೧೨. ಕಣ್ಣಮುಣ್ಡಪೇತಿವತ್ಥುವಣ್ಣನಾ

ಸೋಣ್ಣಸೋಪಾನಫಲಕಾತಿ ಇದಂ ಸತ್ಥರಿ ಸಾವತ್ಥಿಯಂ ವಿಹರನ್ತೇ ಕಣ್ಣಮುಣ್ಡಪೇತಿಂ ಆರಬ್ಭ ವುತ್ತಂ. ಅತೀತೇ ಕಿರ ಕಸ್ಸಪಬುದ್ಧಕಾಲೇ ಕಿಮಿಲನಗರೇ ಅಞ್ಞತರೋ ಉಪಾಸಕೋ ಸೋತಾಪನ್ನೋ ಪಞ್ಚಹಿ ಉಪಾಸಕಸತೇಹಿ ಸದ್ಧಿಂ ಸಮಾನಚ್ಛನ್ದೋ ಹುತ್ವಾ ಆರಾಮರೋಪನಸೇತುಬನ್ಧನಚಙ್ಕಮನಕರಣಾದೀಸು ಪುಞ್ಞಕಮ್ಮೇಸು ಪಸುತೋ ಹುತ್ವಾ ವಿಹರನ್ತೋ ಸಙ್ಘಸ್ಸ ವಿಹಾರಂ ಕಾರೇತ್ವಾ ತೇಹಿ ಸದ್ಧಿಂ ಕಾಲೇನ ಕಾಲಂ ವಿಹಾರಂ ಗಚ್ಛತಿ. ತೇಸಂ ಭರಿಯಾಯೋಪಿ ಉಪಾಸಿಕಾ ಹುತ್ವಾ ಅಞ್ಞಮಞ್ಞಂ ಸಮಗ್ಗಾ ಮಾಲಾಗನ್ಧವಿಲೇಪನಾದಿಹತ್ಥಾ ಕಾಲೇನ ಕಾಲಂ ವಿಹಾರಂ ಗಚ್ಛನ್ತಿಯೋ ಅನ್ತರಾಮಗ್ಗೇ ಆರಾಮಸಭಾದೀಸು ವಿಸ್ಸಮಿತ್ವಾ ಗಚ್ಛನ್ತಿ.

ಅಥೇಕದಿವಸಂ ಕತಿಪಯಾ ಧುತ್ತಾ ಏಕಿಸ್ಸಾ ಸಭಾಯ ಸನ್ನಿಸಿನ್ನಾ ತಾಸು ತತ್ಥ ವಿಸ್ಸಮಿತ್ವಾ ಗತಾಸು ತಾಸಂ ರೂಪಸಮ್ಪತ್ತಿಂ ದಿಸ್ವಾ ಪಟಿಬದ್ಧಚಿತ್ತಾ ಹುತ್ವಾ ತಾಸಂ ಸೀಲಾಚಾರಗುಣಸಮ್ಪನ್ನತಂ ಞತ್ವಾ ಕಥಂ ಸಮುಟ್ಠಾಪೇಸುಂ ‘‘ಕೋ ಏತಾಸು ಏಕಿಸ್ಸಾಪಿ ಸೀಲಭೇದಂ ಕಾತುಂ ಸಮತ್ಥೋ’’ತಿ. ತತ್ಥ ಅಞ್ಞತರೋ ‘‘ಅಹಂ ಸಮತ್ಥೋ’’ತಿ ಆಹ. ತೇ ತೇನ ‘‘ಸಹಸ್ಸೇನ ಅಬ್ಭುತಂ ಕರೋಮಾ’’ತಿ ಅಬ್ಭುತಂ ಅಕಂಸು. ಸೋ ಅನೇಕೇಹಿ ಉಪಾಯೇಹಿ ವಾಯಮಮಾನೋ ತಾಸು ಸಭಂ ಆಗತಾಸು ಸುಮುಞ್ಚಿತಂ ಸತ್ತತನ್ತಿಂ ಮಧುರಸ್ಸರಂ ವೀಣಂ ವಾದೇನ್ತೋ ಮಧುರೇನೇವ ಸರೇನ ಕಾಮಪಟಿಸಂಯುತ್ತಗೀತಾನಿ ಗಾಯನ್ತೋ ಗೀತಸದ್ದೇನ ತಾಸು ಅಞ್ಞತರಂ ಇತ್ಥಿಂ ಸೀಲಭೇದಂ ಪಾಪೇನ್ತೋ ಅತಿಚಾರಿನಿಂ ಕತ್ವಾ ತೇ ಧುತ್ತೇ ಸಹಸ್ಸಂ ಪರಾಜೇಸಿ. ತೇ ಸಹಸ್ಸಪರಾಜಿತಾ ತಸ್ಸಾ ಸಾಮಿಕಸ್ಸ ಆರೋಚೇಸುಂ. ಸಾಮಿಕೋ ತಂ ಪುಚ್ಛಿ – ‘‘ಕಿಂ ತ್ವಂ ಏವರೂಪಾ, ಯಥಾ ತೇ ಪುರಿಸಾ ಅವೋಚು’’ನ್ತಿ. ಸಾ ‘‘ನಾಹಂ ಈದಿಸಂ ಜಾನಾಮೀ’’ತಿ ಪಟಿಕ್ಖಿಪಿತ್ವಾ ತಸ್ಮಿಂ ಅಸದ್ದಹನ್ತೇ ಸಮೀಪೇ ಠಿತಂ ಸುನಖಂ ದಸ್ಸೇತ್ವಾ ಸಪಥಂ ಅಕಾಸಿ ‘‘ಸಚೇ ಮಯಾ ತಾದಿಸಂ ಪಾಪಕಮ್ಮಂ ಕತಂ, ಅಯಂ ಛಿನ್ನಕಣ್ಣೋ ಕಾಳಸುನಖೋ ತತ್ಥ ತತ್ಥ ಭವೇ ಜಾತಂ ಮಂ ಖಾದತೂ’’ತಿ. ಇತರಾಪಿ ಪಞ್ಚಸತಾ ಇತ್ಥಿಯೋ ತಂ ಇತ್ಥಿಂ ಅತಿಚಾರಿನಿಂ ಜಾನನ್ತೀ ಕಿಂ ಅಯಂ ತಥಾರೂಪಂ ಪಾಪಂ ಅಕಾಸಿ, ಉದಾಹು ನಾಕಾಸೀ’’ತಿ ಚೋದಿತಾ ‘‘ನ ಮಯಂ ಏವರೂಪಂ ಜಾನಾಮಾ’’ತಿ ಮುಸಾ ವತ್ವಾ ‘‘ಸಚೇ ಮಯಂ ಜಾನಾಮ, ಭವೇ ಭವೇ ಏತಿಸ್ಸಾಯೇವ ದಾಸಿಯೋ ಭವೇಯ್ಯಾಮಾ’’ತಿ ಸಪಥಂ ಅಕಂಸು.

