೧೨. ಸುಮನಸಾಮಣೇರವತ್ಥು

ಯೋ ಹವೇತಿ ಇಮಂ ಧಮ್ಮದೇಸನಂ ಸತ್ಥಾ ಪುಬ್ಬಾರಾಮೇ ವಿಹರನ್ತೋ ಸುಮನಸಾಮಣೇರಂ ಆರಬ್ಭ ಕಥೇಸಿ. ತತ್ರಾಯಂ ಅನುಪುಬ್ಬೀ ಕಥಾ –

ಪದುಮುತ್ತರಬುದ್ಧಕಾಲಸ್ಮಿಞ್ಹಿ ಏಕೋ ಕುಲಪುತ್ತೋ ಸತ್ಥಾರಾ ಚತುಪರಿಸಮಜ್ಝೇ ಏಕಂ ಭಿಕ್ಖುಂ ದಿಬ್ಬಚಕ್ಖುಕಾನಂ ಅಗ್ಗಟ್ಠಾನೇ ಠಪೇನ್ತಂ ದಿಸ್ವಾ ತಂ ಸಮ್ಪತ್ತಿಂ ಪತ್ಥಯಮಾನೋ ಸತ್ಥಾರಂ ನಿಮನ್ತೇತ್ವಾ ಸತ್ತಾಹಂ ಬುದ್ಧಪ್ಪಮುಖಸ್ಸ ಭಿಕ್ಖುಸಙ್ಘಸ್ಸ ಮಹಾದಾನಂ ದತ್ವಾ, ‘‘ಭನ್ತೇ, ಅಹಮ್ಪಿ ಅನಾಗತೇ ಏಕಸ್ಸ ಬುದ್ಧಸ್ಸ ಸಾಸನೇ ದಿಬ್ಬಚಕ್ಖುಕಾನಂ ಅಗ್ಗೋ ಭವೇಯ್ಯ’’ನ್ತಿ ಪತ್ಥನಂ ಠಪೇಸಿ. ಸತ್ಥಾ ಕಪ್ಪಸತಸಹಸ್ಸಂ ಓಲೋಕೇನ್ತೋ ತಸ್ಸ ಪತ್ಥನಾಯ ಸಮಿಜ್ಝನಭಾವಂ ವಿದಿತ್ವಾ ‘‘ಇತೋ ಕಪ್ಪಸತಸಹಸ್ಸಮತ್ಥಕೇ ಗೋತಮಬುದ್ಧಸಾಸನೇ ದಿಬ್ಬಚಕ್ಖುಕಾನಂ ಅಗ್ಗೋ ಅನುರುದ್ಧೋ ನಾಮ ಭವಿಸ್ಸಸೀ’’ತಿ ಬ್ಯಾಕಾಸಿ. ಸೋ ತಂ ಬ್ಯಾಕರಣಂ ಸುತ್ವಾ ಸ್ವೇ ಪತ್ತಬ್ಬಂ ವಿಯ ತಂ ಸಮ್ಪತ್ತಿಂ ಮಞ್ಞಮಾನೋ ಪರಿನಿಬ್ಬುತೇ ಸತ್ಥರಿ ಭಿಕ್ಖೂ ದಿಬ್ಬಚಕ್ಖುಪರಿಕಮ್ಮಂ ಪುಚ್ಛಿತ್ವಾ ಸತ್ತಯೋಜನಿಕಂ ಕಞ್ಚನಥೂಪಂ ಪರಿಕ್ಖಿಪಿತ್ವಾ ಅನೇಕಾನಿ ದೀಪರುಕ್ಖಸಹಸ್ಸಾನಿ ಕಾರೇತ್ವಾ ದೀಪಪೂಜಂ ಕತ್ವಾ ತತೋ ಚುತೋ ದೇವಲೋಕೇ ನಿಬ್ಬತ್ತಿತ್ವಾ ದೇವಮನುಸ್ಸೇಸು ಕಪ್ಪಸತಸಹಸ್ಸಾನಿ ಸಂಸರಿತ್ವಾ ಇಮಸ್ಮಿಂ ಕಪ್ಪೇ ಬಾರಾಣಸಿಯಂ ದಲಿದ್ದಕುಲೇ ನಿಬ್ಬತ್ತೋ ಸುಮನಸೇಟ್ಠಿಂ ನಿಸ್ಸಾಯ ತಸ್ಸ ತಿಣಹಾರಕೋ ಹುತ್ವಾ ಜೀವಿಕಂ ಕಪ್ಪೇಸಿ. ಅನ್ನಭಾರೋತಿಸ್ಸ ನಾಮಂ ಅಹೋಸಿ. ಸುಮನಸೇಟ್ಠೀಪಿ ತಸ್ಮಿಂ ನಗರೇ ನಿಚ್ಚಕಾಲಂ ಮಹಾದಾನಂ ದೇತಿ.

ಅಥೇಕದಿವಸಂ ಉಪರಿಟ್ಠೋ ನಾಮ ಪಚ್ಚೇಕಬುದ್ಧೋ ಗನ್ಧಮಾದನೇ ನಿರೋಧಸಮಾಪತ್ತಿತೋ ವುಟ್ಠಾಯ ‘‘ಕಸ್ಸ ನು ಖೋ ಅಜ್ಜ ಅನುಗ್ಗಹಂ ಕರಿಸ್ಸಾಮೀ’’ತಿ ಚಿನ್ತೇತ್ವಾ ‘‘ಅಜ್ಜ ಮಯಾ ಅನ್ನಭಾರಸ್ಸ ಅನುಗ್ಗಹಂ ಕಾತುಂ ವಟ್ಟತಿ, ಇದಾನಿ ಚ ಸೋ ಅಟವಿತೋ ತಿಣಂ ಆದಾಯ ಗೇಹಂ ಆಗಮಿಸ್ಸತೀ’’ತಿ ಞತ್ವಾ ಪತ್ತಚೀವರಮಾದಾಯ ಇದ್ಧಿಯಾ ಗನ್ತ್ವಾ ಅನ್ನಭಾರಸ್ಸ ಸಮ್ಮುಖೇ ಪಚ್ಚುಟ್ಠಾಸಿ. ಅನ್ನಭಾರೋ ತಂ ತುಚ್ಛಪತ್ತಹತ್ಥಂ ದಿಸ್ವಾ ‘‘ಅಪಿ, ಭನ್ತೇ, ಭಿಕ್ಖಂ ಲಭಿತ್ಥಾ’’ತಿ ಪುಚ್ಛಿತ್ವಾ ‘‘ಲಭಿಸ್ಸಾಮ ಮಹಾಪುಞ್ಞಾ’’ತಿ ವುತ್ತೇ ‘‘ತೇನ ಹಿ, ಭನ್ತೇ, ಥೋಕಂ ಆಗಮೇಥಾ’’ತಿ ತಿಣಕಾಜಂ ಛಡ್ಡೇತ್ವಾ ವೇಗೇನ ಗೇಹಂ ಗನ್ತ್ವಾ, ‘‘ಭದ್ದೇ, ಮಯ್ಹಂ ಠಪಿತಭಾಗಭತ್ತಂ ಅತ್ಥಿ, ನತ್ಥೀ’’ತಿ ಭರಿಯಂ ಪುಚ್ಛಿತ್ವಾ ‘‘ಅತ್ಥಿ, ಸಾಮೀ’’ತಿ ವುತ್ತೇ ವೇಗೇನ ಪಚ್ಚಾಗನ್ತ್ವಾ ಪಚ್ಚೇಕಬುದ್ಧಸ್ಸ ಪತ್ತಂ ಆದಾಯ ‘‘ಮಯ್ಹಂ ದಾತುಕಾಮತಾಯ ಸತಿ ದೇಯ್ಯಧಮ್ಮೋ ನ ಹೋತಿ, ದೇಯ್ಯಧಮ್ಮೇ ಸತಿ ಪಟಿಗ್ಗಾಹಕಂ ನ ಲಭಾಮಿ. ಅಜ್ಜ ಪನ ಮೇ ಪಟಿಗ್ಗಾಹಕೋ ಚ ದಿಟ್ಠೋ, ದೇಯ್ಯಧಮ್ಮೋ ಚ ಅತ್ಥಿ, ಲಾಭಾ ವತ ಮೇ’’ತಿ ಗೇಹಂ ಗನ್ತ್ವಾ ಭತ್ತಂ ಪತ್ತೇ ಪಕ್ಖಿಪಾಪೇತ್ವಾ ಪಚ್ಚಾಹರಿತ್ವಾ ಪಚ್ಚೇಕಬುದ್ಧಸ್ಸ ಹತ್ಥೇ ಪತಿಟ್ಠಪೇತ್ವಾ –

‘‘ಇಮಿನಾ ಪನ ದಾನೇನ, ಮಾ ಮೇ ದಾಲಿದ್ದಿಯಂ ಅಹು;

ನತ್ಥೀತಿ ವಚನಂ ನಾಮ, ಮಾ ಅಹೋಸಿ ಭವಾಭವೇ. –

ಭನ್ತೇ ಏವರೂಪಾ ದುಜ್ಜೀವಿತಾ ಮುಚ್ಚೇಯ್ಯಂ, ನತ್ಥೀತಿ ಪದಮೇವ ನ ಸುಣೇಯ್ಯ’’ನ್ತಿ ಪತ್ಥನಂ ಠಪೇಸಿ. ಪಚ್ಚೇಕಬುದ್ಧೋ ‘‘ಏವಂ ಹೋತು ಮಹಾಪುಞ್ಞಾ’’ತಿ ವತ್ವಾ ಅನುಮೋದನಂ ಕತ್ವಾ ಪಕ್ಕಾಮಿ.

