೮. ತಿಂಸಭಿಕ್ಖುವತ್ಥು

ಹಂಸಾದಿಚ್ಚಪಥೇತಿ ಇಮಂ ಧಮ್ಮದೇಸನಂ ಸತ್ಥಾ ಜೇತವನೇ ವಿಹರನ್ತೋ ತಿಂಸ ಭಿಕ್ಖೂ ಆರಬ್ಭ ಕಥೇಸಿ.

ಏಕಸ್ಮಿಞ್ಹಿ ದಿವಸೇ ತಿಂಸಮತ್ತಾ ದಿಸಾವಾಸಿಕಾ ಭಿಕ್ಖೂ ಸತ್ಥಾರಂ ಉಪಸಙ್ಕಮಿಂಸು. ಆನನ್ದತ್ಥೇರೋ ಸತ್ಥು ವತ್ತಕರಣವೇಲಾಯ ಆಗನ್ತ್ವಾ ತೇ ಭಿಕ್ಖೂ ದಿಸ್ವಾ ‘‘ಸತ್ಥಾರಾ ಇಮೇಹಿ ಸದ್ಧಿಂ ಪಟಿಸನ್ಥಾರೇ ಕತೇ ವತ್ತಂ ಕರಿಸ್ಸಾಮೀ’’ತಿ ದ್ವಾರಕೋಟ್ಠಕೇ ಅಟ್ಠಾಸಿ. ಸತ್ಥಾಪಿ ತೇಹಿ ಸದ್ಧಿಂ ಪಟಿಸನ್ಥಾರಂ ಕತ್ವಾ ತೇಸಂ ಸಾರಣೀಯಧಮ್ಮಂ ಕಥೇಸಿ. ತಂ ಸುತ್ವಾ ತೇ ಸಬ್ಬೇಪಿ ಅರಹತ್ತಂ ಪತ್ವಾ ಉಪ್ಪತಿತ್ವಾ ಆಕಾಸೇನ ಅಗಮಿಂಸು. ಆನನ್ದತ್ಥೇರೋ ತೇಸು ಚಿರಾಯನ್ತೇಸು ಸತ್ಥಾರಂ ಉಪಸಙ್ಕಮಿತ್ವಾ, ‘‘ಭನ್ತೇ, ಇದಾನೇವ ತಿಂಸಮತ್ತಾ ಭಿಕ್ಖೂ ಆಗತಾ, ತೇ ಕುಹಿ’’ನ್ತಿ ಪುಚ್ಛಿ. ‘‘ಗತಾ, ಆನನ್ದಾ’’ತಿ. ‘‘ಕತರೇನ ಮಗ್ಗೇನ, ಭನ್ತೇ’’ತಿ? ‘‘ಆಕಾಸೇನಾನನ್ದಾ’’ತಿ. ‘‘ಕಿಂ ಪನ ತೇ, ಭನ್ತೇ, ಖೀಣಾಸವಾ’’ತಿ? ‘‘ಆಮಾನನ್ದ, ಮಮ ಸನ್ತಿಕೇ ಧಮ್ಮಂ ಸುತ್ವಾ ಅರಹತ್ತಂ ಪತ್ತಾ’’ತಿ. ತಸ್ಮಿಂ ಪನ ಖಣೇ ಆಕಾಸೇನ ಹಂಸಾ ಆಗಮಿಂಸು. ಸತ್ಥಾ ‘‘ಯಸ್ಸ ಖೋ ಪನಾನನ್ದ, ಚತ್ತಾರೋ ಇದ್ಧಿಪಾದಾ ಸುಭಾವಿತಾ, ಸೋ ಹಂಸಾ ವಿಯ ಆಕಾಸೇನ ಗಚ್ಛತೀ’’ತಿ ವತ್ವಾ ಇಮಂ ಗಾಥಮಾಹ –

೧೭೫. ‘‘ಹಂಸಾದಿಚ್ಚಪಥೇ ಯನ್ತಿ, ಆಕಾಸೇ ಯನ್ತಿ ಇದ್ಧಿಯಾ;

ನೀಯನ್ತಿ ಧೀರಾ ಲೋಕಮ್ಹಾ, ಜೇತ್ವಾ ಮಾರಂ ಸವಾಹಿನಿ’’ನ್ತಿ.

ತಸ್ಸತ್ಥೋ – ಇಮೇ ಹಂಸಾ ಆದಿಚ್ಚಪಥೇ ಆಕಾಸೇ ಗಚ್ಛನ್ತಿ. ಯೇಸಂ ಇದ್ಧಿಪಾದಾ ಸುಭಾವಿತಾ, ತೇಪಿ ಆಕಾಸೇ ಯನ್ತಿ ಇದ್ಧಿಯಾ. ಧೀರಾ ಪಣ್ಡಿತಾ ಸವಾಹಿನಿಂ ಮಾರಂ ಜೇತ್ವಾ ಇಮಮ್ಹಾ ವಟ್ಟಲೋಕಾ ನೀಯನ್ತಿ, ನಿಬ್ಬಾನಂ ಪಾಪುಣನ್ತೀತಿ ಅತ್ಥೋ.

ದೇಸನಾವಸಾನೇ ಬಹೂ ಸೋತಾಪತ್ತಿಫಲಾದೀನಿ ಪಾಪುಣಿಂಸೂತಿ.

ತಿಂಸಭಿಕ್ಖುವತ್ಥು ಅಟ್ಠಮಂ.