ಅಥ ಸಾ ಅತಿಚಾರಿನೀ ಇತ್ಥೀ ತೇನೇವ ವಿಪ್ಪಟಿಸಾರೇನ ಡಯ್ಹಮಾನಹದಯಾ ಸುಸ್ಸಿತ್ವಾ ನ ಚಿರೇನೇವ ಕಾಲಂ ಕತ್ವಾ ಹಿಮವತಿ ಪಬ್ಬತರಾಜೇ ಸತ್ತನ್ನಂ ಮಹಾಸರಾನಂ ಅಞ್ಞತರಸ್ಸ ಕಣ್ಣಮುಣ್ಡದಹಸ್ಸ ತೀರೇ ವಿಮಾನಪೇತೀ ಹುತ್ವಾ ನಿಬ್ಬತ್ತಿ. ವಿಮಾನಸಾಮನ್ತಾ ಚಸ್ಸಾ ಕಮ್ಮವಿಪಾಕಾನುಭವನಯೋಗ್ಗಾ ಏಕಾ ಪೋಕ್ಖರಣೀ ನಿಬ್ಬತ್ತಿ. ಸೇಸಾ ಚ ಪಞ್ಚಸತಾ ಇತ್ಥಿಯೋ ಕಾಲಂ ಕತ್ವಾ ಸಪಥಕಮ್ಮವಸೇನ ತಸ್ಸಾಯೇವ ದಾಸಿಯೋ ಹುತ್ವಾ ನಿಬ್ಬತ್ತಿಂಸು. ಸಾ ತತ್ಥ ಪುಬ್ಬೇ ಕತಸ್ಸ ಪುಞ್ಞಕಮ್ಮಸ್ಸ ಫಲೇನ ದಿವಸಭಾಗಂ ದಿಬ್ಬಸಮ್ಪತ್ತಿಂ ಅನುಭವಿತ್ವಾ ಅಡ್ಢರತ್ತೇ ಪಾಪಕಮ್ಮಬಲಸಞ್ಚೋದಿತಾ ಸಯನತೋ ಉಟ್ಠಹಿತ್ವಾ ಪೋಕ್ಖರಣಿತೀರಂ ಗಚ್ಛತಿ. ತತ್ಥ ಗತಂ ಗಜಪೋತಕಪ್ಪಮಾಣೋ ಏಕೋ ಕಾಳಸುನಖೋ ಭೇರವರೂಪೋ ಛಿನ್ನಕಣ್ಣೋ ತಿಖಿಣಾಯತಕಥಿನದಾಠೋ ಸುವಿಪ್ಫುಲಿತಖದಿರಙ್ಗಾರಪುಞ್ಜಸದಿಸನಯನೋ ನಿರನ್ತರಪ್ಪವತ್ತವಿಜ್ಜುಲತಾಸಙ್ಘಾತಸದಿಸಜಿವ್ಹೋ ಕಥಿನತಿಖಿಣನಖೋ ಖರಾಯತದುಬ್ಬಣ್ಣಲೋಮೋ ತತೋ ಆಗನ್ತ್ವಾ ತಂ ಭೂಮಿಯಂ ನಿಪಾತೇತ್ವಾ ಅತಿಸಯಜಿಘಚ್ಛಾಭಿಭೂತೋ ವಿಯ ಪಸಯ್ಹ ಖಾದನ್ತೋ ಅಟ್ಠಿಸಙ್ಖಲಿಕಮತ್ತಂ ಕತ್ವಾ ದನ್ತೇಹಿ ಗಹೇತ್ವಾ ಪೋಕ್ಖರಣಿಯಂ ಖಿಪಿತ್ವಾ ಅನ್ತರಧಾಯತಿ. ಸಾ ಚ ತತ್ಥ ಪಕ್ಖಿತ್ತಸಮನನ್ತರಮೇವ ಪಕತಿರೂಪಧಾರಿನೀ ಹುತ್ವಾ ವಿಮಾನಂ ಅಭಿರುಯ್ಹ ಸಯನೇ ನಿಪಜ್ಜತಿ. ಇತರಾ ಪನ ತಸ್ಸಾ ದಾಸಬ್ಯಮೇವ ದುಕ್ಖಂ ಅನುಭವನ್ತಿ. ಏವಂ ತಾಸಂ ತತ್ಥ ವಸನ್ತೀನಂ ಪಞ್ಞಾಸಾಧಿಕಾನಿ ಪಞ್ಚ ವಸ್ಸಸತಾನಿ ವೀತಿವತ್ತಾನಿ.

ಅಥ ತಾಸಂ ಪುರಿಸೇಹಿ ವಿನಾ ದಿಬ್ಬಸಮ್ಪತ್ತಿಂ ಅನುಭವನ್ತೀನಂ ಉಕ್ಕಣ್ಠಾ ಅಹೇಸುಂ. ತತ್ಥ ಚ ಕಣ್ಣಮುಣ್ಡದಹತೋ ನಿಗ್ಗತಾ ಪಬ್ಬತವಿವರೇನ ಆಗನ್ತ್ವಾ ಗಙ್ಗಂ ನದಿಂ ಅನುಪವಿಟ್ಠಾ ಏಕಾ ನದೀ ಅತ್ಥಿ. ತಾಸಞ್ಚ ವಸನಟ್ಠಾನಸಮೀಪೇ ಏಕೋ ದಿಬ್ಬಫಲೇಹಿ ಅಮ್ಬರುಕ್ಖೇಹಿ ಪನಸಲಬುಜಾದೀಹಿ ಚ ಉಪಸೋಭಿತೋ ಆರಾಮಸದಿಸೋ ಅರಞ್ಞಪ್ಪದೇಸೋ ಅತ್ಥಿ. ತಾ ಏವಂ ಸಮಚಿನ್ತೇಸುಂ – ‘‘ಹನ್ದ, ಮಯಂ ಇಮಾನಿ ಅಮ್ಬಫಲಾನಿ ಇಮಿಸ್ಸಾ ನದಿಯಾ ಪಕ್ಖಿಪಿಸ್ಸಾಮ, ಅಪ್ಪೇವ ನಾಮ ಇಮಂ ಫಲಂ ದಿಸ್ವಾ ಫಲಲೋಭೇನ ಕೋಚಿದೇವ ಪುರಿಸೋ ಇಧಾಗಚ್ಛೇಯ್ಯ, ತೇನ ಸದ್ಧಿಂ ರಮಿಸ್ಸಾಮಾತಿ. ತಾ ತಥಾ ಅಕಂಸು. ತಾಹಿ ಪನ ಪಕ್ಖಿತ್ತಾನಿ ಅಮ್ಬಫಲಾನಿ ಕಾನಿಚಿ ತಾಪಸಾ ಗಣ್ಹಿಂಸು, ಕಾನಿಚಿ ವನಚರಕಾ, ಕಾನಿಚಿ ಕಾಕಾ ವಿಲುಜ್ಜಿಂಸು, ಕಾನಿಚಿ ತೀರೇ ಲಗ್ಗಿಂಸು. ಏಕಂ ಪನ ಗಙ್ಗಾಯ ಸೋತಂ ಪತ್ವಾ ಅನುಕ್ಕಮೇನ ಬಾರಾಣಸಿಂ ಸಮ್ಪಾಪುಣಿ.