ಸುಮನಸೇಟ್ಠಿನೋಪಿ ಛತ್ತೇ ಅಧಿವತ್ಥಾ ದೇವತಾ ‘‘ಅಹೋ ದಾನಂ ಪರಮದಾನಂ, ಉಪರಿಟ್ಠೇ ಸುಪತಿಟ್ಠಿತ’’ನ್ತಿ ವತ್ವಾ ತಿಕ್ಖತ್ತುಂ ಸಾಧುಕಾರಮದಾಸಿ. ಅಥ ನಂ ಸೇಟ್ಠಿ ‘‘ಕಿಂ ಮಂ ಏತ್ತಕಂ ಕಾಲಂ ದಾನಂ ದದಮಾನಂ ನ ಪಸ್ಸಸೀ’’ತಿ ಆಹ. ನಾಹಂ ತವ ದಾನಂ ಆರಬ್ಭ ಸಾಧುಕಾರಂ ದೇಮಿ, ಅನ್ನಭಾರೇನ ಪನ ಉಪರಿಟ್ಠಸ್ಸ ದಿನ್ನಪಿಣ್ಡಪಾತೇ ಪಸೀದಿತ್ವಾ ಮಯಾ ಏಸ ಸಾಧುಕಾರೋ ಪವತ್ತಿತೋತಿ. ಸೋ ‘‘ಅಚ್ಛರಿಯಂ ವತ, ಭೋ, ಅಹಂ ಏತ್ತಕಂ ಕಾಲಂ ದಾನಂ ದದನ್ತೋ ದೇವತಂ ಸಾಧುಕಾರಂ ದಾಪೇತುಂ ನಾಸಕ್ಖಿಂ, ಅನ್ನಭಾರೋ ಮಂ ನಿಸ್ಸಾಯ ಜೀವನ್ತೋ ಏಕಪಿಣ್ಡಪಾತೇನೇವ ಸಾಧುಕಾರಂ ದಾಪೇಸಿ, ತಸ್ಸ ದಾನೇ ಅನುಚ್ಛವಿಕಂ ಕತ್ವಾ ತಂ ಪಿಣ್ಡಪಾತಂ ಮಮ ಸನ್ತಕಂ ಕರಿಸ್ಸಾಮೀ’’ತಿ ಚಿನ್ತೇತ್ವಾ ತಂ ಪಕ್ಕೋಸಾಪೇತ್ವಾ ‘‘ಅಜ್ಜ ತಯಾ ಕಸ್ಸಚಿ ಕಿಞ್ಚಿ ದಿನ್ನ’’ನ್ತಿ ಪುಚ್ಛಿ. ‘‘ಆಮ, ಸಾಮಿ, ಉಪರಿಟ್ಠಪಚ್ಚೇಕಬುದ್ಧಸ್ಸ ಮೇ ಅಜ್ಜ ಭಾಗಭತ್ತಂ ದಿನ್ನ’’ನ್ತಿ. ‘‘ಹನ್ದ, ಭೋ, ಕಹಾಪಣಂ ಗಹೇತ್ವಾ ಏತಂ ಮಯ್ಹಂ ಪಿಣ್ಡಪಾತಂ ದೇಹೀ’’ತಿ? ‘‘ನ ದೇಮಿ, ಸಾಮೀ’’ತಿ. ಸೋ ಯಾವ ಸಹಸ್ಸಂ ವಡ್ಢೇಸಿ, ಇತರೋ ಸಹಸ್ಸೇನಾಪಿ ನಾದಾಸಿ. ಅಥ ನಂ ‘‘ಹೋತು, ಭೋ, ಯದಿ ಪಿಣ್ಡಪಾತಂ ನ ದೇಸಿ, ಸಹಸ್ಸಂ ಗಹೇತ್ವಾ ಪತ್ತಿಂ ಮೇ ದೇಹೀ’’ತಿ ಆಹ. ಸೋ ‘‘ಅಯ್ಯೇನ ಸದ್ಧಿಂ ಮನ್ತೇತ್ವಾ ಜಾನಿಸ್ಸಾಮೀ’’ತಿ ವೇಗೇನ ಪಚ್ಚೇಕಬುದ್ಧಂ ಸಮ್ಪಾಪುಣಿತ್ವಾ, ‘‘ಭನ್ತೇ ಸುಮನಸೇಟ್ಠಿ, ಸಹಸ್ಸಂ ದತ್ವಾ ತುಮ್ಹಾಕಂ ಪಿಣ್ಡಪಾತೇ ಪತ್ತಿಂ ಯಾಚತಿ, ಕಿಂ ಕರೋಮೀ’’ತಿ ಪುಚ್ಛಿ.

ಅಥಸ್ಸ ಸೋ ಉಪಮಂ ಆಹರಿ ‘‘ಸೇಯ್ಯಥಾಪಿ, ಪಣ್ಡಿತ, ಕುಲಸತಿಕೇ ಗಾಮೇ ಏಕಸ್ಮಿಂ ಘರೇ ದೀಪಂ ಜಾಲೇಯ್ಯ, ಸೇಸಾ ಅತ್ತನೋ ತೇಲೇನ ವಟ್ಟಿಂ ತೇಮೇತ್ವಾ ಜಾಲಾಪೇತ್ವಾ ಗಣ್ಹೇಯ್ಯುಂ, ಪುರಿಮಪದೀಪಸ್ಸ ಪಭಾ ಅತ್ಥೀತಿ ವತ್ತಬ್ಬಾ ನತ್ಥೀ’’ತಿ. ಅತಿರೇಕತರಾ, ಭನ್ತೇ, ಪಭಾ ಹೋತೀತಿ. ಏವಮೇವಂ ಪಣ್ಡಿತ ಉಳುಙ್ಕಯಾಗು ವಾ ಹೋತು, ಕಟಚ್ಛುಭಿಕ್ಖಾ ವಾ, ಅತ್ತನೋ ಪಿಣ್ಡಪಾತೇ ಪರೇಸಂ ಪತ್ತಿಂ ದೇನ್ತಸ್ಸ ಯತ್ತಕಾನಂ ದೇತಿ, ತತ್ತಕಂ ವಡ್ಢತಿ. ತ್ವಞ್ಹಿ ಏಕಮೇವ ಪಿಣ್ಡಪಾತಂ ಅದಾಸಿ, ಸೇಟ್ಠಿಸ್ಸ ಪನ ಪತ್ತಿಯಾ ದಿನ್ನಾಯ ದ್ವೇ ಪಿಣ್ಡಪಾತಾ ಹೋನ್ತಿ ಏಕೋ ತವ, ಏಕೋ ತಸ್ಸಾತಿ.

ಸೋ ‘‘ಸಾಧು, ಭನ್ತೇ’’ತಿ ತಂ ಅಭಿವಾದೇತ್ವಾ ಸೇಟ್ಠಿಸ್ಸ ಸನ್ತಿಕಂ ಗನ್ತ್ವಾ ‘‘ಗಣ್ಹ, ಸಾಮಿ, ಪತ್ತಿ’’ನ್ತಿ ಆಹ. ತೇನ ಹಿ ಇಮೇ ಕಹಾಪಣೇ ಗಣ್ಹಾತಿ. ನಾಹಂ ಪಿಣ್ಡಪಾತಂ ವಿಕ್ಕಿಣಾಮಿ, ಸದ್ಧಾಯ ತೇ ಪತ್ತಿಂ ದಮ್ಮೀತಿ. ‘‘ತ್ವಂ ಸದ್ಧಾಯ ದೇಸಿ, ಅಹಮ್ಪಿ ತವ ಗುಣೇ ಪೂಜೇಮಿ, ಗಣ್ಹ, ತಾತ, ಇತೋ ಪಟ್ಠಾಯ ಚ ಪನ ಮಾ ಸಹತ್ಥಾ ಕಮ್ಮಮಕಾಸಿ, ವೀಥಿಯಂ ಘರಂ ಮಾಪೇತ್ವಾ ವಸ. ಯೇನ ಚ ತೇ ಅತ್ಥೋ ಹೋತಿ, ಸಬ್ಬಂ ಮಮ ಸನ್ತಿಕಾ ಗಣ್ಹಾಹೀ’’ತಿ ಆಹ. ನಿರೋಧಾ ವುಟ್ಠಿತಸ್ಸ ಪನ ದಿನ್ನಪಿಣ್ಡಪಾತೋ ತದಹೇವ ವಿಪಾಕಂ ದೇತಿ. ತಸ್ಮಾ ರಾಜಾಪಿ ತಂ ಪವತ್ತಿಂ ಸುತ್ವಾ ಅನ್ನಭಾರಂ ಪಕ್ಕೋಸಾಪೇತ್ವಾ ಪತ್ತಿಂ ಗಹೇತ್ವಾ ಮಹನ್ತಂ ಭೋಗಂ ದತ್ವಾ ತಸ್ಸ ಸೇಟ್ಠಿಟ್ಠಾನಂ ದಾಪೇಸಿ.

