೬. ಮಹಾಪಜಾಪತಿಗೋತಮೀಥೇರೀಗಾಥಾವಣ್ಣನಾ

ಬುದ್ಧ ವೀರ ನಮೋ ತ್ಯತ್ಥೂತಿಆದಿಕಾ ಮಹಾಪಜಾಪತಿಗೋತಮಿಯಾ ಗಾಥಾ. ಅಯಮ್ಪಿ ಕಿರ ಪದುಮುತ್ತರಸ್ಸ ಭಗವತೋ ಕಾಲೇ ಹಂಸವತೀನಗರೇ ಕುಲಗೇಹೇ ನಿಬ್ಬತ್ತಿತ್ವಾ ವಿಞ್ಞುತಂ ಪತ್ವಾ ಸತ್ಥು ಸನ್ತಿಕೇ ಧಮ್ಮಂ ಸುಣನ್ತೀ ಸತ್ಥಾರಂ ಏಕಂ ಭಿಕ್ಖುನಿಂ ರತ್ತಞ್ಞೂನಂ ಅಗ್ಗಟ್ಠಾನೇ ಠಪೇನ್ತಂ ದಿಸ್ವಾ, ಅಧಿಕಾರಕಮ್ಮಂ ಕತ್ವಾ ತಂ ಠಾನನ್ತರಂ ಪತ್ಥೇತ್ವಾ ಯಾವಜೀವಂ ದಾನಾದೀನಿ ಪುಞ್ಞಾನಿ ಕತ್ವಾ ಕಪ್ಪಸತಸಹಸ್ಸಂ ದೇವಮನುಸ್ಸೇಸು ಸಂಸರಿತ್ವಾ, ಕಸ್ಸಪಸ್ಸ ಚ ಭಗವತೋ ಅನ್ತರೇ ಅಮ್ಹಾಕಞ್ಚ ಭಗವತೋ ಬುದ್ಧಸುಞ್ಞೇ ಲೋಕೇ ಬಾರಾಣಸಿಯಂ ಪಞ್ಚನ್ನಂ ದಾಸಿಸತಾನಂ ಜೇಟ್ಠಿಕಾ ಹುತ್ವಾ ನಿಬ್ಬತ್ತಿ. ಅಥ ಸಾ ವಸ್ಸೂಪನಾಯಿಕಸಮಯೇ ಪಞ್ಚ ಪಚ್ಚೇಕಬುದ್ಧೇ ನನ್ದಮೂಲಕಪಬ್ಭಾರತೋ ಇಸಿಪತನೇ ಓತರಿತ್ವಾ, ನಗರೇ ಪಿಣ್ಡಾಯ ಚರಿತ್ವಾ ಇಸಿಪತನಮೇವ ಗನ್ತ್ವಾ, ವಸ್ಸೂಪನಾಯಿಕಸಮಯೇ ಕುಟಿಯಾ ಅತ್ಥಾಯ ಹತ್ಥಕಮ್ಮಂ ಪರಿಯೇಸನ್ತೇ ದಿಸ್ವಾ, ತಾ ದಾಸಿಯೋ ತಾಸಂ ಅತ್ತನೋ ಚ ಸಾಮಿಕೇ ಸಮಾದಪೇತ್ವಾ ಚಙ್ಕಮಾದಿಪರಿವಾರಸಮ್ಪನ್ನಾ ಪಞ್ಚ ಕುಟಿಯೋ ಕಾರೇತ್ವಾ, ಮಞ್ಚಪೀಠಪಾನೀಯಪರಿಭೋಜನೀಯಭಾಜನಾದೀನಿ ಉಪಟ್ಠಪೇತ್ವಾ ಪಚ್ಚೇಕಬುದ್ಧೇ ತೇಮಾಸಂ ತತ್ಥೇವ ವಸನತ್ಥಾಯ ಪಟಿಞ್ಞಂ ಕಾರೇತ್ವಾ ವಾರಭಿಕ್ಖಂ ಪಟ್ಠಪೇಸುಂ. ಯಾ ಅತ್ತನೋ ವಾರದಿವಸೇ ಭಿಕ್ಖಂ ದಾತುಂ ನ ಸಕ್ಕೋತಿ, ತಸ್ಸಾ ಸಯಂ ಸಕಗೇಹತೋ ನೀಹರಿತ್ವಾ ದೇತಿ. ಏವಂ ತೇಮಾಸಂ ಪಟಿಜಗ್ಗಿತ್ವಾ ಪವಾರಣಾಯ ಸಮ್ಪತ್ತಾಯ ಏಕೇಕಂ ದಾಸಿಂ ಏಕೇಕಂ ಸಾಟಕಂ ವಿಸ್ಸಜ್ಜಾಪೇಸಿ. ಪಞ್ಚಥೂಲಸಾಟಕಸತಾನಿ ಅಹೇಸುಂ. ತಾನಿ ಪರಿವತ್ತಾಪೇತ್ವಾ ಪಞ್ಚನ್ನಂ ಪಚ್ಚೇಕಬುದ್ಧಾನಂ ತಿಚೀವರಾನಿ ಕತ್ವಾ ಅದಾಸಿ. ಪಚ್ಚೇಕಬುದ್ಧಾ ತಾಸಂ ಪಸ್ಸನ್ತೀನಂಯೇವ ಆಕಾಸೇನ ಗನ್ಧಮಾದನಪಬ್ಬತಂ ಅಗಮಂಸು.