ತೇನ ಚ ಸಮಯೇನ ಬಾರಾಣಸಿರಾಜಾ ಲೋಹಜಾಲಪರಿಕ್ಖಿತ್ತೇ ಗಙ್ಗಾಜಲೇ ನ್ಹಾಯತಿ. ಅಥ ತಂ ಫಲಂ ನದಿಸೋತೇನ ವುಯ್ಹಮಾನಂ ಅನುಕ್ಕಮೇನ ಆಗನ್ತ್ವಾ ಲೋಹಜಾಲೇ ಲಗ್ಗಿ. ತಂ ವಣ್ಣಗನ್ಧರಸಸಮ್ಪನ್ನಂ ಮಹನ್ತಂ ದಿಬ್ಬಂ ಅಮ್ಬಫಲಂ ದಿಸ್ವಾ ರಾಜಪುರಿಸಾ ರಞ್ಞೋ ಉಪನೇಸುಂ. ರಾಜಾ ತಸ್ಸ ಏಕದೇಸಂ ಗಹೇತ್ವಾ ವೀಮಂಸನತ್ಥಾಯ ಏಕಸ್ಸ ಬನ್ಧನಾಗಾರೇ ಠಪಿತಸ್ಸ ವಜ್ಝಚೋರಸ್ಸ ಖಾದಿತುಂ ಅದಾಸಿ. ಸೋ ತಂ ಖಾದಿತ್ವಾ ‘‘ದೇವ, ಮಯಾ ಏವರೂಪಂ ನ ಖಾದಿತಪುಬ್ಬಂ, ದಿಬ್ಬಮಿದಂ ಮಞ್ಞೇ ಅಮ್ಬಫಲ’’ನ್ತಿ ಆಹ. ರಾಜಾ ಪುನಪಿ ತಸ್ಸ ಏಕಂ ಖಣ್ಡಂ ಅದಾಸಿ. ಸೋ ತಂ ಖಾದಿತ್ವಾ ವಿಗತವಲಿತಪಲಿತೋ ಅತಿವಿಯ ಮನೋಹರರೂಪೋ ಯೋಬ್ಬನೇ ಠಿತೋ ವಿಯ ಅಹೋಸಿ. ತಂ ದಿಸ್ವಾ ರಾಜಾ ಅಚ್ಛರಿಯಬ್ಭುತಜಾತೋ ತಂ ಅಮ್ಬಫಲಂ ಪರಿಭುಞ್ಜಿತ್ವಾ ಸರೀರೇ ವಿಸೇಸಂ ಲಭಿತ್ವಾ ಮನುಸ್ಸೇ ಪುಚ್ಛಿ – ‘‘ಕತ್ಥ ಏವರೂಪಾನಿ ದಿಬ್ಬಅಮ್ಬಫಲಾನಿ ಸಂವಿಜ್ಜನ್ತೀ’’ತಿ? ಮನುಸ್ಸಾ ಏವಮಾಹಂಸು – ‘‘ಹಿಮವನ್ತೇ ಕಿರ, ದೇವ, ಪಬ್ಬತರಾಜೇ’’ತಿ. ‘‘ಸಕ್ಕಾ ಪನ ತಾನಿ ಆನೇತು’’ನ್ತಿ? ‘‘ವನಚರಕಾ, ದೇವ, ಜಾನನ್ತೀ’’ತಿ.

ರಾಜಾ ವನಚರಕೇ ಪಕ್ಕೋಸಾಪೇತ್ವಾ ತೇಸಂ ತಮತ್ಥಂ ಆಚಿಕ್ಖಿತ್ವಾ ತೇಹಿ ಸಮ್ಮನ್ತೇತ್ವಾ ದಿನ್ನಸ್ಸ ಏಕಸ್ಸ ವನಚರಕಸ್ಸ ಸಹಸ್ಸಂ ದತ್ವಾ ತಂ ವಿಸ್ಸಜ್ಜೇಸಿ – ‘‘ಗಚ್ಛ, ಸೀಘಂ ತಂ ಮೇ ಅಮ್ಬಫಲಂ ಆನೇಹೀ’’ತಿ. ಸೋ ತಂ ಕಹಾಪಣಸಹಸ್ಸಂ ಪುತ್ತದಾರಸ್ಸ ದತ್ವಾ ಪಾಥೇಯ್ಯಂ ಗಹೇತ್ವಾ ಪಟಿಗಙ್ಗಂ ಕಣ್ಣಮುಣ್ಡದಹಾಭಿಮುಖೋ ಗನ್ತ್ವಾ ಮನುಸ್ಸಪಥಂ ಅತಿಕ್ಕಮಿತ್ವಾ ಕಣ್ಣಮುಣ್ಡದಹತೋ ಓರಂ ಸಟ್ಠಿಯೋಜನಪ್ಪಮಾಣೇ ಪದೇಸೇ ಏಕಂ ತಾಪಸಂ ದಿಸ್ವಾ ತೇನ ಆಚಿಕ್ಖಿತಮಗ್ಗೇನ ಗಚ್ಛನ್ತೋ ಪುನ ತಿಂಸಯೋಜನಪ್ಪಮಾಣೇ ಪದೇಸೇ ಏಕಂ ತಾಪಸಂ ದಿಸ್ವಾ, ತೇನ ಆಚಿಕ್ಖಿತಮಗ್ಗೇನ ಗಚ್ಛನ್ತೋ ಪುನ ಪನ್ನರಸಯೋಜನಪ್ಪಮಾಣೇ ಠಾನೇ ಅಞ್ಞಂ ತಾಪಸಂ ದಿಸ್ವಾ, ತಸ್ಸ ಅತ್ತನೋ ಆಗಮನಕಾರಣಂ ಕಥೇಸಿ. ತಾಪಸೋ ತಂ ಅನುಸಾಸಿ – ‘‘ಇತೋ ಪಟ್ಠಾಯ ಇಮಂ ಮಹಾಗಙ್ಗಂ ಪಹಾಯ ಇಮಂ ಖುದ್ದಕನದಿಂ ನಿಸ್ಸಾಯ ಪಟಿಸೋತಂ ಗಚ್ಛನ್ತೋ ಯದಾ ಪಬ್ಬತವಿವರಂ ಪಸ್ಸಸಿ, ತದಾ ರತ್ತಿಯಂ ಉಕ್ಕಂ ಗಹೇತ್ವಾ ಪವಿಸೇಯ್ಯಾಸಿ. ಅಯಞ್ಚ ನದೀ ರತ್ತಿಯಂ ನಪ್ಪವತ್ತತಿ, ತೇನ ತೇ ಗಮನಯೋಗ್ಗಾ ಹೋತಿ, ಕತಿಪಯಯೋಜನಾತಿಕ್ಕಮೇನ ತೇ ಅಮ್ಬೇ ಪಸ್ಸಿಸ್ಸಸೀ’’ತಿ. ಸೋ ತಥಾ ಕತ್ವಾ ಉದಯನ್ತೇ ಸೂರಿಯೇ ವಿವಿಧರತನರಂಸಿಜಾಲಪಜ್ಜೋತಿತಭೂಮಿಭಾಗಂ ಫಲಭಾರಾವನತಸಾಖಾವಿತಾನತರುಗಣೋಪಸೋಭಿತಂ ನಾನಾವಿಧವಿಹಙ್ಗಗಣೂಪಕೂಜಿತಂ ಅತಿವಿಯ ಮನೋಹರಂ ಅಮ್ಬವನಂ ಸಮ್ಪಾಪುಣಿ.

