೩. ಮಿಚ್ಛಾದಿಟ್ಠಿನಿದ್ದೇಸವಣ್ಣನಾ

೧೩೬. ಮಿಚ್ಛಾದಿಟ್ಠಿ ಹೇಟ್ಠಾ ವುತ್ತತ್ಥಾಯೇವ. ಅಯಂ ಪನ ಅಪರೋ ನಯೋ – ನತ್ಥಿ ದಿನ್ನನ್ತಿ ಉಚ್ಛೇದದಿಟ್ಠಿಕತ್ತಾ ದಾನಫಲಂ ಪಟಿಕ್ಖಿಪತಿ. ನತ್ಥಿ ಯಿಟ್ಠನ್ತಿ ಏತ್ಥ ಯಿಟ್ಠನ್ತಿ ಖುದ್ದಕಯಞ್ಞೋ. ಹುತನ್ತಿ ಮಹಾಯಞ್ಞೋ. ದ್ವಿನ್ನಮ್ಪಿ ಫಲಂ ಪಟಿಕ್ಖಿಪತಿ. ನತ್ಥಿ ಸುಕತದುಕ್ಕಟಾನಂ ಕಮ್ಮಾನಂ ಫಲಂ ವಿಪಾಕೋತಿ ದಾನಫಲಸ್ಸ ಪಟಿಕ್ಖಿತ್ತತ್ತಾ ಸೀಲಾದೀನಂ ಪುಞ್ಞಕಮ್ಮಾನಂ, ಪಾಣಾತಿಪಾತಾದೀನಂ ಪಾಪಕಮ್ಮಾನಂ ಫಲಂ ಪಟಿಕ್ಖಿಪತಿ. ನತ್ಥಿ ಅಯಂ ಲೋಕೋತಿ ಪುರೇ ಕತೇನ ಕಮ್ಮುನಾ. ನತ್ಥಿ ಪರೋ ಲೋಕೋತಿ ಇಧ ಕತೇನ ಕಮ್ಮುನಾ. ನತ್ಥಿ ಮಾತಾ, ನತ್ಥಿ ಪಿತಾತಿ ತೇಸು ಕತಕಮ್ಮಾನಂ ಫಲಂ ಪಟಿಕ್ಖಿಪತಿ. ನತ್ಥಿ ಸತ್ತಾ ಓಪಪಾತಿಕಾತಿ ಕಮ್ಮಹೇತುಕಂ ಉಪಪತ್ತಿಂ ಪಟಿಕ್ಖಿಪತಿ. ನತ್ಥಿ ಲೋಕೇ ಸಮಣಬ್ರಾಹ್ಮಣಾ…ಪೇ… ಪವೇದೇನ್ತೀತಿ ಇಧಲೋಕಪರಲೋಕೇ ಪಸ್ಸಿತುಂ ಅಭಿಞ್ಞಾಪಟಿಲಾಭಾಯ ಪಟಿಪದಂ ಪಟಿಕ್ಖಿಪತಿ. ಇಧ ಪಾಳಿಯಂ ಪನ ನತ್ಥಿ ದಿನ್ನನ್ತಿ ವತ್ಥೂತಿ ನತ್ಥಿ ದಿನ್ನನ್ತಿ ವುಚ್ಚಮಾನಂ ದಾನಂ, ತಸ್ಸಾ ದಿಟ್ಠಿಯಾ ವತ್ಥೂತಿ ಅತ್ಥೋ. ಏವಂವಾದೋ ಮಿಚ್ಛಾತಿ ಏವಂ ನತ್ಥಿ ದಿನ್ನನ್ತಿ ವಾದೋ ವಚನಂ ಮಿಚ್ಛಾ ವಿಪರೀತೋತಿ ಅತ್ಥೋ.

ಮಿಚ್ಛಾದಿಟ್ಠಿನಿದ್ದೇಸವಣ್ಣನಾ ನಿಟ್ಠಿತಾ.