ತಾಪಿ ಸಬ್ಬಾ ಯಾವಜೀವಂ ಕುಸಲಂ ಕತ್ವಾ ದೇವಲೋಕೇ ನಿಬ್ಬತ್ತಿಂಸು. ತಾಸಂ ಜೇಟ್ಠಿಕಾ ತತೋ ಚವಿತ್ವಾ ಬಾರಾಣಸಿಯಾ ಅವಿದೂರೇ ಪೇಸಕಾರಗಾಮೇ ಪೇಸಕಾರಜೇಟ್ಠಕಸ್ಸ ಗೇಹೇ ನಿಬ್ಬತ್ತಿತ್ವಾ ವಿಞ್ಞುತಂ ಪತ್ವಾ, ಪದುಮವತಿಯಾ ಪುತ್ತೇ ಪಞ್ಚಸತೇ ಪಚ್ಚೇಕಬುದ್ಧೇ ದಿಸ್ವಾ ಸಮ್ಪಿಯಾಯಮಾನಾ ಸಬ್ಬೇ ವನ್ದಿತ್ವಾ ಭಿಕ್ಖಂ ಅದಾಸಿ. ತೇ ಭತ್ತಕಿಚ್ಚಂ ಕತ್ವಾ ಗನ್ಧಮಾದನಮೇವ ಅಗಮಂಸು. ಸಾಪಿ ಯಾವಜೀವಂ ಕುಸಲಂ ಕತ್ವಾ ದೇವಮನುಸ್ಸೇಸು ಸಂಸರನ್ತೀ ಅಮ್ಹಾಕಂ ಸತ್ಥು ನಿಬ್ಬತ್ತಿತೋ ಪುರೇತರಮೇವ ದೇವದಹನಗರೇ ಮಹಾಸುಪ್ಪಬುದ್ಧಸ್ಸ ಗೇಹೇ ಪಟಿಸನ್ಧಿಂ ಗಣ್ಹಿ, ಗೋತಮೀತಿಸ್ಸಾ ಗೋತ್ತಾಗತಮೇವ ನಾಮಂ ಅಹೋಸಿ; ಮಹಾಮಾಯಾಯ ಕನಿಟ್ಠಭಗಿನೀ. ಲಕ್ಖಣಪಾಠಕಾಪಿ ‘‘ಇಮಾಸಂ ದ್ವಿನ್ನಮ್ಪಿ ಕುಚ್ಛಿಯಂ ವಸಿತಾ ದಾರಕಾ ಚಕ್ಕವತ್ತಿನೋ ಭವಿಸ್ಸನ್ತೀ’’ತಿ ಬ್ಯಾಕರಿಂಸು. ಸುದ್ಧೋದನಮಹಾರಾಜಾ ವಯಪ್ಪತ್ತಕಾಲೇ ದ್ವೇಪಿ ಮಙ್ಗಲಂ ಕತ್ವಾ ಅತ್ತನೋ ಘರಂ ಅಭಿನೇಸಿ.

ಅಪರಭಾಗೇ ಅಮ್ಹಾಕಂ ಸತ್ಥರಿ ಉಪ್ಪಜ್ಜಿತ್ವಾ ಪವತ್ತಿತವರಧಮ್ಮಚಕ್ಕೇ ಅನುಪುಬ್ಬೇನ ತತ್ಥ ತತ್ಥ ವೇನೇಯ್ಯಾನಂ ಅನುಗ್ಗಹಂ ಕರೋನ್ತೇ ವೇಸಾಲಿಂ ಉಪನಿಸ್ಸಾಯ ಕೂಟಾಗಾರಸಾಲಾಯಂ ವಿಹರನ್ತೇ ಸುದ್ಧೋದನಮಹಾರಾಜಾ ಸೇತಚ್ಛತ್ತಸ್ಸ ಹೇಟ್ಠಾ ಅರಹತ್ತಂ ಸಚ್ಛಿಕತ್ವಾ ಪರಿನಿಬ್ಬಾಯಿ. ಅಥ ಮಹಾಪಜಾಪತಿಗೋತಮೀ ಪಬ್ಬಜಿತುಕಾಮಾ ಹುತ್ವಾ ಸತ್ಥಾರಂ ಏಕವಾರಂ ಪಬ್ಬಜ್ಜಂ ಯಾಚಮಾನಾ ಅಲಭಿತ್ವಾ ದುತಿಯವಾರಂ ಕೇಸೇ ಛಿನ್ದಾಪೇತ್ವಾ ಕಾಸಾಯಾನಿ ಅಚ್ಛಾದೇತ್ವಾ ಕಲಹವಿವಾದಸುತ್ತನ್ತದೇಸನಾಪರಿಯೋಸಾನೇ (ಸು. ನಿ. ೮೬೮ ಆದಯೋ) ನಿಕ್ಖಮಿತ್ವಾ ಪಬ್ಬಜಿತಾನಂ ಪಞ್ಚನ್ನಂ ಸಕ್ಯಕುಮಾರಸತಾನಂ ಪಾದಪರಿಚಾರಿಕಾಹಿ ಸದ್ಧಿಂ ವೇಸಾಲಿಂ ಗನ್ತ್ವಾ ಆನನ್ದತ್ಥೇರಂ ಸತ್ಥಾರಂ ಯಾಚಾಪೇತ್ವಾ ಅಟ್ಠಹಿ ಗರುಧಮ್ಮೇಹಿ (ಅ. ನಿ. ೮.೫೧; ಚೂಳವ. ೪೦೩) ಪಬ್ಬಜ್ಜಞ್ಚ ಉಪಸಮ್ಪದಞ್ಚ ಪಟಿಲಭಿ. ಇತರಾ ಪನ ಸಬ್ಬಾಪಿ ಏಕತೋಉಪಸಮ್ಪನ್ನಾ ಅಹೇಸುಂ. ಅಯಮೇತ್ಥ ಸಙ್ಖೇಪೋ, ವಿತ್ಥಾರತೋ ಪನೇತಂ ವತ್ಥು ಪಾಳಿಯಂ ಆಗತಮೇವ.