ಸೋ ಸುಮನಸೇಟ್ಠಿಸ್ಸ ಸಹಾಯಕೋ ಹುತ್ವಾ ಯಾವಜೀವಂ ಪುಞ್ಞಾನಿ ಕತ್ವಾ ತತೋ ಚುತೋ ದೇವಲೋಕೇ ನಿಬ್ಬತ್ತಿತ್ವಾ ದೇವಮನುಸ್ಸೇಸು ಸಂಸರನ್ತೋ ಇಮಸ್ಮಿಂ ಬುದ್ಧುಪ್ಪಾದೇ ಕಪಿಲವತ್ಥುನಗರೇ ಅಮಿತೋದನಸ್ಸ ಸಕ್ಕಸ್ಸ ಗೇಹೇ ಪಟಿಸನ್ಧಿಂ ಗಣ್ಹಿ, ಅನುರುದ್ಧೋತಿಸ್ಸ ನಾಮಂ ಅಕಂಸು. ಸೋ ಮಹಾನಾಮಸಕ್ಕಸ್ಸ ಕನಿಟ್ಠಭಾತಾ, ಸತ್ಥು ಚೂಳಪಿತು ಪುತ್ತೋ ಪರಮಸುಖುಮಾಲೋ ಮಹಾಪುಞ್ಞೋ ಅಹೋಸಿ. ಏಕದಿವಸಂ ಕಿರ ಛಸು ಖತ್ತಿಯೇಸು ಪೂವೇ ಲಕ್ಖಂ ಕತ್ವಾ ಗುಳೇಹಿ ಕೀಳನ್ತೇಸು ಅನುರುದ್ಧೋ ಪರಾಜಿತೋ ಪೂವಾನಂ ಅತ್ಥಾಯ ಮಾತು ಸನ್ತಿಕಂ ಪಹಿಣಿ. ಸಾ ಮಹನ್ತಂ ಸುವಣ್ಣಥಾಲಂ ಪೂರೇತ್ವಾ ಪೂವೇ ಪೇಸೇಸಿ. ಪೂವೇ ಖಾದಿತ್ವಾ ಪುನ ಕೀಳನ್ತೋ ಪರಾಜಿತೋ ತಥೇವ ಪಹಿಣಿ. ಏವಂ ತಿಕ್ಖತ್ತುಂ ಪೂವೇಸು ಆಹಟೇಸು ಚತುತ್ಥೇ ವಾರೇ ಮಾತಾ ‘‘ಇದಾನಿ ಪೂವಾ ನತ್ಥೀ’’ತಿ ಪಹಿಣಿ. ತಸ್ಸಾ ವಚನಂ ಸುತ್ವಾ ‘‘ನತ್ಥೀ’’ತಿ ಪದಸ್ಸ ಅಸುತಪುಬ್ಬತಾಯ ‘‘ನತ್ಥಿಪೂವಾ ನಾಮ ಇದಾನಿ ಭವಿಸ್ಸನ್ತೀ’’ತಿ ಸಞ್ಞಂ ಕತ್ವಾ ‘‘ಗಚ್ಛ ನತ್ಥಿಪೂವೇ ಆಹರಾ’’ತಿ ಪೇಸೇಸಿ. ಅಥಸ್ಸ ಮಾತಾ ‘‘ನತ್ಥಿಪೂವೇ ಕಿರ, ಅಯ್ಯೇ, ದೇಥಾ’’ತಿ ವುತ್ತೇ ‘‘ಮಮ ಪುತ್ತೇನ ನತ್ಥೀತಿ ಪದಂ ನ ಸುತಪುಬ್ಬಂ, ಕಥಂ ನು ಖೋ ನತ್ಥಿಭಾವಂ ಜಾನಾಪೇಯ್ಯ’’ನ್ತಿ ಸುವಣ್ಣಪಾತಿಂ ಧೋವಿತ್ವಾ ಅಪರಾಯ ಸುವಣ್ಣಪಾತಿಯಾ ಪಟಿಕುಜ್ಜಿತ್ವಾ ‘‘ಹನ್ದ, ತಾತ, ಇಮಂ ಮಮ ಪುತ್ತಸ್ಸ ದೇಹೀ’’ತಿ ಪಹಿಣಿ. ತಸ್ಮಿಂ ಖಣೇ ನಗರಪರಿಗ್ಗಾಹಿಕಾ ದೇವತಾ ‘‘ಅಮ್ಹಾಕಂ ಸಾಮಿನಾ ಅನ್ನಭಾರಕಾಲೇ ಉಪರಿಟ್ಠಸ್ಸ ಪಚ್ಚೇಕಬುದ್ಧಸ್ಸ ಭಾಗಭತ್ತಂ ದತ್ವಾ ‘ನತ್ಥೀತಿ ಪದಮೇವ ನ ಸುಣೇಯ್ಯ’ನ್ತಿ ಪತ್ಥನಾ ನಾಮ ಠಪಿತಾ. ಸಚೇ ಮಯಂ ತಮತ್ಥಂ ಞತ್ವಾ ಅಜ್ಝುಪೇಕ್ಖೇಯ್ಯಾಮ, ಮುದ್ಧಾಪಿ ನೋ ಸತ್ತಧಾ ಫಲೇಯ್ಯಾ’’ತಿ ಚಿನ್ತೇತ್ವಾ ದಿಬ್ಬಪೂವೇಹಿ ಪಾತಿಂ ಪೂರಯಿಂಸು. ಸೋ ಪುರಿಸೋ ಪಾತಿಂ ಆಹರಿತ್ವಾ ತಸ್ಸ ಸನ್ತಿಕೇ ಠಪೇತ್ವಾ ವಿವರಿ. ತೇಸಂ ಗನ್ಧೋ ಸಕಲನಗರಂ ಫರಿ. ಪೂವೋ ಪನ ಮುಖೇ ಠಪಿತಮತ್ತೋವ ಸತ್ತರಸಹರಣಿಸಹಸ್ಸಾನಿ ಫರಿತ್ವಾ ಅಟ್ಠಾಸಿ.

ಅನುರುದ್ಧೋಪಿ ಚಿನ್ತೇಸಿ – ‘‘ನ ಮಂ ಮಞ್ಞೇ ಇತೋ ಪುಬ್ಬೇ ಮಾತಾ ಪಿಯಾಯತಿ. ನ ಹಿ ಮೇ ಅಞ್ಞದಾ ತಾಯ ನತ್ಥಿಪೂವಾ ನಾಮ ಪಕ್ಕಪುಬ್ಬಾ’’ತಿ. ಸೋ ಗನ್ತ್ವಾ ಮಾತರಂ ಏವಮಾಹ – ‘‘ಅಮ್ಮ, ನಾಹಂ ತವ ಪಿಯೋ’’ತಿ. ತಾತ, ಕಿಂ ವದೇಸಿ, ಮಮ ಅಕ್ಖೀಹಿಪಿ ಹದಯಮಂಸತೋಪಿ ತ್ವಂ ಪಿಯತರೋತಿ. ಸಚಾಹಂ, ಅಮ್ಮ, ತವ ಪಿಯೋ, ಕಸ್ಮಾ ಮಮ ಪುಬ್ಬೇ ಏವರೂಪೇ ನತ್ಥಿಪೂವೇ ನಾಮ ನ ಅದಾಸೀತಿ. ಸಾ ತಂ ಪುರಿಸಂ ಪುಚ್ಛಿ – ‘‘ತಾತ, ಕಿಞ್ಚಿ ಪಾತಿಯಂ ಅಹೋಸೀ’’ತಿ. ಆಮ, ಅಯ್ಯೇ, ಪೂವಾನಂ ಪಾತಿ ಪರಿಪುಣ್ಣಾ ಅಹೋಸಿ, ನ ಮೇ ಏವರೂಪಾ ದಿಟ್ಠಪುಬ್ಬಾತಿ. ಸಾ ಚಿನ್ತೇಸಿ – ‘‘ಪುತ್ತೋ ಮೇ ಕತಪುಞ್ಞೋ, ದೇವತಾಹಿಸ್ಸ ದಿಬ್ಬಪೂವಾ ಪಹಿತಾ ಭವಿಸ್ಸನ್ತೀ’’ತಿ. ಸೋಪಿ ಮಾತರಂ ಆಹ – ‘‘ಅಮ್ಮ, ನ ಮಯಾ ಏವರೂಪಾ ಪೂವಾ ಖಾದಿತಪುಬ್ಬಾ, ಇತೋ ಪಟ್ಠಾಯ ಮೇ ನತ್ಥಿಪೂವಮೇವ ಪಚೇಯ್ಯಾಸೀ’’ತಿ. ಸಾ ತತೋ ಪಟ್ಠಾಯ ತೇನ ‘‘ಪೂವೇ ಖಾದಿತುಕಾಮೋಮ್ಹೀ’’ತಿ ವುತ್ತಕಾಲೇ ಸುವಣ್ಣಪಾತಿಂ ಧೋವಿತ್ವಾ ಅಞ್ಞಾಯ ಪಾತಿಯಾ ಪಟಿಕುಜ್ಜಿತ್ವಾ ಪಹಿಣತಿ, ದೇವತಾ ಪಾತಿಂ ಪೂರೇನ್ತಿ. ಏವಂ ಸೋ ಅಗಾರಮಜ್ಝೇ ವಸನ್ತೋ ನತ್ಥೀತಿ ಪದಸ್ಸ ಅತ್ಥಂ ಅಜಾನಿತ್ವಾ ದಿಬ್ಬಪೂವೇಯೇವ ಪರಿಭುಞ್ಜಿ.

