೪. ಮಹಾಮೋಗ್ಗಲ್ಲಾನತ್ಥೇರಪಞ್ಹವತ್ಥು

ಸಚ್ಚಂ ಭಣೇತಿ ಇಮಂ ಧಮ್ಮದೇಸನಂ ಸತ್ಥಾ ಜೇತವನೇ ವಿಹರನ್ತೋ ಮಹಾಮೋಗ್ಗಲ್ಲಾನತ್ಥೇರಸ್ಸ ಪಞ್ಹಂ ಆರಬ್ಭ ಕಥೇಸಿ.

ಏಕಸ್ಮಿಞ್ಹಿ ಸಮಯೇ ಥೇರೋ ದೇವಚಾರಿಕಂ ಗನ್ತ್ವಾ ಮಹೇಸಕ್ಖಾಯ ದೇವತಾಯ ವಿಮಾನದ್ವಾರೇ ಠತ್ವಾ ತಂ ಅತ್ತನೋ ಸನ್ತಿಕಂ ಆಗನ್ತ್ವಾ ವನ್ದಿತ್ವಾ ಠಿತಂ ಏವಮಾಹ – ‘‘ದೇವತೇ ಮಹತೀ ತೇ ಸಮ್ಪತ್ತಿ, ಕಿಂ ಕಮ್ಮಂ ಕತ್ವಾ ಇಮಂ ಅಲತ್ಥಾ’’ತಿ? ‘‘ಮಾ ಮಂ, ಭನ್ತೇ, ಪುಚ್ಛಥಾ’’ತಿ. ದೇವತಾ ಕಿರ ಅತ್ತನೋ ಪರಿತ್ತಕಮ್ಮೇನ ಲಜ್ಜಮಾನಾ ಏವಂ ವದತಿ. ಸಾ ಪನ ಥೇರೇನ ‘‘ಕಥೇಹಿಯೇವಾ’’ತಿ ವುಚ್ಚಮಾನಾ ಆಹ – ‘‘ಭನ್ತೇ, ಮಯಾ ನೇವ ದಾನಂ ದಿನ್ನಂ, ನ ಪೂಜಾ ಕತಾ, ನ ಧಮ್ಮೋ ಸುತೋ, ಕೇವಲಂ ಸಚ್ಚಮತ್ತಂ ರಕ್ಖಿತ’’ನ್ತಿ. ಥೇರೋ ಅಞ್ಞಾನಿ ವಿಮಾನದ್ವಾರಾನಿ ಗನ್ತ್ವಾ ಆಗತಾಗತಾ ಅಪರಾಪಿ ದೇವಧೀತರೋ ಪುಚ್ಛಿ. ತಾಸುಪಿ ತಥೇವ ನಿಗುಹಿತ್ವಾ ಥೇರಂ ಪಟಿಬಾಹಿತುಂ ಅಸಕ್ಕೋನ್ತೀಸು ಏಕಾ ತಾವ ಆಹ – ‘‘ಭನ್ತೇ, ಮಯಾ ನೇವ ದಾನಾದೀಸು ಕತಂ ನಾಮ ಅತ್ಥಿ, ಅಹಂ ಪನ ಕಸ್ಸಪಬುದ್ಧಕಾಲೇ ಪರಸ್ಸ ದಾಸೀ ಅಹೋಸಿಂ, ತಸ್ಸಾ ಮೇ ಸಾಮಿಕೋ ಅತಿವಿಯ ಚಣ್ಡೋ ಫರುಸೋ, ಗಹಿತಗ್ಗಹಿತೇನೇವ ಕಟ್ಠೇನ ವಾ ಕಲಿಙ್ಗರೇನ ವಾ ಸೀಸಂ ಭಿನ್ದತಿ. ಸಾಹಂ ಉಪ್ಪನ್ನೇ ಕೋಪೇ ‘ಏಸ ತವ ಸಾಮಿಕೋ ಲಕ್ಖಣಾಹತಂ ವಾ ಕಾತುಂ ನಾಸಾದೀನಿ ವಾ ಛಿನ್ದಿತುಂ ಇಸ್ಸರೋ, ಮಾ ಕುಜ್ಝೀ’ತಿ ಅತ್ತಾನಮೇವ ಪರಿಭಾಸೇತ್ವಾ ಕೋಪಂ ನಾಮ ನ ಅಕಾಸಿಂ, ತೇನ ಮೇ ಅಯಂ ಸಮ್ಪತ್ತಿ ಲದ್ಧಾ’’ತಿ. ಅಪರಾ ಆಹ – ‘‘ಅಹಂ, ಭನ್ತೇ, ಉಚ್ಛುಖೇತ್ತಂ ರಕ್ಖಮಾನಾ ಏಕಸ್ಸ ಭಿಕ್ಖುನೋ ಉಚ್ಛುಯಟ್ಠಿಂ ಅದಾಸಿಂ’’. ಅಪರಾ ಏಕಂ ತಿಮ್ಬರುಸಕಂ ಅದಾಸಿಂ. ಅಪರಾ ಏಕಂ ಏಳಾಲುಕಂ ಅದಾಸಿಂ. ಅಪರಾ ಏಕಂ ಫಾರುಸಕಂ ಅದಾಸಿಂ. ಅಪರಾ ಏಕಂ ಮೂಲಮುಟ್ಠಿಂ. ಅಪರಾ ‘‘ನಿಮ್ಬಮುಟ್ಠಿ’’ನ್ತಿಆದಿನಾ ನಯೇನ ಅತ್ತನಾ ಅತ್ತನಾ ಕತಂ ಪರಿತ್ತದಾನಂ ಆರೋಚೇತ್ವಾ ‘‘ಇಮಿನಾ ಇಮಿನಾ ಕಾರಣೇನ ಅಮ್ಹೇಹಿ ಅಯಂ ಸಮ್ಪತ್ತಿ ಲದ್ಧಾ’’ತಿ ಆಹಂಸು.