ಏವಂ ಉಪಸಮ್ಪನ್ನಾ ಪನ ಮಹಾಪಜಾಪತಿಗೋತಮೀ ಸತ್ಥಾರಂ ಉಪಸಙ್ಕಮಿತ್ವಾ ಅಭಿವಾದೇತ್ವಾ ಏಕಮನ್ತಂ ಅಟ್ಠಾಸಿ. ಅಥಸ್ಸಾ ಸತ್ಥಾ ಧಮ್ಮಂ ದೇಸೇಸಿ. ಸಾ ಸತ್ಥು ಸನ್ತಿಕೇ ಕಮ್ಮಟ್ಠಾನಂ ಗಹೇತ್ವಾ ಭಾವನಮನುಯುಞ್ಜನ್ತೀ ನ ಚಿರಸ್ಸೇವ ಅಭಿಞ್ಞಾಪಟಿಸಮ್ಭಿದಾಪರಿವಾರಂ ಅರಹತ್ತಂ ಪಾಪುಣಿ. ಸೇಸಾ ಪನ ಪಞ್ಚಸತಾ ಭಿಕ್ಖುನಿಯೋ ನನ್ದಕೋವಾದಪರಿಯೋಸಾನೇ (ಮ. ನಿ. ೩.೩೯೮ ಆದಯೋ) ಛಳಭಿಞ್ಞಾ ಅಹೇಸುಂ. ಅಥೇಕದಿವಸಂ ಸತ್ಥಾ ಜೇತವನಮಹಾವಿಹಾರೇ ಅರಿಯಗಣಮಜ್ಝೇ ನಿಸಿನ್ನೋ ಭಿಕ್ಖುನಿಯೋ ಠಾನನ್ತರೇ ಠಪೇನ್ತೋ ಮಹಾಪಜಾಪತಿಗೋತಮಿಂ ರತ್ತಞ್ಞೂನಂ ಭಿಕ್ಖುನೀನಂ ಅಗ್ಗಟ್ಠಾನೇ ಠಪೇಸಿ. ಸಾ ಫಲಸುಖೇನ ನಿಬ್ಬಾನಸುಖೇನ ಚ ವೀತಿನಾಮೇನ್ತೀ ಕತಞ್ಞುತಾಯ ಠತ್ವಾ ಏಕದಿವಸಂ ಸತ್ಥು ಗುಣಾಭಿತ್ಥವನಪುಬ್ಬಕಉಪಕಾರಕವಿಭಾವನಾಮುಖೇನ ಅಞ್ಞಂ ಬ್ಯಾಕರೋನ್ತೀ –

೧೫೭. ‘‘ಬುದ್ಧವೀರ ನಮೋ ತ್ಯತ್ಥು, ಸಬ್ಬಸತ್ತಾನಮುತ್ತಮ;

ಯೋ ಮಂ ದುಕ್ಖಾ ಪಮೋಚೇಸಿ, ಅಞ್ಞಞ್ಚ ಬಹುಕಂ ಜನಂ.

೧೫೮. ‘‘ಸಬ್ಬದುಕ್ಖಂ ಪರಿಞ್ಞಾತಂ, ಹೇತುತಣ್ಹಾ ವಿಸೋಸಿತಾ;

ಭಾವಿತೋ ಅಟ್ಠಙ್ಗಿಕೋ ಮಗ್ಗೋ, ನಿರೋಧೋ ಫುಸಿತೋ ಮಯಾ.

೧೫೯. ‘‘ಮಾತಾ ಪುತ್ತೋ ಪಿತಾ ಭಾತಾ, ಅಯ್ಯಕಾ ಚ ಪುರೇ ಅಹುಂ;

ಯಥಾಭುಚ್ಚಮಜಾನನ್ತೀ, ಸಂಸರಿಂಹಂ ಅನಿಬ್ಬಿಸಂ.

೧೬೦. ‘‘ದಿಟ್ಠೋ ಹಿ ಮೇ ಸೋ ಭಗವಾ, ಅನ್ತಿಮೋಯಂ ಸಮುಸ್ಸಯೋ;

ವಿಕ್ಖೀಣೋ ಜಾತಿಸಂಸಾರೋ, ನತ್ಥಿ ದಾನಿ ಪುನಬ್ಭವೋ.

೧೬೧. ‘‘ಆರದ್ಧವೀರಿಯೇ ಪಹಿತತ್ತೇ, ನಿಚ್ಚಂ ದಳ್ಹಪರಕ್ಕಮೇ;

ಸಮಗ್ಗೇ ಸಾವಕೇ ಪಸ್ಸೇ, ಏಸಾ ಬುದ್ಧಾನ ವನ್ದನಾ.

೧೬೨. ‘‘ಬಹೂನಂ ವತ ಅತ್ಥಾಯ, ಮಾಯಾ ಜನಯಿ ಗೋತಮಂ;

ಬ್ಯಾಧಿಮರಣತುನ್ನಾನಂ, ದುಕ್ಖಕ್ಖನ್ಧಂ ಬ್ಯಪಾನುದೀ’’ತಿ. – ಇಮಾ ಗಾಥಾ ಅಭಾಸಿ;

ತತ್ಥ ಬುದ್ಧವೀರಾತಿ ಚತುಸಚ್ಚಬುದ್ಧೇಸು ವೀರ, ಸಬ್ಬಬುದ್ಧಾ ಹಿ ಉತ್ತಮವೀರಿಯೇಹಿ ಚತುಸಚ್ಚಬುದ್ಧೇಹಿ ವಾ ಚತುಬ್ಬಿಧಸಮ್ಮಪ್ಪಧಾನವೀರಿಯನಿಪ್ಫತ್ತಿಯಾ ವಿಜಿತವಿಜಯತ್ತಾ ವೀರಾ ನಾಮ. ಭಗವಾ ಪನ ವೀರಿಯಪಾರಮಿಪಾರಿಪೂರಿಯಾ ಚತುರಙ್ಗಸಮನ್ನಾಗತವೀರಿಯಾಧಿಟ್ಠಾನೇನ ಸಾತಿಸಯಚತುಬ್ಬಿಧಸಮ್ಮಪ್ಪಧಾನಕಿಚ್ಚನಿಪ್ಫತ್ತಿಯಾ ತಸ್ಸಾ ಚ ವೇನೇಯ್ಯಸನ್ತಾನೇ ಸಮ್ಮದೇವ ಪತಿಟ್ಠಾಪಿತತ್ತಾ ವಿಸೇಸತೋ ವೀರಿಯಯುತ್ತತಾಯ ವೀರೋತಿ ವತ್ತಬ್ಬತಂ ಅರಹತಿ. ನಮೋ ತ್ಯತ್ಥೂತಿ ನಮೋ ನಮಕ್ಕಾರೋ ತೇ ಹೋತು. ಸಬ್ಬಸತ್ತಾನಮುತ್ತಮಾತಿ ಅಪದಾದಿಭೇದೇಸು ಸತ್ತೇಸು ಸೀಲಾದಿಗುಣೇಹಿ ಉತ್ತಮೋ ಭಗವಾ. ತದೇಕದೇಸಂ ಸತ್ಥುಪಕಾರಗುಣಂ ದಸ್ಸೇತುಂ, ‘‘ಯೋ ಮಂ ದುಕ್ಖಾ ಪಮೋಚೇಸಿ, ಅಞ್ಞಞ್ಚ ಬಹುಕಂ ಜನ’’ನ್ತಿ ವತ್ವಾ ಅತ್ತನೋ ದುಕ್ಖಾ ಪಮುತ್ತಭಾವಂ ವಿಭಾವೇನ್ತೀ ‘‘ಸಬ್ಬದುಕ್ಖ’’ನ್ತಿ ಗಾಥಮಾಹ.

