೭. ಗುತ್ತಾಥೇರೀಗಾಥಾವಣ್ಣನಾ

ಗುತ್ತೇ ಯದತ್ಥಂ ಪಬ್ಬಜ್ಜಾತಿಆದಿಕಾ ಗುತ್ತಾಯ ಥೇರಿಯಾ ಗಾಥಾ. ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರಾ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಂ ಕುಸಲಂ ಉಪಚಿನನ್ತೀ ಅನುಕ್ಕಮೇನ ಸಮ್ಭತವಿಮೋಕ್ಖಸಮ್ಭಾರಾ ಹುತ್ವಾ, ಪರಿಪಕ್ಕಕುಸಲಮೂಲಾ ಸುಗತೀಸುಯೇವ ಸಂಸರನ್ತೀ ಇಮಸ್ಮಿಂ ಬುದ್ಧುಪ್ಪಾದೇ ಸಾವತ್ಥಿಯಂ ಬ್ರಾಹ್ಮಣಕುಲೇ ನಿಬ್ಬತ್ತಾ, ಗುತ್ತಾತಿಸ್ಸಾ ನಾಮಂ ಅಹೋಸಿ. ಸಾ ವಿಞ್ಞುತಂ ಪತ್ವಾ ಉಪನಿಸ್ಸಯಸಮ್ಪತ್ತಿಯಾ ಚೋದಿಯಮಾನಾ ಘರಾವಾಸಂ ಜಿಗುಚ್ಛನ್ತೀ ಮಾತಾಪಿತರೋ ಅನುಜಾನಾಪೇತ್ವಾ ಮಹಾಪಜಾಪತಿಗೋತಮಿಯಾ ಸನ್ತಿಕೇ ಪಬ್ಬಜಿ. ಪಬ್ಬಜಿತ್ವಾ ಚ ವಿಪಸ್ಸನಂ ಪಟ್ಠಪೇತ್ವಾ ಭಾವನಂ ಅನುಯುಞ್ಜನ್ತಿಯಾ ತಸ್ಸಾ ಚಿತ್ತಂ ಚಿರಕಾಲಪರಿಚಯೇನ ಬಹಿದ್ಧಾರಮ್ಮಣೇ ವಿಧಾವತಿ, ಏಕಗ್ಗಂ ನಾಹೋಸಿ. ಸತ್ಥಾ ದಿಸ್ವಾ ತಂ ಅನುಗ್ಗಣ್ಹನ್ತೋ, ಗನ್ಧಕುಟಿಯಂ ಯಥಾನಿಸಿನ್ನೋವ ಓಭಾಸಂ ಫರಿತ್ವಾ ತಸ್ಸಾ ಆಸನ್ನೇ ಆಕಾಸೇ ನಿಸಿನ್ನಂ ವಿಯ ಅತ್ತಾನಂ ದಸ್ಸೇತ್ವಾ ಓವದನ್ತೋ –

೧೬೩. ‘‘ಗುತ್ತೇ ಯದತ್ಥಂ ಪಬ್ಬಜ್ಜಾ, ಹಿತ್ವಾ ಪುತ್ತಂ ವಸುಂ ಪಿಯಂ;

ತಮೇವ ಅನುಬ್ರೂಹೇಹಿ, ಮಾ ಚಿತ್ತಸ್ಸ ವಸಂ ಗಮಿ.

೧೬೪. ‘‘ಚಿತ್ತೇನ ವಞ್ಚಿತಾ ಸತ್ತಾ, ಮಾರಸ್ಸ ವಿಸಯೇ ರತಾ;

ಅನೇಕಜಾತಿಸಂಸಾರಂ, ಸನ್ಧಾವನ್ತಿ ಅವಿದ್ದಸೂ.

೧೬೫. ‘‘ಕಾಮಾಚ್ಛನ್ದಞ್ಚ ಬ್ಯಾಪಾದಂ, ಸಕ್ಕಾಯದಿಟ್ಠಿಮೇವ ಚ;

ಸೀಲಬ್ಬತಪರಾಮಾಸಂ, ವಿಚಿಕಿಚ್ಛಂ ಚ ಪಞ್ಚಮಂ.