ಸತ್ಥು ಪನ ಪರಿವಾರತ್ಥಂ ಕುಲಪಟಿಪಾಟಿಯಾ ಸಾಕಿಯಕುಮಾರೇಸು ಪಬ್ಬಜನ್ತೇಸು ಮಹಾನಾಮೇನ ಸಕ್ಕೇನ, ‘‘ತಾತ, ಅಮ್ಹಾಕಂ ಕುಲಾ ಕೋಚಿ ಪಬ್ಬಜಿತೋ ನತ್ಥಿ, ತಯಾ ವಾ ಪಬ್ಬಜಿತಬ್ಬಂ, ಮಯಾ ವಾ’’ತಿ ವುತ್ತೇ ಸೋ ಆಹ – ‘‘ಅಹಂ ಅತಿಸುಖುಮಾಲೋ ಪಬ್ಬಜಿತುಂ ನ ಸಕ್ಖಿಸ್ಸಾಮೀ’’ತಿ. ತೇನ ಹಿ ಕಮ್ಮನ್ತಂ ಉಗ್ಗಣ್ಹ, ಅಹಂ ಪಬ್ಬಜಿಸ್ಸಾಮೀತಿ. ಕೋ ಏಸ ಕಮ್ಮನ್ತೋ ನಾಮಾತಿ? ಸೋ ಹಿ ಭತ್ತಸ್ಸ ಉಟ್ಠಾನಟ್ಠಾನಮ್ಪಿ ನ ಜಾನಾತಿ, ಕಮ್ಮನ್ತಂ ಕಿಮೇವ ಜಾನಿಸ್ಸತಿ, ತಸ್ಮಾ ಏವಮಾಹ. ಏಕದಿವಸಞ್ಹಿ ಅನುರುದ್ಧೋ ಭದ್ದಿಯೋ ಕಿಮಿಲೋತಿ ತಯೋ ಜನಾ ‘‘ಭತ್ತಂ ನಾಮ ಕಹಂ ಉಟ್ಠಾತೀ’’ತಿ ಮನ್ತಯಿಂಸು. ತೇಸು ಕಿಮಿಲೋ ‘‘ಕೋಟ್ಠೇಸು ಉಟ್ಠಾತೀ’’ತಿ ಆಹ. ಸೋ ಕಿರೇಕದಿವಸಂ ವೀಹೀ ಕೋಟ್ಠಮ್ಹಿ ಪಕ್ಖಿಪನ್ತೇ ಅದ್ದಸ, ತಸ್ಮಾ ‘‘ಕೋಟ್ಠೇ ಭತ್ತಂ ಉಪ್ಪಜ್ಜತೀ’’ತಿ ಸಞ್ಞಾಯ ಏವಮಾಹ. ಅಥ ನಂ ಭದ್ದಿಯೋ ‘‘ತ್ವಂ ನ ಜಾನಾಸೀ’’ತಿ ವತ್ವಾ ‘‘ಭತ್ತಂ ನಾಮ ಉಕ್ಖಲಿಯಂ ಉಟ್ಠಾತೀ’’ತಿ ಆಹ. ಸೋ ಕಿರೇಕದಿವಸಂ ಉಕ್ಖಲಿತೋ ಭತ್ತಂ ವಡ್ಢೇನ್ತೇ ದಿಸ್ವಾ ‘‘ಏತ್ಥೇವೇತಂ ಉಪ್ಪಜ್ಜತೀ’’ತಿ ಸಞ್ಞಮಕಾಸಿ, ತಸ್ಮಾ ಏವಮಾಹ. ಅನುರುದ್ಧೋ ತೇ ಉಭೋಪಿ ‘‘ತುಮ್ಹೇ ನ ಜಾನಾಥಾ’’ತಿ ವತ್ವಾ ‘‘ಭತ್ತಂ ನಾಮ ರತನುಬ್ಬೇಧಮಕುಳಾಯ ಮಹಾಸುವಣ್ಣಪಾತಿಯಂ ಉಟ್ಠಾತೀ’’ತಿ ಆಹ. ತೇನ ಕಿರ ನೇವ ವೀಹಿಂ ಕೋಟ್ಟೇನ್ತಾ, ನ ಭತ್ತಂ ಪಚನ್ತಾ ದಿಟ್ಠಪುಬ್ಬಾ, ಸುವಣ್ಣಪಾತಿಯಂ ವಡ್ಢೇತ್ವಾ ಪುರತೋ ಠಪಿತಭತ್ತಮೇವ ಪಸ್ಸತಿ, ತಸ್ಮಾ ‘‘ಪಾತಿಯಂಯೇವೇತಂ ಉಪ್ಪಜ್ಜತೀ’’ತಿ ಸಞ್ಞಮಕಾಸಿ, ತಸ್ಮಾ ಏವಮಾಹ. ಏವಂ ಭತ್ತುಟ್ಠಾನಟ್ಠಾನಮ್ಪಿ ಅಜಾನನ್ತೋ ಮಹಾಪುಞ್ಞೋ ಕುಲಪುತ್ತೋ ಕಮ್ಮನ್ತೇ ಕಿಂ ಜಾನಿಸ್ಸತಿ.

ಸೋ ‘‘ಏಹಿ ಖೋ ತೇ, ಅನುರುದ್ಧ, ಘರಾವಾಸತ್ಥಂ ಅನುಸಾಸಿಸ್ಸಾಮಿ, ಪಠಮಂ ಖೇತ್ತಂ ಕಸಾಪೇತಬ್ಬ’’ನ್ತಿಆದಿನಾ ನಯೇನ ಭಾತರಾ ವುತ್ತಾನಂ ಕಮ್ಮನ್ತಾನಂ ಅಪರಿಯನ್ತಭಾವಂ ಸುತ್ವಾ ‘‘ನ ಮೇ ಘರಾವಾಸೇನ ಅತ್ಥೋ’’ತಿ ಮಾತರಂ ಆಪುಚ್ಛಿತ್ವಾ ಭದ್ದಿಯಪಮುಖೇಹಿ ಪಞ್ಚಹಿ ಸಾಕಿಯಕುಮಾರೇಹಿ ಸದ್ಧಿಂ ನಿಕ್ಖಮಿತ್ವಾ ಅನುಪಿಯಮ್ಬವನೇ ಸತ್ಥಾರಂ ಉಪಸಙ್ಕಮಿತ್ವಾ ಪಬ್ಬಜಿ. ಪಬ್ಬಜಿತ್ವಾ ಚ ಪನ ಸಮ್ಮಾಪಟಿಪದಂ ಪಟಿಪನ್ನೋ ಅನುಪುಬ್ಬೇನ ತಿಸ್ಸೋ ವಿಜ್ಜಾ ಸಚ್ಛಿಕತ್ವಾ ದಿಬ್ಬೇನ ಚಕ್ಖುನಾ ಏಕಾಸನೇ ನಿಸಿನ್ನೋವ ಹತ್ಥತಲೇ ಠಪಿತಆಮಲಕಾನಿ ವಿಯ ಸಹಸ್ಸಲೋಕಧಾತುಯೋ ಓಲೋಕನಸಮತ್ಥೋ ಹುತ್ವಾ –

‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ತೇವಿಜ್ಜೋ ಇದ್ಧಿಪತ್ತೋಮ್ಹಿ, ಕತಂ ಬುದ್ಧಸ್ಸ ಸಾಸನ’’ನ್ತಿ. (ಥೇರಗಾ. ೩೩೨, ೫೬೨) –

ಉದಾನಂ ಉದಾನೇತ್ವಾ ‘‘ಕಿಂ ನು ಖೋ ಮೇ ಕತ್ವಾ ಅಯಂ ಸಮ್ಪತ್ತಿ ಲದ್ಧಾ’’ತಿ ಓಲೋಕೇನ್ತೋ ‘‘ಪದುಮುತ್ತರಪಾದಮೂಲೇ ಪತ್ಥನಂ ಠಪೇಸಿ’’ನ್ತಿ ಞತ್ವಾ ಪುನ ‘‘ಸಂಸಾರೇ ಸಂಸರನ್ತೋ ಅಸುಕಸ್ಮಿಂ ನಾಮ ಕಾಲೇ ಬಾರಾಣಸಿಯಂ ಸುಮನಸೇಟ್ಠಿಂ ನಿಸ್ಸಾಯ ಜೀವನ್ತೋ ಅನ್ನಭಾರೋ ನಾಮ ಅಹೋಸಿ’’ನ್ತಿಪಿ ಞತ್ವಾ –

‘‘ಅನ್ನಭಾರೋ ಪುರೇ ಆಸಿಂ, ದಲಿದ್ದೋ ತಿಣಹಾರಕೋ;

