೧೦. ದುತಿಯನಿದಾನಸುತ್ತವಣ್ಣನಾ

೧೧೩. ದಸಮೇ ಕಮ್ಮಾನನ್ತಿ ವಟ್ಟಗಾಮಿಕಮ್ಮಾನಮೇವ. ಛನ್ದರಾಗಟ್ಠಾನಿಯೇತಿ ಛನ್ದರಾಗಸ್ಸ ಕಾರಣಭೂತೇ. ಆರಬ್ಭಾತಿ ಆಗಮ್ಮ ಸನ್ಧಾಯ ಪಟಿಚ್ಚ. ಛನ್ದೋತಿ ತಣ್ಹಾಛನ್ದೋ. ಯೋ ಚೇತಸೋ ಸಾರಾಗೋತಿ ಯೋ ಚಿತ್ತಸ್ಸ ರಾಗೋ ರಜ್ಜನಾ ರಜ್ಜಿತತ್ತಂ, ಏತಮಹಂ ಸಂಯೋಜನಂ ವದಾಮಿ, ಬನ್ಧನಂ ವದಾಮೀತಿ ಅತ್ಥೋ. ಸುಕ್ಕಪಕ್ಖೇ ಕಮ್ಮಾನನ್ತಿ ವಿವಟ್ಟಗಾಮಿಕಮ್ಮಾನಂ. ತದಭಿನಿವತ್ತೇತೀತಿ ತಂ ಅಭಿನಿವತ್ತೇತಿ. ಯದಾ ವಾ ತೇನ ವಿಪಾಕೋ ಞಾತೋ ಹೋತಿ ವಿದಿತೋ, ತದಾ ತೇ ಚೇವ ಧಮ್ಮೇ ತಞ್ಚ ವಿಪಾಕಂ ಅಭಿನಿವತ್ತೇತಿ. ಇಮಿನಾ ಚ ಪದೇನ ವಿಪಸ್ಸನಾ ಕಥಿತಾ, ತದಭಿನಿವತ್ತೇತ್ವಾತಿ ಇಮಿನಾ ಮಗ್ಗೋ. ಚೇತಸಾ ಅಭಿನಿವಿಜ್ಝಿತ್ವಾತಿ ಇಮಿನಾ ಚ ಮಗ್ಗೋವ. ಪಞ್ಞಾಯ ಅತಿವಿಜ್ಝ ಪಸ್ಸತೀತಿ ಸಹ ವಿಪಸ್ಸನಾಯ ಮಗ್ಗಪಞ್ಞಾಯ ನಿಬ್ಬಿಜ್ಝಿತ್ವಾ ಪಸ್ಸತಿ. ಏವಂ ಸಬ್ಬತ್ಥ ಅತ್ಥೋ ವೇದಿತಬ್ಬೋ. ಇಮಸ್ಮಿಂ ಪನ ಸುತ್ತೇ ವಟ್ಟವಿವಟ್ಟಂ ಕಥಿತನ್ತಿ.

ಸಮ್ಬೋಧವಗ್ಗೋ ಪಠಮೋ.