೧೬೬. ‘‘ಸಂಯೋಜನಾನಿ ಏತಾನಿ, ಪಜಹಿತ್ವಾನ ಭಿಕ್ಖುನೀ;

ಓರಮ್ಭಾಗಮನೀಯಾನಿ, ನಯಿದಂ ಪುನರೇಹಿಸಿ.

೧೬೭. ‘‘ರಾಗಂ ಮಾನಂ ಅವಿಜ್ಜಞ್ಚ, ಉದ್ಧಚ್ಚಞ್ಚ ವಿವಜ್ಜಿಯ;

ಸಂಯೋಜನಾನಿ ಛೇತ್ವಾನ, ದುಕ್ಖಸ್ಸನ್ತಂ ಕರಿಸ್ಸಸಿ.

೧೬೮. ‘‘ಖೇಪೇತ್ವಾ ಜಾತಿಸಂಸಾರಂ, ಪರಿಞ್ಞಾಯ ಪುನಬ್ಭವಂ;

ದಿಟ್ಠೇವ ಧಮ್ಮೇ ನಿಚ್ಛಾತಾ, ಉಪಸನ್ತಾ ಚರಿಸ್ಸಸೀ’’ತಿ. – ಇಮಾ ಗಾಥಾ ಆಭಾಸಿ;

ತತ್ಥ ತಮೇವ ಅನುಬ್ರೂಹೇಹೀತಿ ಯದತ್ಥಂ ಯಸ್ಸ ಕಿಲೇಸಪರಿನಿಬ್ಬಾನಸ್ಸ ಖನ್ಧಪರಿನಿಬ್ಬಾನಸ್ಸ ಚ ಅತ್ಥಾಯ. ಹಿತ್ವಾ ಪುತ್ತಂ ವಸುಂ ಪಿಯನ್ತಿ ಪಿಯಾಯಿತಬ್ಬಂ ಞಾತಿಪರಿವಟ್ಟಂ ಭೋಗಕ್ಖನ್ಧಞ್ಚ ಹಿತ್ವಾ ಮಮ ಸಾಸನೇ ಪಬ್ಬಜ್ಜಾ ಬ್ರಹ್ಮಚರಿಯವಾಸೋ ಇಚ್ಛಿತೋ, ತಮೇವ ವಡ್ಢೇಯ್ಯಾಸಿ ಸಮ್ಪಾದೇಯ್ಯಾಸಿ. ಮಾ ಚಿತ್ತಸ್ಸ ವಸಂ ಗಮೀತಿ ದೀಘರತ್ತಂ ರೂಪಾದಿಆರಮ್ಮಣವಸೇನ ವಡ್ಢಿತಸ್ಸ ಕೂಟಚಿತ್ತಸ್ಸ ವಸಂ ಮಾ ಗಚ್ಛಿ.

ಯಸ್ಮಾ ಚಿತ್ತಂ ನಾಮೇತಂ ಮಾಯೂಪಮಂ, ಯೇನ ವಞ್ಚಿತಾ ಅನ್ಧಪುಥುಜ್ಜನಾ ಮಾರವಸಾನುಗಾ ಸಂಸಾರಂ ನಾತಿವತ್ತನ್ತಿ. ತೇನ ವುತ್ತಂ ‘‘ಚಿತ್ತೇನ ವಞ್ಚಿತಾ’’ತಿಆದಿ.