ಪಿಣ್ಡಪಾತೋ ಮಯಾ ದಿನ್ನೋ, ಉಪರಿಟ್ಠಸ್ಸ ತಾದಿನೋ’’ತಿ. –

ಆಹ. ಅಥಸ್ಸ ಏತದಹೋಸಿ – ‘‘ಯೋ ಸೋ ತದಾ ಮಯಾ ಉಪರಿಟ್ಠಸ್ಸ ದಿನ್ನಪಿಣ್ಡಪಾತತೋ ಕಹಾಪಣೇ ದತ್ವಾ ಪತ್ತಿಂ ಅಗ್ಗಹೇಸಿ, ಮಮ ಸಹಾಯಕೋ ಸುಮನಸೇಟ್ಠಿ ಕಹಂ ನು ಖೋ ಸೋ ಏತರಹಿ ನಿಬ್ಬತ್ತೋ’’ತಿ. ಅಥ ನಂ ‘‘ವಿಞ್ಝಾಟವಿಯಂ ಪಬ್ಬತಪಾದೇ ಮುಣ್ಡನಿಗಮೋ ನಾಮ ಅತ್ಥಿ, ತತ್ಥ ಮಹಾಮುಣ್ಡಸ್ಸ ನಾಮ ಉಪಾಸಕಸ್ಸ ಮಹಾಸುಮನೋ ಚೂಳಸುಮನೋತಿ ದ್ವೇ ಪುತ್ತಾ, ತೇಸು ಸೋ ಚೂಳಸುಮನೋ ಹುತ್ವಾ ನಿಬ್ಬತ್ತೋ’’ತಿ ಅದ್ದಸ. ದಿಸ್ವಾ ಚ ಪನ ಚಿನ್ತೇಸಿ – ‘‘ಅತ್ಥಿ ನು ಖೋ ತತ್ಥ ಮಯಿ ಗತೇ ಉಪಕಾರೋ, ನತ್ಥೀ’’ತಿ. ಸೋ ಉಪಧಾರೇನ್ತೋ ಇದಂ ಅದ್ದಸ ‘‘ಸೋ ತತ್ಥ ಮಯಿ ಗತೇ ಸತ್ತವಸ್ಸಿಕೋವ ನಿಕ್ಖಮಿತ್ವಾ ಪಬ್ಬಜಿಸ್ಸತಿ, ಖುರಗ್ಗೇಯೇವ ಚ ಅರಹತ್ತಂ ಪಾಪುಣಿಸ್ಸತೀ’’ತಿ. ದಿಸ್ವಾ ಚ ಪನ ಉಪಕಟ್ಠೇ ಅನ್ತೋವಸ್ಸೇ ಆಕಾಸೇನ ಗನ್ತ್ವಾ ಗಾಮದ್ವಾರೇ ಓತರಿ. ಮಹಾಮುಣ್ಡೋ ಪನ ಉಪಾಸಕೋ ಥೇರಸ್ಸ ಪುಬ್ಬೇಪಿ ವಿಸ್ಸಾಸಿಕೋ ಏವ. ಸೋ ಥೇರಂ ಪಿಣ್ಡಪಾತಕಾಲೇ ಚೀವರಂ ಪಾರುಪನ್ತಂ ದಿಸ್ವಾ ಪುತ್ತಂ ಮಹಾಸುಮನಂ ಆಹ – ‘‘ತಾತ, ಅಯ್ಯೋ, ಮೇ ಅನುರುದ್ಧತ್ಥೇರೋ ಆಗತೋ, ಯಾವಸ್ಸ ಅಞ್ಞೋ ಕೋಚಿ ಪತ್ತಂ ನ ಗಣ್ಹಾತಿ, ತಾವಸ್ಸ ಗನ್ತ್ವಾ ಪತ್ತಂ ಗಣ್ಹ, ಅಹಂ ಆಸನಂ ಪಞ್ಞಾಪೇಸ್ಸಾಮೀ’’ತಿ. ಸೋ ತಥಾ ಅಕಾಸಿ. ಉಪಾಸಕೋ ಥೇರಂ ಅನ್ತೋನಿವೇಸನೇ ಸಕ್ಕಚ್ಚಂ ಪರಿವಿಸಿತ್ವಾ ತೇಮಾಸಂ ವಸನತ್ಥಾಯ ಪಟಿಞ್ಞಂ ಗಣ್ಹಿ, ಥೇರೋಪಿ ಅಧಿವಾಸೇಸಿ.

ಅಥ ನಂ ಏಕದಿವಸಂ ಪಟಿಜಗ್ಗನ್ತೋ ವಿಯ ತೇಮಾಸಂ ಪಟಿಜಗ್ಗಿತ್ವಾ ಮಹಾಪವಾರಣಾಯ ತಿಚೀವರಞ್ಚೇವ ಗುಳತೇಲತಣ್ಡುಲಾದೀನಿ ಚ ಆಹರಿತ್ವಾ ಥೇರಸ್ಸ ಪಾದಮೂಲೇ ಠಪೇತ್ವಾ ‘‘ಗಣ್ಹಥ, ಭನ್ತೇ’’ತಿ ಆಹ. ‘‘ಅಲಂ, ಉಪಾಸಕ, ನ ಮೇ ಇಮಿನಾ ಅತ್ಥೋ’’ತಿ. ‘‘ತೇನ ಹಿ, ಭನ್ತೇ, ವಸ್ಸಾವಾಸಿಕಲಾಭೋ ನಾಮೇಸ, ಗಣ್ಹಥ ನ’’ನ್ತಿ? ‘‘ನ ಗಣ್ಹಾಮಿ, ಉಪಾಸಕಾ’’ತಿ. ‘‘ಕಿಮತ್ಥಂ ನ ಗಣ್ಹಥ, ಭನ್ತೇ’’ತಿ? ‘‘ಮಯ್ಹಂ ಸನ್ತಿಕೇ ಕಪ್ಪಿಯಕಾರಕೋ ಸಾಮಣೇರೋಪಿ ನತ್ಥೀ’’ತಿ. ‘‘ತೇನ ಹಿ, ಭನ್ತೇ, ಮಮ ಪುತ್ತೋ ಮಹಾಸುಮನೋ ಸಾಮಣೇರೋ ಭವಿಸ್ಸತೀ’’ತಿ. ‘‘ನ ಮೇ, ಉಪಾಸಕ, ಮಹಾಸುಮನೇನತ್ಥೋ’’ತಿ. ‘‘ತೇನ ಹಿ, ಭನ್ತೇ, ಚೂಳಸುಮನಂ ಪಬ್ಬಾಜೇಥಾ’’ತಿ. ಥೇರೋ ‘‘ಸಾಧೂ’’ತಿ ಸಮ್ಪಟಿಚ್ಛಿತ್ವಾ ಚೂಳಸುಮನಂ ಪಬ್ಬಾಜೇಸಿ. ಸೋ ಖುರಗ್ಗೇಯೇವ ಅರಹತ್ತಂ ಪಾಪುಣಿ. ಥೇರೋ ತೇನ ಸದ್ಧಿಂ ಅಡ್ಢಮಾಸಮತ್ತಂ ತತ್ಥೇವ ವಸಿತ್ವಾ ‘‘ಸತ್ಥಾರಂ ಪಸ್ಸಿಸ್ಸಾಮೀ’’ತಿ ತಸ್ಸ ಞಾತಕೇ ಆಪುಚ್ಛಿತ್ವಾ ಆಕಾಸೇನೇವ ಗನ್ತ್ವಾ ಹಿಮವನ್ತಪದೇಸೇ ಅರಞ್ಞಕುಟಿಕಾಯ ಓತರಿ.

ಥೇರೋ ಪನ ಪಕತಿಯಾಪಿ ಆರದ್ಧವೀರಿಯೋ, ತಸ್ಸ ತತ್ಥ ಪುಬ್ಬರತ್ತಾಪರರತ್ತಂ ಚಙ್ಕಮನ್ತಸ್ಸ ಉದರವಾತೋ ಸಮುಟ್ಠಹಿ. ಅಥ ನಂ ಕಿಲನ್ತರೂಪಂ ದಿಸ್ವಾ ಸಾಮಣೇರೋ ಪುಚ್ಛಿ – ‘‘ಭನ್ತೇ, ಕಿಂ ವೋ ರುಜ್ಜತೀ’’ತಿ? ‘‘ಉದರವಾತೋ ಮೇ ಸಮುಟ್ಠಿತೋ’’ತಿ. ‘‘ಅಞ್ಞದಾಪಿ ಸಮುಟ್ಠಿತಪುಬ್ಬೋ, ಭನ್ತೇ’’ತಿ? ‘‘ಆಮಾವುಸೋ’’ತಿ. ‘‘ಕೇನ ಫಾಸುಕಂ ಹೋತಿ, ಭನ್ತೇ’’ತಿ? ‘‘ಅನೋತತ್ತತೋ ಪಾನೀಯೇ ಲದ್ಧೇ ಫಾಸುಕಂ ಹೋತಿ, ಆವುಸೋ’’ತಿ. ‘‘ತೇನ ಹಿ, ಭನ್ತೇ, ಆಹರಾಮೀ’’ತಿ. ‘‘ಸಕ್ಖಿಸ್ಸಸಿ ಸಾಮಣೇರಾ’’ತಿ? ‘‘ಆಮ, ಭನ್ತೇ’’ತಿ. ತೇನ ಹಿ ಅನೋತತ್ತೇ ಪನ್ನಗೋ ನಾಮ ನಾಗರಾಜಾ ಮಂ ಜಾನಾತಿ, ತಸ್ಸ ಆಚಿಕ್ಖಿತ್ವಾ ಭೇಸಜ್ಜತ್ಥಾಯ ಏಕಂ ಪಾನೀಯವಾರಕಂ ಆಹರಾತಿ. ಸೋ ಸಾಧೂತಿ ಉಪಜ್ಝಾಯಂ ವನ್ದಿತ್ವಾ ವೇಹಾಸಂ ಅಬ್ಭುಗ್ಗನ್ತ್ವಾ ಪಞ್ಚಯೋಜನಸತಂ ಠಾನಂ ಅಗಮಾಸಿ. ತಂ ದಿವಸಂ ಪನ ನಾಗರಾಜಾ ನಾಗನಾಟಕಪರಿವುತೋ ಉದಕಕೀಳಂ ಕೀಳಿತುಕಾಮೋ ಹೋತಿ. ಸೋ ಸಾಮಣೇರಂ ಆಗಚ್ಛನ್ತಂ ದಿಸ್ವಾವ ಕುಜ್ಝಿ, ‘‘ಅಯಂ ಮುಣ್ಡಕಸಮಣೋ ಅತ್ತನೋ ಪಾದಪಂಸುಂ ಮಮ ಮತ್ಥಕೇ ಓಕಿರನ್ತೋ ವಿಚರತಿ, ಅನೋತತ್ತೇ ಪಾನೀಯತ್ಥಾಯ ಆಗತೋ ಭವಿಸ್ಸತಿ, ನ ದಾನಿಸ್ಸ ಪಾನೀಯಂ ದಸ್ಸಾಮೀ’’ತಿ ಪಣ್ಣಾಸಯೋಜನಿಕಂ ಅನೋತತ್ತದಹಂ ಮಹಾಪಾತಿಯಾ ಉಕ್ಖಲಿಂ ಪಿದಹನ್ತೋ ವಿಯ ಫಣೇನ ಪಿದಹಿತ್ವಾ ನಿಪಜ್ಜಿ. ಸಾಮಣೇರೋ ನಾಗರಾಜಸ್ಸ ಆಕಾರಂ ಓಲೋಕೇತ್ವಾವ ‘‘ಕುದ್ಧೋ ಅಯ’’ನ್ತಿ ಞತ್ವಾ ಇಮಂ ಗಾಥಮಾಹ –

‘‘ಸುಣೋಹಿ ಮೇ ನಾಗರಾಜ, ಉಗ್ಗತೇಜ ಮಹಬ್ಬಲ;

ದೇಹಿ ಮೇ ಪಾನೀಯಘಟಂ, ಭೇಸಜ್ಜತ್ಥಮ್ಹಿ ಆಗತೋ’’ತಿ.

