೫. ನನ್ದುತ್ತರಾಥೇರೀಗಾಥಾವಣ್ಣನಾ

ಅಗ್ಗಿಂ ಚನ್ದಞ್ಚಾತಿಆದಿಕಾ ನನ್ದುತ್ತರಾಯ ಥೇರಿಯಾ ಗಾಥಾ. ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರಾ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಂ ಕುಸಲಂ ಉಪಚಿನಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಕುರುರಟ್ಠೇ ಕಮ್ಮಾಸಧಮ್ಮನಿಗಮೇ ಬ್ರಾಹ್ಮಣಕುಲೇ ನಿಬ್ಬತ್ತಿತ್ವಾ, ಏಕಚ್ಚಾನಿ ವಿಜ್ಜಾಟ್ಠಾನಾನಿ ಸಿಪ್ಪಾಯತನಾನಿ ಚ ಉಗ್ಗಹೇತ್ವಾ ನಿಗಣ್ಠಪಬ್ಬಜ್ಜಂ ಉಪಗನ್ತ್ವಾ, ವಾದಪ್ಪಸುತಾ ಜಮ್ಬುಸಾಖಂ ಗಹೇತ್ವಾ ಭದ್ದಾಕುಣ್ಡಲಕೇಸಾ ವಿಯ ಜಮ್ಬುದೀಪತಲೇ ವಿಚರನ್ತೀ ಮಹಾಮೋಗ್ಗಲ್ಲಾನತ್ಥೇರಂ ಉಪಸಙ್ಕಮಿತ್ವಾ ಪಞ್ಹಂ ಪುಚ್ಛಿತ್ವಾ ಪರಾಜಯಂ ಪತ್ತಾ ಥೇರಸ್ಸ ಓವಾದೇ ಠತ್ವಾ ಸಾಸನೇ ಪಬ್ಬಜಿತ್ವಾ ಸಮಣಧಮ್ಮಂ ಕರೋನ್ತೀ ನ ಚಿರಸ್ಸೇವ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪತ್ವಾ ಅತ್ತನೋ ಪಟಿಪತ್ತಿಂ ಪಚ್ಚವೇಕ್ಖಿತ್ವಾ ಉದಾನವಸೇನ –

೮೭. ‘‘ಅಗ್ಗಿಂ ಚನ್ದಞ್ಚ ಸೂರಿಯಞ್ಚ, ದೇವತಾ ಚ ನಮಸ್ಸಿಹಂ;

ನದೀತಿತ್ಥಾನಿ ಗನ್ತ್ವಾನ, ಉದಕಂ ಓರುಹಾಮಿಹಂ.

೮೮. ‘‘ಬಹೂವತಸಮಾದಾನಾ, ಅಡ್ಢಂ ಸೀಸಸ್ಸ ಓಲಿಖಿಂ;

ಛಮಾಯ ಸೇಯ್ಯಂ ಕಪ್ಪೇಮಿ, ರತ್ತಿಂ ಭತ್ತಂ ನ ಭುಞ್ಜಹಂ.

೮೯. ‘‘ವಿಭೂಸಾಮಣ್ಡನರತಾ, ನ್ಹಾಪನುಚ್ಛಾದನೇಹಿ ಚ;

ಉಪಕಾಸಿಂ ಇಮಂ ಕಾಯಂ, ಕಾಮರಾಗೇನ ಅಟ್ಟಿತಾ.

೯೦. ‘‘ತತೋ ಸದ್ಧಂ ಲಭಿತ್ವಾನ, ಪಬ್ಬಜಿಂ ಅನಗಾರಿಯಂ;

ದಿಸ್ವಾ ಕಾಯಂ ಯಥಾಭೂತಂ, ಕಾಮರಾಗೋ ಸಮೂಹತೋ.

೯೧. ‘‘ಸಬ್ಬೇ ಭವಾ ಸಮುಚ್ಛಿನ್ನಾ, ಇಚ್ಛಾ ಚ ಪತ್ಥನಾಪಿ ಚ;

ಸಬ್ಬಯೋಗವಿಸಂಯುತ್ತಾ, ಸನ್ತಿಂ ಪಾಪುಣಿ ಚೇತಸೋ’’ತಿ. –

ಇಮಾ ಪಞ್ಚ ಗಾಥಾ ಅಭಾಸಿ.