ಪುನ ಯತೋ ಪಮೋಚೇಸಿ, ತಂ ವಟ್ಟದುಕ್ಖಂ ಏಕದೇಸೇನ ದಸ್ಸೇನ್ತೀ ‘‘ಮಾತಾ ಪುತ್ತೋ’’ತಿ ಗಾಥಮಾಹ. ತತ್ಥ ಯಥಾಭುಚ್ಚಮಜಾನನ್ತೀತಿ ಪವತ್ತಿಹೇತುಆದಿಂ ಯಥಾಭೂತಂ ಅನವಬುಜ್ಝನ್ತೀ. ಸಂಸರಿಂಹಂ ಅನಿಬ್ಬಿಸನ್ತಿ ಸಂಸಾರಸಮುದ್ದೇ ಪತಿಟ್ಠಂ ಅವಿನ್ದನ್ತೀ ಅಲಭನ್ತೀ ಭವಾದೀಸು ಅಪರಾಪರುಪ್ಪತ್ತಿವಸೇನ ಸಂಸರಿಂ ಅಹನ್ತಿ ಕಥೇನ್ತೀ ಆಹ ‘‘ಮಾತಾ ಪುತ್ತೋ’’ತಿಆದಿ. ಯಸ್ಮಿಂ ಭವೇ ಏತಸ್ಸ ಮಾತಾ ಅಹೋಸಿ, ತತೋ ಅಞ್ಞಸ್ಮಿಂ ಭವೇ ತಸ್ಸೇವ ಪುತ್ತೋ, ತತೋ ಅಞ್ಞಸ್ಮಿಂ ಭವೇ ಪಿತಾ ಭಾತಾ ಅಹೂತಿ ಅತ್ಥೋ.

‘‘ದಿಟ್ಠೋ ಹಿ ಮೇ’’ತಿ ಗಾಥಾಯಪಿ ಅತ್ತನೋ ದುಕ್ಖತೋ ಪಮುತ್ತಭಾವಮೇವ ವಿಭಾವೇತಿ. ತತ್ಥ ದಿಟ್ಠೋ ಹಿ ಮೇ ಸೋ ಭಗವಾತಿ ಸೋ ಭಗವಾ ಸಮ್ಮಾಸಮ್ಬುದ್ಧೋ ಅತ್ತನಾ ದಿಟ್ಠಲೋಕುತ್ತರಧಮ್ಮದಸ್ಸನೇನ ಞಾಣಚಕ್ಖುನಾ ಮಯಾ ಪಚ್ಚಕ್ಖತೋ ದಿಟ್ಠೋ. ಯೋ ಹಿ ಧಮ್ಮಂ ಪಸ್ಸತಿ, ಸೋ ಭಗವನ್ತಂ ಪಸ್ಸತಿ ನಾಮ. ಯಥಾಹ – ‘‘ಯೋ ಖೋ, ವಕ್ಕಲಿ, ಧಮ್ಮಂ ಪಸ್ಸತಿ, ಸೋ ಮಂ ಪಸ್ಸತೀ’’ತಿಆದಿ (ಸಂ. ನಿ. ೩.೮೭).

ಆರದ್ಧವೀರಿಯೇತಿ ಪಗ್ಗಹಿತವೀರಿಯೇ. ಪಹಿತತ್ತೇತಿ ನಿಬ್ಬಾನಂ ಪೇಸಿತಚಿತ್ತೇ. ನಿಚ್ಚಂ ದಳ್ಹಪರಕ್ಕಮೇತಿ ಅಪತ್ತಸ್ಸ ಪತ್ತಿಯಾ ಪತ್ತಸ್ಸ ವೇಪುಲ್ಲತ್ಥಾಯ ಸಬ್ಬಕಾಲಂ ಥಿರಪರಕ್ಕಮೇ. ಸಮಗ್ಗೇತಿ ಸೀಲದಿಟ್ಠಿಸಾಮಞ್ಞೇನ ಸಂಹತಭಾವೇನ ಸಮಗ್ಗೇ. ಸತ್ಥುದೇಸನಾಯ ಸವನನ್ತೇ ಜಾತತ್ತಾ ಸಾವಕೇ, ‘‘ಇಮೇ ಮಗ್ಗಟ್ಠಾ ಇಮೇ ಫಲಟ್ಠಾ’’ತಿ ಯಾಥಾವತೋ ಪಸ್ಸತಿ. ಏಸಾ ಬುದ್ಧಾನ ವನ್ದನಾತಿ ಯಾ ಸತ್ಥು ಧಮ್ಮಸರೀರಭೂತಸ್ಸ ಅರಿಯಸಾವಕಾನಂ ಅರಿಯಭಾವಭೂತಸ್ಸ ಚ ಲೋಕುತ್ತರಧಮ್ಮಸ್ಸ ಅತ್ತಪಚ್ಚಕ್ಖಕಿರಿಯಾ, ಏಸಾ ಸಮ್ಮಾಸಮ್ಬುದ್ಧಾನಂ ಸಾವಕಬುದ್ಧಾನಞ್ಚ ವನ್ದನಾ ಯಾಥಾವತೋ ಗುಣನಿನ್ನತಾ.

‘‘ಬಹೂನಂ ವತ ಅತ್ಥಾಯಾ’’ತಿ ಓಸಾನಗಾಥಾಯಪಿ ಸತ್ಥು ಲೋಕಸ್ಸ ಬಹೂಪಕಾರತಂಯೇವ ವಿಭಾವೇತಿ. ಯಂ ಪನೇತ್ಥ ಅತ್ಥತೋ ನ ವಿಭತ್ತಂ, ತಂ ಸುವಿಞ್ಞೇಯ್ಯಮೇವ.