ತಂ ಸುತ್ವಾ ನಾಗರಾಜಾ ಇಮಂ ಗಾಥಮಾಹ –

‘‘ಪುರತ್ಥಿಮಸ್ಮಿಂ ದಿಸಾಭಾಗೇ, ಗಙ್ಗಾ ನಾಮ ಮಹಾನದೀ;

ಮಹಾಸಮುದ್ದಮಪ್ಪೇತಿ, ತತೋ ತ್ವಂ ಪಾನೀಯಂ ಹರಾ’’ತಿ.

ತಂ ಸುತ್ವಾ ಸಾಮಣೇರೋ ‘‘ಅಯಂ ನಾಗರಾಜಾ ಅತ್ತನೋ ಇಚ್ಛಾಯ ನ ದಸ್ಸತಿ, ಅಹಂ ಬಲಕ್ಕಾರಂ ಕತ್ವಾ ಆನುಭಾವಂ ಜಾನಾಪೇತ್ವಾ ಇಮಂ ಅಭಿಭವಿತ್ವಾವ ಪಾನೀಯಂ ಗಣ್ಹಿಸ್ಸಾಮೀ’’ತಿ ಚಿನ್ತೇತ್ವಾ, ‘‘ಮಹಾರಾಜ, ಉಪಜ್ಝಾಯೋ ಮಂ ಅನೋತತ್ತತೋವ ಪಾನೀಯಂ ಆಹರಾಪೇತಿ, ತೇನಾಹಂ ಇದಮೇವ ಹರಿಸ್ಸಾಮಿ, ಅಪೇಹಿ, ಮಾ ಮಂ ವಾರೇಹೀ’’ತಿ ವತ್ವಾ ಇಮಂ ಗಾಥಮಾಹ –

‘‘ಇತೋವ ಪಾನೀಯಂ ಹಾಸ್ಸಂ, ಇಮಿನಾವಮ್ಹಿ ಅತ್ಥಿಕೋ;

ಯದಿ ತೇ ಥಾಮಬಲಂ ಅತ್ಥಿ, ನಾಗರಾಜ ನಿವಾರಯಾ’’ತಿ.

ಅಥ ನಂ ನಾಗರಾಜಾ ಆಹ –

‘‘ಸಾಮಣೇರ ಸಚೇ ಅತ್ಥಿ, ತವ ವಿಕ್ಕಮ ಪೋರಿಸಂ;

ಅಭಿನನ್ದಾಮಿ ತೇ ವಾಚಂ, ಹರಸ್ಸು ಪಾನೀಯಂ ಮಮಾ’’ತಿ.

ಅಥ ನಂ ಸಾಮಣೇರೋ ‘‘ಏವಂ, ಮಹಾರಾಜ, ಹರಾಮೀ’’ತಿ ವತ್ವಾ ‘‘ಯದಿ ಸಕ್ಕೋನ್ತೋ ಹರಾಹೀ’’ತಿ ವುತ್ತೇ – ‘‘ತೇನ ಹಿ ಸುಟ್ಠು ಜಾನಸ್ಸೂ’’ತಿ ತಿಕ್ಖತ್ತುಂ ಪಟಿಞ್ಞಂ ಗಹೇತ್ವಾ ‘‘ಬುದ್ಧಸಾಸನಸ್ಸ ಆನುಭಾವಂ ದಸ್ಸೇತ್ವಾ ಮಯಾ ಪಾನೀಯಂ ಹರಿತುಂ ವಟ್ಟತೀ’’ತಿ ಚಿನ್ತೇತ್ವಾ ಆಕಾಸಟ್ಠದೇವತಾನಂ ತಾವ ಸನ್ತಿಕಂ ಅಗಮಾಸಿ. ತಾ ಆಗನ್ತ್ವಾ ವನ್ದಿತ್ವಾ ‘‘ಕಿಂ, ಭನ್ತೇ’’ತಿ ವತ್ವಾ ಅಟ್ಠಂಸು. ‘‘ಏತಸ್ಮಿಂ ಅನೋತತ್ತದಹಪಿಟ್ಠೇ ಪನ್ನಗನಾಗರಾಜೇನ ಸದ್ಧಿಂ ಮಮ ಸಙ್ಗಾಮೋ ಭವಿಸ್ಸತಿ, ತತ್ಥ ಗನ್ತ್ವಾ ಜಯಪರಾಜಯಂ ಓಲೋಕೇಥಾ’’ತಿ ಆಹ. ಸೋ ಏತೇನೇವ ನೀಹಾರೇನ ಚತ್ತಾರೋ ಲೋಕಪಾಲೇ ಸಕ್ಕಸುಯಾಮಸನ್ತುಸಿತಪರನಿಮ್ಮಿತವಸವತ್ತೀ ಚ ಉಪಸಙ್ಕಮಿತ್ವಾ ತಮತ್ಥಂ ಆರೋಚೇಸಿ. ತತೋ ಪರಂ ಪಟಿಪಾಟಿಯಾ ಯಾವ ಬ್ರಹ್ಮಲೋಕಂ ಗನ್ತ್ವಾ ತತ್ಥ ತತ್ಥ ಬ್ರಹ್ಮೇಹಿ ಆಗನ್ತ್ವಾ ವನ್ದಿತ್ವಾ ಠಿತೇಹಿ ‘‘ಕಿಂ, ಭನ್ತೇ’’ತಿ ಪುಟ್ಠೋ ತಮತ್ಥಂ ಆರೋಚೇಸಿ. ಏವಂ ಸೋ ಅಸಞ್ಞೇ ಚ ಅರೂಪಿಬ್ರಹ್ಮಾನೋ ಚ ಠಪೇತ್ವಾ ಸಬ್ಬತ್ಥ ಮುಹುತ್ತೇನೇವ ಆಹಿಣ್ಡಿತ್ವಾ ಆರೋಚೇಸಿ. ತಸ್ಸ ವಚನಂ ಸುತ್ವಾ ಸಬ್ಬಾಪಿ ದೇವತಾ ಅನೋತತ್ತದಹಪಿಟ್ಠೇ ನಾಳಿಯಂ ಪಕ್ಖಿತ್ತಾನಿ ಪಿಟ್ಠಚುಣ್ಣಾನಿ ವಿಯ ಆಕಾಸಂ ನಿರನ್ತರಂ ಪೂರೇತ್ವಾ ಸನ್ನಿಪತಿಂಸು. ಸನ್ನಿಪತಿತೇ ದೇವಸಙ್ಘೇ ಸಾಮಣೇರೋ ಆಕಾಸೇ ಠತ್ವಾ ನಾಗರಾಜಂ ಆಹ –

‘‘ಸುಣೋಹಿ ಮೇ ನಾಗರಾಜ, ಉಗ್ಗತೇಜ ಮಹಬ್ಬಲ;

ದೇಹಿ ಮೇ ಪಾನೀಯಘಟಂ, ಭೇಸಜ್ಜತ್ಥಮ್ಹಿ ಆಗತೋ’’ತಿ.

ಅಥ ನಂ ನಾಗೋ ಆಹ –

‘‘ಸಾಮಣೇರ ಸಚೇ ಅತ್ಥಿ, ತವ ವಿಕ್ಕಮ ಪೋರಿಸಂ;

ಅಭಿನನ್ದಾಮಿ ತೇ ವಾಚಂ, ಹರಸ್ಸು ಪಾನೀಯಂ ಮಮಾ’’ತಿ.

