೬. ಕಟುವಿಯಸುತ್ತವಣ್ಣನಾ

೧೨೯. ಛಟ್ಠೇ ಗೋಯೋಗಪಿಲಕ್ಖಸ್ಮಿನ್ತಿ ಗಾವೀನಂ ವಿಕ್ಕಯಟ್ಠಾನೇ ಉಟ್ಠಿತಪಿಲಕ್ಖಸ್ಸ ಸನ್ತಿಕೇ. ರಿತ್ತಸ್ಸಾದನ್ತಿ ಝಾನಸುಖಾಭಾವೇನ ರಿತ್ತಸ್ಸಾದಂ. ಬಾಹಿರಸ್ಸಾದನ್ತಿ ಕಾಮಗುಣಸುಖವಸೇನ ಬಾಹಿರಸ್ಸಾದಂ. ಕಟುವಿಯನ್ತಿ ಉಚ್ಛಿಟ್ಠಂ. ಆಮಗನ್ಧೇನಾತಿ ಕೋಧಸಙ್ಖಾತೇನ ವಿಸ್ಸಗನ್ಧೇನ. ಅವಸ್ಸುತನ್ತಿ ತಿನ್ತಂ. ಮಕ್ಖಿಕಾತಿ ಕಿಲೇಸಮಕ್ಖಿಕಾ. ನಾನುಪತಿಸ್ಸನ್ತೀತಿ ಉಟ್ಠಾಯ ನ ಅನುಬನ್ಧಿಸ್ಸನ್ತಿ. ನಾನ್ವಾಸ್ಸವಿಸ್ಸನ್ತೀತಿ ಅನುಬನ್ಧಿತ್ವಾ ನ ಖಾದಿಸ್ಸನ್ತಿ. ಸಂವೇಗಮಾಪಾದೀತಿ ಸೋತಾಪನ್ನೋ ಜಾತೋ.

ಕಟುವಿಯಕತೋತಿ ಉಚ್ಛಿಟ್ಠಕತೋ. ಆರಕಾ ಹೋತೀತಿ ದೂರೇ ಹೋತಿ. ವಿಘಾತಸ್ಸೇವ ಭಾಗವಾತಿ ದುಕ್ಖಸ್ಸೇವ ಭಾಗೀ. ಚರೇತೀತಿ ಚರತಿ ಗಚ್ಛತಿ. ದುಮ್ಮೇಧೋತಿ ದುಪ್ಪಞ್ಞೋ. ಇಮಸ್ಮಿಂ ಸುತ್ತೇ ವಟ್ಟಮೇವ ಕಥಿತಂ, ಗಾಥಾಸು ವಟ್ಟವಿವಟ್ಟಂ ಕಥಿತನ್ತಿ. ಸತ್ತಮೇ ವಟ್ಟಮೇವ ಭಾಸಿತಂ.