ಅಥ ನಂ ತಾ ಅಮನುಸ್ಸಿತ್ಥಿಯೋ ದೂರತೋವ ಆಗಚ್ಛನ್ತಂ ದಿಸ್ವಾ ‘‘ಏಸ ಮಮ ಪರಿಗ್ಗಹೋ, ಏಸ ಮಮ ಪರಿಗ್ಗಹೋ’’ತಿ ಉಪಧಾವಿಂಸು. ಸೋ ಪನ ತಾಹಿ ಸದ್ಧಿಂ ತತ್ಥ ದಿಬ್ಬಸಮ್ಪತ್ತಿಂ ಅನುಭವಿತುಂ ಯೋಗ್ಗಸ್ಸ ಪುಞ್ಞಕಮ್ಮಸ್ಸ ಅಕತತ್ತಾ ತಾ ದಿಸ್ವಾವ ಭೀತೋ ವಿರವನ್ತೋ ಪಲಾಯಿತ್ವಾ ಅನುಕ್ಕಮೇನ ಬಾರಾಣಸಿಂ ಪತ್ವಾ ತಂ ಪವತ್ತಿಂ ರಞ್ಞೋ ಆರೋಚೇಸಿ. ರಾಜಾ ತಂ ಸುತ್ವಾ ತಾ ಇತ್ಥಿಯೋ ದಟ್ಠುಂ ಅಮ್ಬಫಲಾನಿ ಚ ಪರಿಭುಞ್ಜಿತುಂ ಸಞ್ಜಾತಾಭಿಲಾಸೋ ರಜ್ಜಭಾರಂ ಅಮಚ್ಚೇಸು ಆರೋಪೇತ್ವಾ ಮಿಗವಾಪದೇಸೇನ ಸನ್ನದ್ಧಧನುಕಲಾಪೋ ಖಗ್ಗಂ ಬನ್ಧಿತ್ವಾ ಕತಿಪಯಮನುಸ್ಸಪರಿವಾರೋ ತೇನೇವ ವನಚರಕೇನ ದಸ್ಸಿತಮಗ್ಗೇನ ಗನ್ತ್ವಾ ಕತಿಪಯಯೋಜನನ್ತರೇ ಠಾನೇ ಮನುಸ್ಸೇಪಿ ಠಪೇತ್ವಾ ವನಚರಕಮೇವ ಗಹೇತ್ವಾ ಅನುಕ್ಕಮೇನ ಗನ್ತ್ವಾ ತಮ್ಪಿ ತತೋ ನಿವತ್ತಾಪೇತ್ವಾ ಉದಯನ್ತೇ ದಿವಾಕರೇ ಅಮ್ಬವನಂ ಪಾವಿಸಿ. ಅಥ ನಂ ತಾ ಇತ್ಥಿಯೋ ಅಭಿನವಉಪ್ಪನ್ನಮಿವ ದೇವಪುತ್ತಂ ದಿಸ್ವಾ ಪಚ್ಚುಗ್ಗನ್ತ್ವಾ ‘‘ರಾಜಾ’’ತಿ ಞತ್ವಾ ಸಞ್ಜಾತಸಿನೇಹಬಹುಮಾನಾ ಸಕ್ಕಚ್ಚಂ ನ್ಹಾಪೇತ್ವಾ ದಿಬ್ಬೇಹಿ ವತ್ಥಾಲಙ್ಕಾರಮಾಲಾಗನ್ಧವಿಲೇಪನೇಹಿ ಸುಮಣ್ಡಿತಪಸಾಧಿತಂ ಕತ್ವಾ ವಿಮಾನಂ ಆರೋಪೇತ್ವಾ ನಾನಗ್ಗರಸಂ ದಿಬ್ಬಭೋಜನಂ ಭೋಜೇತ್ವಾ ತಸ್ಸ ಇಚ್ಛಾನುರೂಪಂ ಪಯಿರುಪಾಸಿಂಸು.

ಅಥ ದಿಯಡ್ಢವಸ್ಸಸತೇ ಅತಿಕ್ಕನ್ತೇ ರಾಜಾ ಅಡ್ಢರತ್ತಿಸಮಯೇ ಉಟ್ಠಹಿತ್ವಾ ನಿಸಿನ್ನೋ ತಂ ಅತಿಚಾರಿನಿಂ ಪೇತಿಂ ಪೋಕ್ಖರಣಿತೀರಂ ಗಚ್ಛನ್ತಿಂ ದಿಸ್ವಾ ‘‘ಕಿಂ ನು ಖೋ ಏಸಾ ಇಮಾಯ ವೇಲಾಯ ಗಚ್ಛತೀ’’ತಿ ವೀಮಂಸಿತುಕಾಮೋ ಅನುಬನ್ಧಿ. ಅಥ ನಂ ತತ್ಥ ಗತಂ ಸುನಖೇನ ಖಜ್ಜಮಾನಂ ದಿಸ್ವಾ ‘‘ಕಿಂ ನು ಖೋ ಇದ’’ನ್ತಿ ಅಜಾನನ್ತೋ ತಯೋ ಚ ದಿವಸೇ ವೀಮಂಸಿತ್ವಾ ‘‘ಏಸೋ ಏತಿಸ್ಸಾ ಪಚ್ಚಾಮಿತ್ತೋ ಭವಿಸ್ಸತೀ’’ತಿ ನಿಸಿತೇನ ಉಸುನಾ ವಿಜ್ಝಿತ್ವಾ ಜೀವಿತಾ ವೋರೋಪೇತ್ವಾ ತಞ್ಚ ಇತ್ಥಿಂ ಪೋಥೇತ್ವಾ ಪೋಕ್ಖರಣಿಂ ಓತಾರೇತ್ವಾ ಪಟಿಲದ್ಧಪುರಿಮರೂಪಂ ದಿಸ್ವಾ –

