚಿನ್ತೇತ್ವಾ ತಾನಿ ಫಲಾನಿ ಥೇರಸ್ಸ ದತ್ವಾ ರಾಜಾನಂ ಉಪಸಙ್ಕಮಿತ್ವಾ ರಞ್ಞೋ ತಮತ್ಥಂ ಆರೋಚೇಸಿ. ತಂ ಸುತ್ವಾ ರಾಜಾ ರಾಜಪುರಿಸೇ ಆಣಾಪೇಸಿ ‘‘ವೀಮಂಸಥ ತಾವ, ಭಣೇ, ಯಥಾಯಂ ಆಹಾ’’ತಿ. ಥೇರೋ ಪನ ತಾನಿ ಫಲಾನಿ ಭಗವತೋ ಉಪನಾಮೇಸಿ. ಭಗವಾ ತೇಸು ಏಕಂ ಸಾರಿಪುತ್ತತ್ಥೇರಸ್ಸ, ಏಕಂ ಮಹಾಮೋಗ್ಗಲ್ಲಾನತ್ಥೇರಸ್ಸ, ಏಕಂ ಮಹಾಕಸ್ಸಪತ್ಥೇರಸ್ಸ ದತ್ವಾ ಏಕಂ ಅತ್ತನಾ ಪರಿಭುಞ್ಜಿ. ಪುರಿಸಾ ತಂ ಪವತ್ತಿಂ ರಞ್ಞೋ ಆರೋಚೇಸುಂ.

ರಾಜಾ ತಂ ಸುತ್ವಾ ‘‘ಧೀರೋ ವತಾಯಂ ಪುರಿಸೋ, ಯೋ ಅತ್ತನೋ ಜೀವಿತಮ್ಪಿ ಪರಿಚ್ಚಜಿತ್ವಾ ಪುಞ್ಞಪಸುತೋ ಅಹೋಸಿ, ಅತ್ತನೋ ಪರಿಸ್ಸಮಞ್ಚ ಠಾನಗತಮೇವ ಅಕಾಸೀ’’ತಿ ತುಟ್ಠಚಿತ್ತೋ ತಸ್ಸ ಏಕಂ ಗಾಮವರಂ ವತ್ಥಾಲಙ್ಕಾರಾದೀನಿ ಚ ದತ್ವಾ ‘‘ಯಂ ತಯಾ ಭಣೇ ಅಮ್ಬಫಲದಾನೇನ ಪುಞ್ಞಂ ಪಸುತಂ, ತತೋ ಮೇ ಪತ್ತಿಂ ದೇಹೀ’’ತಿ ಆಹ. ಸೋ ‘‘ದೇಮಿ, ದೇವ, ಯಥಾಸುಖಂ ಪತ್ತಿಂ ಗಣ್ಹಾಹೀ’’ತಿ ಅವೋಚ. ಆರಾಮಪಾಲೋ ಅಪರಭಾಗೇ ಕಾಲಂ ಕತ್ವಾ ತಾವತಿಂಸೇಸು ಉಪ್ಪಜ್ಜಿ, ತಸ್ಸ ಸೋಳಸಯೋಜನಿಕಂ ಕನಕವಿಮಾನಂ ನಿಬ್ಬತ್ತಿ ಸತ್ತಸತಕೂಟಾಗಾರಪಟಿಮಣ್ಡಿತಂ. ತಂ ದಿಸ್ವಾ ಆಯಸ್ಮಾ ಮಹಾಮೋಗ್ಗಲ್ಲಾನೋ ಪುಚ್ಛಿ –

೧೦೬೦. ‘‘ಉಚ್ಚಮಿದಂ ಮಣಿಥೂಣಂ ವಿಮಾನಂ, ಸಮನ್ತತೋ ಸೋಳಸ ಯೋಜನಾನಿ;

ಕೂಟಾಗಾರಾ ಸತ್ತಸತಾ ಉಳಾರಾ, ವೇಳುರಿಯಥಮ್ಭಾ ರುಚಕತ್ಥತಾ ಸುಭಾ.

೧೦೬೧. ‘‘ತತ್ಥಚ್ಛಸಿ ಪಿವಸಿ ಖಾದಸಿ ಚ, ದಿಬ್ಬಾ ಚ ವೀಣಾ ಪವದನ್ತಿ ವಗ್ಗುಂ;

ಅಟ್ಠಟ್ಠಕಾ ಸಿಕ್ಖಿತಾ ಸಾಧುರೂಪಾ, ದಿಬ್ಬಾ ಚ ಕಞ್ಞಾ ತಿದಸಚರಾ ಉಳಾರಾ;

ನಚ್ಚನ್ತಿ ಗಾಯನ್ತಿ ಪಮೋದಯನ್ತಿ.

೧೦೬೨. ‘‘ದೇವಿದ್ಧಿಪತ್ತೋಸಿ ಮಹಾನುಭಾವೋ…ಪೇ…

ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ.

೧೦೬೩. ‘‘ಸೋ ದೇವಪುತ್ತೋ ಅತ್ತಮನೋ…ಪೇ… ಯಸ್ಸ ಕಮ್ಮಸ್ಸಿದಂ ಫಲಂ’’.