ಸಂಯೋಜನಾನಿ ಏತಾನೀತಿ ಏತಾನಿ ‘‘ಕಾಮಚ್ಛನ್ದಞ್ಚ ಬ್ಯಾಪಾದ’’ನ್ತಿಆದಿನಾ ಯಥಾವುತ್ತಾನಿ ಪಞ್ಚ ಬನ್ಧನಟ್ಠೇನ ಸಂಯೋಜನಾನಿ. ಪಜಹಿತ್ವಾನಾತಿ ಅನಾಗಾಮಿಮಗ್ಗೇನ ಸಮುಚ್ಛಿನ್ದಿತ್ವಾ. ಭಿಕ್ಖುನೀತಿ ತಸ್ಸಾ ಆಲಪನಂ. ಓರಮ್ಭಾಗಮನೀಯಾನೀತಿ ರೂಪಾರೂಪಧಾತುತೋ ಹೇಟ್ಠಾಭಾಗೇ ಕಾಮಧಾತುಯಂ ಮನುಸ್ಸಜೀವಸ್ಸ ಹಿತಾನಿ ಉಪಕಾರಾನಿ ತತ್ಥ ಪಟಿಸನ್ಧಿಯಾ ಪಚ್ಚಯಭಾವತೋ. ಮ-ಕಾರೋ ಪದಸನ್ಧಿಕರೋ. ‘‘ಓರಮಾಗಮನೀಯಾನೀ’’ತಿ ಪಾಳಿ, ಸೋ ಏವತ್ಥೋ. ನಯಿದಂ ಪುನರೇಹಿಸೀತಿ ಓರಮ್ಭಾಗಿಯಾನಂ ಸಂಯೋಜನಾನಂ ಪಹಾನೇನ ಇದಂ ಕಾಮಟ್ಠಾನಂ ಕಾಮಭವಂ ಪಟಿಸನ್ಧಿವಸೇನ ಪುನ ನಾಗಮಿಸ್ಸಸಿ. ರ-ಕಾರೋ ಪದಸನ್ಧಿಕರೋ. ‘‘ಇತ್ಥ’’ನ್ತಿ ವಾ ಪಾಳಿ, ಇತ್ಥತ್ತಂ ಕಾಮಭವಮಿಚ್ಚೇವ ಅತ್ಥೋ.

ರಾಗನ್ತಿ ರೂಪರಾಗಞ್ಚ ಅರೂಪರಾಗಞ್ಚ. ಮಾನನ್ತಿ ಅಗ್ಗಮಗ್ಗವಜ್ಝಂ ಮಾನಂ. ಅವಿಜ್ಜಞ್ಚ ಉದ್ಧಚ್ಚಞ್ಚಾತಿ ಏತ್ಥಾಪಿ ಏಸೇವ ನಯೋ. ವಿವಜ್ಜಿಯಾತಿ ವಿಪಸ್ಸನಾಯ ವಿಕ್ಖಮ್ಭೇತ್ವಾ. ಸಂಯೋಜನಾನಿ ಛೇತ್ವಾನಾತಿ ಏತಾನಿ ರೂಪರಾಗಾದೀನಿ ಪಞ್ಚುದ್ಧಮ್ಭಾಗಿಯಾನಿ ಸಂಯೋಜನಾನಿ ಅರಹತ್ತಮಗ್ಗೇನ ಸಮುಚ್ಛಿನ್ದಿತ್ವಾ. ದುಕ್ಖಸ್ಸನ್ತಂ ಕರಿಸ್ಸಸೀತಿ ಸಬ್ಬಸ್ಸಾಪಿ ವಟ್ಟದುಕ್ಖಸ್ಸ ಪರಿಯನ್ತಂ ಪರಿಯೋಸಾನಂ ಪಾಪುಣಿಸ್ಸಸಿ.

ಖೇಪೇತ್ವಾ ಜಾತಿಸಂಸಾರನ್ತಿ ಜಾತಿ ಸಮೂಲಿಕಸಂಸಾರಪವತ್ತಿಂ ಪರಿಯೋಸಾಪೇತ್ವಾ. ನಿಚ್ಛಾತಾತಿ ನಿತ್ತಣ್ಹಾ. ಉಪಸನ್ತಾತಿ ಸಬ್ಬಸೋ ಕಿಲೇಸಾನಂ ವೂಪಸಮೇನ ಉಪಸನ್ತಾ. ಸೇಸಂ ವುತ್ತನಯಮೇವ.

ಏವಂ ಸತ್ಥಾರಾ ಇಮಾಸು ಗಾಥಾಸು ಭಾಸಿತಾಸು ಗಾಥಾಪರಿಯೋಸಾನೇ ಥೇರೀ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪತ್ವಾ ಉದಾನವಸೇನ ಭಗವತಾ ಭಾಸಿತನಿಯಾಮೇನೇವ ಇಮಾ ಗಾಥಾ ಅಭಾಸಿ. ತೇನೇವ ತಾ ಥೇರಿಯಾ ಗಾಥಾ ನಾಮ ಜಾತಾ.

ಗುತ್ತಾಥೇರೀಗಾಥಾವಣ್ಣನಾ ನಿಟ್ಠಿತಾ.