ಅಥೇಕದಾ ಮಹಾಪಜಾಪತಿಗೋತಮೀ ಸತ್ಥರಿ ವೇಸಾಲಿಯಂ ವಿಹರನ್ತೇ ಮಹಾವನೇ ಕೂಟಾಗಾರಸಾಲಾಯಂ ಸಯಂ ವೇಸಾಲಿಯಂ ಭಿಕ್ಖುನುಪಸ್ಸಯೇ ವಿಹರನ್ತೀ ಪುಬ್ಬಣ್ಹಸಮಯಂ ವೇಸಾಲಿಯಂ ಪಿಣ್ಡಾಯ ಚರಿತ್ವಾ ಭತ್ತಂ ಭುಞ್ಜಿತ್ವಾ ಅತ್ತನೋ ದಿವಾಟ್ಠಾನೇ ಯಥಾಪರಿಚ್ಛಿನ್ನಕಾಲಂ ಫಲಸಮಾಪತ್ತಿಸುಖೇನ ವೀತಿನಾಮೇತ್ವಾ ಫಲಸಮಾಪತ್ತಿತೋ ವುಟ್ಠಾಯ ಅತ್ತನೋ ಪಟಿಪತ್ತಿಂ ಪಚ್ಚವೇಕ್ಖಿತ್ವಾ ಸೋಮನಸ್ಸಜಾತಾ ಅತ್ತನೋ ಆಯುಸಙ್ಖಾರೇ ಆವಜ್ಜೇನ್ತೀ ತೇಸಂ ಖೀಣಭಾವಂ ಞತ್ವಾ ಏವಂ ಚಿನ್ತೇಸಿ – ‘‘ಯಂನೂನಾಹಂ ವಿಹಾರಂ ಗನ್ತ್ವಾ ಭಗವನ್ತಂ ಅನುಜಾನಾಪೇತ್ವಾ ಮನೋಭಾವನೀಯೇ ಚ ಥೇರೇ ಸಬ್ಬೇವ ಸಬ್ರಹ್ಮಚರಿಯೇ ಆಪುಚ್ಛಿತ್ವಾ ಇಧೇವ ಆಗನ್ತ್ವಾ ಪರಿನಿಬ್ಬಾಯೇಯ್ಯ’’ನ್ತಿ. ಯಥಾ ಚ ಥೇರಿಯಾ, ಏವಂ ತಸ್ಸಾ ಪರಿವಾರಭೂತಾನಂ ಪಞ್ಚನ್ನಂ ಭಿಕ್ಖುನಿಸತಾನಂ ಪರಿವಿತಕ್ಕೋ ಅಹೋಸಿ. ತೇನ ವುತ್ತಂ ಅಪದಾನೇ (ಅಪ. ಥೇರೀ ೨.೨.೯೭-೨೮೮) –

‘‘ಏಕದಾ ಲೋಕಪಜ್ಜೋತೋ, ವೇಸಾಲಿಯಂ ಮಹಾವನೇ;

ಕೂಟಾಗಾರೇ ಕುಸಾಲಾಯಂ, ವಸತೇ ನರಸಾರಥಿ.

‘‘ತದಾ ಜಿನಸ್ಸ ಮಾತುಚ್ಛಾ, ಮಹಾಗೋತಮಿ ಭಿಕ್ಖುನೀ;

ತಹಿಂ ಕತೇ ಪುರೇ ರಮ್ಮೇ, ವಸೀ ಭಿಕ್ಖುನುಪಸ್ಸಯೇ.

‘‘ಭಿಕ್ಖುನೀಹಿ ವಿಮುತ್ತಾಹಿ, ಸತೇಹಿ ಸಹ ಪಞ್ಚಹಿ;

ರಹೋಗತಾಯ ತಸ್ಸೇವಂ, ಚಿತಸ್ಸಾಸಿ ವಿತಕ್ಕಿತಂ.

‘‘ಬುದ್ಧಸ್ಸ ಪರಿನಿಬ್ಬಾನಂ, ಸಾವಕಗ್ಗಯುಗಸ್ಸ ವಾ;

ರಾಹುಲಾನನ್ದನನ್ದಾನಂ, ನಾಹಂ ಲಚ್ಛಾಮಿ ಪಸ್ಸಿತುಂ.

‘‘ಬುದ್ಧಸ್ಸ ಪರಿನಿಬ್ಬಾನಾ, ಸಾವಕಗ್ಗಯುಗಸ್ಸ ವಾ;

ಮಹಾಕಸ್ಸಪನನ್ದಾನಂ, ಆನನ್ದರಾಹುಲಾನ ಚ.

‘‘ಪಟಿಕಚ್ಚಾಯುಸಙ್ಖಾರಂ, ಓಸಜ್ಜಿತ್ವಾನ ನಿಬ್ಬುತಿಂ;

ಗಚ್ಛೇಯ್ಯಂ ಲೋಕನಾಥೇನ, ಅನುಞ್ಞಾತಾ ಮಹೇಸಿನಾ.

‘‘ತಥಾ ಪಞ್ಚಸತಾನಮ್ಪಿ, ಭಿಕ್ಖುನೀನಂ ವಿತಕ್ಕಿತಂ;

ಆಸಿ ಖೇಮಾದಿಕಾನಮ್ಪಿ, ಏತದೇವ ವಿತಕ್ಕಿತಂ.

‘‘ಭೂಮಿಚಾಲೋ ತದಾ ಅಸಿ, ನಾದಿತಾ ದೇವದುನ್ದುಭೀ;

ಉಪಸ್ಸಯಾಧಿವತ್ಥಾಯೋ, ದೇವತಾ ಸೋಕಪೀಳಿತಾ.

‘‘ವಿಲಪನ್ತಾ ಸುಕರುಣಂ, ತತ್ಥಸ್ಸೂನಿ ಪವತ್ತಯುಂ;

ಮಿತ್ತಾ ಭಿಕ್ಖುನಿಯೋ ತಾಹಿ, ಉಪಗನ್ತ್ವಾನ ಗೋತಮಿಂ.

‘‘ನಿಪಚ್ಚ ಸಿರಸಾ ಪಾದೇ, ಇದಂ ವಚನಮಬ್ರವುಂ;

ತತ್ಥ ತೋಯಲವಾಸಿತ್ತಾ, ಮಯಮಯ್ಯೇ ರಹೋಗತಾ.

‘‘ಸಾ ಚಲಾ ಚಲಿತಾ ಭೂಮಿ, ನಾದಿತಾ ದೇವದುನ್ದುಭೀ;

ಪರಿದೇವಾ ಚ ಸುಯ್ಯನ್ತೇ, ಕಿಮತ್ಥಂ ನೂನ ಗೋತಮೀ.