೩೪೮. ‘‘ಸೋಣ್ಣಸೋಪಾನಫಲಕಾ, ಸೋಣ್ಣವಾಲುಕಸನ್ಥತಾ;

ತತ್ಥ ಸೋಗನ್ಧಿಯಾ ವಗ್ಗೂ, ಸುಚಿಗನ್ಧಾ ಮನೋರಮಾ.

೩೪೯. ‘‘ನಾನಾರುಕ್ಖೇಹಿ ಸಞ್ಛನ್ನಾ, ನಾನಾಗನ್ಧಸಮೇರಿತಾ;

ನಾನಾಪದುಮಸಞ್ಛನ್ನಾ, ಪುಣ್ಡರೀಕಸಮೋತತಾ.

೩೫೦. ‘‘ಸುರಭಿಂ ಸಮ್ಪವಾಯನ್ತಿ, ಮನುಞ್ಞಾ ಮಾಲುತೇರಿತಾ;

ಹಂಸಕೋಞ್ಚಾಭಿರುದಾ ಚ, ಚಕ್ಕವಕ್ಕಾಭಿಕೂಜಿತಾ.

೩೫೧. ‘‘ನಾನಾದಿಜಗಣಾಕಿಣ್ಣಾ, ನಾನಾಸರಗಣಾಯುತಾ;

ನಾನಾಫಲಧರಾ ರುಕ್ಖಾ, ನಾನಾಪುಪ್ಫಧರಾ ವನಾ.

೩೫೨. ‘‘ನ ಮನುಸ್ಸೇಸು ಈದಿಸಂ, ನಗರಂ ಯಾದಿಸಂ ಇದಂ;

ಪಾಸಾದಾ ಬಹುಕಾ ತುಯ್ಹಂ, ಸೋವಣ್ಣರೂಪಿಯಾಮಯಾ;

ದದ್ದಲ್ಲಮಾನಾ ಆಭೇನ್ತಿ, ಸಮನ್ತಾ ಚತುರೋ ದಿಸಾ.

೩೫೩. ‘‘ಪಞ್ಚ ದಾಸಿಸತಾ ತುಯ್ಹಂ, ಯಾ ತೇಮಾ ಪರಿಚಾರಿಕಾ;

ತಾ ಕಮ್ಬುಕಾಯೂರಧರಾ, ಕಞ್ಚನಾವೇಳಭೂಸಿತಾ.

೩೫೪. ‘‘ಪಲ್ಲಙ್ಕಾ ಬಹುಕಾ ತುಯ್ಹಂ, ಸೋವಣ್ಣರೂಪಿಯಾಮಯಾ;

ಕದಲಿಮಿಗಸಞ್ಛನ್ನಾ, ಸಜ್ಜಾ ಗೋನಕಸನ್ಥತಾ.

೩೫೫. ‘‘ಯತ್ಥ ತುವಂ ವಾಸೂಪಗತಾ, ಸಬ್ಬಕಾಮಸಮಿದ್ಧಿನೀ;

ಸಮ್ಪತ್ತಾಯಡ್ಢರತ್ತಾಯ, ತತೋ ಉಟ್ಠಾಯ ಗಚ್ಛಸಿ.

೩೫೬. ‘‘ಉಯ್ಯಾನಭೂಮಿಂ ಗನ್ತ್ವಾನ, ಪೋಕ್ಖರಞ್ಞಾ ಸಮನ್ತತೋ;

ತಸ್ಸಾ ತೀರೇ ತುವಂ ಠಾಸಿ, ಹರಿತೇ ಸದ್ದಲೇ ಸುಭೇ.

೩೫೭. ‘‘ತತೋ ತೇ ಕಣ್ಣಮುಣ್ಡೋ ಸುನಖೋ, ಅಙ್ಗಮಙ್ಗಾನಿ ಖಾದತಿ;

ಯದಾ ಚ ಖಾಯಿತಾ ಆಸಿ, ಅಟ್ಠಿಸಙ್ಖಲಿಕಾ ಕತಾ;

ಓಗಾಹಸಿ ಪೋಕ್ಖರಣಿಂ, ಹೋತಿ ಕಾಯೋ ಯಥಾ ಪುರೇ.

೩೫೮. ‘‘ತತೋ ತ್ವಂ ಅಙ್ಗಪಚ್ಚಙ್ಗೀ, ಸುಚಾರು ಪಿಯದಸ್ಸನಾ;

ವತ್ಥೇನ ಪಾರುಪಿತ್ವಾನ, ಆಯಾಸಿ ಮಮ ಸನ್ತಿಕಂ.

೩೫೯. ‘‘ಕಿಂ ನು ಕಾಯೇನ ವಾಚಾಯ, ಮನಸಾ ದುಕ್ಕಟಂ ಕತಂ;

ಕಿಸ್ಸಕಮ್ಮವಿಪಾಕೇನ, ಕಣ್ಣಮುಣ್ಡೋ ಸುನಖೋ ತವ;

ಅಙ್ಗಮಙ್ಗಾನಿ ಖಾದತೀ’’ತಿ. –

ದ್ವಾದಸಹಿ ಗಾಥಾಹಿ ತಂ ತಸ್ಸ ಪವತ್ತಿಂ ಪಟಿಪುಚ್ಛಿ.

೩೪೮. ತತ್ಥ ಸೋಣ್ಣಸೋಪಾನಫಲಕಾತಿ ಸುವಣ್ಣಮಯಸೋಪಾನಫಲಕಾ. ಸೋಣ್ಣವಾಲುಕಸನ್ಥತಾತಿ ಸಮನ್ತತೋ ಸುವಣ್ಣಮಯಾಹಿ ವಾಲುಕಾಹಿ ಸನ್ಥತಾ. ತತ್ಥಾತಿ ಪೋಕ್ಖರಣಿಯಂ. ಸೋಗನ್ಧಿಯಾತಿ ಸೋಗನ್ಧಿಕಾ. ವಗ್ಗೂತಿ ಸುನ್ದರಾ ರುಚಿರಾ. ಸುಚಿಗನ್ಧಾತಿ ಮನುಞ್ಞಗನ್ಧಾ.

