೧೨. ಚನ್ದಾಥೇರೀಗಾಥಾವಣ್ಣನಾ

ದುಗ್ಗತಾಹಂ ಪುರೇ ಆಸಿನ್ತಿಆದಿಕಾ ಚನ್ದಾಯ ಥೇರಿಯಾ ಗಾಥಾ. ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರಾ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಂ ಕುಸಲಂ ಉಪಚಿನನ್ತೀ ಅನುಕ್ಕಮೇನ ಸಮ್ಭತವಿಮೋಕ್ಖಸಮ್ಭಾರಾ ಪರಿಪಕ್ಕಞಾಣಾ ಇಮಸ್ಮಿಂ ಬುದ್ಧುಪ್ಪಾದೇ ಅಞ್ಞತರಸ್ಮಿಂ ಬ್ರಾಹ್ಮಣಗಾಮೇ ಅಪಞ್ಞಾತಸ್ಸ ಬ್ರಾಹ್ಮಣಸ್ಸ ಗೇಹೇ ಪಟಿಸನ್ಧಿಂ ಗಣ್ಹಿ. ತಸ್ಸಾ ನಿಬ್ಬತ್ತಿತೋ ಪಟ್ಠಾಯಂ ತಂ ಕುಲಂ ಭೋಗೇಹಿ ಪರಿಕ್ಖಯಂ ಗತಂ. ಸಾ ಅನುಕ್ಕಮೇನ ವಿಞ್ಞುತಂ ಪತ್ವಾ ದುಕ್ಖೇನ ಜೀವತಿ. ಅಥ ತಸ್ಮಿಂ ಗೇಹೇ ಅಹಿವಾತರೋಗೋ ಉಪ್ಪಜ್ಜಿ. ತೇನಸ್ಸಾ ಸಬ್ಬೇಪಿ ಞಾತಕಾ ಮರಣಬ್ಯಸನಂ ಪಾಪುಣಿಂಸು. ಸಾ ಞಾತಿಕ್ಖಯೇ ಜಾತೇ ಅಞ್ಞತ್ಥ ಜೀವಿತುಂ ಅಸಕ್ಕೋನ್ತೀ ಕಪಾಲಹತ್ಥಾ ಕುಲೇ ಕುಲೇ ವಿಚರಿತ್ವಾ ಲದ್ಧಲದ್ಧೇನ ಭಿಕ್ಖಾಹಾರೇನ ಯಾಪೇನ್ತೀ ಏಕದಿವಸಂ ಪಟಾಚಾರಾಯ ಥೇರಿಯಾ ಭತ್ತವಿಸ್ಸಗ್ಗಟ್ಠಾನಂ ಅಗಮಾಸಿ. ಭಿಕ್ಖುನಿಯೋ ತಂ ದುಕ್ಖಿತಂ ಖುದ್ದಾಭಿಭೂತಂ ದಿಸ್ವಾನ ಸಞ್ಜಾತಕಾರುಞ್ಞಾ ಪಿಯಸಮುದಾಚಾರೇನ ಸಙ್ಗಹೇತ್ವಾ ತತ್ಥ ವಿಜ್ಜಮಾನೇನ ಉಪಚಾರಮನೋಹರೇನ ಆಹಾರೇನ ಸನ್ತಪ್ಪೇಸುಂ. ಸಾ ತಾಸಂ ಆಚಾರಸೀಲೇ ಪಸೀದಿತ್ವಾ ಥೇರಿಯಾ ಸನ್ತಿಕಂ ಉಪಸಙ್ಕಮಿತ್ವಾ ವನ್ದಿತ್ವಾ ಏಕಮನ್ತಂ ನಿಸೀದಿ. ತಸ್ಸಾ ಥೇರೀ ಧಮ್ಮಂ ಕಥೇಸಿ. ಸಾ ತಂ ಧಮ್ಮಂ ಸುತ್ವಾ ಸಾಸನೇ ಅಭಿಪ್ಪಸನ್ನಾ ಸಂಸಾರೇ ಚ ಸಞ್ಜಾತಸಂವೇಗಾ ಪಬ್ಬಜಿ. ಪಬ್ಬಜಿತ್ವಾ ಚ ಥೇರಿಯಾ ಓವಾದೇ ಠತ್ವಾ ವಿಪಸ್ಸನಂ ಪಟ್ಠಪೇತ್ವಾ ಭಾವನಂ ಅನುಯುಞ್ಜನ್ತೀ ಕತಾಧಿಕಾರತಾಯ ಞಾಣಸ್ಸ ಚ ಪರಿಪಾಕಂ ಗತತ್ತಾ ನ ಚಿರಸ್ಸೇವ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪತ್ವಾ ಅತ್ತನೋ ಪಟಿಪತ್ತಿಂ ಪಚ್ಚವೇಕ್ಖಿತ್ವಾ –

೧೨೨. ‘‘ದುಗ್ಗತಾಹಂ ಪುರೇ ಆಸಿಂ, ವಿಧವಾ ಚ ಅಪುತ್ತಿಕಾ;

ವಿನಾ ಮಿತ್ತೇಹಿ ಞಾತೀಹಿ, ಭತ್ತಚೋಳಸ್ಸ ನಾಧಿಗಂ.

೧೨೩. ‘‘ಪತ್ತಂ ದಣ್ಡಞ್ಚ ಗಣ್ಹಿತ್ವಾ, ಭಿಕ್ಖಮಾನಾ ಕುಲಾ ಕುಲಂ;

ಸೀತುಣ್ಹೇನ ಚ ಡಯ್ಹನ್ತೀ, ಸತ್ತ ವಸ್ಸಾನಿ ಚಾರಿಹಂ.