ತತ್ಥ ಅಗ್ಗಿಂ ಚನ್ದಞ್ಚ ಸೂರಿಯಞ್ಚ, ದೇವತಾ ಚ ನಮಸ್ಸಿಹನ್ತಿ ಅಗ್ಗಿಪ್ಪಮುಖಾ ದೇವಾತಿ ಇನ್ದಾನಂ ದೇವಾನಂ ಆರಾಧನತ್ಥಂ ಆಹುತಿಂ ಪಗ್ಗಹೇತ್ವಾ ಅಗ್ಗಿಞ್ಚ, ಮಾಸೇ ಮಾಸೇ ಸುಕ್ಕಪಕ್ಖಸ್ಸ ದುತಿಯಾಯ ಚನ್ದಞ್ಚ, ದಿವಸೇ ದಿವಸೇ ಸಾಯಂ ಪಾತಂ ಸೂರಿಯಞ್ಚ, ಅಞ್ಞಾ ಚ ಬಾಹಿರಾ ಹಿರಞ್ಞಗಬ್ಭಾದಯೋ ದೇವತಾ ಚ, ವಿಸುದ್ಧಿಮಗ್ಗಂ ಗವೇಸನ್ತೀ ನಮಸ್ಸಿಹಂ ನಮಕ್ಕಾರಂ ಅಹಂ ಅಕಾಸಿಂ. ನದೀತಿತ್ಥಾನಿ ಗನ್ತ್ವಾನ, ಉದಕಂ ಓರುಹಾಮಿಹನ್ತಿ ಗಙ್ಗಾದೀನಂ ನದೀನಂ ಪೂಜಾತಿತ್ಥಾನಿ ಉಪಗನ್ತ್ವಾ ಸಾಯಂ ಪಾತಂ ಉದಕಂ ಓತರಾಮಿ ಉದಕೇ ನಿಮುಜ್ಜಿತ್ವಾ ಅಙ್ಗಸಿಞ್ಚನಂ ಕರೋಮಿ.

ಬಹೂವತಸಮಾದಾನಾತಿ ಪಞ್ಚಾತಪತಪ್ಪನಾದಿ ಬಹುವಿಧವತಸಮಾದಾನಾ. ಗಾಥಾಸುಖತ್ಥಂ ಬಹೂತಿ ದೀಘಕರಣಂ. ಅಡ್ಢಂ ಸೀಸಸ್ಸ ಓಲಿಖಿನ್ತಿ ಮಯ್ಹಂ ಸೀಸಸ್ಸ ಅಡ್ಢಮೇವ ಮುಣ್ಡೇಮಿ. ಕೇಚಿ ‘‘ಅಡ್ಢಂ ಸೀಸಸ್ಸ ಓಲಿಖಿನ್ತಿ ಕೇಸಕಲಾಪಸ್ಸ ಅಡ್ಢಂ ಜಟಾಬನ್ಧನವಸೇನ ಬನ್ಧಿತ್ವಾ ಅಡ್ಢಂ ವಿಸ್ಸಜ್ಜೇಸಿ’’ನ್ತಿ ಅತ್ಥಂ ವದನ್ತಿ. ಛಮಾಯ ಸೇಯ್ಯಂ ಕಪ್ಪೇಮೀತಿ ಥಣ್ಡಿಲಸಾಯಿನೀ ಹುತ್ವಾ ಅನನ್ತರಹಿತಾಯ ಭೂಮಿಯಾ ಸಯಾಮಿ. ರತ್ತಿಂ ಭತ್ತಂ ನ ಭುಞ್ಜಹನ್ತಿ ರತ್ತೂಪರತಾ ಹುತ್ವಾ ರತ್ತಿಯಂ ಭೋಜನಂ ನ ಭುಞ್ಜಿಂ.