೩೪೯. ನಾನಾಗನ್ಧಸಮೇರಿತಾತಿ ನಾನಾವಿಧಸುರಭಿಗನ್ಧವಸೇನ ಗನ್ಧವಾಯುನಾ ಸಮನ್ತತೋ ಏರಿತಾ. ನಾನಾಪದುಮಸಞ್ಛನ್ನಾತಿ ನಾನಾವಿಧರತ್ತಪದುಮಸಞ್ಛಾದಿತಸಲಿಲತಲಾ. ಪುಣ್ಡರೀಕಸಮೋತತಾತಿ ಸೇತಪದುಮೇಹಿ ಚ ಸಮೋಕಿಣ್ಣಾ.

೩೫೦. ಸುರಭಿಂ ಸಮ್ಪವಾಯನ್ತೀತಿ ಸಮ್ಮದೇವ ಸುಗನ್ಧಂ ವಾಯತಿ ಪೋಕ್ಖರಣೀತಿ ಅಧಿಪ್ಪಾಯೋ. ಹಂಸಕೋಞ್ಚಾಭಿರುದಾತಿ ಹಂಸೇಹಿ ಚ ಕೋಞ್ಚೇಹಿ ಚ ಅಭಿನಾದಿತಾ.

೩೫೧. ನಾನಾದಿಜಗಣಾಕಿಣ್ಣಾತಿ ನಾನಾದಿಜಗಣಾಕಿಣ್ಣಾ. ನಾನಾಸರಗಣಾಯುತಾತಿ ನಾನಾವಿಧವಿಹಙ್ಗಮಾಭಿರುದಸಮೂಹಯುತ್ತಾ. ನಾನಾಫಲಧರಾತಿ ನಾನಾವಿಧಫಲಧಾರಿನೋ ಸಬ್ಬಕಾಲಂ ವಿವಿಧಫಲಭಾರನಮಿತಸಾಖತ್ತಾ. ನಾನಾಪುಪ್ಫಧರಾ ವನಾತಿ ನಾನಾವಿಧಸುರಭಿಕುಸುಮದಾಯಿಕಾನಿ ವನಾನೀತಿ ಅತ್ಥೋ. ಲಿಙ್ಗವಿಪಲ್ಲಾಸೇನ ಹಿ ‘‘ವನಾ’’ತಿ ವುತ್ತಂ.

೩೫೨. ನ ಮನುಸ್ಸೇಸು ಈದಿಸಂ ನಗರನ್ತಿ ಯಾದಿಸಂ ತವ ಇದಂ ನಗರಂ, ಈದಿಸಂ ಮನುಸ್ಸೇಸು ನತ್ಥಿ, ಮನುಸ್ಸಲೋಕೇ ನ ಉಪಲಬ್ಭತೀತಿ ಅತ್ಥೋ. ರೂಪಿಯಮಯಾತಿ ರಜತಮಯಾ. ದದ್ದಲ್ಲಮಾನಾತಿ ಅತಿವಿಯ ವಿರೋಚಮಾನಾ. ಆಭೇನ್ತೀತಿ ಸೋಭಯನ್ತಿ. ಸಮನ್ತಾ ಚತುರೋ ದಿಸಾತಿ ಸಮನ್ತತೋ ಚತಸ್ಸೋಪಿ ದಿಸಾಯೋ.

೩೫೩. ಯಾ ತೇಮಾತಿ ಯಾ ತೇ ಇಮಾ. ಪರಿಚಾರಿಕಾತಿ ವೇಯ್ಯಾವಚ್ಚಕಾರಿನಿಯೋ. ತಾತಿ ತಾ ಪರಿಚಾರಿಕಾಯೋ. ಕಮ್ಬುಕಾಯೂರಧರಾತಿ ಸಙ್ಖವಲಯಕಾಯೂರವಿಭೂಸಿತಾ. ಕಞ್ಚನಾವೇಳಭೂಸಿತಾತಿ ಸುವಣ್ಣವಟಂಸಕಸಮಲಙ್ಕತಕೇಸಹತ್ಥಾ.

೩೫೪. ಕದಲಿಮಿಗಸಞ್ಛನ್ನಾತಿ ಕದಲಿಮಿಗಚಮ್ಮಪಚ್ಚತ್ಥರಣತ್ಥತಾ. ಸಜ್ಜಾತಿ ಸಜ್ಜಿತಾ ಸಯಿತುಂ ಯುತ್ತರೂಪಾ. ಗೋನಕಸನ್ಥತಾತಿ ದೀಘಲೋಮಕೇನ ಕೋಜವೇನ ಸನ್ಥತಾ.

೩೫೫. ಯತ್ಥಾತಿ ಯಸ್ಮಿಂ ಪಲ್ಲಙ್ಕೇ. ವಾಸೂಪಗತಾತಿ ವಾಸಂ ಉಪಗತಾ, ಸಯಿತಾತಿ ಅತ್ಥೋ. ಸಮ್ಪತ್ತಾಯಡ್ಢರತ್ತಾಯಾತಿ ಅಡ್ಢರತ್ತಿಯಾ ಉಪಗತಾಯ. ತತೋತಿ ಪಲ್ಲಙ್ಕತೋ.

೩೫೬. ಪೋಕ್ಖರಞ್ಞಾತಿ ಪೋಕ್ಖರಣಿಯಾ. ಹರಿತೇತಿ ನೀಲೇ. ಸದ್ದಲೇತಿ ತರುಣತಿಣಸಞ್ಛನ್ನೇ. ಸುಭೇತಿ ಸುದ್ಧೇ. ಸುಭೇತಿ ವಾ ತಸ್ಸಾ ಆಲಪನಂ. ಭದ್ದೇ, ಸಮನ್ತತೋ ಹರಿತೇ ಸದ್ದಲೇ ತಸ್ಸಾ ಪೋಕ್ಖರಣಿಯಾ ತೀರೇ ತ್ವಂ ಗನ್ತ್ವಾನ ಠಾಸಿ ತಿಟ್ಠಸೀತಿ ಯೋಜನಾ.

