೩. ಪಞ್ಚಸತವಿಪಸ್ಸಕಭಿಕ್ಖುವತ್ಥು

ಯಥಾ ಪುಬ್ಬುಳಕನ್ತಿ ಇಮಂ ಧಮ್ಮದೇಸನಂ ಸತ್ಥಾ ಜೇತವನೇ ವಿಹರನ್ತೋ ಪಞ್ಚಸತೇ ವಿಪಸ್ಸಕೇ ಭಿಕ್ಖೂ ಆರಬ್ಭ ಕಥೇಸಿ.

ತೇ ಕಿರ ಸತ್ಥು ಸನ್ತಿಕೇ ಕಮ್ಮಟ್ಠಾನಂ ಗಹೇತ್ವಾ ಅರಞ್ಞಂ ಪವಿಸಿತ್ವಾ ಘಟೇನ್ತಾ ವಾಯಮನ್ತಾ ಅಪ್ಪವಿಸೇಸಾ ‘‘ವಿಸೇಸೇತ್ವಾ ಕಮ್ಮಟ್ಠಾನಂ ಗಹೇಸ್ಸಾಮಾ’’ತಿ ಸತ್ಥು ಸನ್ತಿಕಂ ಆಗಚ್ಛನ್ತಾ ಅನ್ತರಾಮಗ್ಗೇ ಮರೀಚಿಕಮ್ಮಟ್ಠಾನಂ ಭಾವೇನ್ತಾವ ಆಗಮಿಂಸು. ತೇಸಂ ವಿಹಾರಂ ಪವಿಟ್ಠಕ್ಖಣೇಯೇವ ದೇವೋ ವಸ್ಸಿ. ತೇ ತತ್ಥ ತತ್ಥ ಪಮುಖೇಸು ಠತ್ವಾ ಧಾರಾವೇಗೇನ ಉಟ್ಠಹಿತ್ವಾ ಭಿಜ್ಜನ್ತೇ ಪುಬ್ಬಳಕೇ ದಿಸ್ವಾ ‘‘ಅಯಮ್ಪಿ ಅತ್ತಭಾವೋ ಉಪ್ಪಜ್ಜಿತ್ವಾ ಭಿಜ್ಜನತ್ಥೇನ ಪುಬ್ಬುಳಕಸದಿಸೋಯೇವಾ’’ತಿ ಆರಮ್ಮಣಂ ಗಣ್ಹಿಂಸು. ಸತ್ಥಾ ಗನ್ಧಕುಟಿಯಂ ನಿಸಿನ್ನೋವ ತೇ ಭಿಕ್ಖೂ ಓಲೋಕೇತ್ವಾ ತೇಹಿ ಸದ್ಧಿಂ ಕಥೇನ್ತೋ ವಿಯ ಓಭಾಸಂ ಫರಿತ್ವಾ ಇಮಂ ಗಾಥಮಾಹ –

೧೭೦. ‘‘ಯಥಾ ಪುಬ್ಬುಳಕಂ ಪಸ್ಸೇ, ಯಥಾ ಪಸ್ಸೇ ಮರೀಚಿಕಂ;

ಏವಂ ಲೋಕಂ ಅವೇಕ್ಖನ್ತಂ, ಮಚ್ಚುರಾಜಾ ನ ಪಸ್ಸತೀ’’ತಿ.

ತತ್ಥ ಮರೀಚಿಕನ್ತಿ ಮಯೂಖಂ. ತೇ ಹಿ ದೂರತೋವ ಗೇಹಸಣ್ಠಾನಾದಿವಸೇನ ಉಪಟ್ಠಿತಾಪಿ ಉಪಗಚ್ಛನ್ತಾನಂ ಅಗಯ್ಹೂಪಗಾ ರಿತ್ತಕಾ ತುಚ್ಛಕಾವ. ತಸ್ಮಾ ಯಥಾ ಉಪ್ಪಜ್ಜಿತ್ವಾ ಭಿಜ್ಜನತ್ಥೇನ ಪುಬ್ಬುಳಕಂ ರಿತ್ತತುಚ್ಛಾದಿಭಾವೇನೇವ ಪಸ್ಸೇಯ್ಯ, ಏವಂ ಖನ್ಧಾದಿಲೋಕಂ ಅವೇಕ್ಖನ್ತಂ ಮಚ್ಚುರಾಜಾ ನ ಪಸ್ಸತೀತಿ ಅತ್ಥೋ.

ದೇಸನಾವಸಾನೇ ತೇ ಭಿಕ್ಖೂ ಠಿತಟ್ಠಾನೇಯೇವ ಅರಹತ್ತಂ ಪಾಪುಣಿಂಸೂತಿ.

ಪಞ್ಚಸತವಿಪಸ್ಸಕಭಿಕ್ಖುವತ್ಥು ತತಿಯಂ.