೧೨೪. ‘‘ಭಿಕ್ಖುನಿಂ ಪುನ ದಿಸ್ವಾನ, ಅನ್ನಪಾನಸ್ಸ ಲಾಭಿನಿಂ;

ಉಪಸಙ್ಕಮ್ಮಂ ಅವೋಚಂ, ಪಬ್ಬಜ್ಜಂ ಅನಗಾರಿಯಂ.

೧೨೫. ‘‘ಸಾ ಚ ಮಂ ಅನುಕಮ್ಪಾಯ, ಪಬ್ಬಾಜೇಸಿ ಪಟಾಚಾರಾ;

ತತೋ ಮಂ ಓವದಿತ್ವಾನ, ಪರಮತ್ಥೇ ನಿಯೋಜಯಿ.

೧೨೬. ‘‘ತಸ್ಸಾಹಂ ವಚನಂ ಸುತ್ವಾ, ಅಕಾಸಿಂ ಅನುಸಾಸನಿಂ;

ಅಮೋಘೋ ಅಯ್ಯಾಯೋವಾದೋ, ತೇವಿಜ್ಜಾಮ್ಹಿ ಅನಾಸವಾ’’ತಿ. –

ಉದಾನವಸೇನ ಇಮಾ ಗಾಥಾ ಅಭಾಸಿ.

ತತ್ಥ ದುಗ್ಗತಾತಿ ದಲಿದ್ದಾ. ಪುರೇತಿ ಪಬ್ಬಜಿತತೋ ಪುಬ್ಬೇ. ಪಬ್ಬಜಿತಕಾಲತೋ ಪಟ್ಠಾಯ ಹಿ ಇಧ ಪುಗ್ಗಲೋ ಭೋಗೇಹಿ ಅಡ್ಢೋ ವಾ ದಲಿದ್ದೋ ವಾತಿ ನ ವತ್ತಬ್ಬೋ. ಗುಣೇಹಿ ಪನ ಅಯಂ ಥೇರೀ ಅಡ್ಢಾಯೇವ. ತೇನಾಹ ‘‘ದುಗ್ಗತಾಹಂ ಪುರೇ ಆಸಿ’’ನ್ತಿ. ವಿಧವಾತಿ ಧವೋ ವುಚ್ಚತಿ ಸಾಮಿಕೋ, ತದಭಾವಾ ವಿಧವಾ, ಮತಪತಿಕಾತಿ ಅತ್ಥೋ. ಅಪುತ್ತಿಕಾತಿ ಪುತ್ತರಹಿತಾ. ವಿನಾ ಮಿತ್ತೇಹೀತಿ ಮಿತ್ತೇಹಿ ಬನ್ಧವೇಹಿ ಚ ಪರಿಹೀನಾ ರಹಿತಾ. ಭತ್ತಚೋಳಸ್ಸ ನಾಧಿಗನ್ತಿ ಭತ್ತಸ್ಸ ಚೋಳಸ್ಸ ಚ ಪಾರಿಪೂರಿಂ ನಾಧಿಗಚ್ಛಿಂ, ಕೇವಲಂ ಪನ ಭಿಕ್ಖಾಪಿಣ್ಡಸ್ಸ ಪಿಲೋತಿಕಾಖಣ್ಡಸ್ಸ ಚ ವಸೇನ ಘಾಸಚ್ಛಾದನಮತ್ತಮೇವ ಅಲತ್ಥನ್ತಿ ಅಧಿಪ್ಪಾಯೋ. ತೇನಾಹ ‘‘ಪತ್ತಂ ದಣ್ಡಞ್ಚ ಗಣ್ಹಿತ್ವಾ’’ತಿಆದಿ.

ತತ್ಥ ಪತ್ತನ್ತಿ ಮತ್ತಿಕಾಭಾಜನಂ. ದಣ್ಡನ್ತಿ ಗೋಣಸುನಖಾದಿಪರಿಹರಣದಣ್ಡಕಂ. ಕುಲಾ ಕುಲನ್ತಿ ಕುಲತೋ ಕುಲಂ. ಸೀತುಣ್ಹೇನ ಚ ಡಯ್ಹನ್ತೀತಿ ವಸನಗೇಹಾಭಾವತೋ ಸೀತೇನ ಚ ಉಣ್ಹೇನ ಚ ಪೀಳಿಯಮಾನಾ.

ಭಿಕ್ಖುನಿನ್ತಿ ಪಟಾಚಾರಾಥೇರಿಂ ಸನ್ಧಾಯ ವದತಿ. ಪುನಾತಿ ಪಚ್ಛಾ, ಸತ್ತಸಂವಚ್ಛರತೋ ಅಪರಭಾಗೇ.

ಪರಮತ್ಥೇತಿ ಪರಮೇ ಉತ್ತಮೇ ಅತ್ಥೇ, ನಿಬ್ಬಾನಗಾಮಿನಿಯಾ ಪಟಿಪದಾಯ ನಿಬ್ಬಾನೇ ಚ. ನಿಯೋಜಯೀತಿ ಕಮ್ಮಟ್ಠಾನಂ ಆಚಿಕ್ಖನ್ತೀ ನಿಯೋಜೇಸಿ. ಸೇಸಂ ವುತ್ತನಯಮೇವ.

ಚನ್ದಾಥೇರೀಗಾಥಾವಣ್ಣನಾ ನಿಟ್ಠಿತಾ.

ಪಞ್ಚಕನಿಪಾತವಣ್ಣನಾ ನಿಟ್ಠಿತಾ.