೩೫೭. ಕಣ್ಣಮುಣ್ಡೋತಿ ಖಣ್ಡಿತಕಣ್ಣೋ ಛಿನ್ನಕಣ್ಣೋ. ಖಾಯಿತಾ ಆಸೀತಿ ಖಾದಿತಾ ಅಹೋಸಿ. ಅಟ್ಠಿಸಙ್ಖಲಿಕಾ ಕತಾತಿ ಅಟ್ಠಿಸಙ್ಖಲಿಕಮತ್ತಾ ಕತಾ. ಯಥಾ ಪುರೇತಿ ಸುನಖೇನ ಖಾದನತೋ ಪುಬ್ಬೇ ವಿಯ.

೩೫೮. ತತೋತಿ ಪೋಕ್ಖರಣಿಂ ಓಗಾಹನತೋ ಪಚ್ಛಾ. ಅಙ್ಗಪಚ್ಚಙ್ಗೀತಿ ಪರಿಪುಣ್ಣಸಬ್ಬಙ್ಗಪಚ್ಚಙ್ಗವತೀ. ಸುಚಾರೂತಿ ಸುಟ್ಠು ಮನೋರಮಾ. ಪಿಯದಸ್ಸನಾತಿ ದಸ್ಸನೀಯಾ. ಆಯಾಸೀತಿ ಆಗಚ್ಛಸಿ.

ಏವಂ ತೇನ ರಞ್ಞಾ ಪುಚ್ಛಿತಾ ಸಾ ಪೇತೀ ಆದಿತೋ ಪಟ್ಠಾಯ ಅತ್ತನೋ ಪವತ್ತಿಂ ತಸ್ಸ ಕಥೇನ್ತೀ –

೩೬೦. ‘‘ಕಿಮಿಲಾಯಂ ಗಹಪತಿ, ಸದ್ಧೋ ಆಸಿ ಉಪಾಸಕೋ;

ತಸ್ಸಾಹಂ ಭರಿಯಾ ಆಸಿಂ, ದುಸ್ಸೀಲಾ ಅತಿಚಾರಿನೀ.

೩೬೧. ‘‘ಸೋ ಮಂ ಅತಿಚರಮಾನಾಯ, ಸಾಮಿಕೋ ಏತದಬ್ರವಿ;

‘ನೇತಂ ತಂ ಛನ್ನಂ ಪತಿರೂಪಂ, ಯಂ ತ್ವಂ ಅತಿಚರಾಸಿ ಮಂ’.

೩೬೨. ‘‘ಸಾಹಂ ಘೋರಞ್ಚ ಸಪಥಂ, ಮುಸಾವಾದಞ್ಚ ಭಾಸಿಸಂ;

‘ನಾಹಂ ತಂ ಅತಿಚರಾಮಿ, ಕಾಯೇನ ಉದ ಚೇತಸಾ.

೩೬೩. ‘‘‘ಸಚಾಹಂ ತಂ ಅತಿಚರಾಮಿ, ಕಾಯೇನ ಉದ ಚೇತಸಾ;

ಕಣ್ಣಮುಣ್ಡೋಯಂ ಸುನಖೋ, ಅಙ್ಗಮಙ್ಗಾನಿ ಖಾದತು’.

೩೬೪. ‘‘ತಸ್ಸ ಕಮ್ಮಸ್ಸ ವಿಪಾಕಂ, ಮುಸಾವಾದಸ್ಸ ಚೂಭಯಂ;

ಸತ್ತೇವ ವಸ್ಸಸತಾನಿ, ಅನುಭೂತಂ ಯತೋ ಹಿ ಮೇ;

ಕಣ್ಣಮುಣ್ಡೋ ಚ ಸುನಖೋ, ಅಙ್ಗಮಙ್ಗಾನಿ ಖಾದತೀ’’ತಿ. – ಪಞ್ಚ ಗಾಥಾ ಆಹ;

೩೬೦-೧. ತತ್ಥ ಕಿಮಿಲಾಯನ್ತಿ ಏವಂನಾಮಕೇ ನಗರೇ. ಅತಿಚಾರಿನೀತಿ ಭರಿಯಾ ಹಿ ಪತಿಂ ಅತಿಕ್ಕಮ್ಮ ಚರಣತೋ ‘‘ಅತಿಚಾರಿನೀ’’ತಿ ವುಚ್ಚತಿ. ಅತಿಚರಮಾನಾಯ ಮಯಿ ಸೋ ಸಾಮಿಕೋ ಮಂ ಏತದಬ್ರವೀತಿ ಯೋಜನಾ. ನೇತಂ ಛನ್ನನ್ತಿಆದಿ ವುತ್ತಾಕಾರದಸ್ಸನಂ. ತತ್ಥ ನೇತಂ ಛನ್ನನ್ತಿ ನ ಏತಂ ಯುತ್ತಂ. ನ ಪತಿರೂಪನ್ತಿ ತಸ್ಸೇವ ವೇವಚನಂ. ಯನ್ತಿ ಕಿರಿಯಾಪರಾಮಸನಂ. ಅತಿಚರಾಸೀತಿ ಅತಿಚರಸಿ, ಅಯಮೇವ ವಾ ಪಾಠೋ. ಯಂ ಮಂ ತ್ವಂ ಅತಿಚರಸಿ, ತತ್ಥ ಯಂ ಅತಿಚರಣಂ, ನೇತಂ ಛನ್ನಂ ನೇತಂ ಪತಿರೂಪನ್ತಿ ಅತ್ಥೋ.

೩೬೨-೪. ಘೋರನ್ತಿ ದಾರುಣಂ. ಸಪಥನ್ತಿ ಸಪನಂ. ಭಾಸಿಸನ್ತಿ ಅಭಾಸಿಂ. ಸಚಾಹನ್ತಿ ಸಚೇ ಅಹಂ. ತನ್ತಿ ತ್ವಂ. ತಸ್ಸ ಕಮ್ಮಸ್ಸಾತಿ ತಸ್ಸ ಪಾಪಕಮ್ಮಸ್ಸ ದುಸ್ಸೀಲ್ಯಕಮ್ಮಸ್ಸ. ಮುಸಾವಾದಸ್ಸ ಚಾತಿ ‘‘ನಾಹಂ ತಂ ಅತಿಚರಾಮೀ’’ತಿ ವುತ್ತಮುಸಾವಾದಸ್ಸ ಚ. ಉಭಯನ್ತಿ ಉಭಯಸ್ಸ ವಿಪಾಕಂ. ಅನುಭೂತನ್ತಿ ಅನುಭೂಯಮಾನಂ ಮಯಾತಿ ಅತ್ಥೋ. ಯತೋತಿ ಯತೋ ಪಾಪಕಮ್ಮತೋ.

