೮. ಛಬ್ಬಗ್ಗಿಯವತ್ಥು

ಕಾಯಪ್ಪಕೋಪನ್ತಿ ಇಮಂ ಧಮ್ಮದೇಸನಂ ಸತ್ಥಾ ವೇಳುವನೇ ವಿಹರನ್ತೋ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಕಥೇಸಿ.

ಏಕದಿವಸಞ್ಹಿ ಸತ್ಥಾ ವೇಳುವನೇ ವಿಹರನ್ತೋ ತೇಸಂ ಛಬ್ಬಗ್ಗಿಯಾನಂ ಉಭೋಹಿ ಹತ್ಥೇಹಿ ಯಟ್ಠಿಯೋ ಗಹೇತ್ವಾ ಕಟ್ಠಪಾದುಕಾ ಆರುಯ್ಹ ಪಿಟ್ಠಿಪಾಸಾಣೇ ಚಙ್ಕಮನ್ತಾನಂ ಖಟಖಟಾತಿಸದ್ದಂ ಸುತ್ವಾ, ‘‘ಆನನ್ದ, ಕಿಂ ಸದ್ದೋ ನಾಮೇಸೋ’’ತಿ ಪುಚ್ಛಿತ್ವಾ ‘‘ಛಬ್ಬಗ್ಗಿಯಾನಂ ಪಾದುಕಾ ಆರುಯ್ಹ ಚಙ್ಕಮನ್ತಾನಂ ಖಟಖಟಸದ್ದೋ’’ತಿ ಸುತ್ವಾ ಸಿಕ್ಖಾಪದಂ ಪಞ್ಞಾಪೇತ್ವಾ ‘‘ಭಿಕ್ಖುನಾ ನಾಮ ಕಾಯಾದೀನಿ ರಕ್ಖಿತುಂ ವಟ್ಟತೀ’’ತಿ ವತ್ವಾ ಧಮ್ಮಂ ದೇಸೇನ್ತೋ ಇಮಾ ಗಾಥಾ ಅಭಾಸಿ –

೨೩೧. ‘‘ಕಾಯಪ್ಪಕೋಪಂ ರಕ್ಖೇಯ್ಯ, ಕಾಯೇನ ಸಂವುತೋ ಸಿಯಾ;

ಕಾಯದುಚ್ಚರಿತಂ ಹಿತ್ವಾ, ಕಾಯೇನ ಸುಚರಿತಂ ಚರೇ.

೨೩೨. ‘‘ವಚೀಪಕೋಪಂ ರಕ್ಖೇಯ್ಯ, ವಾಚಾಯ ಸಂವುತೋ ಸಿಯಾ;

ವಚೀದುಚ್ಚರಿತಂ ಹಿತ್ವಾ, ವಾಚಾಯ ಸುಚರಿತಂ ಚರೇ.

೨೩೩. ‘‘ಮನೋಪಕೋಪಂ ರಕ್ಖೇಯ್ಯ, ಮನಸಾ ಸಂವುತೋ ಸಿಯಾ;

ಮನೋದುಚ್ಚರಿತಂ ಹಿತ್ವಾ, ಮನಸಾ ಸುಚರಿತಂ ಚರೇ.

೨೩೪. ‘‘ಕಾಯೇನ ಸಂವುತಾ ಧೀರಾ, ಅಥೋ ವಾಚಾಯ ಸಂವುತಾ;

ಮನಸಾ ಸಂವುತಾ ಧೀರಾ, ತೇ ವೇ ಸುಪರಿಸಂವುತಾ’’ತಿ.

ತತ್ಥ ಕಾಯಪ್ಪಕೋಪನ್ತಿ ತಿವಿಧಂ ಕಾಯದುಚ್ಚರಿತಂ ರಕ್ಖೇಯ್ಯ. ಕಾಯೇನ ಸಂವುತೋತಿ ಕಾಯದ್ವಾರೇ ದುಚ್ಚರಿತಪವೇಸನಂ ನಿವಾರೇತ್ವಾ ಸಂವುತೋ ಪಿಹಿತದ್ವಾರೋ ಸಿಯಾ. ಯಸ್ಮಾ ಪನ ಕಾಯದುಚ್ಚರಿತಂ ಹಿತ್ವಾ ಕಾಯಸುಚರಿತಂ ಚರನ್ತೋ ಉಭಯಮ್ಪೇತಂ ಕರೋತಿ, ತಸ್ಮಾ ಕಾಯದುಚ್ಚರಿತಂ ಹಿತ್ವಾ, ಕಾಯೇನ ಸುಚರಿತಂ ಚರೇತಿ ವುತ್ತಂ. ಅನನ್ತರಗಾಥಾಸುಪಿ ಏಸೇವ ನಯೋ. ಕಾಯೇನ ಸಂವುತಾ ಧೀರಾತಿ ಯೇ ಪಣ್ಡಿತಾ ಪಾಣಾತಿಪಾತಾದೀನಿ ಅಕರೋನ್ತಾ ಕಾಯೇನ, ಮುಸಾವಾದಾದೀನಿ ಅಕರೋನ್ತಾ ವಾಚಾಯ, ಅಭಿಜ್ಝಾದೀನಿ ಅಸಮುಟ್ಠಪೇನ್ತಾ ಮನಸಾ ಸಂವುತಾ, ತೇ ಇಧ ಲೋಕಸ್ಮಿಂ ಸುಸಂವುತಾ ಸುರಕ್ಖಿತಾ ಸುಗೋಪಿತಾ ಸುಪಿಹಿತದ್ವಾರಾತಿ ಅತ್ಥೋ.

ದೇಸನಾವಸಾನೇ ಬಹೂ ಸೋತಾಪತ್ತಿಫಲಾದೀನಿ ಪಾಪುಣಿಂಸೂತಿ.

ಛಬ್ಬಗ್ಗಿಯವತ್ಥು ಅಟ್ಠಮಂ.

ಕೋಧವಗ್ಗವಣ್ಣನಾ ನಿಟ್ಠಿತಾ.

ಸತ್ತರಸಮೋ ವಗ್ಗೋ.