‘‘ತದಾ ಅವೋಚ ಸಾ ಸಬ್ಬಂ, ಯಥಾಪರಿವಿತಕ್ಕಿತಂ;

ತಾಯೋಪಿ ಸಬ್ಬಾ ಆಹಂಸು, ಯಥಾಪರಿವಿತಕ್ಕಿತಂ.

‘‘ಯದಿ ತೇ ರುಚಿತಂ ಅಯ್ಯೇ, ನಿಬ್ಬಾನಂ ಪರಮಂ ಸಿವಂ;

ನಿಬ್ಬಾಯಿಸ್ಸಾಮ ಸಬ್ಬಾಪಿ, ಬುದ್ಧಾನುಞ್ಞಾಯ ಸುಬ್ಬತೇ.

‘‘ಮಯಂ ಸಹಾವ ನಿಕ್ಖನ್ತಾ, ಘರಾಪಿ ಚ ಭವಾಪಿ ಚ;

ಸಹಾಯೇವ ಗಮಿಸ್ಸಾಮ, ನಿಬ್ಬಾನಂ ಪದಮುತ್ತಮಂ.

‘‘ನಿಬ್ಬಾನಾಯ ವಜನ್ತೀನಂ, ಕಿಂ ವಕ್ಖಾಮೀತಿ ಸಾ ವದಂ;

ಸಹ ಸಬ್ಬಾಹಿ ನಿಗ್ಗಞ್ಛಿ, ಭಿಕ್ಖುನೀನಿಲಯಾ ತದಾ.

‘‘ಉಪಸ್ಸಯೇ ಯಾಧಿವತ್ಥಾ, ದೇವತಾ ತಾ ಖಮನ್ತು ಮೇ;

ಭಿಕ್ಖುನೀನಿಲಯಸ್ಸೇದಂ, ಪಚ್ಛಿಮಂ ದಸ್ಸನಂ ಮಮ.

‘‘ನ ಜರಾ ಮಚ್ಚು ವಾ ಯತ್ಥ, ಅಪ್ಪಿಯೇಹಿ ಸಮಾಗಮೋ;

ಪಿಯೇಹಿ ನ ವಿಯೋಗೋತ್ಥಿ, ತಂ ವಜಿಸ್ಸಂ ಅಸಙ್ಖತಂ.

‘‘ಅವೀತರಾಗಾ ತಂ ಸುತ್ವಾ, ವಚನಂ ಸುಗತೋರಸಾ;

ಸೋಕಟ್ಟಾ ಪರಿದೇವಿಂಸು, ಅಹೋ ನೋ ಅಪ್ಪಪುಞ್ಞತಾ.

‘‘ಭಿಕ್ಖುನೀನಿಲಯೋ ಸುಞ್ಞೋ, ಭೂತೋ ತಾಹಿ ವಿನಾ ಅಯಂ;

ಪಭಾತೇ ವಿಯ ತಾರಾಯೋ, ನ ದಿಸ್ಸನ್ತಿ ಜಿನೋರಸಾ.

‘‘ನಿಬ್ಬಾನಂ ಗೋತಮೀ ಯಾತಿ, ಸತೇಹಿ ಸಹ ಪಞ್ಚಹಿ;

ನದೀಸತೇಹಿವ ಸಹ, ಗಙ್ಗಾ ಪಞ್ಚಹಿ ಸಾಗರಂ.

‘‘ರಥಿಯಾಯ ವಜನ್ತಿಯೋ, ದಿಸ್ವಾ ಸದ್ಧಾ ಉಪಾಸಿಕಾ;

ಘರಾ ನಿಕ್ಖಮ್ಮ ಪಾದೇಸು, ನಿಪಚ್ಚ ಇದಮಬ್ರವುಂ.

‘‘ಪಸೀದಸ್ಸು ಮಹಾಭೋಗೇ, ಅನಾಥಾಯೋ ವಿಹಾಯ ನೋ;

ತಯಾ ನ ಯುತ್ತಾ ನಿಬ್ಬಾತುಂ, ಇಚ್ಛಟ್ಟಾ ವಿಲಪಿಂಸು ತಾ.

‘‘ತಾಸಂ ಸೋಕಪಹಾನತ್ಥಂ, ಅವೋಚ ಮಧುರಂ ಗಿರಂ;

ರುದಿತೇನ ಅಲಂ ಪುತ್ತಾ, ಹಾಸಕಾಲೋಯಮಜ್ಜ ವೋ.

‘‘ಪರಿಞ್ಞಾತಂ ಮಯಾ ದುಕ್ಖಂ, ದುಕ್ಖಹೇತು ವಿವಜ್ಜಿತೋ;

ನಿರೋಧೋ ಮೇ ಸಚ್ಛಿಕತೋ, ಮಗ್ಗೋ ಚಾಪಿ ಸುಭಾವಿತೋ.

‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;

ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.

‘‘ಯಸ್ಸತ್ಥಾಯ ಪಬ್ಬಜಿತಾ, ಅಗಾರಸ್ಮಾನಗಾರಿಯಂ;

ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.

‘‘ಬುದ್ಧೋ ತಸ್ಸ ಚ ಸದ್ಧಮ್ಮೋ, ಅನೂನೋ ಯಾವ ತಿಟ್ಠತಿ;

ನಿಬ್ಬಾತುಂ ತಾವ ಕಾಲೋ ಮೇ, ಮಾ ಮಂ ಸೋಚಥ ಪುತ್ತಿಕಾ.

‘‘ಕೋಣ್ಡಞ್ಞಾನನ್ದನನ್ದಾದೀ, ತಿಟ್ಠನ್ತಿ ರಾಹುಲೋ ಜಿನೋ;

ಸುಖಿತೋ ಸಹಿತೋ ಸಙ್ಘೋ, ಹತದಬ್ಬಾ ಚ ತಿತ್ಥಿಯಾ.

‘‘ಓಕ್ಕಾಕವಂಸಸ್ಸ ಯಸೋ, ಉಸ್ಸಿತೋ ಮಾರಮದ್ದನೋ;

ನನು ಸಮ್ಪತಿ ಕಾಲೋ ಮೇ, ನಿಬ್ಬಾನತ್ಥಾಯ ಪುತ್ತಿಕಾ.

‘‘ಚಿರಪ್ಪಭುತಿ ಯಂ ಮಯ್ಹಂ, ಪತ್ಥಿತಂ ಅಜ್ಜ ಸಿಜ್ಝತೇ;

ಆನನ್ದಭೇರಿಕಾಲೋಯಂ, ಕಿಂ ವೋ ಅಸ್ಸೂಹಿ ಪುತ್ತಿಕಾ.