ಸೋ ತಿಕ್ಖತ್ತುಂ ನಾಗರಾಜಸ್ಸ ಪಟಿಞ್ಞಂ ಗಹೇತ್ವಾ ಆಕಾಸೇ ಠಿತಕೋವ ದ್ವಾದಸಯೋಜನಿಕಂ ಬ್ರಹ್ಮತ್ತಭಾವಂ ಮಾಪೇತ್ವಾ ಆಕಾಸತೋ ಓರುಯ್ಹ ನಾಗರಾಜಸ್ಸ ಫಣೇ ಅಕ್ಕಮಿತ್ವಾ ಅಧೋಮುಖಂ ನಿಪ್ಪೀಳೇಸಿ, ತಾವದೇವ ಬಲವತಾ ಪುರಿಸೇನ ಅಕ್ಕನ್ತಅಲ್ಲಚಮ್ಮಂ ವಿಯ ನಾಗರಾಜಸ್ಸ ಫಣೇ ಅಕ್ಕನ್ತಮತ್ತೇ ಓಗಲಿತ್ವಾ ದಬ್ಬಿಮತ್ತಾ ಫಣಪುಟಕಾ ಅಹೇಸುಂ. ನಾಗರಾಜಸ್ಸ ಫಣೇಹಿ ಮುತ್ತಮುತ್ತಟ್ಠಾನತೋ ತಾಲಕ್ಖನ್ಧಪಮಾಣಾ ಉದಕವಟ್ಟಿಯೋ ಉಗ್ಗಞ್ಛಿಂಸು. ಸಾಮಣೇರೋ ಆಕಾಸೇಯೇವ ಪಾನೀಯವಾರಕಂ ಪೂರೇಸಿ. ದೇವಸಙ್ಘೋ ಸಾಧುಕಾರಮದಾಸಿ. ಅಥ ನಾಗರಾಜಾ ಲಜ್ಜಿತ್ವಾ ಸಾಮಣೇರಸ್ಸ ಕುಜ್ಝಿ, ಜಯಕುಸುಮವಣ್ಣಾನಿಸ್ಸ ಅಕ್ಖೀನಿ ಅಹೇಸುಂ. ಸೋ ‘‘ಅಯಂ ಮಂ ದೇವಸಙ್ಘಂ ಸನ್ನಿಪಾತೇತ್ವಾ ಪಾನೀಯಂ ಗಹೇತ್ವಾ ಲಜ್ಜಾಪೇಸಿ, ಏತಂ ಗಹೇತ್ವಾ ಮುಖೇ ಹತ್ಥಂ ಪಕ್ಖಿಪಿತ್ವಾ ಹದಯಮಂಸಂ ವಾಸ್ಸ ಮದ್ದಾಮಿ, ಪಾದೇ ವಾ ನಂ ಗಹೇತ್ವಾ ಪಾರಗಙ್ಗಾಯಂ ಖಿಪಾಮೀ’’ತಿ ವೇಗೇನ ಅನುಬನ್ಧಿ. ಅನುಬನ್ಧನ್ತೋಪಿ ನಂ ಪಾಪುಣಿತುಂ ನಾಸಕ್ಖಿಯೇವ. ಸಾಮಣೇರೋ ಗನ್ತ್ವಾ ಉಪಜ್ಝಾಯಸ್ಸ ಹತ್ಥೇ ಪಾನೀಯಂ ಠಪೇತ್ವಾ ‘‘ಪಿವಥ, ಭನ್ತೇ’’ತಿ ಆಹ. ನಾಗರಾಜಾಪಿ ಪಚ್ಛತೋ ಆಗನ್ತ್ವಾ, ‘‘ಭನ್ತೇ ಅನುರುದ್ಧ, ಸಾಮಣೇರೋ ಮಯಾ ಅದಿನ್ನಮೇವ ಪಾನೀಯಂ ಗಹೇತ್ವಾ ಆಗತೋ, ಮಾ ಪಿವಿತ್ಥಾ’’ತಿ ಆಹ. ಏವಂ ಕಿರ ಸಾಮಣೇರಾತಿ. ‘‘ಪಿವಥ, ಭನ್ತೇ, ಇಮಿನಾ ಮೇ ದಿನ್ನಂ ಪಾನೀಯಂ ಆಹಟ’’ನ್ತಿ ಆಹ. ಥೇರೋ ‘‘ಖೀಣಾಸವಸಾಮಣೇರಸ್ಸ ಮುಸಾಕಥನಂ ನಾಮ ನತ್ಥೀ’’ತಿ ಞತ್ವಾ ಪಾನೀಯಂ ಪಿವಿ. ತಙ್ಖಣಞ್ಞೇವಸ್ಸ ಆಬಾಧೋ ಪಟಿಪಸ್ಸಮ್ಭಿ. ಪುನ ನಾಗೋ ಥೇರಂ ಆಹ – ‘‘ಭನ್ತೇ, ಸಾಮಣೇರೇನಮ್ಹಿ ಸಬ್ಬಂ ದೇವಗಣಂ ಸನ್ನಿಪಾತೇತ್ವಾ ಲಜ್ಜಾಪಿತೋ, ಅಹಮಸ್ಸ ಹದಯಂ ವಾ ಫಾಲೇಸ್ಸಾಮಿ, ಪಾದೇ ವಾ ನಂ ಗಹೇತ್ವಾ ಪಾರಗಙ್ಗಾಯ ಖಿಪಿಸ್ಸಾಮೀ’’ತಿ. ಮಹಾರಾಜ, ಸಾಮಣೇರೋ ಮಹಾನುಭಾವೋ, ತುಮ್ಹೇ ಸಾಮಣೇರೇನ ಸದ್ಧಿಂ ಸಙ್ಗಾಮೇತುಂ ನ ಸಕ್ಖಿಸ್ಸಥ, ಖಮಾಪೇತ್ವಾ ನಂ ಗಚ್ಛಥಾತಿ. ಸೋ ಸಯಮ್ಪಿ ಸಾಮಣೇರಸ್ಸ ಆನುಭಾವಂ ಜಾನಾತಿಯೇವ, ಲಜ್ಜಾಯ ಪನ ಅನುಬನ್ಧಿತ್ವಾ ಆಗತೋ. ಅಥ ನಂ ಥೇರಸ್ಸ ವಚನೇನ ಖಮಾಪೇತ್ವಾ ತೇನ ಸದ್ಧಿಂ ಮಿತ್ತಸನ್ಥವಂ ಕತ್ವಾ ‘‘ಇತೋ ಪಟ್ಠಾಯ ಅನೋತತ್ತಉದಕೇನ ಅತ್ಥೇ ಸತಿ ತುಮ್ಹಾಕಂ ಆಗಮನಕಿಚ್ಚಂ ನತ್ಥಿ, ಮಯ್ಹಂ ಪಹಿಣೇಯ್ಯಾಥ, ಅಹಮೇವ ಆಹರಿತ್ವಾ ದಸ್ಸಾಮೀ’’ತಿ ವತ್ವಾ ಪಕ್ಕಾಮಿ.

ಥೇರೋಪಿ ಸಾಮಣೇರಂ ಆದಾಯ ಪಾಯಾಸಿ. ಸತ್ಥಾ ಥೇರಸ್ಸ ಆಗಮನಭಾವಂ ಞತ್ವಾ ಮಿಗಾರಮಾತುಪಾಸಾದೇ ಥೇರಸ್ಸ ಆಗಮನಂ ಓಲೋಕೇನ್ತೋ ನಿಸೀದಿ. ಭಿಕ್ಖೂಪಿ ಥೇರಂ ಆಗಚ್ಛನ್ತಂ ದಿಸ್ವಾ ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇಸುಂ. ಅಥೇಕಚ್ಚೇ ಸಾಮಣೇರಂ ಸೀಸೇಪಿ ಕಣ್ಣೇಸುಪಿ ಬಾಹಾಯಮ್ಪಿ ಗಹೇತ್ವಾ ಸಞ್ಚಾಲೇತ್ವಾ ‘‘ಕಿಂ, ಸಾಮಣೇರ ಚೂಳಕನಿಟ್ಠ, ನ ಉಕ್ಕಣ್ಠಿತೋಸೀ’’ತಿ ಆಹಂಸು. ಸತ್ಥಾ ತೇಸಂ ಕಿರಿಯಂ ದಿಸ್ವಾ ಚಿನ್ತೇಸಿ – ‘‘ಭಾರಿಯಂ ವತಿಮೇಸಂ ಭಿಕ್ಖೂನಂ ಕಮ್ಮಂ ಆಸೀವಿಸಂ ಗೀವಾಯ ಗಣ್ಹನ್ತಾ ವಿಯ ಸಾಮಣೇರಂ ಗಣ್ಹನ್ತಿ, ನಾಸ್ಸ ಆನುಭಾವಂ ಜಾನನ್ತಿ, ಅಜ್ಜ ಮಯಾ ಸುಮನಸಾಮಣೇರಸ್ಸ ಗುಣಂ ಪಾಕಟಂ ಕಾತುಂ ವಟ್ಟತೀ’’ತಿ. ಥೇರೋಪಿ ಆಗನ್ತ್ವಾ ಸತ್ಥಾರಂ ವನ್ದಿತ್ವಾ ನಿಸೀದಿ. ಸತ್ಥಾ ತೇನ ಸದ್ಧಿಂ ಪಟಿಸನ್ಥಾರಂ ಕತ್ವಾ ಆನನ್ದತ್ಥೇರಂ ಆಮನ್ತೇಸಿ – ‘‘ಆನನ್ದ, ಅನೋತತ್ತಉದಕೇನಮ್ಹಿ ಪಾದೇ ಧೋವಿತುಕಾಮೋ, ಸಾಮಣೇರಾನಂ ಘಟಂ ದತ್ವಾ ಪಾನೀಯಂ ಆಹರಾಪೇಹೀ’’ತಿ. ಥೇರೋ ವಿಹಾರೇ ಪಞ್ಚಮತ್ತಾನಿ ಸಾಮಣೇರಸತಾನಿ ಸನ್ನಿಪಾತೇಸಿ. ತೇಸು ಸುಮನಸಾಮಣೇರೋ ಸಬ್ಬನವಕೋ ಅಹೋಸಿ. ಥೇರೋ ಸಬ್ಬಮಹಲ್ಲಕಂ ಸಾಮಣೇರಂ ಆಹ – ‘‘ಸಾಮಣೇರ, ಸತ್ಥಾ ಅನೋಕತ್ತದಹಉದಕೇನ ಪಾದೇ ಧೋವಿತುಕಾಮೋ, ಘಟಂ ಆದಾಯ ಗನ್ತ್ವಾ ಪಾನೀಯಂ ಆಹರಾ’’ತಿ. ಸೋ ‘‘ನ ಸಕ್ಕೋಮಿ, ಭನ್ತೇ’’ತಿ ನ ಇಚ್ಛಿ. ಥೇರೋ ಸೇಸೇಪಿ ಪಟಿಪಾಟಿಯಾ ಪುಚ್ಛಿ, ತೇಪಿ ತಥೇವ ವತ್ವಾ ಪಟಿಕ್ಖಿಪಿಂಸು. ‘‘ಕಿಂ ಪನೇತ್ಥ ಖೀಣಾಸವಸಾಮಣೇರಾ ನತ್ಥೀ’’ತಿ? ಅತ್ಥಿ, ತೇ ಪನ ‘‘ನಾಯಂ ಅಮ್ಹಾಕಂ ಬದ್ಧೋ ಮಾಲಾಪುಟೋ, ಸುಮನಸಾಮಣೇರಸ್ಸೇವ ಬದ್ಧೋ’’ತಿ ನ ಇಚ್ಛಿಂಸು, ಪುಥುಜ್ಜನಾ ಪನ ಅತ್ತನೋ ಅಸಮತ್ಥತಾಯೇವ ನ ಇಚ್ಛಿಂಸು. ಪರಿಯೋಸಾನೇ ಪನ ಸುಮನಸ್ಸ ವಾರೇ ಸಮ್ಪತ್ತೇ, ‘‘ಸಾಮಣೇರ, ಸತ್ಥಾ ಅನೋತತ್ತದಹಉದಕೇನ ಪಾದೇ ಧೋವಿತುಕಾಮೋ, ಕುಟಂ ಆದಾಯ ಕಿರ ಉದಕಂ ಆಹರಾ’’ತಿ ಆಹ. ಸೋ ‘‘ಸತ್ಥರಿ ಆಹರಾಪೇನ್ತೇ ಆಹರಿಸ್ಸಾಮೀ’’ತಿ ಸತ್ಥಾರಂ ವನ್ದಿತ್ವಾ, ‘‘ಭನ್ತೇ, ಅನೋತತ್ತತೋ ಕಿರ ಮಂ ಉದಕಂ ಆಹಾರಾಪೇಥಾ’’ತಿ ಆಹ. ‘‘ಆಮ, ಸುಮನಾ’’ತಿ. ಸೋ ವಿಸಾಖಾಯ ಕಾರಿತೇಸು ಘನಸುವಣ್ಣಕೋಟ್ಟಿಮೇಸು ಸೇನಾಸನಕುಟೇಸು ಏಕಂ ಸಟ್ಠಿಕುಟಉದಕಗಣ್ಹನಕಂ ಮಹಾಘಟಂ ಹತ್ಥೇನ ಗಹೇತ್ವಾ ‘‘ಇಮಿನಾ ಮೇ ಉಕ್ಖಿಪಿತ್ವಾ ಅಂಸಕೂಟೇ ಠಪಿತೇನ ಅತ್ಥೋ ನತ್ಥೀ’’ತಿ ಓಲಮ್ಬಕಂ ಕತ್ವಾ ವೇಹಾಸಂ ಅಬ್ಭುಗ್ಗನ್ತ್ವಾ ಹಿಮವನ್ತಾಭಿಮುಖೋ ಪಕ್ಖನ್ದಿ.