ಏವಞ್ಚ ಪನ ವತ್ವಾ ತೇನ ಅತ್ತನೋ ಕತಂ ಉಪಕಾರಂ ಕಿತ್ತೇನ್ತೀ –

೩೬೫. ‘‘ತ್ವಞ್ಚ ದೇವ ಬಹುಕಾರೋ, ಅತ್ಥಾಯ ಮೇ ಇಧಾಗತೋ;

ಸುಮುತ್ತಾಹಂ ಕಣ್ಣಮುಣ್ಡಸ್ಸ, ಅಸೋಕಾ ಅಕುತೋಭಯಾ.

೩೬೬. ‘‘ತಾಹಂ ದೇವ ನಮಸ್ಸಾಮಿ, ಯಾಚಾಮಿ ಪಞ್ಜಲೀಕತಾ;

ಭುಞ್ಜ ಅಮಾನುಸೇ ಕಾಮೇ, ರಮ ದೇವ ಮಯಾ ಸಹಾ’’ತಿ. –

ದ್ವೇ ಗಾಥಾ ಆಹ. ತತ್ಥ ದೇವಾತಿ ರಾಜಾನಂ ಆಲಪತಿ. ಕಣ್ಣಮುಣ್ಡಸ್ಸಾತಿ ಕಣ್ಣಮುಣ್ಡತೋ. ನಿಸ್ಸಕ್ಕೇ ಹಿ ಇದಂ ಸಾಮಿವಚನಂ. ಅಥ ರಾಜಾ ತತ್ಥ ವಾಸೇನ ನಿಬ್ಬಿನ್ನಮಾನಸೋ ಗಮನಜ್ಝಾಸಯಂ ಪಕಾಸೇಸಿ. ತಂ ಸುತ್ವಾ ಪೇತೀ ರಞ್ಞೋ ಪಟಿಬದ್ಧಚಿತ್ತಾ ತತ್ಥೇವಸ್ಸ ವಾಸಂ ಯಾಚನ್ತೀ ‘‘ತಾಹಂ, ದೇವ, ನಮಸ್ಸಾಮೀ’’ತಿ ಗಾಥಮಾಹ.

ಪುನ ರಾಜಾ ಏಕಂಸೇನ ನಗರಂ ಗನ್ತುಕಾಮೋವ ಹುತ್ವಾ ಅತ್ತನೋ ಅಜ್ಝಾಸಯಂ ಪವೇದೇನ್ತೋ –

೩೬೭. ‘‘ಭುತ್ತಾ ಅಮಾನುಸಾ ಕಾಮಾ, ರಮಿತೋಮ್ಹಿ ತಯಾ ಸಹ;

ತಾಹಂ ಸುಭಗೇ ಯಾಚಾಮಿ, ಖಿಪ್ಪಂ ಪಟಿನಯಾಹಿ ಮ’’ನ್ತಿ. –

ಓಸಾನಗಾಥಮಾಹ. ತತ್ಥ ತಾಹನ್ತಿ ತಂ ಅಹಂ. ಸುಭಗೇತಿ ಸುಭಗಯುತ್ತೇ. ಪಟಿನಯಾಹಿ ಮನ್ತಿ ಮಯ್ಹಂ ನಗರಮೇವ ಮಂ ಪಟಿನೇಹಿ. ಸೇಸಂ ಸಬ್ಬತ್ಥ ಪಾಕಟಮೇವ.

ಅಥ ಸಾ ವಿಮಾನಪೇತೀ ರಞ್ಞೋ ವಚನಂ ಸುತ್ವಾ ವಿಯೋಗಂ ಅಸಹಮಾನಾ ಸೋಕಾತುರತಾಯ ಬ್ಯಾಕುಲಹದಯಾ ವೇಧಮಾನಸರೀರಾ ನಾನಾವಿಧೇಹಿ ಉಪಾಯೇಹಿ ಆಯಾಚಿತ್ವಾಪಿ ತಂ ತತ್ಥ ವಾಸೇತುಂ ಅಸಕ್ಕೋನ್ತೀ ಬಹೂಹಿ ಮಹಾರಹೇಹಿ ರತನೇಹಿ ಸದ್ಧಿಂ ರಾಜಾನಂ ನಗರಂ ನೇತ್ವಾ ಪಾಸಾದಂ ಆರೋಪೇತ್ವಾ ಕನ್ದಿತ್ವಾ ಪರಿದೇವಿತ್ವಾ ಅತ್ತನೋ ವಸನಟ್ಠಾನಮೇವ ಗತಾ. ರಾಜಾ ಪನ ತಂ ದಿಸ್ವಾ ಸಞ್ಜಾತಸಂವೇಗೋ ದಾನಾದೀನಿ ಪುಞ್ಞಕಮ್ಮಾನಿ ಕತ್ವಾ ಸಗ್ಗಪರಾಯಣೋ ಅಹೋಸಿ. ಅಥ ಅಮ್ಹಾಕಂ ಭಗವತಿ ಲೋಕೇ ಉಪ್ಪಜ್ಜಿತ್ವಾ ಪವತ್ತಿತವರಧಮ್ಮಚಕ್ಕೇ ಅನುಕ್ಕಮೇನ ಸಾವತ್ಥಿಯಂ ವಿಹರನ್ತೇ ಏಕದಿವಸಂ ಆಯಸ್ಮಾ ಮಹಾಮೋಗ್ಗಲ್ಲಾನೋ ಪಬ್ಬತಚಾರಿಕಂ ಚರಮಾನೋ ತಂ ಇತ್ಥಿಂ ಸಪರಿವಾರಂ ದಿಸ್ವಾ ತಾಯ ಕತಕಮ್ಮಂ ಪುಚ್ಛಿ. ಸಾ ಆದಿತೋ ಪಟ್ಠಾಯ ಸಬ್ಬಂ ಥೇರಸ್ಸ ಕಥೇಸಿ. ಥೇರೋ ತಾಸಂ ಧಮ್ಮಂ ದೇಸೇಸಿ. ತಂ ಪವತ್ತಿಂ ಥೇರೋ ಭಗವತೋ ಆರೋಚೇಸಿ. ಭಗವಾ ತಮತ್ಥಂ ಅಟ್ಠುಪ್ಪತ್ತಿಂ ಕತ್ವಾ ಸಮ್ಪತ್ತಪರಿಸಾಯ ಧಮ್ಮಂ ದೇಸೇಸಿ. ಮಹಾಜನೋ ಪಟಿಲದ್ಧಸಂವೇಗೋ ಪಾಪತೋ ಓರಮಿತ್ವಾ ದಾನಾದೀನಿ ಪುಞ್ಞಕಮ್ಮಾನಿ ಕತ್ವಾ ಸಗ್ಗಪರಾಯಣೋ ಅಹೋಸೀತಿ.

ಕಣ್ಣಮುಣ್ಡಪೇತಿವತ್ಥುವಣ್ಣನಾ ನಿಟ್ಠಿತಾ.