‘‘ಸಚೇ ಮಯಿ ದಯಾ ಅತ್ಥಿ, ಯದಿ ಚತ್ಥಿ ಕತಞ್ಞುತಾ;

ಸದ್ಧಮ್ಮಟ್ಠಿತಿಯಾ ಸಬ್ಬಾ, ಕರೋಥ ವೀರಿಯಂ ದಳ್ಹಂ.

‘‘ಥೀನಂ ಅದಾಸಿ ಪಬ್ಬಜ್ಜಂ, ಸಮ್ಬುದ್ಧೋ ಯಾಚಿತೋ ಮಯಾ;

ತಸ್ಮಾ ಯಥಾಹಂ ನನ್ದಿಸ್ಸಂ, ತಥಾ ತಮನುತಿಟ್ಠಥ.

‘‘ತಾ ಏವಮನುಸಾಸಿತ್ವಾ, ಭಿಕ್ಖುನೀಹಿ ಪುರಕ್ಖತಾ;

ಉಪೇಚ್ಚ ಬುದ್ಧಂ ವನ್ದಿತ್ವಾ, ಇದಂ ವಚನಮಬ್ರವಿ.

‘‘ಅಹಂ ಸುಗತ ತೇ ಮಾತಾ, ತ್ವಞ್ಚ ವೀರ ಪಿತಾ ಮಮ;

ಸದ್ಧಮ್ಮಸುಖದ ನಾಥ, ತಯಿ ಜಾತಾಮ್ಹಿ ಗೋತಮ.

‘‘ಸಂವದ್ಧಿತೋಯಂ ಸುಗತ, ರೂಪಕಾಯೋ ಮಯಾ ತವ;

ಅನಿನ್ದಿತೋ ಧಮ್ಮಕಾಯೋ, ಮಮ ಸಂವದ್ಧಿತೋ ತಯಾ.

‘‘ಮುಹುತ್ತಂ ತಣ್ಹಾಸಮಣಂ, ಖೀರಂ ತ್ವಂ ಪಾಯಿತೋ ಮಯಾ;

ತಯಾಹಂ ಸನ್ತಮಚ್ಚನ್ತಂ, ಧಮ್ಮಖೀರಞ್ಹಿ ಪಾಯಿತಾ.

‘‘ಬನ್ಧನಾರಕ್ಖಣೇ ಮಯ್ಹಂ, ಅಣಣೋ ತ್ವಂ ಮಹಾಮುನೇ;

ಪುತ್ತಕಾಮಾ ಥಿಯೋ ಯಾಚಂ, ಲಭನ್ತಿ ತಾದಿಸಂ ಸುತಂ.

‘‘ಮನ್ಧಾತಾದಿನರಿನ್ದಾನಂ, ಯಾ ಮಾತಾ ಸಾ ಭವಣ್ಣವೇ;

ನಿಮುಗ್ಗಾಹಂ ತಯಾ ಪುತ್ತ, ತಾರಿತಾ ಭವಸಾಗರಾ.

‘‘ರಞ್ಞೋ ಮಾತಾ ಮಹೇಸೀತಿ, ಸುಲಭಂ ನಾಮಮಿತ್ಥಿನಂ;

ಬುದ್ಧಮಾತಾತಿ ಯಂ ನಾಮಂ, ಏತಂ ಪರಮದುಲ್ಲಭಂ.

‘‘ತಞ್ಚ ಲದ್ಧಂ ಮಹಾವೀರ, ಪಣಿಧಾನಂ ಮಮಂ ತಯಾ;

ಅಣುಕಂ ವಾ ಮಹನ್ತಂ ವಾ, ತಂ ಸಬ್ಬಂ ಪೂರಿತಂ ಮಯಾ.

‘‘ಪರಿನಿಬ್ಬಾತುಮಿಚ್ಛಾಮಿ, ವಿಹಾಯೇಮಂ ಕಳೇವರಂ;

ಅನುಜಾನಾಹಿ ಮೇ ವೀರ, ದುಕ್ಖನ್ತಕರ ನಾಯಕ.

‘‘ಚಕ್ಕಙ್ಕುಸಧಜಾಕಿಣ್ಣೇ, ಪಾದೇ ಕಮಲಕೋಮಲೇ;

ಪಸಾರೇಹಿ ಪಣಾಮಂ ತೇ, ಕರಿಸ್ಸಂ ಪುತ್ತಉತ್ತಮೇ.

‘‘ಸುವಣ್ಣರಾಸಿಸಙ್ಕಾಸಂ, ಸರೀರಂ ಕುರು ಪಾಕಟಂ;

ಕತ್ವಾ ದೇಹಂ ಸುದಿಟ್ಠಂ ತೇ, ಸನ್ತಿಂ ಗಚ್ಛಾಮಿ ನಾಯಕ.

‘‘ದ್ವತ್ತಿಂಸಲಕ್ಖಣೂಪೇತಂ, ಸುಪ್ಪಭಾಲಙ್ಕತಂ ತನುಂ;

ಸಞ್ಝಾಘನಾವ ಬಾಲಕ್ಕಂ, ಮಾತುಚ್ಛಂ ದಸ್ಸಯೀ ಜಿನೋ.

‘‘ಫುಲ್ಲಾರವಿನ್ದಸಂಕಾಸೇ, ತರುಣಾದಿಚ್ಚಸಪ್ಪಭೇ;

ಚಕ್ಕಙ್ಕಿತೇ ಪಾದತಲೇ, ತತೋ ಸಾ ಸಿರಸಾ ಪತಿ.

‘‘ಪಣಮಾಮಿ ನರಾದಿಚ್ಚ, ಆದಿಚ್ಚಕುಲಕೇತುಕಂ;

ಪಚ್ಛಿಮೇ ಮರಣೇ ಮಯ್ಹಂ, ನ ತಂ ಇಕ್ಖಾಮಹಂ ಪುನೋ.

‘‘ಇತ್ಥಿಯೋ ನಾಮ ಲೋಕಗ್ಗ, ಸಬ್ಬದೋಸಾಕರಾ ಮತಾ;

ಯದಿ ಕೋ ಚತ್ಥಿ ದೋಸೋ ಮೇ, ಖಮಸ್ಸು ಕರುಣಾಕರ.