ನಾಗರಾಜಾ ಸಾಮಣೇರಂ ದೂರತೋವ ಆಗಚ್ಛನ್ತಂ ದಿಸ್ವಾ ಪಚ್ಚುಗ್ಗನ್ತ್ವಾ ಕುಟಂ ಅಂಸಕೂಟೇನ ಆದಾಯ, ‘‘ಭನ್ತೇ, ತುಮ್ಹೇ ಮಾದಿಸೇ ದಾಸೇ ವಿಜ್ಜಮಾನೇ ಕಸ್ಮಾ ಸಯಂ ಆಗತಾ, ಉದಕೇನತ್ಥೇ ಸತಿ ಕಸ್ಮಾ ಸಾಸನಮತ್ತಮ್ಪಿ ನ ಪಹಿಣಥಾ’’ತಿ ಕುಟೇನ ಉದಕಂ ಆದಾಯ ಸಯಂ ಉಕ್ಖಿಪಿತ್ವಾ ‘‘ಪುರತೋ ಹೋಥ, ಭನ್ತೇ, ಅಹಮೇವ ಆಹರಿಸ್ಸಾಮೀ’’ತಿ ಆಹ. ‘‘ತಿಟ್ಠಥ ತುಮ್ಹೇ, ಮಹಾರಾಜ, ಅಹಮೇವ ಸಮ್ಮಾಸಮ್ಬುದ್ಧೇನ ಆಣತ್ತೋ’’ತಿ ನಾಗರಾಜಾನಂ ನಿವತ್ತಾಪೇತ್ವಾ ಕುಟಂ ಮುಖವಟ್ಟಿಯಂ ಹತ್ಥೇನ ಗಹೇತ್ವಾ ಆಕಾಸೇನಾಗಞ್ಛಿ. ಅಥ ನಂ ಸತ್ಥಾ ಆಗಚ್ಛನ್ತಂ ಓಲೋಕೇತ್ವಾ ಭಿಕ್ಖೂ ಆಮನ್ತೇಸಿ – ‘‘ಪಸ್ಸಥ, ಭಿಕ್ಖವೇ, ಸಾಮಣೇರಸ್ಸ ಲೀಲಂ, ಆಕಾಸೇ ಹಂಸರಾಜಾ ವಿಯ ಸೋಭತೀ’’ತಿ ಆಹ. ಸೋಪಿ ಪಾನೀಯಘಟಂ ಠಪೇತ್ವಾ ಸತ್ಥಾರಂ ವನ್ದಿತ್ವಾ ಅಟ್ಠಾಸಿ. ಅಥ ನಂ ಸತ್ಥಾ ಆಹ – ‘‘ಕತಿವಸ್ಸೋಸಿ ತ್ವಂ, ಸುಮನಾ’’ತಿ? ‘‘ಸತ್ತವಸ್ಸೋಮ್ಹಿ, ಭನ್ತೇತಿ. ‘‘ತೇನ ಹಿ, ಸುಮನ, ಅಜ್ಜ ಪಟ್ಠಾಯ ಭಿಕ್ಖು ಹೋಹೀ’’ತಿ ವತ್ವಾ ದಾಯಜ್ಜಉಪಸಮ್ಪದಂ ಅದಾಸಿ. ದ್ವೇಯೇವ ಕಿರ ಸಾಮಣೇರಾ ಸತ್ತವಸ್ಸಿಕಾ ಉಪಸಮ್ಪದಂ ಲಭಿಂಸು – ಅಯಞ್ಚ ಸುಮನೋ ಸೋಪಾಕೋ ಚಾತಿ.

ಏವಂ ತಸ್ಮಿಂ ಉಪಸಮ್ಪನ್ನೇ ಧಮ್ಮಸಭಾಯಂ ಕಥಂ ಸಮುಟ್ಠಾಪೇಸುಂ, ‘‘ಅಚ್ಛರಿಯಂ ಆವುಸೋ, ಏವರೂಪೋ ಹಿ ನಾಮ ದಹರಸಾಮಣೇರಸ್ಸ ಆನುಭಾವೋ ಹೋತಿ, ನ ನೋ ಇತೋ ಪುಬ್ಬೇ ಏವರೂಪೋ ಆನುಭಾವೋ ದಿಟ್ಠಪುಬ್ಬೋ’’ತಿ. ಸತ್ಥಾ ಆಗನ್ತ್ವಾ ‘‘ಕಾಯ ನುತ್ಥ, ಭಿಕ್ಖವೇ, ಏತರಹಿ ಕಥಾಯ ಸನ್ನಿಸಿನ್ನಾ’’ತಿ ಪುಚ್ಛಿತ್ವಾ ‘‘ಇಮಾಯ ನಾಮಾ’’ತಿ ವುತ್ತೇ, ‘‘ಭಿಕ್ಖವೇ, ಮಮ ಸಾಸನೇ ದಹರೋಪಿ ಸಮ್ಮಾ ಪಟಿಪನ್ನೋ ಏವರೂಪಂ ಸಮ್ಪತ್ತಿಂ ಲಭತಿಯೇವಾ’’ತಿ ವತ್ವಾ ಧಮ್ಮಂ ದೇಸೇನ್ತೋ ಇಮಂ ಗಾಥಮಾಹ –

೩೮೨. ‘‘ಯೋ ಹವೇ ದಹರೋ ಭಿಕ್ಖು, ಯುಞ್ಜತಿ ಬುದ್ಧಸಾಸನೇ;

ಸೋಮಂ ಲೋಕಂ ಪಭಾಸೇತಿ, ಅಬ್ಭಾ ಮುತ್ತೋವ ಚನ್ದಿಮಾ’’ತಿ.

ತತ್ಥ ಯುಞ್ಜತೀತಿ ಘಟತಿ ವಾಯಮತಿ. ಪಭಾಸೇತೀತಿ ಸೋ ಭಿಕ್ಖು ಅತ್ತನೋ ಅರಹತ್ತಮಗ್ಗಞಾಣೇನ ಅಬ್ಭಾದೀಹಿ ಮುತ್ತೋ ಚನ್ದಿಮಾ ವಿಯ ಲೋಕಂ ಖನ್ಧಾದಿಭೇದಂ ಲೋಕಂ ಓಭಾಸೇತಿ, ಏಕಾಲೋಕಂ ಕರೋತೀತಿ ಅತ್ಥೋ.

ದೇಸನಾವಸಾನೇ ಬಹೂ ಸೋತಾಪತ್ತಿಫಲಾದೀನಿ ಪಾಪುಣಿಂಸೂತಿ.

ಸುಮನಸಾಮಣೇರವತ್ಥು ದ್ವಾದಸಮಂ.

ಭಿಕ್ಖುವಗ್ಗವಣ್ಣನಾ ನಿಟ್ಠಿತಾ.

ಪಞ್ಚವೀಸತಿಮೋ ವಗ್ಗೋ.