೪. ಅನತ್ತಲಕ್ಖಣವತ್ಥು

ತತಿಯಗಾಥಾಯಪಿ ಏಸೇವ ನಯೋ. ಕೇವಲಞ್ಹಿ ಏತ್ಥ ಭಗವಾ ತೇಸಂ ಭಿಕ್ಖೂನಂ ಪುಬ್ಬೇ ಅನತ್ತಲಕ್ಖಣೇ ಅನುಯುತ್ತಭಾವಂ ಞತ್ವಾ, ‘‘ಭಿಕ್ಖವೇ, ಸಬ್ಬೇಪಿ ಖನ್ಧಾ ಅವಸವತ್ತನಟ್ಠೇನ ಅನತ್ತಾ ಏವಾ’’ತಿ ವತ್ವಾ ಇಮಂ ಗಾಥಮಾಹ –

೨೭೯. ‘‘ಸಬ್ಬೇ ಧಮ್ಮಾ ಅನತ್ತಾತಿ, ಯದಾ ಪಞ್ಞಾಯ ಪಸ್ಸತಿ;

ಅಥ ನಿಬ್ಬಿನ್ದತಿ ದುಕ್ಖೇ, ಏಸ ಮಗ್ಗೋ ವಿಸುದ್ಧಿಯಾ’’ತಿ.

ತತ್ಥ ಸಬ್ಬೇ ಧಮ್ಮಾತಿ ಪಞ್ಚಕ್ಖನ್ಧಾ ಏವ ಅಧಿಪ್ಪೇತಾ. ಅನತ್ತಾತಿ ‘‘ಮಾ ಜೀಯನ್ತು ಮಾ ಮೀಯನ್ತೂ’’ತಿ ವಸೇ ವತ್ತೇತುಂ ನ ಸಕ್ಕಾತಿ ಅವಸವತ್ತನಟ್ಠೇನ ಅನತ್ತಾ ಅತ್ತಸುಞ್ಞಾ ಅಸ್ಸಾಮಿಕಾ ಅನಿಸ್ಸರಾತಿ ಅತ್ಥೋ. ಸೇಸಂ ಪುರಿಮಸದಿಸಮೇವಾತಿ.

ಅನತ್ತಲಕ್ಖಣವತ್ಥು ಚತುತ್ಥಂ.