ವಿಭೂಸಾಮಣ್ಡನರತಾತಿ ಚಿರಕಾಲಂ ಅತ್ತಕಿಲಮಥಾನುಯೋಗೇನ ಕಿಲನ್ತಕಾಯಾ ‘‘ಏವಂ ಸರೀರಸ್ಸ ಕಿಲಮನೇನ ನತ್ಥಿ ಪಞ್ಞಾಸುದ್ಧಿ. ಸಚೇ ಪನ ಇನ್ದ್ರಿಯಾನಂ ತೋಸನವಸೇನ ಸರೀರಸ್ಸ ತಪ್ಪನೇನ ಸುದ್ಧಿ ಸಿಯಾ’’ತಿ ಮನ್ತ್ವಾ ಇಮಂ ಕಾಯಂ ಅನುಗ್ಗಣ್ಹನ್ತೀ ವಿಭೂಸಾಯಂ ಮಣ್ಡನೇ ಚ ರತಾ ವತ್ಥಾಲಙ್ಕಾರೇಹಿ ಅಲಙ್ಕರಣೇ ಗನ್ಧಮಾಲಾದೀಹಿ ಮಣ್ಡನೇ ಚ ಅಭಿರತಾ. ನ್ಹಾಪನುಚ್ಛಾದನೇಹಿ ಚಾತಿ ಸಮ್ಬಾಹನಾದೀನಿ ಕಾರೇತ್ವಾ ನ್ಹಾಪನೇನ ಉಚ್ಛಾದನೇನ ಚ. ಉಪಕಾಸಿಂ ಇಮಂ ಕಾಯನ್ತಿ ಇಮಂ ಮಮ ಕಾಯಂ ಅನುಗ್ಗಣ್ಹಿಂ ಸನ್ತಪ್ಪೇಸಿಂ. ಕಾಮರಾಗೇನ ಅಟ್ಟಿತಾತಿ ಏವಂ ಕಾಯದಳ್ಹೀಬಹುಲಾ ಹುತ್ವಾ ಅಯೋನಿಸೋಮನಸಿಕಾರಪಚ್ಚಯಾ ಪರಿಯುಟ್ಠಿತೇನ ಕಾಮರಾಗೇನ ಅಟ್ಟಿತಾ ಅಭಿಣ್ಹಂ ಉಪದ್ದುತಾ ಅಹೋಸಿಂ.

ತತೋ ಸದ್ಧಂ ಲಭಿತ್ವಾನಾತಿ ಏವಂ ಸಮಾದಿನ್ನವತಾನಿ ಭಿನ್ದಿತ್ವಾ ಕಾಯದಳ್ಹೀಬಹುಲಾ ವಾದಪ್ಪಸುತಾ ಹುತ್ವಾ ತತ್ಥ ತತ್ಥ ವಿಚರನ್ತೀ ತತೋ ಪಚ್ಛಾ ಅಪರಭಾಗೇ ಮಹಾಮೋಗ್ಗಲ್ಲಾನತ್ಥೇರಸ್ಸ ಸನ್ತಿಕೇ ಲದ್ಧೋವಾದಾನುಸಾಸನಾ ಸದ್ಧಂ ಪಟಿಲಭಿತ್ವಾ. ದಿಸ್ವಾ ಕಾಯಂ ಯಥಾಭೂತನ್ತಿ ಸಹ ವಿಪಸ್ಸನಾಯ ಮಗ್ಗಪಞ್ಞಾಯ ಇಮಂ ಮಮ ಕಾಯಂ ಯಥಾಭೂತಂ ದಿಸ್ವಾ ಅನಾಗಾಮಿಮಗ್ಗೇನ ಸಬ್ಬಸೋ ಕಾಮರಾಗೋ ಸಮೂಹತೋ. ತತೋ ಪರಂ ಅಗ್ಗಮಗ್ಗೇನ ಸಬ್ಬೇ ಭವಾ ಸಮುಚ್ಛಿನ್ನಾ, ಇಚ್ಛಾ ಚ ಪತ್ಥನಾಪಿ ಚಾತಿ ಪಚ್ಚುಪ್ಪನ್ನವಿಸಯಾಭಿಲಾಸಸಙ್ಖಾತಾ ಇಚ್ಛಾ ಚ ಆಯತಿಭವಾಭಿಲಾಸಸಙ್ಖಾತಾ ಪತ್ಥನಾಪಿ ಸಬ್ಬೇ ಭವಾಪಿ ಸಮುಚ್ಛಿನ್ನಾತಿ ಯೋಜನಾ. ಸನ್ತಿಂ ಪಾಪುಣಿ ಚೇತಸೋತಿ ಅಚ್ಚನ್ತಂ ಸನ್ತಿಂ ಅರಹತ್ತಫಲಂ ಪಾಪುಣಿಂ ಅಧಿಗಚ್ಛಿನ್ತಿ ಅತ್ಥೋ.

ನನ್ದುತ್ತರಾಥೇರೀಗಾಥಾವಣ್ಣನಾ ನಿಟ್ಠಿತಾ.