೮. ವಿಸಾಖಸುತ್ತವಣ್ಣನಾ

೪೮. ಅಟ್ಠಮೇ ಪಞ್ಚಾಲಪುತ್ತೋತಿ ಪಞ್ಚಾಲಬ್ರಾಹ್ಮಣಿಯಾ ಪುತ್ತೋ. ಪೋರಿಯಾ ವಾಚಾಯಾತಿ ಪರಿಪುಣ್ಣವಾಚಾಯ. ವಿಸ್ಸಟ್ಠಾಯಾತಿ ಅಪಲಿಬುದ್ಧಾಯ. ಅನೇಲಗಲಾಯಾತಿ ನಿದ್ದೋಸಾಯ ಚೇವ ಅಗಳಿತಾಯ ಚ ಅಪತಿತಪದಬ್ಯಞ್ಜನಾಯ. ಪರಿಯಾಪನ್ನಾಯಾತಿ ವಿವಟ್ಟಪರಿಯಾಪನ್ನಾಯ. ಅನಿಸ್ಸಿತಾಯಾತಿ ವಟ್ಟಂ ಅನಿಸ್ಸಿತಾಯ. ವಿವಟ್ಟನಿಸ್ಸಿತಮೇವ ಕತ್ವಾ ಕಥೇತಿ, ವಟ್ಟನಿಸ್ಸಿತಂ ಕತ್ವಾ ನ ಕಥೇತೀತಿ ಅಯಮೇತ್ಥ ಅಧಿಪ್ಪಾಯೋ.

ನಾಭಾಸಮಾನನ್ತಿ ನ ಅಕಥೇನ್ತಂ. ಅಮತಂ ಪದನ್ತಿ ನಿಬ್ಬಾನಪದಂ. ಭಾಸಯೇತಿ ಓಭಾಸೇಯ್ಯ. ಜೋತಯೇತಿ ತಸ್ಸೇವ ವೇವಚನಂ. ಪಗ್ಗಣ್ಹೇ ಇಸಿನಂ ಧಜನ್ತಿ ಅಬ್ಭುಗ್ಗತಟ್ಠೇನ ನವಲೋಕುತ್ತರಧಮ್ಮೋ ಇಸೀನಂ ಧಜೋ ನಾಮ ವುಚ್ಚತಿ, ತಮೇವ ಪಗ್ಗಣ್ಹೇಯ್ಯ ಉಕ್ಖಿಪೇಯ್ಯ, ಉಚ್ಚಂ ಕತ್ವಾ ಕಥೇಯ್ಯಾತಿ ಅತ್ಥೋ. ನವಲೋಕುತ್ತರಧಮ್ಮದೀಪಕಂ ಸುಭಾಸಿತಂ ಧಜೋ ಏತೇಸನ್ತಿ ಸುಭಾಸಿತಧಜಾ. ಇಸಯೋತಿ ಬುದ್ಧಾದಯೋ ಅರಿಯಾ. ಧಮ್ಮೋ ಹಿ ಇಸಿನಂ ಧಜೋತಿ ಹೇಟ್ಠಾ ವುತ್ತನಯೇನೇವ ಲೋಕುತ್ತರಧಮ್ಮೋ ಇಸೀನಂ ಧಜೋ ನಾಮಾತಿ.