‘‘ಇತ್ಥಿಕಾನಞ್ಚ ಪಬ್ಬಜ್ಜಂ, ಹಂ ತಂ ಯಾಚಿಂ ಪುನಪ್ಪುನಂ;

ತತ್ಥ ಚೇ ಅತ್ಥಿ ದೋಸೋ ಮೇ, ತಂ ಖಮಸ್ಸು ನರಾಸಭ.

‘‘ಮಯಾ ಭಿಕ್ಖುನಿಯೋ ವೀರ, ತವಾನುಞ್ಞಾಯ ಸಾಸಿತಾ;

ತತ್ರ ಚೇ ಅತ್ಥಿ ದುನ್ನೀತಂ, ತಂ ಖಮಸ್ಸು ಖಮಾಧಿಪ.

‘‘ಅಕ್ಖನ್ತೇ ನಾಮ ಖನ್ತಬ್ಬಂ, ಕಿಂ ಭವೇ ಗುಣಭೂಸನೇ;

ಕಿಮುತ್ತರಂ ತೇ ವತ್ಥಾಮಿ, ನಿಬ್ಬಾನಾಯ ವಜನ್ತಿಯಾ.

‘‘ಸುದ್ಧೇ ಅನೂನೇ ಮಮ ಭಿಕ್ಖುಸಙ್ಘೇ, ಲೋಕಾ ಇತೋ ನಿಸ್ಸರಿತುಂ ಖಮನ್ತೇ;

ಪಭಾತಕಾಲೇ ಬ್ಯಸನಙ್ಗತಾನಂ, ದಿಸ್ವಾನ ನಿಯ್ಯಾತಿವ ಚನ್ದಲೇಖಾ.

‘‘ತದೇತರಾ ಭಿಕ್ಖುನಿಯೋ ಜಿನಗ್ಗಂ, ತಾರಾವ ಚನ್ದಾನುಗತಾ ಸುಮೇರುಂ;

ಪದಕ್ಖಿಣಂ ಕಚ್ಚ ನಿಪಚ್ಚ ಪಾದೇ, ಠಿತಾ ಮುಖನ್ತಂ ಸಮುದಿಕ್ಖಮಾನಾ.

‘‘ನ ತಿತ್ತಿಪುಬ್ಬಂ ತವ ದಸ್ಸನೇನ, ಚಕ್ಖುಂ ನ ಸೋತಂ ತವ ಭಾಸಿತೇನ;

ಚಿತ್ತಂ ಮಮಂ ಕೇವಲಮೇಕಮೇವ, ಪಪ್ಪುಯ್ಯ ತಂ ಧಮ್ಮರಸೇನ ತಿತ್ತಿ.

‘‘ನದತೋ ಪರಿಸಾಯಂ ತೇ, ವಾದಿತಬ್ಬಪಹಾರಿನೋ;

ಯೇ ತೇ ದಕ್ಖನ್ತಿ ವದನಂ, ಧಞ್ಞಾ ತೇ ನರಪುಙ್ಗವ.

‘‘ದೀಘಙ್ಗುಲೀ ತಮ್ಬನಖೇ, ಸುಭೇ ಆಯತಪಣ್ಹಿಕೇ;

ಯೇ ಪಾದೇ ಪಣಮಿಸ್ಸನ್ತಿ, ತೇಪಿ ಧಞ್ಞಾ ಗುಣನ್ಧರ.

‘‘ಮಧುರಾನಿ ಪಹಟ್ಠಾನಿ, ದೋಸಗ್ಘಾನಿ ಹಿತಾನಿ ಚ;

ಯೇ ತೇ ವಾಕ್ಯಾನಿ ಸುಯ್ಯನ್ತಿ, ತೇಪಿ ಧಞ್ಞಾ ನರುತ್ತಮ.

‘‘ಧಞ್ಞಾಹಂ ತೇ ಮಹಾವೀರ, ಪಾದಪೂಜನತಪ್ಪರಾ;

ತಿಣ್ಣಸಂಸಾರಕನ್ತಾರಾ, ಸುವಾಕ್ಯೇನ ಸಿರೀಮತೋ.

‘‘ತತೋ ಸಾ ಅನುಸಾವೇತ್ವಾ, ಭಿಕ್ಖುಸಙ್ಘಮ್ಪಿ ಸುಬ್ಬತಾ;

ರಾಹುಲಾನನ್ದನನ್ದೇ ಚ, ವನ್ದಿತ್ವಾ ಇದಮಬ್ರವಿ.

‘‘ಆಸೀವಿಸಾಲಯಸಮೇ, ರೋಗಾವಾಸೇ ಕಳೇವರೇ;

ನಿಬ್ಬಿನ್ದಾ ದುಕ್ಖಸಙ್ಘಾಟೇ, ಜರಾಮರಣಗೋಚರೇ.

‘‘ನಾನಾಕಲಿಮಲಾಕಿಣ್ಣೇ, ಪರಾಯತ್ತೇ ನಿರೀಹಕೇ;

ತೇನ ನಿಬ್ಬಾತುಮಿಚ್ಛಾಮಿ, ಅನುಮಞ್ಞಥ ಪುತ್ತಕಾ.

‘‘ನನ್ದೋ ರಾಹುಲಭದ್ದೋ ಚ, ವೀತಸೋಕಾ ನಿರಾಸವಾ;

ಠಿತಾಚಲಟ್ಠಿತಿ ಥಿರಾ, ಧಮ್ಮತಮನುಚಿನ್ತಯುಂ.

‘‘ಧಿರತ್ಥು ಸಙ್ಖತಂ ಲೋಲಂ, ಅಸಾರಂ ಕದಲೂಪಮಂ;

ಮಾಯಾಮರೀಚಿಸದಿಸಂ, ಇತ್ತರಂ ಅನವಟ್ಠಿತಂ.

‘‘ಯತ್ಥ ನಾಮ ಜಿನಸ್ಸಾಯಂ, ಮಾತುಚ್ಛಾ ಬುದ್ಧಪೋಸಿಕಾ;

ಗೋತಮೀ ನಿಧನಂ ಯಾತಿ, ಅನಿಚ್ಚಂ ಸಬ್ಬಸಙ್ಖತಂ.

‘‘ಆನನ್ದೋ ಚ ತದಾ ಸೇಖೋ, ಸೋಕಟ್ಟೋ ಜಿನವಚ್ಛಲೋ;