ಥೇರೋ ತಾಹಿ ಕತಕಮ್ಮಂ ಸುತ್ವಾ ಸತ್ಥಾರಂ ಉಪಸಙ್ಕಮಿತ್ವಾ ಪುಚ್ಛಿ – ‘‘ಸಕ್ಕಾ ನು ಖೋ, ಭನ್ತೇ, ಸಚ್ಚಕಥನಮತ್ತೇನ, ಕೋಪನಿಬ್ಬಾಪನಮತ್ತೇನ, ಅತಿಪರಿತ್ತಕೇನ ತಿಮ್ಬರುಸಕಾದಿದಾನಮತ್ತೇನ ದಿಬ್ಬಸಮ್ಪತ್ತಿಂ ಲದ್ಧು’’ನ್ತಿ. ‘‘ಕಸ್ಮಾ ಮಂ, ಮೋಗ್ಗಲ್ಲಾನ, ಪುಚ್ಛಸಿ, ನನು ತೇ ದೇವತಾಹಿ ಅಯಂ ಅತ್ಥೋ ಕಥಿತೋ’’ತಿ? ‘‘ಆಮ, ಭನ್ತೇ, ಲಬ್ಭತಿ ಮಞ್ಞೇ ಏತ್ತಕೇನ ದಿಬ್ಬಸಮ್ಪತ್ತೀ’’ತಿ. ಅಥ ನಂ ಸತ್ಥಾ ‘‘ಮೋಗ್ಗಲ್ಲಾನ, ಸಚ್ಚಮತ್ತಂ ಕಥೇತ್ವಾಪಿ ಕೋಪಮತ್ತಂ ಜಹಿತ್ವಾಪಿ ಪರಿತ್ತಕಂ ದಾನಂ ದತ್ವಾಪಿ ದೇವಲೋಕಂ ಗಚ್ಛತಿಯೇವಾ’’ತಿ ವತ್ವಾ ಇಮಂ ಗಾಥಮಾಹ –

೨೨೪. ‘‘ಸಚ್ಚಂ ಭಣೇ ನ ಕುಜ್ಝೇಯ್ಯ, ದಜ್ಜಾ ಅಪ್ಪಮ್ಪಿ ಯಾಚಿತೋ;

ಏತೇಹಿ ತೀಹಿ ಠಾನೇಹಿ, ಗಚ್ಛೇ ದೇವಾನ ಸನ್ತಿಕೇ’’ತಿ.

ತತ್ಥ ಸಚ್ಚಂ ಭಣೇತಿ ಸಚ್ಚಂ ದೀಪೇಯ್ಯ ವೋಹರೇಯ್ಯ, ಸಚ್ಚೇ ಪತಿಟ್ಠಹೇಯ್ಯಾತಿ ಅತ್ಥೋ. ನ ಕುಜ್ಝೇಯ್ಯಾತಿ ಪರಸ್ಸ ನ ಕುಜ್ಝೇಯ್ಯ. ಯಾಚಿತೋತಿ ಯಾಚಕಾ ನಾಮ ಸೀಲವನ್ತೋ ಪಬ್ಬಜಿತಾ. ತೇ ಹಿ ಕಿಞ್ಚಾಪಿ ‘‘ದೇಥಾ’’ತಿ ಅಯಾಚಿತ್ವಾವ ಘರದ್ವಾರೇ ತಿಟ್ಠನ್ತಿ, ಅತ್ಥತೋ ಪನ ಯಾಚನ್ತಿಯೇವ ನಾಮ. ಏವಂ ಸೀಲವನ್ತೇಹಿ ಯಾಚಿತೋ ಅಪ್ಪಸ್ಮಿಂ ದೇಯ್ಯಧಮ್ಮೇ ವಿಜ್ಜಮಾನೇ ಅಪ್ಪಮತ್ತಕಮ್ಪಿ ದದೇಯ್ಯ. ಏತೇಹಿ ತೀಹೀತಿ ಏತೇಸು ತೀಸು ಏಕೇನಾಪಿ ಕಾರಣೇನ ದೇವಲೋಕಂ ಗಚ್ಛೇಯ್ಯಾತಿ ಅತ್ಥೋ.

ದೇಸನಾವಸಾನೇ ಬಹೂ ಸೋತಾಪತ್ತಿಫಲಾದೀನಿ ಪಾಪುಣಿಂಸೂತಿ.

ಮಹಾಮೋಗ್ಗಲ್ಲಾನತ್ಥೇರಪಞ್ಹವತ್ಥು ಚತುತ್ಥಂ.