೧೦೬೪. ‘‘ಫಲದಾಯೀ ಫಲಂ ವಿಪುಲಂ ಲಭತಿ, ದದಮುಜುಗತೇಸು ಪಸನ್ನಮಾನಸೋ;

ಸೋ ಹಿ ಪಮೋದತಿ ಸಗ್ಗಗತೋ ತಿದಿವೇ, ಅನುಭೋತಿ ಚ ಪುಞ್ಞಫಲಂ ವಿಪುಲಂ.

೧೦೬೫. ‘‘ತವೇವಾಹಂ ಮಹಾಮುನಿ, ಅದಾಸಿಂ ಚತುರೋ ಫಲೇ.

೧೦೬೬. ‘‘ತಸ್ಮಾ ಹಿ ಫಲಂ ಅಲಮೇವ ದಾತುಂ, ನಿಚ್ಚಂ ಮನುಸ್ಸೇನ ಸುಖತ್ಥಿಕೇನ;

ದಿಬ್ಬಾನಿ ವಾ ಪತ್ಥಯತಾ ಸುಖಾನಿ, ಮನುಸ್ಸಸೋಭಗ್ಗತಮಿಚ್ಛತಾ ವಾ.

೧೦೬೭. ‘‘ತೇನ ಮೇತಾದಿಸೋ ವಣ್ಣೋ…ಪೇ…

ವಣ್ಣೋ ಚ ಮೇ ಸಬ್ಬದಿಸಾ ಪಭಾಸತೀ’’ತಿ. – ಸೋಪಿಸ್ಸ ಬ್ಯಾಕಾಸಿ;

೧೦೬೧. ತತ್ಥ ಅಟ್ಠಟ್ಠಕಾತಿ ಏಕೇಕಸ್ಮಿಂ ಕೂಟಾಗಾರೇ ಅಟ್ಠಟ್ಠಕಾ ಚತುಸಟ್ಠಿಪರಿಮಾಣಾ. ಸಾಧುರೂಪಾತಿ ರೂಪಸಮ್ಪತ್ತಿಯಾ ಚ ಸೀಲಾಚಾರಸಮ್ಪತ್ತಿಯಾ ಚ ಸಿಕ್ಖಾಸಮ್ಪತ್ತಿಯಾ ಚ ಸುನ್ದರಸಭಾವಾ. ದಿಬ್ಬಾ ಚ ಕಞ್ಞಾತಿ ದೇವಚ್ಛರಾಯೋ. ತಿದಸಚರಾತಿ ತಿದಸೇಸು ಸುಖಾಚಾರಾ ಸುಖವಿಹಾರಿನಿಯೋ. ಉಳಾರಾತಿ ಉಳಾರವಿಭವಾ.

೧೦೬೪. ಫಲದಾಯೀತಿ ಅತ್ತನಾ ಅಮ್ಬಫಲಸ್ಸ ದಿನ್ನತ್ತಾ ಅತ್ತಾನಂ ಸನ್ಧಾಯ ವದತಿ. ಫಲನ್ತಿ ಪುಞ್ಞಫಲಂ. ವಿಪುಲನ್ತಿ ಮಹನ್ತಂ ಲಭತಿ ಮನುಸ್ಸಲೋಕೇ ಪತಿಟ್ಠಿತೋತಿ ಅಧಿಪ್ಪಾಯೋ. ದದನ್ತಿ ದದನ್ತೋ ದಾನಹೇತು. ಉಜುಗತೇಸೂತಿ ಉಜುಪಟಿಪನ್ನೇಸು. ಸಗ್ಗಗತೋತಿ ಉಪ್ಪಜ್ಜನವಸೇನ ಸಗ್ಗಂ ಗತೋ, ತತ್ಥಾಪಿ ತಿದಿವೇ ತಾವತಿಂಸಭವನೇ ಅನುಭೋತಿ ಚ ಪುಞ್ಞಫಲಂ ವಿಪುಲಂ ಯಥಾಹಂ, ಏವಂ ಅಞ್ಞೋಪೀತಿ ಅತ್ಥೋ.

೧೦೬೬. ತಸ್ಮಾತಿ ಯಸ್ಮಾ ಚತುನ್ನಂ ಫಲಾನಂ ದಾನಮತ್ತೇನ ಈದಿಸೀ ಸಮ್ಪತ್ತಿ ಅಧಿಗತಾ, ತಸ್ಮಾ. ಅಲಮೇವ ಯುತ್ತಮೇವ. ನಿಚ್ಚನ್ತಿ ಸಬ್ಬಕಾಲಂ. ದಿಬ್ಬಾನೀತಿ ದೇವಲೋಕಪರಿಯಾಪನ್ನಾನಿ. ಮನುಸ್ಸಸೋಭಗ್ಗತನ್ತಿ ಮನುಸ್ಸೇಸು ಸುಭಗಭಾವಂ. ಸೇಸಂ ವುತ್ತನಯಮೇವ.

ಫಲದಾಯಕವಿಮಾನವಣ್ಣನಾ ನಿಟ್ಠಿತಾ.